 If you would like a copy of this version please contact info@davaraudiobibles.org

Adamawa Fulfulde Bible

Fulfulde Bible Ajamiya © Bible Society of Cameroon, 2016.

مَلَاعِکَعٜنْ طِطٛ غٛ نجٛتِّ سٛدٛمَ بٜى کِيکِيطٜ؞ لُوطُ طٛنّٛ جٛوطِ حَا دَمُّغَلْ سٛدٛمَ؞ ندٜ عٛيِعِ ࢡٜ، عٛعُمِّ، عٛيٜحِ ڢٛتّٛيْغٛ بٜى مَࢡّٜ، عٛسُجِدِ، يٜىٰسٛ مَاکٛ حَا لٜسْدِ؞ عٛوِعِ‏: «بَرْکَ مٛوطٛنْ، عُسٜنِ، نجَࢡٜ نَسْتُغٛ سَارٜ مَشُّطٛ مٛوطٛنْ، لٛوتٛنْ کٛسْطٜ مٛوطٛنْ عٜ مبَالٛنْ؞ ڢَجِرِ شُبْ عٛنْ عُمّٛتٛ، ندٜنْ عٛنْ تٛکِّتِنَ لَاوٛلْ مٛوطٛنْ؞» ࢡٜمبِعِ‏: «عَاعَ، مِنْ مبَالَنْ حَا دَلْدَلْ بٜرْنِوٛلْ؞» عَمَّا عٛتٛرِ ࢡٜ طُوطُّمْ، حَا ࢡٜنغَرِ ࢡٜنَسْتِ سَارٜ مَاکٛ؞ عٛوَطَنِ ࢡٜ ࢩَامْدُوجِ عٜ تَمْسٜىٰجٜ طٜ عُڢْنَاکَا، ࢡٜࢩَامِ؞ دِغَ ࢡٜشِوَا وَالُغٛ، وٛرْࢡٜ بٜرْنِوٛلْ سٛدٛمَ، دٜرْکٜعٜنْ عٜ نَيٜىٰࢡٜ نغَرِ دِغَ ݠَتُّلٜ ڢُو، تَارِ سَارٜ؞ ࢡٜعٜوْنِ لُوطُ، ࢡٜمبِعِمٛ‏: «تٛيْ وٛرْࢡٜ وَرْࢡٜ حَا مَاطَ جٜمَّارٜ ندٜعٜ؟ وُرْتِنْ ࢡٜ حَا عَمِنْ، حَا مِنْ مبَالْدَ بٜى مَࢡّٜ؞» لُوطُ وُرْتِ حَا مَࢡّٜ حَا دَمُّغَلْ، عٛمَࢡِّ ݠَرٜوَلْ ࢡَاوٛ مَاکٛ؞ عٛوِعِ‏: «سٛوبَعٜنْ عَمْ، تَا مبَطٜ کَلُّطُمْ طُعُمْ؞ ندَا، مِوٛودِ ࢡِࢡّٜ رٜوْࢡٜ طِطٛ، ࢡٜعَنْدَا غٛرْکٛ؞ مِوُرْتِنَنْ ࢡٜ حَا مٛوطٛنْ، عٛنْ مبَطَ ࢡٜ کٛ ڢٛتَّنِ عٛنْ؞ عَمَّا وٛرْࢡٜ ࢡٜعٜ، تَا مبَطٜ ࢡٜ کٛو طُمٜ، نغَمْ ࢡٜنغَرِ حَا عَمْ؞» ࢡٜمبِعِ‏: «وٛسْتَ طٛ‏! عَ جَنَنّٛ مٜىٰرٜ حَا طٛ، عَيِطِ حِيتَاغٛ مِنْ نَ؟ يٛوَّ‏! مِنْ مبَطٜتٜ کَلُّطُمْ، کٛ ࢡُرَتَ ࢡٜيَ؞» ࢡٜࢡِلِّ لُوطُ، ࢡٜࢡَدِتِ حَا ࢡٜشٛکِّتَ ݠَرٜوَلْ؞ عَمَّا مَلَاعِکَعٜنْ طِطٛ غٛ ݠٛرْتِ جُوطٜ مُوطُمْعٜنْ، ࢡٜنَسْتِنِ لُوطُ ندٜرْ سَارٜ، ندٜنْ ࢡٜمَࢡِّ ݠَرٜوَلْ؞ ندٜنْ ࢡٜمبُمْنِ وٛنْࢡٜ يَاسِ ڢُو، دِغَ دٜرْکٜعٜنْ حَا ندٛتِّعٜنْ، حَا ࢡٜمبَاوَايْ حٜࢡْتُغٛ دَمُّغَلْ؞
