Busa-Bisã 2005 SIM (NT) Non-Drama

Busa-Bisã 2005 SIM (NT) Drama

Abire gbɛra Yesu bikũ̀ Galili sɛ̀bɛ kũ òdi pi dɔ Tiberia bara. Gbɛ̃nɔ gɔ̃ tɛ́i dasidasi, kũ ò a daboyãnɔ è deran àtɛn gyãrenɔ werekɔ̃ana yãi. Akũ Yesu dìdi à vùtɛ sĩ̀sĩi musu kũ a ìbanɔ. Yudanɔ Vĩnla dikpɛ kà kãni. Kũ Yesu wɛ́ sɛ̀ musu, à è gbɛ̃nɔ tɛn su a kĩnaa dasidasi, akũ à Filipi là à pì: Mákpan óni pɔ́ble lún de gbɛ̃nɔ blee? À abirekũ ò de à Filipi yɔ̃ à gwa yãimɛ, zaakũ à dɔ̃ lákũ áni kɛ nà. Akũ Filipi wèa à pì: Andurufu ɔgɔ mɛ̀n wàa do burodii, bee tó ò ɛ̀'ɛ baadinɛ fítifiti, ani mɔ́ḿmaro. A ìbanɔ do Anduru, Simɔ Pita dakũna pìnɛ: Nɛ́gɔ̃gbɛ̃ ke kú la, à burodi araga vĩ mɛ̀n sɔɔro kũ kpɔ̀ fítinnanɔ mɛ̀n pla. Bɔ́n abirekũ ni kɛ pari díkĩnanɔnɛɛ? Yesu pì: À gbɛ̃nɔ vutɛvutɛ. Sɛ̃̀la di gu pìn, akũ ò vùtɛvutɛ. Gɔ̃gbɛ̃nɔ kà gbɛ̃nɔn dúbu sɔɔro taka. Yesu burodii pìnɔ sɛ̀ à arubarikaa dàn, akũ à kpàatɛtɛ gbɛ̃ kũ ò vutɛnaa pìnɔnɛ lákũ ò yei nà. Lɛn à kpɔ̀ɔ kpàḿma lɛ dɔ. Kũ ò kã̀ ó pínki, à pì a ìbanɔnɛ: À a kpara kũ à gɔ̃̀ sɛ́tɛ pínki, de a ke sún kɛ pãro. Akũ ò burodi mɛ̀n sɔɔro kũ ò sòo pì kpara kũ ò gɔ̃̀nɔ sɛ̀tɛ tãnko kuri awɛɛpla pà. Kũ ò daboyã kũ Yesu kɛ̀ɛ pìi è ò pì: Gbɛ̃ pì bi annabi kũ àtɛn su andunia gũmmɛ yãpura. Yesu dɔ̃̀ kũ ò ye ò su ò a kũ ò a ká kína ũ kũ gbãnaomɛ, akũ à gòńnɛ gwe à ɛ̀ra à dìdi sĩ̀sĩi musu ado.


Kũ ɔkɔsi kɛ̀, a ìbanɔ gɛ̀ɛ sɛ̀bɛɛ bara. Akũ ò gɛ̃̀ gó'itɛ gũn, òtɛn bikũ sɛ̀bɛɛ pìi bara dire Kapɛnamu kpa. Gu gĩnakɛ à sì Yesu dí ká ń kĩnaa kɔ̀ro. Zàga'ĩa gbãna kàka, akũ í tɛn futɛ. Kũ a ìbanɔ gó lì ò kà kiloo sɔɔro ke suddo taka bà, akũ ò Yesu è àtɛn táa o íla, àtɛn na ń gói, akũ vĩna ń kũ. Akũ à pìńnɛ: Makũmɛ, àsun tó vĩna á kũro. Ò wènɛ à gɛ̃ gó gũn, akũ gó pìi kà gu kũ òtɛn gɛ́n gɔ̃̀nɔ.

Kũ gu dɔ̀ pari kpɛ́ zɛna sɛ̀bɛɛ bara dire. Ò dɔ̃ kũ gó'itɛ kú gwe yã mɛ̀n domɛ, Yesu sɔ̃ adi gɛ̃ gó pìi gũn kũ a ìbanɔro, ò tà ńtɛ̃nɛmɛ. Kũ à kɛ̀ saa gó'itɛ pãndenɔ bò Tiberia, ò sù gu kũ kãni kũ gu kũ ò burodii sònwo, kũ Dikiri sáabu kpà à làka. Kũ pari pìi è àpii ke a ìbanɔn kú gwe doro, ò gɛ̃̀ gó pìnɔ gũn ò gɛ̀ɛ a wɛtɛ Kapɛnamu.

