Bible text: Luvale © Bible Society of Zambia, 2017 www.biblesociety-zambia.org/ Recording of the New Testament ℗ Hosanna, 2022

Luvale - 2017 BSZ (NT) Drama

Jino omu akungulwile tumbaji twenyi likumi navavali (12) hamwe, avahanyine ngolo nawata hali vandemone vosena nakuka misongo.
Kaha avatumine vakavilike wangana waKalunga, nakuhindula vaveji.
Avalwezele ngwenyi, Kanda namumbata chuma chakuya nacho muungejiko, chipwe mukombo, chipwe chola, chipwe vyakulya, chipwe jimbongo, kaha kanda mupwa navikovelo vyavisuku vyamukachi vivaliko.
Kaha mweshomwo muzuvo namukengila, katwamenunga vene muze, palanga nomu namukafuma kuze.
Kaha kweshokwo navakazeneka kumitambula, omu namukalovoka mulimbo lize lyakembwe kalitotomonenu lukungu kuvilyachilo vyenu, chikapwe unjiho wakuvahishilaho.
Kaha vayile, vahichilenga mumembo nakwambulula mujimbu wamwaza nakuhindula vatu kwosena.


Jino mwangana Helote evwile vyosena vize vyapwile nakusoloka, kaha akakasanyine, mwomwo vamwe vambile ngwavo Yowano vanamusangula muvafu,
vakwavo ngwavo Elija nasoloka, kaha veka nawa ngwavo umwe wavapolofweto vakushikulu nasanguka.
Oloze Helote ambile ngwenyi, Yowano ngwamutapile lyehi. Nyi Ou nguli nakwivwa váli nakuvulukila vyangana, iya? Kaha asakile kumumona.


Omu vaposetolo vahilukile, valwezele Yesu vyosena vize valingile. Kaha ayile navo kwakuhengama kulimbo lyakembwe vavuluka ngwavo Mbetesaita .
Oloze omu mazavu avatu atachikijile kuze áyile vamukavile, kaha omu avatambwokesele, ahanjikile navo vyawangana waKalunga, kaha vaze vapwile nakuviza, avahindwile.
Jino hakuhunguluka chalikumbi, vaze likumi navavali (12) vejile nakwamba ngwavo, Suula eli lizavu lyavatu mangana vayenga kumembo nakujingalila jamande jinajingilika vakasavaleko nakuwana vyakulya, mwomwo muno tuli mupambo.
Kaha avambile ngwenyi, Vahanenu vyakulya vene enu. Oloze vamukumbulwile ngwavo, Katweshi navyakulya vyekako, shina tumbolo tutanu navaishi vavali kaha. Kuvanga pamo etu tuyenga nakulanjila ava vatu vosena vyakulya,
mwomwo malunga kaha vapwile kafwe makombakaji atanu (5,000). Oloze ambile tumbaji twenyi ngwenyi, Valwezenu vatwame mumazavu, halizavu hilizavu hapwenga makumi atanu (50).
Kaha valingile ngocho, vosena vatwamine.
Kaha omu atambwile tuze tumbolo tutanu navaze vaishi vavali, atalile mwilu, asakwililile, kaha atupuzwile nakuhana tumbaji twenyi vahane vaze vatu.
Kaha vosena valile nakwikuta, kaha vihanda vize vyasalileho, vavimbachile nakuzalisa jimbángo likumi najivali.


Jino chasolokele omu apwile nakulomba uka wenyi, tumbaji twenyi kuvapwile, kaha avahulishile ngwenyi, Mazavu avatu eji kwambanga ngwawo Yami Iya?
Kaha vamukumbulwile ngwavo, Veji kwambanga ngwavo, Yove Yowano muka-kujimika vatu. Oloze vakwavo ngwavo, Elija. Veka nawa ngwavo, Umwe wavaze vapolofweto vakushikulu násanguka.
Kaha avahulishile ngwenyi, Nyi enu mweji kwambanga ngwenu Yami Iya? Petulu amukumbulwile ngwenyi, Yove Kulishitu yaKalunga.
Kaha avakanjile chikuma nakuvalweza vazeneke kuchambulula chipwe kuli umwe.


