GÉNESIS 4
4
Caín huan iicni Abel
1Huan Adán cochqui ihuaya isihua, huan isihua conecuic huan quitacatilti se oquichpil cati quitocaxti Caín. (Caín quinequi quiijtos Nijpixtoc.) Quej nopa quitocaxti pampa Eva quiijto: “Ica itapalehuil TOTECO nijpixtoc se tacat.”
2Huan teipa Eva quitacatilti seyoc oquichpil cati quitocaxtali Abel.
Huan quema nopa ome moscaltijque, Abel quinmocuitahui borregojme, huan Caín miltequitic. 3Huan se tonali Caín quihualiquili TOTECO se tacajcahualisti cati quipixcatoya. 4Huan Abel nojquiya quihualiquili TOTECO sequij borregojme cati más tomahuaque huan cati achtohui tacatque. Huan quinmicti huan quimacac TOTECO. Huan TOTECO quicualitac Abel ica itacajcahualis huan quiseli. 5Pero ica Caín huan itacajcahualis amo quicualitac. Yeca Caín cualanqui miyac huan fiero tachixtinenqui.
6Huajca TOTECO quiilhui Caín: “¿Para ten ticualani huan fiero titachixtinemi? 7¿Amo tijmati sinta tijchihuas cati cuali, nimitzselis huan tipaquis? Pero sinta amo tijchihua cati cuali, mitztanis tajtacoli. Nopa tajtacoli eltoc quej se tecuani cati mitzchiya mocalteno huan quinequi mitztanis, pero monequi ta xijtanis ya.”
8Huan panoc se ome tonati huan Caín quinotztejqui iicni Abel huan quiilhui:
―Ma tiyaca cuatita.
Huan quema ajsitoj cuatita, Caín quitehui iicni Abel huan quimicti. 9Huajca TOTECO quitatzintoquili Caín:
―¿Canque itztoc moicni Abel?
Huan Caín quinanquili:
―Amo nijmati na. Amo notequi para nijmocuitahuis noicni.
10Huan TOTECO quiilhui:
―¿Para ten tijchijtoc ya ni? Tijmicti moicni huan ieso tijtoyajtoc ipan tali. Huan ama eltoc quej ieso techtajtanía chicahuac ma nimitztatzacuilti. 11Huajca ama, por cati tijchijtoc, nimitztelchihuas. Ayecmo huelis titequitis ipan ni tali pampa tijnenpolojtoc ica ieso moicni. 12Huan masque titatojtocas, ayecmo teno tiqueliltis. Monequi san tinentinemis campa hueli ipan taltipacti huan amo cana tijpiyas para timochantalis.
13Huajca Caín quinanquili TOTECO:
―Nelchicahuac ni tatzacuiltili huan amo huelis niquijyohuis. 14Ama techquixtía huejca ten ni tali huan ayecmo huelis nimitznechcahuis ta. Nielis se ninejnenquet campa hueli tali huan amo huelis nimosiyajquetzas. Quej ni cati hueli nechpantis, nechmictis.
15Pero TOTECO quinanquili:
―¡Amo! Sinta acajya mitzmictis, nijtatzacuiltis chicome huelta más para nijcuepilis.
Huajca TOTECO quitalili ipan Caín se tanextili para nochi quiixmatisquíaj para yaya huan amo quimictisquíaj. 16Huan Caín quistejqui campa ihuaya camanaltiyaya TOTECO huan yajqui itztoti ipan se tali itoca Nod cati mocahua imelac Edén para campa quisa tonati.
Iixhuihua Caín
17Huan Caín ihuaya cochqui isihua, huan yaya conecuic huan quitacatilti se oquichpil cati itoca Enoc. Teipa Caín quichijqui se altepet huan quitocaxti nopa altepet Enoc quej itoca icone. 18Huan Enoc motacachijqui huan elqui itata Irad. Huan teipa Irad moscalti huan elqui itata Mehujael. Huan teipa Mehujael motacachijqui huan elqui itata Metusael. Huan Metusael moscalti huan elqui itata Lamec.
19Huan Lamec quinpixqui ome isihuajhua; se itoca Ada huan ne seyoc Zila. 20Huan Ada quitacatilti Jabal. Huan Jabal motacachijqui huan elqui inintata masehualme cati mocajque ipan calme ten yoyomit huan quinxinachohuayayaj huan quiniscaltiyayaj tapiyalme. 21Huan Jabal quipixqui se iicni cati itoca Jubal. Huan Jubal moscalti huan quiyolilti tapitzali huan nopa tatzotzonali cati itoca arpa. Huan yaya elqui inintata masehualme cati tatzotzonaj. 22Huan Zila, nopa seyoc isihua Lamec, quitacatilti se oquichpil cati itoca Tubal Caín cati elqui se teposchijquet. Huan Tubal Caín quitejtzonayaya nopa teposti cati itoca bronce huan cati itoca hierro huan ica nopa teposti quichijchihuayaya miyac tamanti. Huan Tubal Caín quipixqui se isihua icni cati itoca Naama.
23Huan se tonali Lamec quinilhui iome sihuajhua Ada huan Zila:
“Xijtacaquilica cuali cati nimechilhuis.
Nijmicti se tacat pampa nechcoco.
Huan elqui se telpocat cati nechmaquilijtoya.
24Sinta se acajya quichihuilisquía se tenijqui Caín,
quiselisquía se tatzacuiltili chicome huelta más chicahuac.
Pero sinta se acajya nechcuepilisquía cati nijchijtoc na, niLamec,
monequisquía quiselis se tatzacuiltili cati amo san chicome hueltas,
pero se tatzacuiltili cati tahuel más chicahuac.”
Adán, Eva huan ininconehua
25Huan Adán cochqui ihuaya isihua, huan isihua sempa conepixqui huan quitacatilti seyoc oquichpil cati quitocaxti Set. (Set quinequi quiijtos Nechmacatoc.) Quej nopa quitocaxti pampa quiijto: “Toteco Dios techmacatoc seyoc conet ipataca Abel cati Caín quimicti.”
26Huan quema Set motacachijqui, quipixqui se icone cati quitocaxti Enós. Huajca ipan nopa tonali tacame pejque quihueyichihuaj TOTECO san sejco.
Terpilih Sekarang Ini:
GÉNESIS 4: nchC
Highlight
Kongsi
Salin
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fms.png&w=128&q=75)
Ingin menyimpan sorotan merentas semua peranti anda? Mendaftar atau log masuk
© 2005, Wycliffe Bible Translators, Inc. All rights reserved.