Manadonese Malay - 2017 LAI (NT) no drama

Manadonese Malay - 2017 LAI (NT) drama

Perjanjian Baru Bahasa Manado @ Lembaga Alkitab Indonesia 2017

Hari itu, Yesus kaluar dari tu ruma kong pigi ka pinggir danau Galilea, trus Dia dudu di situ. Di pinggir danau itu banya skali orang datang bakumpul pa Dia. So itu Dia nae ka prao tu ada di situ trus dudu di atas prao, kong tu orang banya da badiri di pinggir danau. Yesus kase ajar banya hal pa dorang pake prumpamaan, Dia bilang, “Ada tu petani pigi baambor bibit. Samantara dia baambor di kobong, ada bibit yang da taciri di jalang, kong burung-burung datang teto tu bibit sampe abis. Ada lei bibit tu da taciri di tana yang babatu-batu, tu de pe tana cuma sadiki. Tu bibit di tampa itu capat batumbu lantaran de pe tana sadiki. Mar serta matahari so kaluar, tu tanaman itu layu kong kring lantaran de pe akar nyanda tatanang butul di tana. Kong tu bibit laeng da taciri di tana yang ada rumpu baduri. Serta tu bibit mulai batumbu, tu rumpu baduri lei batumbu jadi lebe basar kong tu rumpu gepe tu tanaman yang so batumbu sampe mati. Mar tu bibit laeng komang da taciri di tana subur. Tu bibit batumbu kong babua. Dia babua sampe de pe hasil ada tu tiga pulu kali lipa, ada tu anam pulu kali lipa, deng ada lei tu sratus kali lipa. Sapa tu ada talinga, badengar jo bae-bae.”


Abis itu, Yesus pe murit-murit pi badekat pa Dia kong batanya, “Guru, kiapa Guru da babicara pa orang banya itu pake prumpamaan?”
Yesus manyao, “Tuhan Allah beking ngoni bole tau deng jelas tu rahasia tentang Tuhan Allah Berkuasa sbagai Raja, mar pa orang laeng, dorang nimbole tau tu rahasia itu. Soalnya kalu ada orang yang mo trima tu Tuhan pe firman, Tuhan mo beking dia lebe mangarti sampe dia jadi mangarti skali. Mar kalu ada orang yang nimau mo trima tu Tuhan pe firman, apa yang dia so tau, Tuhan mo ambe dari pa dia. So itu no Kita da mangajar pa dorang pake prumpamaan, lantaran ‘Biar dorang balia, dorang nyanda mangarti apa tu da lia. Biar dorang badengar, dorang nyanda dengar deng dorang nyanda mangarti.’ Jadi apa tu da jadi pa orang-orang ini, itu beking gnap tu Tuhan da bilang dulu pa nabi Yesaya. Tuhan da bilang bagini,
‘Biar ngoni mo dengar-dengar trus,
mar ngoni nyanda mo mangarti.
Biar lei ngoni mo lia-lia trus,
mar ngoni nyanda mampu mo mangarti apa tu da jadi.
Soalnya tu bangsa ini so kras hati.
Dorang pe talinga so nimau mo badengar,
dorang lei tutu dong pe mata.
So lantaran dorang da beking bagitu,
dorang nyanda mo lia tu butul.
Dorang nyanda mo badengar deng dong pe talinga,
dorang lei nyanda mo mangarti deng dong pe hati,
jadi dorang nyanda mo bertobat,
kong Kita nyanda mo se slamat pa dorang.’ ”
Yesus bilang lei pa Dia pe murit-murit, “Mar ngoni ini yang paling snang. Soalnya ngoni bole lia deng ngoni pe mata kapala sandiri trus mangarti, deng ngoni lei bole dengar deng ngoni pe talinga kong tau de pe arti. Kita bilang pa ngoni, dulu banya nabi deng orang yang ja beking tu butul yang suka mo lia apa tu ngoni so lia, mar dorang nyanda dapa kesempatan for lia itu. Dorang lei suka mo dengar apa tu ngoni so dengar, mar dorang nyanda dapa kesempatan for dengar itu.”


Yesus bilang lei, “Jadi ngoni dengar bae-bae jo tu arti dari prumpamaan bibit di macam-macam tana. Tu bibit yang da taciri di jalang sama deng orang-orang yang da dengar tu firman tentang Tuhan Allah Berkuasa sbagai Raja, mar dorang nyanda mangarti. Pe klar dorang dengar tu firman, setang pe bos datang ambe tu firman itu dari pa dorang pe hati.
Tu bibit yang da taciri di tana babatu-batu, itu sama deng orang-orang yang da dengar tu firman kong iko trima itu deng hati snang. Mar tu firman nyanda baakar butul pa dorang pe hati, so itu nyanda lama da batahang. Kalu dapa siksa deng mendrita lantaran percaya tu firman itu, dorang iko jadi nyanda percaya lei pa Tuhan.
Tu bibit yang da taciri di tana yang ada rumpu baduri, itu sama deng orang-orang yang so dengar tu firman, mar dorang talalu kuatir deng tu dorang pe hidop deng dorang tagila-gila deng harta. Samua itu beking tu firman nyanda ada de pe arti pa dong pe hidop, itu sama deng tu firman nyanda babua pa dong pe hati.
Kong tu bibit yang da ciri di tana subur, itu sama deng tu orang-orang yang badengar tu firman kong dia mangarti. So itu dorang hidop iko tu Tuhan pe mau, sama deng tu bibit yang da batumbu sampe babua. Ada yang babua tiga pulu kali lipa, ada tu anam pulu kali lipa deng ada lei tu sratus kali lipa.”