Jino avalwezele ngwenyi, Kuvanga Mwanamutu akamone makava mwamuvulu nakumukana kuli vakulwane navapilishitu vavalemu navaka-kusoneka, nakumujiha, kaha halikumbi lyamuchitatu navakamusangula kuli Kalunga.
Kaha ambile vosena ngwenyi, Weshowo mwasaka kungukava, alikanyise vize áfwila ivene kaha, alitwike kulusu yenyi hakumbi hakumbi nakungukavangizanga.
Mwomwo weshowo mwasaka kulwila mwono wenyi mwaujimbalisa. Oloze weshowo mwajimbalishila mwono wenyi hali Ami, mwaulwila.
Mwomwo mutu mwawanyinaho ika nge mwaheta kaye kosena, oloze mwalitokesa ivene chipwe kulivindamisa?
Mwomwo weshowo mwangwivwila sonyi, nakwivwila mazu ami nawa sonyi, naMwanamutu nawa mwakamwivwila sonyi omu mwakeza muupahu wenyi, ukiko vene waIse navangelo vajila.
Mwamuchano nangumilweza ngwami, kuli vamwe vanemana hano kaveshi kufwako, swi-i nakukumona wangana waKalunga.


Jino chasolokele omu mwahichile kafwe makumbi atanu naatatu kufuma haze ahanjikile vihande evi, ambachile Petulu naYowano naYakova nakukanduka navo hapili nakulomba.
Kaha chasolokele omu apwile nakulomba, chihanga chenyi chasolokele mweka, nauvwalo wenyi watomene nakuvyakuma.
Kaha kukasumuka malunga vavali, Mose naElija, vali nakushimutwila nenyi,
vasolokele muupahu, kaha vapwile nakuvuluka kulovoka chenyi chikiko kufwa chize mwatesamo linwomu kuYelusalema.
Oloze Petulu navaze apwile navo meso avo alemene natulo, kaha omu vatonene kanawa, vamwene upahu waYesu navaze malunga vavali vemanyine nenyi.
Kaha chasolokele omu vapwile vaze vavali nakumuseza, Petulu ambile Yesu ngwenyi, Ove Mwata, nachiwaha tupwenga kuno. Tutunge visakila vitatu, chimwe chayOve, chimwe chaMose, chikwavo chaElija — oloze katachikijile ovyo apwile nakuhanjikako.
Shimbu apwile nakuhanjika ngocho, livwi lyejile nakuvafwika, kaha vevwile woma hakwingila muze mulivwi.
Kaha muze mulivwi mwafumine lizu lyakwamba ngwalyo, Ou Ikiye Mwanami ngwátongola, mwivwililenunga.
Kaha omu lyaholele lize lizu, Yesu apwile kaha uka wenyi. Kaha vize vamwene vaholele navyo hamakumbi aze, kavavilwezele naumweko.


Chasolokele omu kwachele, oho vanashikumuka lyehi kufuma hapili, lizavu lyalinene lyamuhumanganyine.
Kaha kukasumuka, lunga umwe muze mulizavu mwatambakana ngwenyi, Ove Muka-kunangula, ngunalembe, utaleko kuli ou mwanami walunga, mwomwo mwanami umwe-lyamunwe —
mukasumuka shipilitu waunyengwe namukwate lyehi, kaha hahaze vene mwatetumuka. Kaha eji kumutunyisanga nakumutupwisa lifulu kukanwa nakumulemejekesa chikuma, kaha keshi nakumwechanga washiko.
Kaha ngwalembanga kuli tumbaji twove vamulovoleyo, oloze kavahashileko.
Kaha Yesu akumbulwile ngwenyi, Enu vaka-chisemunwino chakuzeneka lufwelelo, chakuhingama! Nangutwamanga nayenu nakumiyanjila palanga nakumwaka uka? Neha mwanove kuno.
Shimbu uze mukweze apwile nakwiza kuli Yesu, uze ndemone amumbilile hamavu nakumukonyesa chikuma. Oloze Yesu ahanjikilile uze shipilitu waunyengwe, okile uze mukweze nakumuhana cheka kuli ise.
Kaha vosena valihomokelele unene waKalunga nangolo jenyi.


