Yala - 1979 BSNIG (NT) Non Drama

Iji̍sɔ̄ɔsi kwɛ̍ɛjī lɛlā ɔla̍ā wa̍a̍ la ongū wā ongōngū ma̍, o̍ ka de a̍chi̍kpo̍ yī nū hīka, “Je̍ka aa̍ ala̍ jo̍ōkū hīka o̍ hī ɔ̄chī ɛpa nīi Ɔwɔ̄wīyā yī Owu̍lā ge̍ē kū! E̍ ge̍ē ku̍ Ɔyi̍ yī Ɔngrɔ̄ɔ ē wa̍ābɔ̄ la anu̍ nīi e̍ ē de ɔ̍ ē gwōba̍ la ɔchi̍ ɔhrɛ̍ɛpa.”
Bɛ̍ɛ̄nɛ̄ ma̍, alɛhu̍ aligbe ba̍la ɛgabɔ̄ yī Iju̍u wa̍a̍ gāa ge̍ lɛ ogrēeyī la ipwɔ̍ɔ̄nū yī Ike̍yāfasi nīi - A̍dā Aligbe ma̍. E̍ ya̍ ɔmɔ̄miya lɔkɔ nīi e̍ ge̍ē ku̍ Iji̍sɔ̄ɔsi ge̍ē ngmo̍ lɛ̍bɛ̍ba ma̍. E̍ ka hīka aɛ̍lɛ i̍ ge̍ē ku̍ ɔ̍lɔ yɛ̄grāa yī Ɔwɔ̄wīyā yī Owu̍lā ɔla̍ā ni̍, nɛ̄ni̍ āchɛ ɛ̍lɛ ge̍ē de ɛbɛ ē ti̍ya ē tū.


Yɛ̄grāa ɔha̍, Iji̍sɔ̄ɔsi hɔ̄ abɔ̍ɔ la Ibɛ̍tāni la wɔlɛ̍ yī Isa̍yi̍mɔ̄ɔn nīi - olimada ma̍. Ɔnyā ɔha̍ wā abɔ̍ɔ dikpo̍ba̍ ɔ̄. Ɔnyā ɔla̍ā bī yanɔ̄ oni̍pī kwɛ̍kwɛ̍ ɔha̍ nīi ē lwɔ̍la̍ gba̍a̍ ma̍ wā. O̍ tū lipu̍ yī agbɔtū onīchi̍chɛ̍ ɔha̍ nīi e̍ ya̍ la alaba̍si̍ta ma̍. O̍ de yanɔ̄ ɔla̍ā chīyēkla̍ Iji̍sɔ̄ɔsi la īkplɛ̄hu̍ wa̍a̍, yɛ̄grāa nīi Iji̍sɔ̄ɔsi hɔ̄ abɔ̍ɔ ē re̍ ojōre̍ ma̍. A̍chi̍kpo̍ yī Iji̍sɔ̄ɔsi ma̍ i̍ngɔ̍ɔ ma̍, o̍ wu̍ wā ɔtū gba̍a̍. Oji̍ nīi ɔ̍lɔ de ɔjā nūma̍ ē bīya i̍ngɔ̍ɔ ji ma̍/? Ɔjā nīi - ɔ̍lɔ ge̍ē gbo okpo ɔha̍ ke̍ke̍ni̍ nīi ɛ̍lɛ ē de okpo ɔla̍ā tū alyeklo̍ wɔbɔ̄ ma̍?