مَلَاعِکَعٜنْ طِطٛ غٛ مبِعِ لُوطُ‏: «وٛودِ غٛطّٛ مَاطَ حَا طٛ نَ؟ کٛو عٜسِرَاوٛ، کٛو ࢡِࢡّٜ مَاطَ وٛرْࢡٜ عٜ رٜوْࢡٜ، کٛو مٛيٜ ندٜرْ بٜرْنِوٛلْ نغٛعٛلْ، وُرْتِنْ ࢡٜ دِغَ طٛ؞ نغَمْ مِنْ نَتِّنَنْ نٛکُّورٜ ندٜعٜ؞ جَوْمِرَاوٛ نَنِ غُلَّالِ طُوطِّ دٛوْ يِمْࢡٜ سٛدٛمَ، نغَمْ مَاجُمْ عٛنٜلِ مِنْ حَلْکُغٛ نغٛ؞» لُوطُ وُرْتِ، يٜحِ نغَمْ وٛلْوَنْغٛ عٜسُمْعٜنْ، تَمِّيࢡٜ تٜعُغٛ ࢡِيُمْعٜنْ رٜوْࢡٜ، وِعِ ࢡٜ‏: «عُمّٜ، نغُرْتٜ نٛکُّورٜ ندٜعٜ، نغَمْ جَوْمِرَاوٛ يِطِ حَلْکُغٛ بٜرْنِوٛلْ نغٛعٛلْ‏!» عَمَّا عٜسِرَاࢡٜ مَاکٛ ندَارِ بَنَ عٛجَلْنَنْ ࢡٜ نٛنْ؞
بٜى سُبَحَ، مَلَاعِکَعٜنْ نجَاوْطِنِ لُوطُ، مبِعِ‏: «عُمَّ، حٛوعُ دٜبّٛ مَاطَ عٜ ࢡِࢡّٜ مَاطَ رٜوْࢡٜ طِطٛ، وٛنْࢡٜ حَا طٛ، نغَمْ تَا کَلْکٛنْ ندٜرْ کِيتَ نغَمْ حَلّٜىٰندٜ بٜرْنِوٛلْ نغٛعٛلْ‏!» ندٜ عٛطٛنْ نٜىٰࢡَ، ࢡٜنَنغِ جُنغٛ مَاکٛ عٜ جُنغٛ دٜبّٛ مَاکٛ عٜ جُوطٜ ࢡِيِيکٛعٜنْ رٜوْࢡٜ، نغَمْ جَوْمِرَاوٛ يِطِ حِسْنُغٛ مٛ؞ ࢡٜنغُرْتِنِ ࢡٜ، ࢡٜعَشِّ ࢡٜ يَاسِ بٜرْنِوٛلْ؞ ندٜ ࢡٜنغُرْتِنِ ࢡٜ، غٛوتٛ مَࢡّٜ وِعِ‏: «دٛغُّ نغَمْ کِسْنَ يٛنغْکِ مَاطَ، تَا يٜىٰسِتَ، تَا دَرَ ندٜرْ وَادِوٛلْ ڢُو‏! دٛغُّ حَا حٛوسٜىٰرٜ نغَمْ تَا عَنَتَّ‏!» عَمَّا لُوطُ جَابِ‏: «نَا نٛنْ، جَوْمِرَاوٛ، طُمْ سَطِ؞ ندَا، مَشُّطٛ مَاطَ حٜࢡِ مٛعّٜرٜ يٜىٰسٛ مَاطَ، عَوَطَنِ يَمْ مبٛوطٜىٰنغَ طُوطْنغَ بٜى حِسْنَنغٛ يَمْ يٛنغْکِ عَمْ؞ عَمَّا مِوَاوَتَا دٛغُّغٛ حَا حٛوسٜىٰرٜ، تٜىٰمَ مَسِيبٛ جٛکّٛتٛ يَمْ، مِمَايَ؞ ندَا وُرٛ ڢَمَرٛ، ࢡَدِينغٛ بٛو نغَمْ مِدٛغَّ تٛنْ؞ عَشُّ مِسُطٛيَ تٛنْ؞ نَا نغٛ ڢَمَرٛ نَ؟ نغَمْ حَا يٛنغْکِ عَمْ حِسَ‏!» عٛوِعِ‏: «بٛوطُّمْ، مِمٛعَّنِ مَ طُمْ ڢَحِنْ؞ مِنَتِّنْتَا وُرٛ نغٛ مبٛلْوَنْتَ؞ يَاوْطَ سُطٛيَ تٛنْ، نغَمْ مِوَطَتَا کٛو طُمٜ، سٜيْ تٛ عَيٛتَّکٜ تٛنْ؞» نغَمْ مَاجُمْ وُرٛ نغٛ عٜوْنَ شٛعَرْ؞