Kũ ò a è sɛ̀bɛɛ bara gwe, ò pìnɛ: Rabi, n ka la bɔrɛɛ? Yesu pìńnɛ: Yãpuran matɛn oárɛ, átɛni ma wɛtɛ burodi kũ a sò a kã yãimɛ, adi kɛ daboyã kũ a ènɔ yãinlo. Àsun zĩ kɛ pɔ́ble kũ àdi láka yãiro, sé pɔ́ble kũ àdi ń ká wɛ̃̀ndi kũ àdi lákaroa. Bisãsiri Nɛ́ mɛ́ ani á gba pɔ́ble pìi, zaakũ àpiin De Luda a sèedaa kɛ̀a.
Akũ ò a là ò pì: Deran óni kɛ nà ò yã kũ Luda ye ò kɛ kɛɛ? Yesu wèḿma à pì: Yã kũ Luda ye à kɛn dí: À gbɛ̃ kũ à a zĩ̀ náani kɛ. Ò pìnɛ: Daboyã kpaten ĩni kɛwɛrɛ, de ò le ò n náani kɛɛ? Yã kpaten ĩni kɛɛ? Ó dizinɔ mana blè gbárannan lákũ ò kɛ̃̀ Luda yãn nà ò pì: A pɔ́ble kũ à bò musu kpàḿma ò blè. Akũ Yesu pìńnɛ: Yãpuran matɛn oárɛ, adi kɛ Musa mɛ́ à pɔ́ble kũ à bò musu kpàáwaro. Ma De mɛ́ àdi pɔ́ble yãpurade kũ à bò musu kpááwa. Pɔ́ble kũ Luda kpà pìin gbɛ̃ kũ à bò musu àdi wɛ̃̀ndi kpá anduniaa ũ.
Ò pìnɛ: Mare, ǹgɔ̃ pɔ́ble bire taka kpáwá gɔrɔ sĩnda pínki. Akũ Yesu pìńnɛ: Makũmɛ pɔ́ble kũ àdi ń ká wɛ̃̀ndiia ũ. Nà ni gbɛ̃ kũ à sù ma kĩnaa dɛro, ími ni ma náanikɛri dɛ zikiro. Bee kũ abireo lákũ ma òárɛ nà, bee kũ a ma e, ádi ma náani kɛro. Gbɛ̃ kũ ma De kpàma ni su ma kĩnaa, mani pɛ́ gbɛ̃ kũ à sù ma kĩnaaa zikiro. Adi kɛ ma zĩda pɔyenyĩna yãin ma bo musu ma suro, gbɛ̃ kũ à ma zĩ pɔ́mɛ. Pɔ́ kũ gbɛ̃ kũ à ma zĩ pì yein dí: Màsun tó gbɛ̃ kũ à kpàmanɔ ke sãtɛro. À ye mà ń futɛ gɔrɔ kpɛde zĩ. Zaakũ pɔ́ kũ ma De yein dí: Gbɛ̃ kũ à wɛ́ pɛ̀ a Nɛ́a, akũsɔ̃ àtɛni a náani kɛ gɔ̃ wɛ̃̀ndi kũ àdi lákaro vĩ, má a vu gɔrɔ kpɛde zĩ.
Akũ Yuda gbãnadenɔ zuka kài, kũ à pì ákãamɛ pɔ́ble kũ à bò musu ũ yãi. Ò pì: Gbɛ̃ pì bi Yesu Yusufu nɛ́nloo? Ó a de kũ a dao dɔ̃ bi! Akũ àtɛn pi a bo musumɛ. Yesu pìńnɛ: Àsun zuka káro. Gbɛ̃ke ni fɔ̃ à su ma kĩnaaro, tó adi kɛ ma De kũ à ma zĩ a sìsi baasiro, mani a futɛ gɔrɔ kpɛde zĩ. À kɛ̃na annabinɔ takada gũn ò pì: Luda mɛ́ ani yã da baadinɛ. Gbɛ̃ kũ à De Luda yã mà, akũsɔ̃ à a yã dà, àkũ mɛ́ àdi su ma kĩnaa. Adi kɛ gbɛ̃ke De Luda è kũ wɛ́onlo. Gbɛ̃ kũ à bò a kĩnaa mɛ́ à a è ado. Yãpuran matɛn oárɛ, ma náanikɛrii wɛ̃̀ndi kũ àdi lákaro vĩ. Makũmɛ pɔ́ble kũ àdi ń ká wɛ̃̀ndiia ũ. Á dizinɔ mana blè gbárannan, bee kũ abireo ò gàga. Pɔ́ble kũ àdi bo musu sɔ̃, tó gbɛ̃ blè, ani garo. Makũmɛ pɔ́ble wɛ̃̀ndide kũ à bò musu pì ũ. Tó gbɛ̃ adi blè, anigɔ̃ kun gɔrɔ sĩnda pínki. Pɔ́ble kũ mani kpáḿmamɛ ma mɛ̀baasi ũ, de andunia gɔ̃ wɛ̃̀ndi vĩ yãi.
Akũ gbãnade pìnɔ tɛn lɛ́kpakɔ̃a kɛ kũ kɔ̃o ò pì: Gbɛ̃ pì ni fɔ̃ à a mɛ̀baasi kpáwá ò són yá? Akũ Yesu pìńnɛ: Yãpuran matɛn oárɛ, tó ádi Bisãsiri Nɛ́ mɛ̀baasi só a a aru mìro, ánigɔ̃ wɛ̃̀ndi vĩro. Gbɛ̃ kũ àdi ma mɛ̀baasi só à ma aru mi wɛ̃̀ndi kũ àdi lákaro vĩ. Makũ mɛ́ mani a futɛ gɔrɔ kpɛde zĩ. Zaakũ ma mɛ̀baasi bi pɔ́ble yãpuramɛ, ma aru bi pɔ́mina yãpuramɛ. Gbɛ̃ kũ àdi ma mɛ̀baasi só à ma aru mi kú ma gũn, makũ sɔ̃ má kú a gũn. Lákũ De Luda Wɛ̃̀ndide ma zĩ, akũsɔ̃ má kun a yãi nà, lɛn gbɛ̃ kũ àdi ma mɛ̀baasi só nigɔ̃ kun ma yãi lɛ. Pɔ́ble kũ à bò musun gwe. À de lán pɔ́ble kũ á dizinɔ blè ò gà bàro. Pɔ́ble bire blèri nigɔ̃ kun gɔrɔ sĩnda pínkimɛ. Yesu yã birenɔ ò gɔrɔ kũ àtɛn yã dańnɛ Kapɛnamu aduakɛkpɛmmɛ.