Iji̍sɔ̄ɔsi jo̍ōkū yī ɔjā nīi e̍ yɛ ē ka ma̍ ɔpɔ̄ɔpɛ̄. Iji̍sɔ̄ɔsi da wa̍ bɛ̍ɛ̄nɛ̄ hīka, “Oji̍ - ohu̍ nīi ala̍ ē ti̍ya ɔnyā nūma̍ ūkpɔ̄tū tū ma̍? Lɛlā ɔnɛ̄ɛhɛhi ɔlamu-ɔlamu nīi o̍ chī ya̍ de u hɔ̄ ma̍ a̍nɛ. Alyeklo̍ ma̍ chī ge̍ē gblāa amu ba̍la ala̍ myɛ̄grāa-myɛ̄grāa. Ami i̍ chī ge̍ē hɔ̄ amu ē tāa ala̍ i̍ngɔ̍ɔ ni̍. Ɔjā nīi o̍ ya̍ hɔ̄ ma̍ de yanɔ̄ chīyēkla̍ ami la ibi̍īyē ma̍, okū yī u nīi o̍ yɛ ē gbɔ̍ɔ̄gbla̍a ē lā tīgbē yī onyōnyi a̍nɛ. Lēchi̍-lēchi̍, n ā koko̍o de ala̍! Ɛbɛha̍-ɛbɛha̍ amu lipu̍ yī yɛchɛ wa̍a̍ nīi e̍ ge̍ bī Wɔ̄kā Ɔlwɔnyɛ yī Ɔwɔ nūma̍ ge̍ ka ma̍, lɛlā nīi o̍ ya̍ hɔ̄ ma̍ ma̍, e̍ ge̍ē lɛ ɔbɔ̄bla yī nū.”


Bɛ̍ɛ̄nɛ̄ ma̍, ɔ̄chɛ ūkpo̍he lipu̍ yī a̍chi̍kpo̍ yī nū āchɛ igwo̍lɛpa wā ge̍ pīya dikpo̍ba̍ alɛhu̍ aligbe. O̍ re̍ka Iju̍dasi Isikɛ̍rīyɔti. O̍ ka de wa̍ hīka oji̍ nīi ɛ̍lɛ ge̍ē de ē de anu̍ ma̍, hɛ̄ɛbɛ nīi anɔ̍lɔ ge̍ ku̍ Iji̍sɔ̄ɔsi de ɛ̍lɛ? E̍ gāa ge̍ de okpo yī isi̍li̍ba ohu che igwo̍ kɔ̄ka nāa tū ɔ̄ la abɔ̄. Bū la yɛ̄grāa ɔla̍ā, Iju̍dasi yɛ ē deyīrɛ ge̍ē ma̍ yɛ̄grāa ɔnɛ̄ɛhɛhi hɛ̄ɛbɛ ē chɔ̄ɔwɛ ē tū Iji̍sɔ̄ɔsi bɛ̍ɛ̄nɛ̄.


La ɔ̄chī ɔrāarāa yī ɔwɔ̄wīyā Ɔla̍ā Nīi Ibrɛ̍ɛdi yī Nū I̍ tū Ɔjā Obī Ɔ̄ Nōnū Ni̍ Ma̍, a̍chi̍kpo̍ yī Iji̍sɔ̄ɔsi gāa dikpo̍ba̍ ɔ̄ ge̍ che ɔ̍ ikpo̍ hīka aba̍ nīi ɔ̍lɔ chikpo̍ nīi aɛ̍lɛ ge̍ē ya̍ ojōre̍ ɔ̄nɛ̄ yī Ɔwɔ̄wīyā yī Owu̍lā nūma̍ ē lā tīgbē yī ɔ̍lɔ ma̍?
Iji̍sɔ̄ɔsi koko̍o de wa̍ bɛ̍ɛ̄nɛ̄ hīka, “Ala̍ ā ga ɛbɛ yī ɔ̄chɛ nūma̍ i̍ngɛ̍ɛ̄nɛ̄-i̍ngɛ̍ɛ̄nɛ̄ abɔ̍ɔ la ipwɔ̍ɔ̄lɛ̍. Ala̍ ā ka de ɔ̍ hīka, ‘Ɔngūlɛ̄lā ka hīka yɛ̄grāa yī anu̍ ɔ̍lɔ de gbajɛ mɛ̍. Anu̍ ba̍la a̍chi̍kpo̍ yī anu̍ ɔ̍lɔ ge̍ē re̍ Ɔwɔ̄wīyā yī Owu̍lā nūma̍ amu la wɔlɛ̍ yī aɔ̍lɔ.’ ”
A̍chi̍kpo̍ yī Iji̍sɔ̄ɔsi pīya gāa ge̍ ya̍ lɔkɔ nīi Iji̍sɔ̄ɔsi ka ma̍. E̍ de ojōre̍ ɔ̄nɛ̄ yī Ɔwɔ̄wīyā yī Owu̍lā ɔla̍ā ya̍ lā abɔ̍ɔ bɛ̍ɛ̄nɛ̄.
