AkwaRoma 12
12
Ku yoyera ku kwamena Nyambi mu mwoyo oupe
1Mweyo, andengenu, naa mi adikanena ko ñekeñeke thza Nyambi ci mu tupwere erama yenu kwa Nyambi kwikara thsiyambero thsothsiyumi, thsothsikenu, karo thso ku roerithsa Nyambi. Edi dyodiyo dikuñwa dyodiwa dyo ku rombera Nyambi. 2Mwa temununa mikarero thzo kano kaye, unone mu thsie Nyambi a mi pirure mu kaci, a pirure maano enu. Mbeci honi mwa ku twethse ku yuvithsithsa eshima ya Nyambi, ayo yoiwa, yo ku mu roerithsa, karo yo kwononoka.
3Inene ko thsihemo ethsi na ni piwa naa amba ku kwenu mwahe ci mwa anekera ci mwakuru mu thsivaka kupita edi mu di. Mwikare neanekera yo ku cihuthsa kushi. Munu no munu a cirature kopa thsi kuma thsitawo ethsi naa mu pa Nyambi. 4Dyodi i di erama yetu nepo yoingi, karo thsipo no thsipo thsi di nekwama yathso, 5dyo i di nerama ya Krisitu, shaanga ci twangi, twerama yofoci mwa Krisitu, twahe tu na nunganungiwa.
6Tu di nepa yo ku cithsiathsia kokuthza komu naa tu pera Nyambi ko thsihemo thsenthzi. Ngeci thsipa thsoe po kukethza, okethze kokuthza ko thsitawo thsoe. 7Ngeci thsipa thsoe po ku kwamena, o kwamene. Ngeci orongithsi, o rongithse omu ku na roera. 8Ngeci ku tanarithsa amweya micima, o tende kengeyo. Ngeci thsipa thsoe po kupa, o pe. Ngeci oendithsi, o endithse ko ku pakerako maano. Ngeci ku monithsa ñeke, o tende kengeyo ko thsinyanyu.
Emonithso yo Mukrisitu o shemwa
9Thsishimo thsenu thsikare thso shemwa. Mu thzimbe yoimango, karo mu tanarithse yoiwa. 10Mu cishime oandu eci edi a cishima oandu ana munu yofoci, mu ciremeke oandu mu kaci kenu. 11Mwa vapa, unone mu kwame nene no ku kwamena Fumu ko mucima wenu ouhe. 12Mu nyanyuke mukaci kokurupero wenu. Mu tanare micima mu makando, mu rombere ko muooto. 13Mu citapere naenthzenu akwakutawa eyi mu di nayo o kwa na piri, karo mu tambure nawa munu yomuhe.
14Mu rombe Nyambi ku fiyawera awa mi nyandithsa. Mwa wa kuta, unone mu rombe Nyambi ci a wa fiyawere. 15Mu nyanyuke nowa a na nyanyuka, mu dire nowa a dira. 16Mu yoye ko thsianekera thsofoci namweya. Mwa cinuneka, unone mu ambaure nowa a di kushi. Mwa cimona onyanyami.
17Mwa huthsera omango nomango. Mu mamere ci mwaa kwama enu eyi a na vara anu wahe ci iwa. 18Mu kwame momuhe omu mu na twethsera ci mu yoye ko thsiyaro nanu wahe. 19Ashimiwa ange, mwa huthsera omango, unone mu i thsiere oanthzi wa Nyambi, inene ku na ñoriwa ci: “Ditoto po dyange, kenge na ku wa kura,” Fumu aa amba. 20Karo ku na ñoriwa ci:
“Ngeci mukwathsithzimbo thsoe aa fa nthzara, o mu pe yo ku dya.
Ngeci aa fa dinotwa, o mu pe meyu o ku nwa.
Ko ku kwama kengeyo kenge wa ku rundumeka makara o mudiro o honyi pa mutwi wenthzi.”
21Mwa othziwa kumango, unone mu othze omango kowa.
Terpilih Sekarang Ini:
AkwaRoma 12: mho
Highlight
Kongsi
Bandingkan
Salin
Ingin menyimpan sorotan merentas semua peranti anda? Mendaftar atau log masuk
©2023 The Seed Company