Génesis 3
3
Ma Sjije Ebꞌ Tzet Jix Yal Jehová
1Asan xin, jaꞌ noꞌ labꞌa yel xacꞌal jelan noꞌ yintaj masanil noꞌ xol-laj teꞌal noꞌ waꞌnebꞌil yu Jehová. Jix yalon noꞌ tet ix ix jaxca tiꞌ:
¿Tumi yel jix yal Jehová tol cꞌam che loꞌ sat masanil teꞌ awbꞌeal teꞌ tiꞌ? ẍi noꞌ tet ix.
2Catuꞌ jix takꞌwi ix tet noꞌ jaxca tiꞌ:
—Masanil teꞌ awbꞌeal teꞌ tiꞌ, chi skeꞌ cu loꞌon sat teꞌ jon, 3asan teꞌ eey snan xol teꞌ awbꞌeal teꞌ tiꞌ, jix yal Jehová tol cꞌam chi skeꞌ cu loꞌon sat teꞌ jon, tam wal cu mitxꞌon sat, yet watxꞌ cꞌam chi cu cam jon, ẍi ix.
4Catuꞌ jix yalon noꞌ labꞌa tuꞌ tet ix jaxca tiꞌ:
—Tucꞌal chi yal Jehová jaxca tuꞌ, man oj jex camoj. 5Yutol yotaj Dios tol jaꞌ yet oj je loꞌon sat teꞌ tuꞌ, oj jajcha je naꞌbꞌal, laan oj je yun can el jaxca Dios tuꞌ, oj je yotajne el swatxꞌil cꞌal spenail, ẍi noꞌ tet ix.
6Jix yilon oc ix Eva jun sat teꞌ teꞌ tuꞌ, tol caw watxꞌ xacꞌal sloꞌlei, yutol watxꞌ xacꞌal yili ocoj, catuꞌ jix yochen ocoj, yet watxꞌ chi stzꞌajna el snaꞌbꞌal ix yaloni. Catuꞌ jix sbꞌixon el jun sat teꞌ teꞌ tuꞌ ix, catuꞌ jix sloꞌon eytoj ix. Jix lawi tuꞌ, jix yakꞌon pax ix tet yichamil, catuꞌ jix sloꞌon teꞌ naj yetoj ix. 7Jaꞌ yet jun txolan tuꞌ jix naꞌcha el yu ebꞌ, catuꞌ jix yilontej sbꞌa ebꞌ tol tꞌiran el ebꞌ, yuxan jix swaꞌne ey xaj teꞌ higo ebꞌ, jix stzꞌison ey spichil ebꞌ yu smajchen el smimanil ebꞌ.
8Jaꞌ yet yeycꞌualil xa jix yabꞌen naj winaj yetoj ix ix, tol chi ecꞌ Jehová xol teꞌ awbꞌeal teꞌ tuꞌ yet labꞌanxa yajan cꞌu, jix el jininoj ebꞌ yewbꞌan el sbꞌa xol teꞌ awbꞌeal teꞌ tuꞌ. 9Catuꞌ jix awtele naj winaj tuꞌ yu Jehová:
—¿Bꞌeytuꞌ eyoc jaach ocoj? ẍi tet Adán.
10Catuꞌ jix takꞌwi naj jaxca tiꞌ:
—Ti ey jin ecꞌ titiꞌ an, jix wabꞌ yoc yul ja nucꞌ, tol chach awi ecꞌ xol teꞌ awbꞌeal teꞌ tiꞌ, yuxan jix jin xiwaoj yutol tꞌiran jin eloj, yuxan jix webꞌa el jin bꞌa ey jaach, ẍi naj.
11Catuꞌ jix skꞌanlen Jehová tet naj jaxca tiꞌ:
—¿Tzet jix yun ja wotajne eloj ta tol tꞌiran jaach eloj? ¿Tumi jix ja loꞌ sat teꞌ teꞌ tol jix wal ey jaach tol manche ja loꞌ?
12Catuꞌ jix takꞌwi naj jaxca tiꞌ:
—Jaꞌ ix ix jix ja wakꞌ wistiloj tiꞌ an, jaꞌ ix jix akꞌon jun sat teꞌ teꞌ tuꞌ ey jin, catuꞌ jix jin loꞌon eytoj teꞌ, ẍi naj.
13Jix skꞌanlen pax Jehová tet ix ix tuꞌ jaxca tiꞌ:
—¿Tzet yuxan queytuꞌ jix ja wute ja bꞌa?
Catuꞌ jix takꞌwi ix jaxca tiꞌ:
—Jaꞌ noꞌ labꞌa jix iꞌon eytej jin sat an, queytuꞌ jix jin loꞌon eytoj sat teꞌ teꞌ tiꞌ, ẍi ix.