Ɔ̄nɛ̄ wā ge̍ de gbo ma̍, Iji̍sɔ̄ɔsi ba̍la a̍chi̍kpo̍ yī nū gāa ge̍ gblāa abɔ̍ɔ ge̍ē re̍ ojōre̍ bɛ̍ɛ̄nɛ̄. E̍ yɛ ē re̍ ojōre̍ ma̍, Iji̍sɔ̄ɔsi ka de wa̍ hīka, ɔ̄chɛ ɔha̍ lipu̍ yī ɛ̍lɛ yɛ amu ge̍ē chɔ̄ɔwɛ ē tū anu̍.
Lɛlā ɔla̍ā ti̍ya a̍chi̍kpo̍ yī nū ūkpɔ̄tū tū kpɛ̍ɛji, Ɔnyɔnyɛ kū abɔ̍ɔ ē ka hīka, “O̍ i̍ chī - aa̍ ami ni̍ mɛ̍, Ādā!”
Iji̍sɔ̄ɔsi koko̍o de wa̍ bɛ̍ɛ̄nɛ̄ hīka, “Ala̍ ma̍ ko̍ō! Ɔ̄chɛ nīi ge̍ē de ibrɛ̍ɛdi ē ku ɔrɔ̄ la u̍kpu̍ūhā ūkpo̍he nūma̍ ba̍la ami ma̍, anu̍ ge̍ē chɔ̄ɔwɛ ē tū u a̍nɛ. Ɔyi̍ yī Ɔngrɔ̄ɔ ma̍ ge̍ē pīyaku̍ lɔkɔ nīi Īpū yī Ɔwɔ ka ɔ̍lɔ ge̍ ku̍ ma̍. I̍īyo̍ de ɔ̄chɛ ɔla̍ā nīi ge̍ē chɔ̄ɔwɛ ē tū ɔ̄ ma̍! E̍ i̍ ge̍ ma ɔlɔjā we̍ ni̍ nɛ, o̍ ge̍ hwɔhi fi̍yɛ̍ de ɔlɔjā!”
Iju̍dasi hu oko̍o kpa̍ ka hīka, “Ami nɛ, Ɔngūlɛ̄lā?”
Iji̍sɔ̄ɔsi hīya anu̍ ɔkɔ hīka, “I̍ngɔ̍ɔ nīi a ka a̍nɛ.”


E̍ yɛ ē re̍ ojōre̍ ma̍, Iji̍sɔ̄ɔsi nāa ibrɛ̍ɛdi bī la abɔ̄. O̍ jɔhā da Ɔwɔ o̍be ma̍, o̍ de hɛ̍, de nāa de a̍chi̍kpo̍ yī nū. O̍ ka hīka, “Ala̍ ā nāa re̍, ma̍a ibi̍īyē yī u hɔ̄ ma̍ a̍nɛ!”
O̍ wā ge̍ nāa ɔgba̍galā yī ɛ̍mwɔ̄ bī la abɔ̄. O̍ da Ɔwɔ o̍be bɛ̍ɛ̄nɛ̄ ma̍, o̍ nāa de wa̍. O̍ ka hīka, “Ala̍ wa̍a̍, ala̍ ā nāa gwa̍! Yeyī yī u nīi hu̍ nīi yɛka ɔgwɔ̍ɔ̄gwa̍ yī Ɔwɔ de lwɔhu̍ brii ma̍ hɔ̄ ma̍ a̍nɛ. Yeyī yī u nūma̍ nīi n hu ē hunū de āchɛ yɛ̄mɛ̄mɛ̄, hɛ̄ɛbɛ ge̍ē de lɛlā ɔdwɔ̄bi̍ wa̍a̍ ē ngmo̍nyi̍ a̍nɛ. N ā koko̍o de ala̍! N i̍ ge̍ē gwa̍ ɛ̍mwɔ̄ nūma̍ ē gɛ ni̍, kpɛ̍ɛ ē gbo̍ ɔ̄chī ɔla̍ā nīi n ge̍ē gwa̍ ɛ̍mwɔ̄ onīpīpɛ̄ ba̍la ala̍ abɔ̍ɔ la ɛbɛ yī Ɔchwɔ̄lɛ̍ Oro̍ōre̍ yī A̍dā yī u.”