نَانغٜ ڢُطِ، لُوطُ بٛو يٛتِّ شٛعَرْ؞ ندٜنْ جَوْمِرَاوٛ تٛࢡْنِ يِيتٜ عٜ بَرُودُ دِغَ عَسَمَ دٛوْ سٛدٛمَ عٜ غٛمٛرَّ؞ عٛحَلْکِ بٜرْنِيجِ طِطِ طِعِ عٜ يِمْࢡٜ وٛنْࢡٜ تٛنْ ڢُو عٜ وَادِوٛلْ بٜى ڢُطْنغٛوجِ مُمْ ڢُو؞ دٜبّٛ لُوطُ يٜىٰسِتِ، لَاتِ دَنغْرَنغَلْ مَنْدَ؞
إِبْرَاهِيمَ دَوِ شُبْ، يٜحِ حَا نٛکُّورٜ ندٜ عٛدَرِنٛ يٜىٰسٛ جَوْمِرَاوٛ؞ عٛلَارِ غَلْ سٛدٛمَ عٜ غٛمٛرَّ عٜ وَادِوٛلْ مَنْ ڢُو؞ عٛيِعِ شُورْطٜ عٜىٰنغِ دِغَ لٜسْدِ بَنَ شُورْطٜ ࢡٛلِنِرْدٜ؞ ندٜ اَللَّه نَتِّنِ بٜرْنِيجِ وَادِوٛلْ مَنْ، عٛسِڢْتٛرِ إِبْرَاهِيمَ؞ ندٜ عٛوِلِ بٜرْنِيجِ حَا لُوطُ جٛوطِنٛ، عٛوُرْتِنِ لُوطُ جَمْ؞

لُوطُ حُلِ جٛوطَاغٛ حَا شٛعَرْ؞ نغَمْ مَاجُمْ عٛوُرْتِ وُرٛ مَنْ، عٛوَعِّ حٛوسٜىٰرٜ، عٛجٛوطِ تٛنْ ندٜرْ لٛوٛلْ، کَنغْکٛ عٜ ࢡِيِيکٛعٜنْ رٜوْࢡٜ طِطٛ؞ ندٜنْ عَڢٛ وِعِ مِࢩُمْ‏: «بَابَ مٜىٰطٜنْ نَيْوِ، وَلَا غٛرْکٛ بٛو ندٜرْ لٜسْدِ مٛ وَرَتَ نَسْتَ حَا مٜىٰطٜنْ ڢٛدّٜ طَبِيَ دُنِيَارُ ڢُو؞ وَرْ، نجَرْنٜنْ بَابَ مٜىٰطٜنْ نغُيْکِنٛوجَمْ، ندٜنْ مبَالْدٜنْ بٜى مَاکٛ، نغَمْ کٜࢡٜنْ دَࢩْغٛلْ دِغَ مَاکٛ؞» جٜمَّ مَاجُمْ ࢡٜنجَرْنِ بَابَ مَࢡّٜ نغُيْکِنٛوجَمْ؞ عَڢٛ نَسْتِ، وَالْدِ بٜى بَابَ مُمْ؞ بَابَ عَنْدَا ندٜيْ ࢡِيُمْ وَرِ وَالِ عٜ ندٜيْ عٛعُمِّ؞ جَنغٛ مَاجُمْ عَڢٛ وِعِ مِࢩُمْ‏: «ندَا، مِوَالْدِ حَنغْکِ بٜى بَابَ عَمْ؞ سٜيْ عٜنْ نغُيْکِنَ مٛ جٜمَّارٜ ندٜعٜ بٛو؞ ندٜنْ وَالْدُ بٜى مَاکٛ عَنْ بٛو، نغَمْ کٜࢡٜنْ دَࢩْغٛلْ دِغَ بَابَ مٜىٰطٜنْ؞» جٜمَّارٜ مَاجُمْ بٛو ࢡٜنجَرْنِ بَابَ مَࢡّٜ نغُيْکِنٛوجَمْ؞ طِطَࢡٛ يٜحِ، وَالْدِ بٜى مَاکٛ؞ بَابَ عَنْدَا ندٜيْ ࢡِيُمْ وَرِ وَالِ عٜ ندٜيْ عٛعُمِّ؞ ࢡِࢡّٜ لُوطُ طِطٛ ندٜىٰدِ دِغَ بَابَ مَࢡّٜ؞ عَڢٛ دَࢩِ ࢡِطّٛ غٛرْکٛ، عِنْدِ طُمْ مٛعَبْ؞ کَنغْکٛ وٛنِ بَابَ مٛعَبِعٜنْ حَنْدٜ؞ طِطَࢡٛ بٛو دَࢩِ ࢡِطّٛ غٛرْکٛ، عِنْدِ طُمْ بٜنْ-عَمِّ؞ کَنغْکٛ وٛنِ بَابَ عَمّٛونِعٜنْ حَنْدٜ؞

နားေထာင္ပါ။ لَاتَانٛوجِ 19