San Juan 2
2
Nda̱sa Jesús tikuii ndu̱u rá vino nuu viko tíndaꞌa
1Kivi uni ndi̱xiyo iin viko tíndaꞌa ñuu Caná, estado Galilea, ta ndi̱xaa tu siꞌí Jesús va íyo yá nuu viko ikán. 2Saa tu mií va ra ka̱na na ra kuaꞌan ra nuu viko ikán xiꞌin nda ítaꞌan xiꞌin ra. 3Saa ndi̱ꞌi vino na, ta ndi̱kaꞌan siꞌí Jesús xiꞌin ra, káchi yá saa:
―Ndi̱ꞌi vino na, köo ka rá ―káchi yá xiꞌin ra.
4Saa ndi̱kuiin ra káꞌan ra:
―¿Nana, ndachu káꞌan un saa xiꞌin i? Ta täꞌan vi tindaa kivi ya xaa súvi i chiñu Ndioxi ―káchi ra xiꞌin yá.
5Saa ndi̱kaꞌan siꞌí ra xiꞌin na xíka ndítaꞌvi koꞌo nuu mesa ikán, káchi yá saa:
―Xaa súvi ndiꞌi ndo ya káꞌan ra xiꞌin ndo ―káchi yá xiꞌin na.
6Saa íyo iñu kisi yu̱ú naꞌnu yati nuu íyo Jesús, tá kuꞌva íyo tikuii xíniñuꞌu na judío saa íyo rá chi saa ini na ya xáa súvi na mií na tá kuꞌva káꞌan ley na. Ta iin iin kisi ikán náni kee kumi xiko án nda iin ciento litro tikuii ini ya. 7Saa ndi̱kaꞌan Jesús xiꞌin na xíka chiñu nuu na káꞌan viko ikán, káchi ra saa:
―Sikutu ndaa ndo tikuii ini kisi yóꞌó ―káchi ra xiꞌin na.
Saa si̱kutu ndaa na ya. 8Ñaa ndi̱kaꞌan tuku ra xiꞌin na, káchi ra saa:
―Tava ndo loꞌo rá taxi ndo ndaꞌa ra ndíso chiñu xiꞌin viko yóꞌó ―káchi ra.
Ta saa i̱kan na. 9Tá xi̱to ndoso ra ndíso chiñu xiꞌin viko ikán rá ta süvi ka tikuii ku rá, vino ndu̱u rá. Ta ra ikán ni köo xíni ra míí ke̱e rá, sundi na xíko koꞌo nuu mesa ta xíni vaꞌa va na míí ke̱e rá, chi mií na ta̱va tikuii si̱kutu na kisi ikán. Saa ka̱na ra mií ra tíndaꞌa ikán, 10ndi̱kaꞌan ra xiꞌin ra, káchi ra saa:
―Ndiꞌi naꞌa ta táxi na vino rá vaꞌa ni ndaꞌa na xáa nuu viko. Sindiꞌi tá xi̱ꞌi ni na ndi̱xini na, ta saa táva na nduta núú táxi na ndaꞌa na. Sundi yóꞌo̱ ta nda vitin chi̱vaꞌa un vino rá vaꞌa ni ―káchi ra xiꞌin ra.
11Yatuꞌun yóꞌó ku ya núnu̱ú i̱kan Jesús ñuu Caná, estado Galilea. Xaꞌa ya i̱kan ra ya yóꞌó ta si̱naꞌa ra naꞌa ya ndee ni ndee kúu mií ra. Ta ka̱ndixa ñaꞌa nda ítaꞌan xiꞌin ra.
12Sindiꞌi ikán ta ke̱e ra kuaꞌan ra chí ñuu Capernaum, kuaꞌan siꞌí ra tin ñani ra xiꞌin nda ítaꞌan xiꞌin ra, saa ndi̱xiyo na uvi ndaá kivi ñuu ikán.