Bɛ̍ɛ̄nɛ̄, e̍ wā ge̍ gwe̍ejē kā Ɔwɔ ɔkɔ̄kā, o̍bū nīi e̍ wā ge̍ pīya ga Yɛwu yī O̍līifu.


Iji̍sɔ̄ɔsi koko̍o de wa̍ bɛ̍ɛ̄nɛ̄ hīka, “I̍chɛ la otu̍ nūma̍, ala̍ wa̍a̍ ge̍ē gwɛ̍ɛnya ē pīya ē hī u. Wu̍chē oji̍ nɛ, Īpū yī Ɔwɔ ka hīka, Ɔwɔ ɔ̍lɔ ge̍ē de ɔ̄chɛ ɔgbyɛ̄wū ngmo̍ ma̍, ribi yī yɛwū ɔla̍ā wa̍a̍ ɔ̍lɔ ge̍ē mīyanya. N ge̍ hye̍ēyī la okū wā la ɔhɔ̄leyī mɛ̍, n ge̍ē yɔbū de ala̍ ē gāa Iga̍līli.”
Ipi̍ta hu oko̍o kpa̍ ka de Iji̍sɔ̄ɔsi hīka, “Āchɛ ehēhī ge̍ pɔ̄pīya hī wɔ cha̍cha̍, ami i̍ ge̍ē pīya ē hī wɔ ge̍ē gbo̍ ni̍.”
Iji̍sɔ̄ɔsi da ɔ̍ bɛ̍ɛ̄nɛ̄ hīka, “Ma̍a ko̍ō, Ipi̍ta! O̍bū nīi obu̍ūgū ge̍ē tɛ̄ra̍ la otu̍ oli̍chɛ nūma̍, a ge̍ē ta̍ahu̍ igbɛta̍ hīka aɔ̍lɔ i̍ je̍ amɔ̍lɔ ni̍.”
Ipi̍ta gba̍a ka de ɔ̍ hīka, “N ge̍ yɛ ge̍ē pɔ̄pīya ē ku̍ ba̍la awɔ, n i̍ ge̍ē ka hīka n i̍ je̍ wɔ ni̍ ge̍ē gbo̍ ni̍.”
A̍chi̍kpo̍ yī Iji̍sɔ̄ɔsi āchɛ ehēhī wa̍a̍ titi ka i̍ngi̍ngɔ̍ɔ.


Iji̍sɔ̄ɔsi wā ge̍ pīya ba̍la a̍chi̍kpo̍ yī nū ga ɛbɛ ɔha̍ nīi re̍ka Igɛsɛ̍māni ma̍. O̍ ka de wa̍ hīka, “Ala̍ ā hɔ̄ amu u̍ma̍ nīi n ā ga iyɔ̄bū a̍nū ge̍ jɔhā.” Iji̍sɔ̄ɔsi bī Ipi̍ta ba̍la ayi̍ yī Ijɛ̍bɛ̄di āchɛ ɛpɛpa yɛ. Īlāanyī ba̍la ūkpɔ̄tū ɔti̍yatū wā la anu̍ bɛ̍ɛ̄nɛ̄. O̍ koko̍o de wa̍ hīka, “Īlāanyī yɛ amu ē lā u kpɛ̍ɛ bɔ̄ɔjā nīi o̍ ge̍ē de u ē ngmo̍ ma̍. Ala̍ ā gblāa amu u̍ma̍ nīi ala̍ ge̍ deyīrɛ tāa ami.”
O̍ yɛ ga iyɔ̄bū pi̍nyɛ̍ ma̍, o̍ pu̍ kpɛ̍ɛ̍ de eyī kla̍ ajɛ, jɔhā de Ɔwɔ hīka, “Ɔwɔ A̍dā yī u! O̍ ge̍ yɛ ge̍ē ngmɛ̍rɛ̍ ē mɛ, ɔ̍lɔma̍ de ɔgba̍galā yī ichi̍ nūma̍ nāa hī u. A ā chī ya̍ lɔkɔ nīi ami chikpo̍ ma̍ ni̍, ya̍ lɔkɔ nīi awɔ ɔlɔjā chikpo̍ ma̍.”
