Yala - 1979 BSNIG (NT) Non Drama

Yɛ̄grāa ɔla̍ā nīi Ihɛ̍rɔ̄ɔdi nīi - ɔchwɔ̄lɛ̍ yī Iga̍līli ma̍ po̍ ohu yī Iji̍sɔ̄ɔsi a̍nɛ. O̍ ka de ɛgabɔ̄ yī nū ɔpɔ̄ɔpɛ̄ ka Ijɔ̍ɔn Ohuyenyi ɔ̍lɔ hye̍ēyī la okū ke̍e̍ hɔ̄ aa̍ a̍nɛ. Wu̍chē yī ɔla̍ā ɔ̍lɔ - ohu̍ nīi wɔhu̍ ɛla̍ā wa̍a̍ ɔ̍lɔ yɛ aa̍ ē ya̍ u̍ku̍rɔ̍ la ibi̍īyē yī ɔ̍lɔ a̍nɛ.
Ihɛ̍rɔ̄ɔdi ɔlɔjā ka nīi e̍ de Ijɔ̍ɔn ku̍, tū ɔ̄ agba̍, bī ɔ̄ ge̍ tū la igbakɔbɔ a̍nɛ. O̍ ya̍ i̍ngɔ̍ɔ wu̍chē yī Ihɛrɔ̍dīyasi nīi - ɔnyā yī Ifi̍līipu ɔɔ̍nɛ̍ yī nū o̍bū ma̍. Ijɔ̍ɔn ē ka tāa Ihɛ̍rɔ̄ɔdi ka ɔ̍lɔ i̍ ngma̍ nīi ɔ̍lɔ ē wu̍ Ihɛrɔ̍dīyasi - ɔnyā yī ɔɔ̍nɛ̍ yī ɔ̍lɔ ni̍. Ihɛ̍rɔ̄ɔdi chikpo̍ ge̍ de Ijɔ̍ɔn ngmo̍; o̍ chī de tūuhwi, wu̍chē oji̍ nɛ, āchɛ yī Iju̍u wa̍a̍ nāa Ijɔ̍ɔn bāa ɔ̄chɛ ɔkɛrɔ̄ yī Ɔwɔ de āchɛ ma̍.
I̍chi̍chɛ ɔha̍, Ihɛ̍rɔ̄ɔdi yɛ ē ya̍ ɔwɔ̄wīyā yī lɛ̍yi̍ yī ɔmɔ̄ma yī nū; ɔyi̍ yī Ihɛrɔ̍dīyasi ɔnɔ̄nyā bīyɛchɛ ge̍ jēejē la ɔgbādu. Ihɛ̍rɔ̄ɔdi lɛ ɔwɔ̄wīyā kpɛ̍ɛji; o̍ choko̍o, gbyɛka hīka ɔjāmɔjā nīi ɔyi̍ ɔnɔ̄nyā ɔla̍ā ɔ̍lɔ ge̍ chikpo̍, anɔ̍lɔ ge̍ē de ē de ɔ̍lɔ.
Lɔkɔ nīi ɛ̍nɛ̍ yī nū ta̍ ɔ̄ tū ka ɔ̍lɔ ge̍ ka ma̍, ɔyi̍ ɔla̍ā gāa ge̍ ka de Ihɛ̍rɔ̄ɔdi ka ɔ̍lɔ ge̍ de īkplɛ̄hu̍ yī Ijɔ̍ɔn Ohuyenyi de anu̍. Ɔ̍lɔ ge̍ de tū la u̍kpu̍ūhā bī ge̍ de anu̍ u̍ma̍ama.
Lɛlā nūma̍ ta̍ Ihɛ̍rɔ̄ɔdi anyī kpɛ̍ɛji. Wu̍chē yī oko̍o nīi o̍ che, gbyɛka i̍ngɔ̍ɔ la iyɔ̄bū yī āchɔga yī nū ma̍, o̍ ka ɛ̍lɛ ge̍ gāa ge̍ ya̍ lɔkɔ nīi ɔyi̍ ɔ̍lɔ chikpo̍ ma̍. I̍ngɔ̍ɔ nīi o̍ lɛ nīi e̍ de Ijɔ̍ɔn Ohuyenyi hlɛ̍hu̍ abɔ̍ɔ la igbakɔbɔ a̍nɛ. E̍ de īkplɛ̄hu̍ yī nū tū la u̍kpu̍ūhā bī ge̍ de ɔyi̍ ɔnɔ̄nyā ɔla̍ā. Ɔyi̍ ɔlɔjā de nāa ge̍ de Ihɛrɔ̍dīyasi ɛ̍nɛ̍ yī nū bɛ̍ɛ̄nɛ̄. A̍chi̍kpo̍ yī Ijɔ̍ɔn gāa ge̍ de okū yī Ijɔ̍ɔn nāa ge̍ nyi. E̍ pīya ge̍ de koko̍o de Iji̍sɔ̄ɔsi.