Kong Yesus kase cirita lei prumpamaan laeng pa tu orang banya itu, Dia bilang, “Waktu Tuhan Allah Berkuasa sbagai Raja pa Dia pe orang-orang, de pe keadaan sama deng ni prumpamaan ini: satu hari, ada satu orang da baambor bibit gandum yang bagus pa de pe kobong. Mar satu malam waktu samua orang yang karja di situ da tasono, tu orang yang baambor bibit pe musu datang pa tu orang itu pe kobong. Tu musu pi ambor akang bibit kusu-kusu, abis itu dia pigi. Kong waktu tu bibit gandum batumbu deng mulai babiji, tu kusu-kusu lei mulai muncul. Waktu tu orang yang punya kobong pe orang karja lia tu kusu-kusu itu, dorang pigi pa tu yang punya kobong itu kong babilang bagini, ‘Tuang, torang tau kalu tuang da ambor cuma tu bibit yang bagus di kobong. Mar skarang, kiapa dang sampe so ada kusu-kusu da batumbu di kobong?’
Tu orang yang punya kobong itu bilang pa dorang, ‘Ini samua pasti kita pe musu yang da beking.’
Kong tu dia pe orang karja batanya lei pa dia, ‘Kalu bagitu, apa tuang suka kalu torang mo pi cabu tu kusu-kusu yang ada di kobong?’
Mar tu tuang itu manyao, ‘Ngoni jang beking bagitu. Soalnya kalu ngoni cabu tu kusu-kusu itu, nanti ada tu gandum lei yang mo iko tacabu. Jadi lebe bae se biar jo tu gandum deng tu kusu-kusu itu batumbu sama-sama sampe tu oras panen datang. Kong nanti waktu so oras panen, kita mo suru pa tu orang-orang yang bapanen for kase kumpul dulu tu kusu-kusu, kong ika jadi satu-satu bal for mo bakar. Abis itu baru kase kumpul tu gandum kong pi simpang pa kita pe lumbung.’ ”


Kong Yesus se cirita prumpamaan laeng lei pa dorang. Dia bilang, “Tuhan Allah Berkuasa sbagai Raja pa Dia pe orang-orang, mo jadi bagini: Tuhan pe orang-orang pertama cuma sadiki, itu sama deng tu biji paling kacili yang orang da kase ambor pa de pe kobong. Tu biji itu yang paling kacili dari samua biji. Mar kalu tu biji batumbu, dia jadi tanaman yang lebe basar dari tu tanaman-tanaman laeng di kobong sayor, dia jadi sama deng pohong, so itu burung-burung datang basarang pa de pe cabang-cabang, bagitu lei deng Tuhan pe orang-orang jadi banya sama deng tu biji yang da jadi pohong itu.”
Yesus lei kase tau prumpamaan laeng pa dorang, Dia bilang, “Tuhan Allah Berkuasa sbagai Raja pa Dia pe orang-orang yang dari sadiki orang kong jadi banya, itu bole mo se sama deng ragi sadiki yang satu parampuang da ambe kong kase campur ka ampa pulu liter topong trigu sampe bareis tu adonan.”
Yesus mangajar pa tu orang banya itu pake prumpamaan, Dia nyanda kase tau apa-apa pa dorang kalu nyanda pake prumpamaan. Deng Dia pake prumpamaan rupa itu, so jadi apa tu Tuhan da bilang dulu lewat Dia pe nabi, bagini tu Tuhan Allah da bilang,
“Kita mo babicara pa orang banya pake prumpamaan.
Kita mo kase tau tu hal-hal yang orang blum perna tau dari dulu waktu Kita da beking ni dunia.”