Iji̍sɔ̄ɔsi ku̍chē wā la ɛbɛ yī a̍chi̍kpo̍ yī nū āchɛ ɛta̍ ɛla̍ā ge̍ ma̍ wā nīi e̍ gbwɔlā gblāa abɔ̍ɔ. O̍ da Ipi̍ta hīka, “Oji̍ - ohu̍ nīi ala̍ i̍ hīyɛchɛ tāa ami yɛ̄grāa pi̍nyɛ̍ mɛ ni̍ ma̍/? Ala̍ ē deyīrɛ; ala̍ ē jɔhā, hɛ̄ɛbɛ nīi ala̍ ge̍ e̍e gwāajɛ la otu̍tū ni̍. Uhu ma̍ chikpo̍ ge̍ē ya̍ i̍ngɔ̍ɔ, ibi̍īyē ɔlamu lɛ kwīkwī a̍nɛ.”
Iji̍sɔ̄ɔsi gba̍a pīya ge̍ jɔhā o̍mgbo̍mɛpa hīka, “Ɔwɔ A̍dā yī u, ɔgba̍galā yī ichi̍ nūma̍ ge̍ yɛ ge̍ē ga ē hī u ē mɛ ni̍, ɔ̍chi̍kpa̍kpa̍ n de gwa̍, ɔ̍lɔma̍ o̍ ge̍ lɛ lɔkɔ nīi a chikpo̍ ma̍ gɛ.” O̍ gba̍a ku̍chē ga ɛbɛ yī a̍chi̍kpo̍ yī nū ge̍ ma̍ wā nīi e̍ gbwɔlā gblāa abɔ̍ɔ. Wɔlā hɛ̍tū wā mikomiko.
Iji̍sɔ̄ɔsi gba̍a ku̍ pīya hī wā o̍mgbo̍mɛta̍ gāa ge̍ jɔhā lɔkɔkɔ nīi o̍ ji o̍bū ma̍. O̍ ku̍chē wā dikpo̍ba̍ a̍chi̍kpo̍ yī nū bɛ̍ɛ̄nɛ̄ ge̍ de wa̍ hīka, “O̍ re̍ka ala̍ e̍e gblāa amu ē gbwɔlā ē myɛ̍nyɛ̍ we̍? Ala̍ ma̍ ko̍ō! Yɛ̄grāa de gbajɛ nīi e̍ ge̍ē ku̍ Ɔyi̍ yī Ɔngrɔ̄ɔ ē wa̍ābɔ̄ la anu̍ ē tū āchɛ ɔyɛ̍ɛ̄lā ɔdwɔ̄bi̍ la abɔ̄ mɛ̍. Ala̍ ā nīichō nīi alɔ ā pīya! Ma̍ ɔ̄chɛ ɔ̍lɔma̍ nīi chɔ̄ɔwɛ tū u ma̍ nīi yɛ aa̍.”


Iji̍sɔ̄ɔsi e̍e rɛ abɔ̍ɔ ē kɛlā we̍. Ɔpɔ̄ɔpɛ̄ Iju̍dasi nīi - ɔ̄chɛ ɔha̍ lipu̍ yī a̍chi̍kpo̍ yī nū āchɛ igwo̍lɛpa ma̍ gbajɛ wā bɛ̍ɛ̄nɛ̄. Āchɛ lyɛ̄mɛ̄ kpɛ̍ɛ nīi tīkpo̍ ba̍la anu̍ ma̍, la ogblo̍ ba̍la a̍yā la abɔ̄. Alɛhu̍ aligbe ba̍la ɛgabɔ̄ yī Iju̍u de wa̍ tɛ̄rɔ̄ wā a̍nɛ. Ɔlɔwɛ ɔlɔjā de chabɔ̄ hu̍ wā lɔ̄lā mɛ̍ hīka, ɔ̄chɛ nīi anɔ̍lɔ ge̍ de oko̍o tū ɔ̍lɔ mɛ̍; ɛ̍lɛ ge̍ ku̍ ɔ̍lɔ bɛ̍ɛ̄nɛ̄. Ma̍a ɔlɔjā nīi ɛ̍lɛ ē chikpo̍ a̍nɛ.