Iji̍sɔ̄ɔsi plɛ̍ɛ̄lā nūma̍ ma̍, o̍ pīya hī ɛbɛ ɔla̍ā la wɔwu̍ ga lipu̍ a̍chi̍ chukuru lōri̍īnū. Āchɛ ɛla̍ā wa̍a̍ po̍ i̍ngɔ̍ɔ ma̍, e̍ pīya hī ipwo̍gra yī wā de ku ɔ̍ gānyɔ̄. Aa̍ ga la yɛchɛchɛ gānyɔ̄. Iji̍sɔ̄ɔsi bīyɛchɛ hī wɔwu̍ ge̍ ma̍ yɛ̄mɛ̄ āchɛ ɛla̍ā nīi gblāa abɔ̍ɔ ma̍, e̍ de ya̍ ɔ̄ lɛhɛ̍ha̍. O̍ nyiya aa̍ iyē oko̍ōku̍ yī wā wa̍a̍.
La ɔ̄nɛ̄ ɔla̍ā, a̍chi̍kpo̍ yī nū gāa dikpo̍ba̍ ɔ̄ ge̍ da ɔ̍ hīka, “Yɛ̄grāa de hɛ̍ga mɛ̍/. Ɛbɛ nūma̍ chī lipu̍ a̍chi̍ chukuru nɛ. Ka nīi āchɛ nūma̍ ge̍ pīya, hɛ̄ɛbɛ nīi e̍ ge̍ ga wɔlɛ̍ɛchɛ ɔha̍ ge̍ ra̍ ojōre̍ re̍ la abɔ̄ yī wā.”
Iji̍sɔ̄ɔsi hīya aa̍ ɔkɔ hīka, “Ɔpīya i̍ngɔ̍ɔ ge̍ ya̍ oji̍ nɛ? Ala̍ ɛlɛjā, ala̍ ā de ojōre̍ de wa̍ nīi e̍ ge̍ re̍.”
E̍ koko̍o de Iji̍sɔ̄ɔsi hīka ibrɛ̍ɛdi ɛrwɔ̄ ba̍la ɛbɛ̍yēenyi īkpɛ̄ɛpa ɔbɔbɔ nīi aɛ̍lɛ bī amu a̍nɛ/.
Iji̍sɔ̄ɔsi de wa̍ ka ɛ̍lɛ ge̍ bī wā ge̍ de anu̍. O̍ koko̍o de āchɛ ɛla̍ā ka ɛ̍lɛ ge̍ hyāhɔ̄ wa̍a̍ abɔ̍ɔ la īkpāa̍chi̍. O̍ nāa ākpā yī ibrɛ̍ɛdi ɛrwɔ̄ ɔla̍ā ba̍la ɛbɛ̍yēenyi īkpɛ̄ɛpa ɔla̍ā bī la abɔ̄. O̍ hu eyī hwa̍a̍ ga ichō, da Ɔwɔ o̍be. O̍ de ibrɛ̍ɛdi ɛla̍ā hɛ̍ wa̍a̍, de nāa de a̍chi̍kpo̍ yī nū; a̍chi̍kpo̍ yī nū de kɔ̄ de āchɛ ɛla̍ā wa̍a̍ bɛ̍ɛ̄nɛ̄. Ɔ̄chɛmɔ̄chɛ re̍ ojōre̍ ɔla̍ā nīi o̍ jɛ̄ ɔ̄ hwɔhi hwɔhi. A̍chi̍kpo̍ yī nū kpo̍ irwi yī ojōre̍ nīi jɛ̄ wā hōhī ma̍ tū la obri̍bri̍ igwo̍lɛpa mōmu-mōmu. Āchɛ nīi re̍ ojōre̍ ɔla̍ā ma̍ gbajɛ la āchɛ u̍nɔ igwo̍lɛpa che āchɛ ohu igwo̍; anyā ba̍la aɛ̍pɛ̄ i̍ tū ni̍.


