The Kisi Old Testament

Kisi Bible © Bible Society in Liberia, 2015.

O̍ ko̍ŋ, mi̍ E̍bīlām chu̍ā la̍a̍ ndɔ̄ a̍ Lɔ̍tū a̍ nyɛ̄ o̍ nyɛ̄ ndā nɔ̄, ma̍ māl I̍chi̍pī, ma̍ mīīŋgū Ke̍nāŋ. E̍bīlām ndu̍ o̍o̍ su̍l ta̍u̍. Chɔ̄lūa̍a̍ wa̍ ndu̍ o̍ bā ta̍u̍, a̍ ka̍ni̍ŋ hu̍mbo᷅ŋ a̍ ko̍o̍līi̍yo̍ŋ. Mbo̍ māl o̍ lɛ̄ŋndē Ke̍nāŋnde̍ŋ mā tōū, mbo̍ hēēlū bā Bɛ̍tɛ̄ɛ̄l wo̍. Mbo̍ lō bālɔ̄ɔ̍ mbo̍ fūūlūū nāa̍ ndu̍ o̍o̍ to̍ndū tɛ̍ndīi̍la̍ŋ o̍ tāse̍la̍ ndɔ̄ɔ̍ Bɛ̍tɛ̄ɛ̄l tɛ̍ɛ̄ŋ a̍ E̍yāī wa̍. Mbo̍ kūā o̍ fo̍ndāŋ o̍ to̍o̍si̍a̍a̍ ma̍āŋndo̍ wo̍. Mbo̍ sōōlūū Mɛ̄lɛ̄ka̍ Ya̍a̍wɛ̄ɛ̄ lo̍ŋ.
A̍ bōōndi̍i̍ ke̍ŋ, Lɔ̍tū bɛ̍ɛ̍ ndu̍ o̍o̍ nɔ̍ chɔ̄lūa̍a̍ ta̍u̍, sāa̍, a̍ nāūwa̍. O̍ ko̍ŋ kɔ̍ɔ̍lī, ndu̍ o̍o̍ nɔ̍ vɛ̄lɛ̄ tɛ̍ndɛ̄i̍la̍ŋ ta̍u̍. Le̍ he̍ī, fo̍ndāŋndo̍ ndu̍ o̍o̍ ve̍ lɛ̍ lētūu̍ le̍ mī nda̍ a̍a̍ wa̍ nāa̍ pi᷅lɛ̍ le̍. Nda̍ nda̍ ŋi̍ɔ̍ɔ̍ŋ nda̍ a̍a̍ nɔ̍ ni᷄ŋ chɔ̄lūa̍a̍ ta̍u̍ nda̍ a̍a̍ sūl lɛ̍ nāa̍ pi᷅lɛ̍ le̍. O̍ ko̍ŋ, mi̍ sɛ̄ɛ̄ŋgi̍āŋndo̍ lūɛ̄ī wānāā māndāā lāchɔ̄lūa̍a̍ E̍bīlām nda̍ tɛ̄ɛ̄ŋ a̍ wānāā māndāā lāchɔ̄lūa̍a̍ Lɔ̍tū wa̍. Bōōndi̍i̍ ke̍ŋ Ke̍na̍na̍i̍tīi̍ya̍ a̍ Pɛ̍lu̍i̍sa̍i̍tīi̍ya̍, nda̍ wa̍ īchāli̍ o̍ lɛ̄ŋndē lēŋ ni᷄ŋ ni̍.
Mi̍ E̍bīlām lo᷅ o̍ ko̍ŋ mbo̍ dīmūl Lɔ̍tū āā, “Ō bɛ̍ndā mī sɛ̄ɛ̄ŋgi̍āŋ lūɛ̄ī na̍a̍ tɛ̄ɛ̄ŋ na̍a̍ nūm te̍. Kɛ̄lɛ̄ŋgāā wānāā nu̍m a̍ ma̍ndāā lāchɔ̄lūa̍a̍ tɛ̄ɛ̄ŋ, a̍ a̍ ni̍a̍a̍. Kāni̍ fo̍ndōle̍, wānāā pi᷄lla̍ na̍a̍ ŋ̄ chō ni̍. Lɛ̄ŋnde̍ŋ lē chō lē kūāna᷄ŋ kɛ̄. Ŋ̄ pīɔ̄ūwa᷅ŋ tɛ̍ɛ̄ŋ. Tē nu᷄m ku̍ɛ̄ o̍ bā mīāllo̍ chōo̍ ni̍, ya̍ I̍ ku̍ɛ̄ o̍ bā kɛ̄ndɔ̄ɔ̍ chōo̍. Tē nu᷄m ku̍ɛ̄ yɛ̄ o̍ bā kɛ̄ndɔ̄ɔ̍ chōo̍ ni̍, ya̍ I̍ ku̍ɛ̄ o̍ bā mīāllo̍ chōo̍.”