Iju̍dasi gbajɛ wā ɔpɔ̄ɔpɛ̄ ma̍, o̍ gāa dikpo̍ba̍ Iji̍sɔ̄ɔsi ge̍ da ɔ̍ o̍be hīka ɔ̍lɔ ge̍, “No̍be, Ɔngūlɛ̄lā.” O̍ de oko̍o tū Iji̍sɔ̄ɔsi bɛ̍ɛ̄nɛ̄.
Iji̍sɔ̄ɔsi hīya anu̍ ɔkɔ hīka, “Pa̍pa̍ lɛlā nīi a wā ge̍ē ya̍ ma̍ gɛ!”
Āchɛ ɛla̍ā che gbūdūū wā ge̍ de Iji̍sɔ̄ɔsi ku̍, bī ɔ̄ brii. Ɔ̄chɛ ɔha̍ lipu̍ yī āchɛ nīi hɔ̄ abɔ̍ɔ ba̍la Iji̍sɔ̄ɔsi ma̍ pi oge yī nū hi̍ya̍a̍ de ɔfiyɛ yī A̍dā Aligbe kpo̍ wɔrɔ̄. Iji̍sɔ̄ɔsi da ɔngrɔ̄ɔ ɔla̍ā hīka, “De oge yī wɔ ɔla̍ā gatū la apɛ̍ yī nū. Wu̍chē oji̍ nɛ, āchɛ nīi ē nāa lɛlā yāā ma̍ ē ku̍ rikū yī yāā a̍nɛ. A i̍ jo̍ōkū ni̍ ma̍, n ge̍ hī A̍dā yī u ɛra̍ yī wɔbɔ̄ otū um otōtū nɛ, o̍ ge̍ de u̍nu̍nɔ ohūkū yī ayɛ̍ɛ̄chɛ̄rɔ̄ yī nū tɛ̄rɔ̄ wā ɔpɔ̄ɔpɛ̄. O̍ ge̍ chī lɛ i̍ngɔ̍ɔ ma̍, kana̍ nīi lɛlā yī Īpū yī Ɔwɔ ge̍ē grāa we̍ ma̍. Wu̍chē oji̍ nɛ, Īpū yī Ɔwɔ ka hīka i̍ngɛ̍ɛ̄nɛ̄ nīi ɔ̍lɔ ge̍ē lɛ a̍nɛ.”
Bɛ̍ɛ̄nɛ̄, Iji̍sɔ̄ɔsi da āchɛ ɛla̍ā wa̍a̍ hīka, “O̍ re̍ka ala̍ bī ogblo̍ ba̍la a̍yā wā ge̍ē ku̍ u bɔ̄ɔjā nīi ala̍ yɛ gāa ge̍ē ku̍ obu̍ūwī ma̍? Mɔ̄chīmɔ̄chī nīi n ē hɔ̄ abɔ̍ɔ la u̍nu̍ yī Ɔwɔ ē ngū āchɛ lɛlā ma̍ bɛ̍ɛ? Ala̍ ku̍ u kɛ̄ɛ! Onūma̍ wa̍a̍ yɛ ē ya̍ lɛbɛ nīi lɛlā nīi āchɛ ɔkɛrɔ̄ yī Ɔwɔ mwɔ̍ɔmu lɔ̄lā tū la Īpū yī Ɔwɔ ma̍ ge̍ē de pīya ichɛ̄ɛhi.”
Bɛ̍ɛ̄nɛ̄ ma̍, a̍chi̍kpo̍ yī nū wa̍a̍ gwɛ̍ɛnya pīya hī ɔ̄.