Jix Yalon Jehová Tzet Syaꞌtajil Oj Jul Yibꞌan Ebꞌ
14Jix yalon pax Jehová tet noꞌ labꞌa jaxca tiꞌ:
—Yutol jix ja wun jun tiꞌ, yuxan oj jaach intajnele can el xol masanil noꞌ jobꞌbꞌeal noꞌ, cꞌal xol noꞌ xol-laj teꞌal noꞌ bꞌey yul yibꞌankꞌinal tiꞌ, tol oj ja jutx xaam ja cꞌul yet oj jaach ecꞌoj. Jaꞌ spojojal txꞌotxꞌ txꞌotxꞌ oj ja loꞌ. 15Chi wa can ey cajlebꞌail je nan je xol yetoj ix ix tiꞌ, cꞌal yetoj masanil ja winatil, cꞌal yetoj yicꞌaal ix. Jaꞌ yicꞌaal ix ix tiꞌ oj makꞌon poꞌo ja jolom, jal jaach xin, oj ja chiꞌtoj yajan ebꞌ yicꞌaal ix.
16Jix yalon Jehová tet ix ix jaxca tiꞌ:
—Oj ja wabꞌ syaꞌil yet mimejal jaach, cꞌal yet oj aloj ja wuneꞌ. Caxcꞌal ey syaꞌtajil oj ja wilaꞌ oj ja woche cꞌaltaꞌ ja wichamil. Jaꞌ naj oj oc ja waawiloj.
17Jix yalon pax Jehová tet naj Adán jaxca tiꞌ:
—Yutol jix ja jije tzet jix yal ix ja wistil tiꞌ, yin ja loꞌon sat teꞌ teꞌ tol jix wal ey jaach tol cꞌam cha loꞌ, jaꞌ tinaniꞌ xin, chi wa can ey syaꞌtajilal yibꞌan txꞌotxꞌ txꞌotxꞌ tiꞌ ja yaꞌiloj, yuxan yin syaꞌtajil oj yun ja lowi, yajbꞌan ey jaach ecꞌ bꞌey yul yibꞌankꞌinal tiꞌ. 18Oj chꞌibꞌa teꞌ qꞌuix cꞌal an cꞌultaj ey sqꞌuixal sat txꞌotxꞌ txꞌotxꞌ tiꞌ, queytuꞌ oj yun yilcha ja loꞌbꞌe yin sat ja wawo. 19Tol oj el jaꞌ ja win yet oj jaach mulnaoj, queytuꞌ oj yun yilcha ja loꞌbꞌe masantaꞌcꞌal oj jaach meltzo cantoj bꞌey txꞌotxꞌ txꞌotxꞌ tiꞌ junelxa. Yutol yin txꞌotxꞌ jix jaach tita, txꞌotxꞌ jaach cꞌaltaꞌa, yuxan oj jaach meltzo pax can oc yin pojojal junelxa.
20Jal naj Adán tuꞌ, Eva,#3:20 Jaꞌ yin Hebreo, jaꞌ jun bꞌie chi yij Eva, laan skꞌaneal jaxca jun kꞌane, iquis. jix yakꞌ yij sbꞌi yistil tuꞌ, yutol yin ix, chi iquisbꞌi masanil ánima. 21Catuꞌ jix waꞌnele ey stzꞌuumal noꞌ noꞌ yu Jehová yet chi oc spichiloj naj Adán yetoj yistil, jix ale can oc spichil ebꞌ yu.
22Jix yalon Jehová jaxca tiꞌ: Jaꞌ tinaniꞌ jaxca keocoj, queytuꞌ yeoc ebꞌ ánima tiꞌ, yotaj xa swatxꞌil cꞌal spenail ebꞌ, yuxan ta chi sloꞌ sat teꞌ teꞌ ebꞌ chi akꞌon kꞌinale, oj iquisbꞌoj cꞌal ecꞌ ebꞌ.
23Yu jun tuꞌ, yuxan jix ujtele eltej ebꞌ yu Jehová bꞌey Edén tuꞌ, catuꞌ jix oc can naj yin mulnail sat txꞌotxꞌ txꞌotxꞌ tiꞌ, yutol yin txꞌotxꞌ jix tit naj. 24Jaꞌ yet jix iꞌle can eltej ebꞌ ánima tuꞌ yu Jehová, jix yaon can oc wan querubín yetcꞌulal bꞌey chi aol cꞌu, cꞌal jun chꞌen espada eyoc skꞌakꞌal chi ecꞌ joyoyoj, yet watxꞌ cꞌamxa junoj mactxequel chi skeꞌ yoctoj, cꞌal sloꞌon sat teꞌ teꞌ chi akꞌon kꞌinale tuꞌ.
Terpilih Sekarang Ini:
Génesis 3: knj
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2016, Wycliffe Bible Translators, Inc. All rights reserved.