2 AkwaKorinte 2
2
1Inene na ni i cikupura ci na ku na mi hungerithsa ko ku na mi korithsa ku micima karo. 2Inene ngeci naa mi korithsa ku micima, edye oyu nga o ni roerithsa ngeci kadi shime oyu ni na yuvithsa ku kora ku mucima? 3Na ñorire eci edi na ñorire ci ou na ku keya nga na ku na yuvithsiwa kukora ku mucima kowa a na roera ku ni roerithsa. Inene na rakwire ci ku kwenu mwahe, kuroera kwange po kuroera kwenu namwe mwahe. 4Inene na mi ñorerire ko ku kora nene ku mucima no thsorokoto no mihothzi thzothzingi. Kadi cingwa shime na fotire ku mi yuvithsa ku kora ku micima unone shime na fotire ku mi monithsa edi na mi shima nene.
Oyu nepithsa a teteriwe
5Uno honi ngeci kwaa di oyu naa reta kukora ku mucima, ame ka a ni korithsire nene ku mucima unone yamwe mwahe a na korithsa nene ku micima, eyo tumba ni i koño. 6Munu o kengeyo, humbithso ethzi na a piwa kwanu owangi thzi na mu kwana. 7Pano honi, mwaa roera ku mu tetera no ku mu hengawethza, ci katere a ku othziwe ku mathsiwa oakuru nene. 8Mweyo, naa mi adikanena ci mu mu monithse ketenda ci mwakwa ku mu shima.
9Eyo ngeyi na mi ñorerire ku mi ereka ku mona ci kenge nga mu shupwera eraerera yange ko kuyara. 10Yomuhe oyu mu na kwatera, name naa mu kwatera. Karo ngeci naa kwatera ethsi thsi na roera ku kwateriwa, naa tenda kengeyo pa meho a Krisitu mukaci kenu, 11ci Satana a twethsa ku tu nyanyamena. Inene tu na dimuka nawa esheteka yenthzi yoimango.
Kuothza mwa Krisitu
12Ou na ka kumine mu Toroasi ku ka honga Muthzimbu Ouwa wa Krisitu, na ka wanine ci Fumu naa ni yanthzurwera thsero. 13Uno honi ka na ka ciyarire nawa mukaci ko kuninga ci muenthzange Tite ka na ka mu waninemo. Mweyo, na wa thsiarithsirepo no ku thza ku Masedonia.
14Uno honi ku kandereriwe Nyambi, oyu na tu tangereranga thsikati thsothsihe mwa Krisitu mu kuothza no ku cikwathsithsa atwe ku kuwa odimukero wa Krisitu kokuhe, eci munuko ouwa. 15Inene yatwe twa munuko ouwa wa Krisitu kwa Nyambi mu kaci kowa a yoyithsiwa nowa a cithzira. 16Kwamweya po twa munuko ou u reta kufa, kwamweya po twa munuko ou u reta mwoyo. Edye o ku twethsa ku kwama enu yo kenge?
17Ka tu cipiturire nanu amweya awa a honga diywi dya Nyambi ko ku fota ku wanenapo. Unone atwe twaa di honga koshemwa nokoro wa Krisitu, ko kwikara awa naa tumu Nyambi ko ku dimuka ci Nyambi na tu tanekera.
Terpilih Sekarang Ini:
2 AkwaKorinte 2: mho
Highlight
Kongsi
Bandingkan
Salin
Ingin menyimpan sorotan merentas semua peranti anda? Mendaftar atau log masuk
©2023 The Seed Company