Āchɛ ɛla̍ā nīi ku̍ Iji̍sɔ̄ɔsi ma̍ bī ɔ̄ ga wɔlɛ̍ yī Ike̍yāfasi nīi - A̍dā Aligbe ma̍. Āchɛ ongū Lihɔ yī Iju̍u ba̍la ɛgabɔ̄ yī Iju̍u wa̍a̍ grēeyī gblāa abɔ̍ɔ. Ipi̍ta de ku ɔ̍, yɛ la okwi̍ihi hwɛɛ i̍ngɔ̍ɔ kpɛɛ ge̍ chɛ̄ la ipwɔ̍ɔ̄nū yī A̍dā Aligbe. O̍ chɛ̄ ga iyɛ̍ɛchɛ ɔla̍ā ge̍ hyāhɔ̄ abɔ̍ɔ ba̍la āchɛ ɔgbɛ̄ɛbɛ, hɛ̄ɛbɛ ge̍ē ma̍ lɔkɔ nīi lɛlā ɔla̍ā ge̍ē lɛ wa̍a̍ ma̍. Alɛhu̍ aligbe tūla Ogrēeyī yī Alihiyo wa̍a̍ yɛ ē gāla̍ lɛlā yī arīmɛ̄ ɔha̍ nīi e̍ ge̍ē ku̍ Iji̍sɔ̄ɔsi, hɛ̄ɛbɛ nīi e̍ ge̍ē de ɔ̍ ē ngmo̍. Āchɛ ɛha̍ wɔ̄wā ge̍ warīmɛ̄ ba̍ Iji̍sɔ̄ɔsi nyaa ma̍, e̍ i̍ ma̍ lɛlɛ̄lā i̍ngɔ̍ɔ ni̍. Bɛ̍ɛ̄nɛ̄ ma̍, āchɛ ɛpa ɛha̍ bīyɛchɛ ge̍ rɛ. E̍ ka bɛ̍ɛ̄nɛ̄ hīka, “Ala̍ ma̍ ko̍ō! Ɔngrɔ̄ɔ nūma̍ ka hīka anɔ̍lɔ lwɔhu̍ ge̍ē de u̍nu̍ yī Ɔwɔ nūma̍ ē gbo ē tāajɛ ē chōo̍chē de ɔ̍lɔ gwo̍ lipu̍ yī ɔ̄chī ɛta̍ ē mɛ.”
A̍dā Aligbe nīichō yarɛ da Iji̍sɔ̄ɔsi hīka, “A i̍ lɛ ɔkɔ ɔhɔ̄hīya ɔha̍lɔha̍ lipu̍ yī lɛlā nūma̍ nīi e̍ ka ku̍ wɔ ma̍ ni̍?” Iji̍sɔ̄ɔsi hīdīdū. A̍dā Aligbe gba̍a da ɔ̍ hīka, “Bū la riyī yī Ɔwɔ Nīi - Ɔwɔ Ɔhɔ̄leyī ma̍, n de wɔ tū la yɛka u̍ma̍ama! Ka de alɔ we̍ e̍ē! Awɔ - Ɔhɔ̍ɔnyɛta̍ Nīi Ɔwɔ Hōhu nīi - Ɔyi̍ yī Ɔwɔ ma̍ a̍nɛ?”
Iji̍sɔ̄ɔsi hīya anu̍ ɔkɔ hīka, “I̍ngɔ̍ɔ nīi a ka a̍nɛ. N chī ge̍ē koko̍o ē de ala̍ wa̍a̍! Obū la yɛ̄grāa nūma̍ ga iyɔ̄bū, ala̍ ge̍ē ma̍ Ɔyi̍ yī Ɔngrɔ̄ɔ ē hyāhɔ̄ abɔ̍ɔ la wāā yī abɔ̄ līre̍ yī Ɔwɔ nīi - Ɔgɔnyɛ Ɔnɔ̄kɔ̄kū ma̍. Ala̍ ge̍ē ma̍ ɔ̄ nīi o̍ ge̍ē yɛ ē wā la ichō yī akpɔ̍ɔwɔ ma̍.”
Wu̍chē yī lɛlā nūma̍, A̍dā Aligbe ku̍ iyī nū ɔjā otūlibi̍īyē hi̍ya ɔpɔ̄ɔpɛ̄. O̍ ka bɛ̍ɛ̄nɛ̄ hīka, “Ala̍ ā ma̍ lɛlā abi̍ nīi o̍ ka ku̍ Ɔwɔ gɛ! Alɔ gba̍a ge̍ē chikpo̍ yī itɛ̍ɛhi̍yɛ̍ ge̍ē ya̍ oji̍? Ala̍ wa̍a̍ chī plɛ̍ɛ̄lā yī nū ɔ̍lɔma̍ mɛ̍! Kɛ̄ɛ ala̍ gbɛri̍ya̍ kana̍?”