Abis itu, Yesus kase tinggal tu orang banya kong babale ka ruma. Di situ Dia pe murit-murit datang kong babilang, “Guru, co trangkan akang pa torang dang tu arti dari prumpamaan kusu-kusu yang da batumbu di antara gandum di kobong.”
Kong Yesus bilang pa dorang, “Orang yang da baambor tu bibit yang bagus, itu tu Anak Manusia. Tu kobong itu sama deng dunia, kong tu bibit yang bagus sama deng tu orang-orang dari Tuhan Allah yang Berkuasa sbagai Raja. Mar tu kusu-kusu itu sama deng setang pe bos pe orang-orang, kong tu musu yang da baambor tu bibit kusu-kusu, so dia tu setang pe bos. Tu oras panen itu, itu no tu hari kiamat, hari Tuhan mo adili pa samua orang. Kong tu orang-orang yang bapanen itu, so dorang itu tu malaekat-malaekat.
Jadi sama deng tu kusu-kusu yang orang da cabu kong kumpul trus buang di api, bagitu lei no tu mo jadi di hari kiamat. Waktu itu, tu Anak Manusia mo utus De pe malaekat-malaekat. Dorang mo pigi pa tu orang-orang dari Tuhan Allah yang Berkuasa sbagai Raja, kong dari antara pa dorang itu, tu malaekat-malaekat mo se kumpul tu orang-orang yang beking orang laeng berdosa deng tu orang-orang yang ja beking tu jaha. Kong Dia pe malaekat-malaekat itu mo se lego tu orang-orang itu ka dalam tampa yang baapi. Di situ dorang pe siksa skali, dorang mo manangis deng dong pe gigi tabaku goso kong babunyi lantaran pe mendrita skali. Mar tu orang-orang yang ja beking tu butul, dorang mo basinar sama deng matahari di dalam krajaan dari dorang pe Bapa yang Berkuasa sbagai Raja. Jadi sapa tu ada talinga, badengar jo bae-bae!”

Kong Yesus bilang lei, “Kalu Tuhan Berkuasa sbagai Raja pa Dia pe orang-orang, itu sama deng tu prumpamaan ini: ada harta yang orang da tambung di kobong. Satu hari ada satu orang dapa tu harta itu kong dia kase tambung ulang tu harta itu. Tu orang itu pe snang skali kong pi jual samua tu dia punya trus pake tu doi dari hasil da bajual for bli tu kobong itu, supaya tu harta yang da tambung itu jadi dia punya.”
Yesus bilang lei, “Kalu Tuhan Berkuasa sbagai Raja pa Dia pe orang-orang, itu sama lei deng tu prumpamaan ini: ada tu satu orang pedagang da bacari mutiara yang bagus deng mahal for dia mo bli. Waktu dia dapa tu satu mutiara yang bagus deng mahal, dia pi jual samua yang dia punya trus tu doi dari hasil da bajual itu dia pake for bli tu mutiara itu.”

Yesus bilang lei, “Tuhan Allah Berkuasa sbagai Raja de pe keadaan sama deng tu prumpamaan ini: ada tu bebrapa orang buang jala basar ka danau kong dorang dapa macam-macam ikang. Serta tu jala so punung deng ikang, dorang hela tu jala ka pinggir danau. Abis itu dorang dudu kong kase pisa-pisa tu ikang-ikang, yang bagus dorang taru di tampayang, mar tu ikang yang nyanda bagus dorang buang. Bagitu lei no tu mo jadi nanti di hari kiamat, tu hari Tuhan mo adili samua orang. Waktu itu, tu malaekat-malaekat mo datang kong kase pisa tu orang-orang jaha dari tu orang-orang yang ja beking tu butul di muka pa Tuhan. Kong tu malaekat-malaekat mo kase lego tu orang jaha ka dalam tampa yang baapi. Di sana orang-orang manangis deng dong pe gigi tabaku goso kong babunyi lantaran pe mendrita skali.”

Abis itu Yesus batanya pa De pe murit-murit, “Apa ngoni mangarti samua tu prumpamaan-prumpamaan itu yang Kita da kase cirita pa ngoni?”
Kong dorang manyao pa Yesus, “Iyo Guru, torang mangarti.”
Kong Yesus bilang lei pa dorang, “Tiap ahli Taurat yang so trima tu ajaran bagimana Tuhan Allah Berkuasa sbagai Raja, dia itu bole mo se sama deng tu satu tuang ruma yang da simpang barang pa dia pe ruma: dia bole kase kaluar de pe barang-barang berharga yang lama deng lei dia bole kase kaluar de pe barang-barang yang masi baru dari de pe tampa simpang barang.”


Waktu Yesus so klar kase cirita tu prumpamaan-prumpamaan itu, Dia kase tinggal tu tampa itu. Yesus pigi pa Dia pe kampung. Di situ Yesus mangajar pa orang-orang di ruma ibada agama Yahudi. Tu orang-orang yang da badengar pa Dia taheran-heran kong babilang, “Dia tau dari mana stou kang tu ajaran ini? Kong sapa tu da kase kuasa pa Dia for beking tu mujisat-mujisat itu? Padahal Dia itu cuma tukang kayu pe anak. Dia pe mama tu Maria kong Dia pe sudara-sudara laki-laki tu Yakobus, Yusuf, Simon deng Yudas. Samua tu Dia pe sudara-sudara parampuang lei da tinggal sama-sama deng torang di sini. Jadi dari mana Dia bole mo dapa tu ajaran deng kuasa itu?” Kong tu orang-orang nyanda trima pa Dia, so itu Yesus bilang pa dorang, “Di mana-mana orang ja hormat pa nabi, kacuali pa tu nabi pe kampung sandiri deng pa de pe ruma.” So lantaran dorang nyanda percaya pa Yesus, Dia nyanda beking banya mujisat di situ.

နားေထာင္ပါ။ Matius 13