Táva ndiꞌi Jesús ya väꞌa íyo yeꞌe veꞌe ñuꞌu kaꞌnu
(Mt. 21:12-13; Mr. 11:15-18; Lc. 19:45-46)
13Tá xa tindaa kivi kana viko pascua ya táva na judío ta ke̱e Jesús kuaꞌan ra viko ñuu Jerusalén. 14Tá ndi̱xaa ra yeꞌe veꞌe ñuꞌu kaꞌnu ikán, ta ndi̱taꞌan ra na xíko sindiki tin levo xiꞌin sata. Ta ndóo tu na náma xuꞌun va. 15Saa tá xi̱ni Jesús na, ta ti̱in ra yoꞌó. Ñaa ta̱va ndiꞌi ra na yeꞌe veꞌe ñuꞌu xiꞌin sindiki tin levo sana na. Ta na náma xuꞌun xa̱ta yava ra xuꞌun na, saa ka̱ta ndee ra mesa na nuu ñuꞌú. 16Ta na xíko sata ndi̱kaꞌan ra xiꞌin na, káchi ra saa:
―¡Tava ndo ri yóꞌó ná kana koo ri kuꞌun ri! ¡Ta ndäsa ndo veꞌe Iva i ndúu ya nuu yaꞌvi! ―káchi ra xiꞌin na.
17Saa ndi̱kaꞌán ini nda ítaꞌan xiꞌin ra xaꞌa tuꞌun Ndioxi ya ta̱a na xinaꞌa, ta ya ikán káchi ya saa: “Tá káa ñu̱ꞌu̱ ya ndee ni xáꞌmi ñaꞌa, saa káa ya ndóꞌo nima i xaꞌa ya ndee ni ndíꞌi ini i xíni i veꞌe un.” káchi ra.
18Saa ndi̱ndakan tuꞌun nda chiñu nuu na judío Jesús káchi nda saa:
―¿Ndá yatuꞌun kua táxi un kuni nde ya kúu mií un ichí ikan un saa? ―káchi nda xiꞌin ra.
19Saa ndi̱kuiin Jesús ndi̱kaꞌan ra xiꞌin nda, káchi ra saa:
―Tá ná sindiꞌi xaꞌa ndo veꞌe ñuꞌu yóꞌó ta tixin kivi uni ta sikuaꞌa tuku i ya ―káchi ra xiꞌin nda.
20Saa ndi̱kuiin nda chiñu ikan káꞌan nda:
―Uvi xiko iñu kuiya vi xa̱a chiñu na, saa ndi̱xinu ya i̱kan na. Ta ¿án ndixa kua tixin uni kivi ta sixinu un ya? ―káchi nda xiꞌin ra xáa siki ñaꞌa nda.
21Sundi Jesús ta köo ndi̱kaꞌan ra xaꞌa veꞌe ñuꞌu ya ndíkaa ñuu Jerusalén, xaꞌa ikin kuñu va ra kua ndi̱kaꞌan ra. 22Chi tá ndi̱xiꞌi ra ta ndi̱taku ra kivi uni, ta saa ndi̱kaꞌán ini nda xi̱taꞌan xiꞌin ra xaꞌa tuꞌun yóꞌó. Ta saa ka̱ndixa nda tuꞌun Ndioxi ya ta̱a na xinaꞌa, ta ka̱ndixa tu nda tuꞌun ya ndi̱kaꞌan Jesús xiꞌin va nda.
Jesús ta xíni vaꞌa ra ini ndiꞌi ni kúu yo ivi
23Tá ndi̱xiyo Jesús ñuu Jerusalén kivi kána viko pascua, ta kuaꞌa ni yatuꞌun i̱kan ra, saa kuaꞌa ni naꞌa ka̱ndixa kivi ra xaꞌa ya xi̱ni na ñaꞌa íkan ra. 24Sundi Jesús ta köo ndi̱kandixa ra na, saa chi xa xíni vaꞌa va ra ini ndiꞌi na. 25Köo ndi̱xiniñuꞌu Jesús kuni soꞌo ra ya kaꞌan inka naꞌa xiꞌin ra xaꞌa na ivi yóꞌó, saa chi xa xíni vaꞌa va mií ra ini na.
Terpilih Sekarang Ini:
San Juan 2: xta
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Active: ©Wycliffe Bible Translators, Inc. All rights reserved.