Mi̍ Lɔ̍tū chu̍ā hɔ̄lla̍ mbo̍ mɛ̄ɛ̄ndīa̍ŋ dɛ̍ɛ̍lɛ̄la̍ Chɔ̍ɔ̍dāŋ nda̍ŋ, mɛ̄ŋnda̍ŋ mā chō le̍nde̍ ba᷅ o̍ bā fe̍e̍. Wānā a̍a̍ che᷅ fo̍ndāŋndo̍ ho̍ō pɛ̍, āā kpe̍le̍ Mɛ̄lɛ̄ka̍ Ya̍a̍wɛ̄ɛ̄ o̍ tɔ̄l I̍dɛ̄ŋ ndo̍ ni̍, a̍ nāŋɔ̄ɔ̍. Wānā a̍a̍ che᷅ pɛ̍ āā yōndōo̍ lɛ̄ŋndē I̍chi̍pīle̍ŋ kūmbū So̍wā wo̍ ni̍. A̍ bōōndi̍i̍ ke̍ŋ, Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ tɛ̍ɛ̍mbu̍u̍ wɔ̍ So̍dɔ̄m a̍ Kōmo̍o̍lūā le̍. O̍ ko̍ŋ, mi̍ Lɔ̍tū chu̍ā dɛ̄ɛ̄lɛ̄la̍ Chɔ̍ɔ̍dāŋ nda̍ŋ fa̍ū. Mbo̍ cha᷄ŋ mbo̍ kūā a̍ ku̍ndā ndɔ̄ɔ̍ lo̍ŋ kūmbū pāa̍le̍ŋ lē chāŋ ko̍ŋ ndo̍. O̍ ko̍ŋ, ma̍ pīɔ̄ūwa᷅ŋ tɛ̍ɛ̄ŋ. Mi̍ E̍bīlām ndu̍ cha᷅l o̍ lɛ̄ŋndē Ke̍nāŋnde̍ŋ ni᷄ŋ. Mi̍ Lɔ̍tū ndu̍ cha᷅l o̍ chi̍e̍e̍ŋ bɛ̍ndo᷄ŋ tɛ̄ɛ̄ŋ o̍ dɛ̄ɛ̄lɛ̄la̍ Chɔ̍ɔ̍dāŋ nda̍ŋ ni᷄ŋ, So̍dɔ̄m chi̍e̍e̍ i̍kɛ̍i̍. Ndu̍yɛ̍ wāŋnda̍ So̍dɔ̄m wānāā dɛ̍nɛ̍ wɔ̍ɔ̍ŋnda̍ pīla̍ nda̍ wa̍ ni̍. Ā wa̍ wānāā yɔ̄ŋndā wɔ̄ɔ̍ŋāā bɛ̄ndū Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l.
O̍ ko̍ŋ kɔ̍ɔ̍lī, mɛ̄ɛ̍ Lɔ̍tū nda̍ E̍bīlām a̍ pi̍ɔ̍u̍wa᷅ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl E̍bīlām āā, “E̍bīlām, chu̍a̍ wɔ̍ hɔ̄lla̍ nāa̍ ŋ̄ chō ka̍ŋ nda̍, mā mɛ̍ɛ̍ndi̍a̍ŋ ba᷅ o̍ bā fe̍e̍, lūāŋ a̍ tōū a̍ bā pāa̍le̍ŋ lē chāŋ ndo̍ a̍ bā le̍ de᷅l lo̍. Lɛ̄ŋnde̍ŋ nde᷅ŋ kpo̍u̍ ya̍ cho̍ nu̍m kē ni̍ nya̍ chūāūwāā nūm a̍ ma̍māa̍ le̍ fɛ̍ɛ̍ŋ a̍ fɛ̍ɛ̍ŋ. I̍ cho̍ tōsā mī chūāūwāā nūm a̍ ma̍māa̍ ā kūi̍i̍ māā chu̍ndo̍o̍ lɛ̄ŋ. Mɛ̄ɛ̍ wānā nɔ̍lā chu̍ndu̍ cho̍ lɛ̄ŋ ndo̍ chɔ̄m te̍ yɛ̍, le̍nde̍ chūāūwāā nūm a̍ ma̍māa̍ chō wā ni̍, ā chu̍ū ni̍ŋ chɔ̄m te̍. Le̍la̍ŋ, chɔ̍ŋ mā ba̍lu̍ bā o̍ bā fe̍e̍ o̍ lɛ̄ŋnde̍ŋ nde᷅ŋ ni᷄ŋ, kāni̍ fu̍u̍le̍, le̍ŋ ya̍ cho̍ nu̍m kē ni̍.” O̍ ko̍ŋ, mi̍ E̍bīlām si̍mbū tɛ̍ndɛ̄i̍la̍ ndɔ̄la̍ŋ, mbo̍ kūā o̍ fo̍ndāŋ yɔ̄mīī tɔ̍ɔ̍ve̍ Ma̍mi̍lūē, Hi̍bu̍lɔ̄ŋ chi̍e̍e̍ i̍kɛ̍i̍. Mbo̍ tāŋgūl ma̍āŋndo̍ lo̍ŋ le̍ Mɛ̄lɛ̄ka̍ Ya̍a̍wɛ̄ɛ̍ sōōlūūwo̍.

နားေထာင္ပါ Chɛ̄nɛ̍se̍ē 13