Aa̍ wa̍a̍ chɛ̄ hīka lɛpɔ̄ ɔ̍lɔ ku̍ ɔ̍lɔ. Ɛ̍lɛ ge̍ de ɔ̍lɔ ngmo̍!
Āchɛ ta̍arɛ kla̍ anu̍ la eyī, gwō ɔ̄ lijē, dra̍ anu̍ abɔ̄ la a̍ba̍a. E̍ ē da ɔ̍ hīka, “Ɔhɔ̍ɔnyɛta̍ Nīi Ɔwɔ Hōhu be̍e! Mwɔ̍ɔmu gɛ e̍ē! A je̍ ma̍, ɔ̄nyɛ dra̍ awɔ abɔ̄ u̍uma ma̍?”


Ipi̍ta ma̍ hɔ̄ amu la iyɛ̍ɛchɛ yī ipwɔ̍ɔ̄nū ɔla̍ā. Ɔyi̍ ɔnɔ̄nyā ɔha̍ lipu̍ yī aɛ̍pɛ̄ anānyā nīi - a̍chɛ̍ yī A̍dā Aligbe ma̍ wā dikpo̍ba̍ Ipi̍ta bɛ̍ɛ̄nɛ̄ ge̍ da ɔ̍ hīka, “Je̍ka aa̍ awɔ titi ē yɛ ba̍la Iji̍sɔ̄ɔsi yī Iga̍līli?”
Ipi̍ta ta̍ahu̍ la iyɔ̄bū yī āchɛ ɛla̍ā wa̍a̍ ɔpɔ̄ɔpɛ̄ hīka, anɔ̍lɔ i̍ je̍ ɔjā nīi ɔ̍lɔ yɛ aa̍ ē ka ma̍ ni̍ lachi̍lachi̍. Ipi̍ta wā ge̍ ku̍ pīya ga oko̍no̍grīgba yī iyɛ̍ɛchɛ ɔla̍ā bɛ̍ɛ̄nɛ̄. Ɔyi̍ ɔnɔ̄nyā ɔha̍ gba̍a ma̍ ɔ̄ koko̍o de āchɛ nīi gblāa abɔ̍ɔ ma̍ hīka, “Ɔngrɔ̄ɔ nūma̍ ē yɛ ba̍la Iji̍sɔ̄ɔsi yī Ina̍jārɛ̄ɛti.”
Ipi̍ta gba̍a ta̍ahu̍ gbo ɔjāha̍-ɔjāha̍ hīka, anɔ̍lɔ i̍ je̍ ɔngrɔ̄ɔ ɔ̍lɔma̍ ni̍.
Yɛ̄grāa ɔha̍ pi̍nyɛ̍ ɔpɔ̄ɔpɛ̄, āchɛ nīi gblāa abɔ̍ɔ ma̍ gāa dikpo̍ba̍ Ipi̍ta ge̍ da ɔ̍ hīka, “Lēchi̍, awɔ - ɔ̄chɛ ɔha̍ yī wā nɛ. Ma̍ gɛ! Lɔkɔ nīi a ē kɛlā ma̍ de wɔ hi̍yɛchɛ ke̍e̍ mɛ̍.”
Ipi̍ta jɔhā tū iyī nū, gbo ɔjāha̍ ɔjāha̍ ka anɔ̍lɔ i̍ je̍ ɔ̄chɛ ɔ̍lɔma̍ ni̍.
Yɛ̄grāa ɔla̍ā pi̍i̍, obu̍ūgū tɛ̄ra̍ i̍ngɔ̍ɔ ke̍e̍. Ɔpɔ̄ɔpɛ̄, Ipi̍ta bla lɛlā nīi Iji̍sɔ̄ɔsi da ɔ̍ ma̍, “O̍bū nīi obu̍ūgū ge̍ē tɛ̄ra̍, a ge̍ē ta̍ahu̍ igbɛta̍ ka aɔ̍lɔ i̍ je̍ amɔ̍lɔ ni̍.” Ipi̍ta bīyɛchɛ pīya ge̍ drɛ̄ɛgba ɛbɛ̍bɛ̍-ɛbɛ̍bɛ̍.

နားေထာင္ပါ။ Ima̍tiyu 26