Kũ a ìbanɔ yã pìi mà, ń gbɛ̃ dasidenɔ pì: Yã gbãnamɛ, dí mɛ́ ani abirekũ fɔ̃ɔ? Yesu dɔ̃̀ a swɛ̃̀ɛ gũn kũ a ìbanɔ tɛn zuka ká yã pìi musu, akũ à pìńnɛ: Yã pì tɛni á fu yá? Tó a è Bisãsiri Nɛ́ fùtɛ àtɛn tá gu kũ a kun yã sɔ̃ bi? Luda Nini mɛ́ àdi wɛ̃̀ndi kpáḿma, mɛ̀baasi bi pɔ́kenlo. Yã kũ ma òárɛnɔmɛ Luda Nini kũ àdi ń ká wɛ̃̀ndiia yã ũ. Ama á gbɛ̃kenɔ tɛni ma náani kɛro. Zaakũ Yesu gbɛ̃ kũ òtɛni a náani kɛronɔ dɔ̃ zaa káaku kũ gbɛ̃ kũ ani a kpáḿmao. Akũ à pì dɔ: Abire yãin ma òárɛ, gbɛ̃ke ni fɔ̃ à su ma kĩnaaro, séto De Luda a gbà zɛ́.
Zaa gɔrɔ birea a ìba kenɔ bòru kpɛo dasidasi, òdi tɛ́i doro. Akũ Yesu a ìba gbɛ̃nɔn kuri awɛɛplanɔ là à pì: Á ye à tá sen yá? Simɔ Pita wèa à pì: Dikiri, dí kĩnaan óni gɛ́nn? Ń wɛ̃̀ndi kũ àdi lákaro yã vĩ. O n náani kɛ̀, o dɔ̃̀ kũ Luda gbɛ̃ kũ à kú adonamɛ n ũ. Yesu pìńnɛ: Á gbɛ̃nɔn kuri awɛɛpla dínɔn ma sɛ̀roo? Bee kũ abireo á gbɛ̃ mɛ̀n do bi ibilisiimɛ. Yudasi, Simɔ Isikariɔti nɛ́n à tɛ́a. Àkũmɛ gbɛ̃nɔn kuri awɛɛpla pìnɔ doke kũ ani a kpáḿma ũ.

နားေထာင္ပါ။ YUHANA 6