Wani 2
2
Neɨkiya kememɨte'uwewi Kanaha kiekariyaritsie
1Merikɨtsɨ hairieka tukari 'aye'aku mekaneitineɨkitɨani xeime, mɨkɨ 'ixɨarari mepewewiekai Kanaha kiekariyaritsie Karereya kwieyaritsie, Ketsutsi maamaya mana kaniuyeikakaitɨni. 2Ketsutsi neɨkiyapa kaniuta'inierieni, teyɨ'ɨkitɨwamete meta mete'uta'inierie. 3Hikɨ kaxie winuyari 'uyexɨxɨaku Ketsutsi maamaya mɨpaɨ katinitahɨawe:
—Kaxie winuyari mepɨkahexeiyari.
4Ketsutsi mɨpaɨ katinitahɨawe:
—Nemaama, ¿ketita mɨkɨkɨ tetehexeiya? Netukari 'akuxi pɨka'aye'awe.
5Hikɨ maamaya mɨpaɨ katiniwarutahɨawe teparewiwamete:
—Mɨkɨ kemɨtixetahɨawe yaxeketenekahuni.
6Merikɨtsɨ mana pɨtitekai tete ye'ɨrɨteyarite 'ataxewi paɨmetɨ huriyutsixi memukamaimawa memɨ'itiyanikɨ. Xexuimetsie katinakananakekaitɨni nauka tewiyari yatɨni xeitsienituyari rituruyari.
7Hikɨ Ketsutsi mɨpaɨ katiniwarutahɨawe:
—Haa xekeneutihɨniya tete ye'ɨrɨteyariteta.
Hikɨ kɨtsitana paitɨ mekanitihɨniya.
8Mɨpaɨta katiniwarutahɨawe Ketsutsi:
—Hikɨtari xekeniwatihapani, 'ixɨarari mɨhɨritɨarie hetsɨa xekenanuhapani.
Hikɨ mɨkɨ mekaneihapanirieni. 9Mɨhɨritɨarie kepauka menuti'inɨataxɨ haa kaxie winuyari matɨa, 'atsikatimaitɨ hakewa memiemetɨkai, tsepa teparewiwamete yamemɨtemaikai haa memɨwatihanakaikɨri, 'ixɨarari mɨhɨritɨariekai neneɨkeme kaniutahɨawe. 10Mɨpaɨ katinitahɨawe:
—Yunaitɨ teɨteri kaxie winuyari 'aixɨa ma'ane mekaniwa'itɨaka meri, kepauka memɨtitarɨweni 'axamɨ'ane 'ana mepɨwa'itɨa. 'Ekɨtsɨ pɨta pekanitikwerieni kaxie winuyari 'aixɨa ma'ane hikɨkeri temenu'ienikɨ.
11'Ipaɨ matɨari katiniuyurieni Ketsutsi Kanahatsie Karereya kwieyaritsie 'itsutɨatɨ 'inɨari kemɨtiyurienekai. Matsiɨkɨtɨ kanayuyeitɨani kemɨtimariwekai, teyɨ'ɨkitɨwamete yuri mekateniuta'erieni hetsiena.
12Merikɨtsɨ 'arikeke Kaperunaume mɨkɨ kaneuyeyune, maamaya, 'iwamama, meta teyɨ'ɨkitɨwametemama, mana mɨixa mepɨka'uyuri.
Ketsutsi tukita kemɨtiwarayeweiyaxɨa
(Wa 2:14-16 – Mat 21:12-13, Mar 11:15-17, Ruk 19:45-46)
13Merikɨtsɨ huriyutsixi wa'ixɨarari Patsikwa mɨtitewa kanahurakaitɨni, Ketsutsi Kerutsareme kaneutiyune. 14Mana tuki kuraruyarita kaniwaretaxeiya tuurutsixi memɨwatuakai, muxatsi, kukuruxi meta tumini patamete tiwaretaxei muwa me'ayeteme. 15Kaunari tiyuwayame 'utawewieka tuki kuraruyarita meyunaime kaniwaranuyeweiya, muxatsi meta tuurutsixi wahamatɨa. Tumini patamete watumini kananakaxɨrieni, wamexate kanatixɨriexɨani. 16Kukuruxi memɨwatuakai mɨpaɨ katiniwarutahɨawe:
—'Ikɨ xekenanuye'ɨi takwa paitɨ. Ne'ukiyari kiiya tetuayamete wakii xepɨka'ayeitɨwani.
17Teyɨ'ɨkitɨwamete mekaneye'erieni niuki mɨpaɨ mɨre'uxa: «'Akii nemɨkweriekɨ netaɨta nepɨtaxɨtsitɨariexime». 18Hikɨ huriyutsixi mɨpaɨ mekatenita'eiya:
—¿Ketita 'inɨariyari petatixeiyatsitɨani mɨyapemɨtiyurienekɨ?
19Ketsutsi mɨpaɨ katiniwaruta'eiya:
—'Ikɨ tuki xekeneuka'una, ne hairieka tukari 'anukayayu nekanenukuketɨamɨkɨ hutarieka.
20'Ayumieme huriyutsixi mɨpaɨ mekaniutiyuani:
—'Ikɨ tuki wewiyanetɨ huta tewiyari heimana 'ataxewime wiyari mekaniuyurieni. 'Ekɨri haika tukari perenukuketɨani.
21Matsi mɨkɨ yuwaiyari kanixatakaitɨni tukitɨme. 22Kepaukari mɨkite watsata manukuketɨarie, teyɨ'ɨkitɨwametemama mekane'eriwakaitɨni mɨpaɨ mutayɨkɨ. 'Ana 'utɨarika yuri mekateniuta'eririeni, meta Ketsutsi niukieya yuri mete'uta'eriri.
Ketsutsi kemɨtiwamaikai yunaime teɨteri
23Merikɨtsɨ Kerutsareme 'uyeikakaku Patsikwa 'ixɨararipa, yumɨiretɨ yuri mekateniuta'erieni hetsiena me'ixeiyaka 'inɨarite mɨkɨ kemɨtiyurienekai. 24Matsi Ketsutsi yuri pɨkatiwa'eririekai, mɨkɨ yunaime mɨwamaikaikɨ, 25xewitɨ tewi hepaɨtsita mɨtitahekɨatɨanikɨ pɨkaheuyehɨakai, mɨkɨ yɨkɨmana mɨtimaikaikɨ tita tewi 'iyarieyatsie mɨtiyeka.
Terpilih Sekarang Ini:
Wani 2: hch
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2020, Wycliffe Bible Translators, Inc.