AkwaFilipi 1
1
Kuvumenena
1Yatwe twa Paulu na Timoti apika Krisitu Yesu. Twaa ñorera akwakutawa wahe o mu Filipi, awa di mwa Krisitu Yesu, mofoci kengeyo natangereri nangamba o kereke.
2Thsihemo no thsiyaro ikare nenu ku tunderera kwa Nyambi Tata wetu na Fumu Yesu Krisitu.
Okanderero no thsirombero
3Naa kandereranga Nyambi wange thsikati thsothsihe o ku ni mi vuruka ko ku mi romberera. 4Naa mi rombereranga thsikati thsothsihe, naa romberanga o ku ni na nyanyuka. 5Naa tendanga kengeyo, inene mwaa kwamena pofoci nange mu ku honga Muthzimbu Ouwa, ku tateka mu diyuwa dyo kutanga shime ku na kuma thsino thsikati. 6Ni na dimuka yoshemwa ci Nyambi oyu naa tateka eyi ekwama yoiwa ku kwenu, kenge a ku i manenena shime ku ka kuma mu diyuwa dya Krisitu Yesu.
7Kwaa ni roera ku ciyuva kengeyo mukaci kenu mwahe pakuninga ci mwahe mu mucima wange mu di thsikati thsothsihe! Inene mwaa ciera nange thsihemo thsa Nyambi, ikare o ku ni di mu kamenga nji o ku ni rwera Muthzimbu Ouwa. 8Nyambi na dimuka ci naa amba yoshemwa, no ku dimuka ci naa mi rura nene mwahe ko thsidirañeke thsa Krisitu Yesu.
9Naa rombera kwa Nyambi ci thsishimo thsenu thsi twarerere ku kura, mudimukero no mu kuyuvithsithsa enu yoihe, 10ci mu twethse ku tawethza yoiwa nene, ci nga mwikare owakenu no kupira kapongonyi mu diyuwa dya Krisitu. 11Mwoyo wenu u yare ima yowawa eyi i piwa ka Yesu Krisitu, ci Nyambi a piwe direma no kushangariwa.
Ku yoya po ka Krisitu
12Andengenu, naa fota ci mu dimuke ci eyi na i tendahara ku kwange na i kwathsa ku twara ku rupara Muthzimbu Ouwa. 13Mane nakwakunyunga marombe, namweya kengeyo na dimuka nawa ci shime na ni pakiwa mu kamenga pa kwikara mupika Krisitu. 14Pa kwikara kwange mu kamenga, aenthzetu akwakutawa owangi na tanara mu ku kurupera Fumu. Karo ondume wo na u kuru thsikati no thsikati ku honga diywi dya Nyambi ko kupira wowa.
15Ya shemwa ci amweya ku kwo aa honga ya Krisitu ko ku ni tendera mbamba, karo aa fota pohuma dikanyi. Uno honi amweya aa honga keyi yenthzi ko micima thzothzikenu. 16Awa honga ko micima thzothzikenu aa tenda kengeyo ko thsishimo, ko ku dimuka ci Nyambi naa ni pa ekwama yo ku rwera Muthzimbu Ouwa. 17Uno honi awa amba ya Krisitu koñondi, kadi ko micima thzothziwa, aa anekera ci aa ni paka mu dikando uno ni di mu kamenga. 18Kwithsa okaru! Ame po yaa ni nyanyukithsa ci wahe aa honga ya Krisitu, nji aa i honga ko dikuñwa dyo kwithsa nji dyo shemwa, micima thzo shaanga thzo thzikara thzothziwa nji thzothzimango. Karo mukaci keyi kenge na ku twarerera ku roera.
19Inene ni na dimuka ci kerombero yenu no ku kwathsiwa ku Mupepo ou a ni pa Yesu Krisitu, kenge na ku rukururiwa ku mahurerero. 20Naa taterera nene no ku kurupera mu mucima wange ci ka na ku fa honyi, unone kenge na kwikara nondume o ku yara pano eci ekati yoihe ku pa direma Krisitu mwirama yange, ikare o ku ni yoya nji o ku ni na fu. 21Inene ku kwange ku yoya po Krisitu, karo kufa po rukuru. 22Ngeci amepo ni henya ku yoya mu nyama, eyo ku kwange po ekwama eyi ya ku reta ima yoingi. Uno honi ne ine ni hangura? Ka ni dimuka. 23Apo honi ni na kwatiwa kwidi. Ame naa mona ci ku di nawa ku thsia uno mwoyo no ku ka ciwana na Krisitu. 24Uno honi mukaci kenu, naa mona ci ku di nawa ci nga naa twarerera ku yoya.
25Ko ku tawa shemwa eyi, naa dimuka ci kenge na ku yoya, karo kenge na ku twarerera kwikara nenu ku mi tanarithsa no ku mi retera thsinyanyu mu thsitawo. 26Honi ou na ku keya ku kwenu karo, kenge kwa ku nekara nethsi thso ku cishangarera nene shemwa mwa Krisitu Yesu mukaci keyi a kwama kange.
Mu yoye eci anu o mu wiru
27Uno honi thsothsikuru mu thsivaka po: Mu yoye ko mukarero ou u na enderera no Muthzimbu Ouwa wa Krisitu, ci shaanga yame ni keya ku na mi mona nji ku yuva pohuma keyi yenu o ku ni na piriko, ci nga ni yuve ci mu na tanara mu mupepo ofoci no ku rwera pofoci thsitawo thso Muthzimbu Ouwa. 28Mwa yapa akwethzimbo yenu, mu tanare micima. Ethsi po thsimonithso kukwo ci kenge a ku nongithsiwa, unone amwe kenge mwa ku yoyithsiwa, karo oko kuyoyithsiwa kwaa tunda kwa Nyambi. 29Inene na mu piwa mukaci ka Krisitu ci mwa tawa pohuma ku kwenthzi, unone karo mu mu nyandere. 30Mwikarupa yofoci tu di twahe. Mwa monine ekarupa yange edi na nyandithsiwire, karo na mu yuvu ci shimbi nekareramo.
Terpilih Sekarang Ini:
AkwaFilipi 1: mho
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
©2023 The Seed Company