Shimbu vosena vapwile nakulikomokela havyuma vyosena alingilenga, Yesu ambile tumbaji twenyi ngwenyi,
Hakenu michima yenu kumazu awa, mwomwo linwomu vahane Mwanamutu kumavoko avatu.
Oloze chihande kana kachavalumbunukilileko, kaha chapwile chakusweka mangana vazeneke kuchijiva, kaha vevwile woma wakumuhulisa chihande kana.


Jino mukachi kavo mwakatukile jipami vawane ou ahambakana vakwavo vosena ulemu.
Jino hakutachikiza kujina chamichima yavo, Yesu ambachile mwana wamundende nakumwimika kuli Ikiye nakuvalweza ngwenyi,
Weshowo mwatambula ou kanyike wamundende mulijina lyami, natambula Ami. Kaha weshowo mwangutambula, natambula Uze angutuma. Mwomwo ou akuminamo mukachi kenu muvosena, ikiye vene wamulemu.


Yowano ambile ngwenyi, Ove Mwata, twamonanga umwe apwanga nakulovola vandemone mulijina lyove, kaha twamukandanga, mwomwo ikiye kakukavangiza ove hamwe nayetuko.
Oloze Yesu amwambile ngwenyi, Kanda mumukandako, mwomwo ou keshi nakole nayenuko, ali kumwe nayenu.

Kaha omu makumbi apandamine akumutambula mwilu, Yesu ajikile muchima wenyi nameso enyi haungeji wakuya kuYelusalema.
Kaha atumine valuwa kulutwe. Kaha omu vayile vengilile mulimbo limwe lyava Samaliya ngwavo vamulongesele kwakushikila,
oloze kavamutambwileko, mwomwo atalikishile kuYelusalema.
Kaha omu tumbaji twenyi, vaYakova naYowano, vachimwene, vamuhulishile ngwavo, Ove Mwata, nausaka tuvasanyikile kakahya kafume mwilu kavanongese tahi?
Oloze alumukile nakuvahanjikila [ngwenyi, Kamwatachikijile kupwa chaShipilitu Ou mwapandamako. Mwomwo Mwanamutu keza nakunongesa myono yavatuko, oloze nakulwila.]
Kaha vayile kulimbo likwavo.


Omu vapwile nakuya mujila, umwe ejile nakumwamba ngwenyi, Nangukukavangiza kweshokwo nauya.
Kaha Yesu amwambile ngwenyi, Myumbwe vatwama namena, tujila vahelu vatwama namaswa, oloze Mwanamutu keshi naaha hakusachila mutwe wenyiko.
Kaha alwezele mukwavo ngwenyi, Ngukavangizenga. Oloze ikiye amukumbulwile ngwenyi, Ove Mwata, ngwitavise nguvangile kukafunda tata.
Oloze Yesu amukumbulwile ngwenyi, Seza vafu vakafunde vafu javo. Oloze ove, yako uvilikenga wangana waKalunga.
Mukwavo nawa ambile ngwenyi, Ove Mwata, nangukukavangiza, oloze ngwitavise nguvangile kukasalisa vaze vakuzuvo yami.
Oloze Yesu amwambile ngwenyi, Ou mwakwata kulitemo lyavangombe nakulima, kaha mwatala kunyima, katela wangana waKalungako.

နားေထာင္ပါ။ Luka 9