If you have would like a copy of this version please contact info@davarpartners.org

The Gaddi New Testament

This work is licensed under Creative Commons Attribution-ShareAlike 4.0 License.

हप्तै रै पैहलै दिन मरियम मगदलीनी भ्यागा ही नैहरै मन्ज कब्र बलै आई, अतै पत्थर जो कब्रा थऊँ घिरूरा हेरू। ता सो दौड़ी करी शमौन पतरस अतै तैस दूये चेलै सोगी जैडा यीशु रा प्यारा थू, ईच्ची करी बल्लू, “सो प्रभु रै शरीरा जो कब्रा थऊँ कड्ड़ी लेई गै हिन, अतै असिओ ना पता कि तैसिओ कड्ड़ी रखी दिता हा।”
ता पतरस अतै दुआ चेला कब्रा री कनारी चलै। सो सोगी सोगी दौडू करदै थियै, पर दुआ चेला पतरस थऊँ अगो चली करी कब्रा मन्ज पैहलै पुजु; अतै टेकीकरी कफणा री कनारी हेरू, तांभी सो अन्दर ना गो। ता शमौन पतरस तसेरै पिचो पिचो पुजु ता, कब्रा मन्ज अन्दरा जो गो अतै तिनी औढ़ण पैऊरै हेरै; अतै सो परना जैडा तसेरै मुण्डा सोगी बनुरा थू, औढ़णा सोगी ना पर अलग जगह लपेटी के थैऊँरा हेरू। ता दुआ चेला भी जैडा कब्रा पुर पैहलै पुजुरा थू, अन्दर गो अतै हेरी करी विस्वास करू। ऐह ता हालि तिकर पवित्रग्रन्था री गल्ल ना समझै थियै कि तैसिओ मरी के जी भूणा भोला।
ता ऐह चेलै अपणै घरा जो फिरी गै।


पर मरियम रूंदी कब्रा रै नेड़ै ही बाहर खड़ी रैई, अतै रूंदै रूंदै कब्रा री कनारी टेकीकरी हेरू,
ता दोई स्वर्गदूत चमकदै औढ़ण लाऊरै अक्की जो सराणै अतै दूये जो पैरा री कनारी बैहुरै हेरू, जैड़ी यीशु री लाश रखुरी थी।
तियैं तैहा जो बल्लू, “ओ जनानी, तू कजो रोऊ करदी हा?” तैहै तियां सितै बल्लू, “सो मेरै प्रभु जो चुक्की लेई गै हिन अतै अऊँ ना जाणदी कि तैसिओ कड्ड़ी रखूरा हा।” ऐह बली करी सो पचूँह मुड़ी अतै तैहै यीशु जो खडुरै हेरू, पर पच्छैणी ना पाई की यीशु हा।
यीशुऐ तैहा जो बल्लू, “ओ जनानी, तू कजो रूंदी हा? कसिओ तोपदी हा?” तैहै माली समझी करी तैस सोगी बल्लू, “हे स्वामी, अगर तैंई तसेरै शरीरा जो चुक्की लैऊरा हा ता मिन्जो दस्सी दे कि तैसिओ कड्ड़ी रखूरा हा, अतै मुँ सो लेई गाणा।”
यीशुऐ तैहा सोगी बल्लू, “मरियम!” तैहै पिचो मुड़ीकरी तैस सोगी इब्रानी बोली मन्ज बल्लू, “रब्बूनी” मतलब “हे गुरू”।
यीशुऐ तैहा सोगी बल्लू, “मिन्जो पकड़ी मत रख, क्ओकि अऊँ हालि तिकर पिता बलै ऊपर ना गच्छुरा हा, पर मेरै भाई बलै गिचीकरी तियां सितै बली दे, कि अऊँ अपणै पिता अतै तून्दै पिता, अपणै प्रमात्मैं अतै तून्दै प्रमात्मैं बलै ऊपर चलूरा हा।”
मरियम मगदलीनी गिच्ची करी चेलै जो दस्सु, “मैंई प्रभु जो हेरू हा, अतै तिनी मिन्जो सोगी ऐह गल्ला करी।”


तैस दिन ही जैडा हप्तै रा पैहला दिन थू, सझां रै टैमैं जैड़ी चेलै थियै तियैं तैड़ीआ रै दार यहूदी रै डरा रै बन्द करूरै थियै, तैहणै यीशु तियां मन्‍झै ईच्ची खडू अतै तियां सितै बल्लू, “तुसिओ शान्ती मुळा।” ऐह बली करी अपणा हत्थ अतै अपणी प्रहि तियां जो दस्सी। ता चेलै प्रभु जो हेरी करी खुश भूच्ची गै।
यीशुऐ फिरी तियां सोगी बल्लू, “तुसिओ शान्ती मुळा; जियां पितै मिन्जो भैजुरा, तियां ही अऊँ भी तुसिओ भैजदा।” ऐह बली करी तिनी तियां पुर फूक मारी अतै तियां सितै बल्लू, “पवित्र आत्मा लेआ। जंयारै पाप तुहै माफ करलै, सो तियां तांयें माफ भूच्ची गै; जसेरै तुहै रखै, सो रखी गै हिन।”

पर बारह मन्ज अक्क, मतलब थोमा जैसियो दिदुमुस बलदै थियै, जैहणै यीशु आ थू ता सो तियां सोगी ना थू।
जैहणै होर चेलै तैस सोगी बलणा लगै “अहै प्रभु जो हेरू हा,” ता तिनी तियां सितै बल्लू, “जैहणै तक अऊँ तसेरै हत्था मन्ज मेखा रै भोक्क ना हेरी लैऊ, अतै तियां मेखा रै भोक्का मन्ज अपणी उँगळी ना पाई लैऊ, अतै तसेरी प्रहि मन्ज अपणा हत्थ ना पाई लैऊ, तैहणै तक मुँ विस्वास ना करना।”
अठ दिन बाद तसेरै चेलै फिरी घरा अन्दर थियै, अतै थोमा भी तियां सोगी थू; अतै दार बन्द थियै, ता यीशु आ अतै तंयारै मन्जै खड़ी करी बल्लू, “तुसिओ शान्ती मुळा।” ता तिनी थोमा सोगी बल्लू, “अपणी उँगळी ऐड़ी लेई करी मेरा हत्था जो हेर अपणा हत्थ लेई करी मेरी प्रहि मन्ज पा, अतै अविस्वासी ना पर विस्वासी बण।”
ऐह हुणी करी थोमे जवाव दिता, “हे मेरै प्रभु, हे मेरै प्रमात्मां!” यीशुऐ तैस सोगी बल्लू, “तैंई मिन्जो हेरूरा हा, कै ठेरैतांये विस्वास करू हा? धन्य सो हिन जियें बिना हेरै विस्वास करू।”

यीशुऐ होर भी मतै सारै चमत्कार चेलै रै सामणै दसै, जैड़ै ऐस कताबा मन्ज लिखुरै ना हिन; पर ऐह ठेरैतांये लिखै हिन कि तुहै तैस पुर विस्वास करन कि यीशु मसीह ही प्रमात्मैं रा पुत्र हा, अतै तैस पुर विस्वास करीके तसेरै नां सितै जिन्दगी पान।

နားေထာင္ပါ။ यूहन्‍ना 20