Iji̍sɔ̄ɔsi ka nīi a̍chi̍kpo̍ yī nū gatū la wɔwu̍ nīi e̍ ge̍ē bī yɛ ē ga oe̍ ɔla̍nū yī li̍hu ē yɔbū de ɔ̍. Anu̍ ma̍ ge̍ē hɔ̄ abɔ̍ɔ ē ka nīi āchɛ ɛla̍ā pīya. O̍ ka nīi e̍ pīya wa̍a̍ ma̍, anu̍ lōri̍īnū pīya ga u̍kpo̍chi ɔha̍ ge̍ē jɔhā. Ɔ̄nɛ̄ de gbo mɛ̍, Iji̍sɔ̄ɔsi chī e̍e hɔ̄ abɔ̍ɔ lōri̍īnū we̍. Yɛ̄grāa ɔla̍ā, wɔwu̍ yī a̍chi̍kpo̍ yī nū yɛ hwɛɛ abɔ̍ɔ lipu̍ yī li̍hu mɛ̍. A̍kpa̍yēenyi yɛ ē dra̍ wɔwu̍ ɔla̍ā kpɛ̍ɛ bāa ogbo̍gbogbo̍ ma̍; wu̍chē oji̍ nɛ, ahuhu yɛ ē gwō pīyeyīta̍ wā. Yɛ̄grāa yī otu̍ obūrɔ̍ɔ̄chī bāa oje ɛta̍ ge̍ chɛ̄ la oje erīiyī ma̍, Iji̍sɔ̄ɔsi pīya gāa dikpo̍ba̍ wā. O̍ yɛ ē yɛɛ la ichō yī yenyi i̍ngɔ̍ɔ ke̍e̍. A̍chi̍kpo̍ yī nū ma̍ ɔ̄ nīi o̍ yɛ ē yɛɛ la ichō yī yenyi ma̍, e̍ de kpo̍ tūuhwi ɔlamu-ɔlamu. E̍ to̍ohwe̍e luhwi-luhwi ka ɔ̍lɔ ge̍ wo̍o̍! Ɔ̍lɔ - okū nɛ oo!
Iji̍sɔ̄ɔsi ka grāa aa̍ ɔpɔ̄ɔpɛ̄ hīka, “Ala̍ ā tu̍ ūkpɔ̄tū chɛ̄, ma̍a ami nɛ! Ala̍ e̍e tūuhwi ni̍!”
Ipi̍ta hu oko̍o kpa̍ ka bɛ̍ɛ̄nɛ̄ hīka, “Ādā be̍e! O̍ ge̍ - awɔ ichɛ̄ɛhi, ɔ̍lɔma̍ ka hɛ̄ɛbɛ nīi n ā yɛ grāa awɔ wā la ichō yī yenyi gɛ e̍ē!”
Iji̍sɔ̄ɔsi da ɔ̍ ka ɔ̍lɔ ge̍ yewā gɛ! Ipi̍ta bīyɛchɛ hī wɔwu̍ ɔpɔ̄ɔpɛ̄ che ga yenyi ke̍e̍, yɛɛ la ichō yī yenyi yɛ grāa Iji̍sɔ̄ɔsi bɛ̍ɛ̄nɛ̄. O̍ ma̍ ahuhu ɔla̍ā wa̍a̍ ma̍, o̍ chōo̍chē de tūuhwi. Yenyi gbotū la anu̍; Ipi̍ta to̍ohwe̍e ka ɔ̍lɔ ge̍ Ādā, ɔ̍lɔ ge̍ hɛ̍ anu̍ ta̍ gɛ!
Ɔpɔ̄ɔpɛ̄, Iji̍sɔ̄ɔsi nā abɔ̄ kpaa ku̍ ɔ̄. Iji̍sɔ̄ɔsi da ɔ̍ hīka, “Ipi̍ta, ɔtū ode chōche yī wɔ ma̍ bi̍hi chɔ̍ɔ! Oji̍ - ohu̍ nīi a hi̍yɛ̄ngura ma̍?”
Aa̍ āchɛ ɛpɛpa ku̍chē ge̍ gatū la wɔwu̍ bɛ̍ɛ̄nɛ̄. Ahuhu ɔla̍ā wa̍a̍ hīya i̍ngɔ̍ɔ brɛɛ ɔpɔ̄ɔpɛ̄. A̍chi̍kpo̍ yī nū nīi tū abɔ̍ɔ la wɔwu̍ ma̍ de lɛhu̍ gbo ajɛ ya̍ otūlichō de Iji̍sɔ̄ɔsi. E̍ ka ɔ̍lɔ ge̍ ēē! Ɔ̍lɔ - Ɔyi̍ yī Ɔwɔ ichɛ̄ɛhi-ichɛ̄ɛhi nɛ.


E̍ hɛ̍ li̍hu ārɛ̄ wa̍a̍ ge̍ gbajɛ la ɔcha yī Igɛnɛ̍sārɛti. Alɛbɛ ɔla̍ā jo̍ōkū yī Iji̍sɔ̄ɔsi ɔpɔ̄ɔpɛ̄. E̍ rɛ̄ɛnya ta̍ ɛbɛbɛ ta̍ wa̍a̍ abɔ̍ɔ la ɔta̍kakatū yī ɔcha ɔla̍ā, kpo̍ aliyē oko̍ōku̍ ge̍ de Iji̍sɔ̄ɔsi. E̍ ra̍ābɔ̄ de ɔ̍ ka ɔ̍lɔ ge̍ pi̍ye̍mā nīi aliyē oko̍ōku̍ ɛ̍lɛ ge̍ de abɔ̄ gwō ahu̍ yī ɔjā otūlibi̍īyē yī ɔ̍lɔ ji. Āchɛ nīi de abɔ̄ gwō ɔ̄ wa̍a̍ ma̍ de lɛ cha̍cha̍ ke̍e̍.

နားေထာင္ပါ။ Ima̍tiyu 14