Text: © New Life Computer Institute Audio: ℗ 2022 Hosanna

Shekhawati 2017 NLCI (NT)  Non Drama

इकै पाछै जद ईसु डूँगरऊँ तळै उतर्यो जणा मिनखा की भीड़ बाकै गेल होलिनी। बामै एक कोढी बी हो। बो ईसु कनै आयो अर बाकै पगा म धोक खार बोल्यो, “म्हराज, ज थे चाओ तो मेरो कोढ धो सको हो।” आ सुणर ईसु बिपै हात धर बिऊँ खयो, “म चाऊँ हूँ क तेरो कोढ धुपज्या!” अर जदकी जदई बिको कोढ धुपगो। पण ईसु बिनै ओडायो, “इ बात क बारां म खिनई मना खिजे। पण याजक क कनै जार खुदनै दिखा अर मूसा की रीत गेल भेंट चढा जिऊँ मिनखानै तेरै निरोगो होबा को सबूत मिलै।”


अर जद ईसु कफरनूम नगरी आयो, जणा रोमी सुबेदार जखो सो सिपाईड़ा प हो, ईसु कनै आर अरदास करबा लाग्यो, “म्हराज मेरो एक दास घर क मांयनै रोगलो पड़्यो ह। बिकै हवा भेगी इ बजेऊँ बिनै पिड़ा होरी ह।” जणा ईसु बिऊँ खयो, “म बठै आर बिनै निरोगो करस्युं।” जणा बो सुबेदार ईसुऊँ बोल्यो, “म्हराज म इ जोगो कोनी क थे मेरै घरा पधारो। थे तो अठैऊँई आदेस करद्‍यो जणा मेरो दास निरोगो होज्यासी। क्युं क म खुद दुसरा क तळै काम करबाळो आदमी हूँ अर मेरै तळै बी सिपाईड़ा काम करीं हीं, अर जद म बामैऊँ एकनै ओडाऊँ क, ‘तू जा ’ जणा बो चल्यो जावै अर दुसरानै ओडाऊँ क, ‘आ’ जणा बो आज्यावै ह। अर जद म मेरा दासऊँ खेऊँ हूँ क, ‘अंय्यां कर’ जणा बो बंय्यांई करै ह।” आ सुणर ईसुनै बि मिनख प ताजूब होयो अर बि भीड़ऊँ बोल्यो जखी बाकै गेल आरी ही, “म थानै सची खेऊँ हूँ इ जंय्यांको पक्को बिस्वास तो म इजरायल का मिनखा म बी कोनी देख्यो। म थानै बताऊँ हूँ क, बोळा मिनख अगुणी अर पाछुणी दिसाऊँ आसी अर बे ईस्बर नगरी राज म अब्राहम, इसाक अर याकूब क सागै जिमबा बेठसी। पण जखी पिडीनै राज मिलबाळो हो बिनै अँधेरा म गेर दिओ ज्यासी जठै रोबो अर दांत पिसबो होसी।” इकै पाछै ईसु बि सुबेदारनै ओडायो, “चल्योजा जंय्यां को तेरो बिस्वास ह बंय्यांई तेरै सागै होसी।” जणा बि टेमई बिको दास निरोगो होगो।


जद ईसु पतरस क घरा गयो बठै पतरस की सासू बुखार म पड़ी ही। जणा ईसु बिकै हात अड़ायो अर बा निरोगी होगी। अर बा खड़ी होर बाकी सेवा-पाणी करबा लागी। जद दिन आथगो जणा लोग बा मिनखानै जामै फेंट होईड़ी ही बाकन लेर आया। ईसु बा ओपरी बलायानै हुकम देतो अर बे बाको हुकम मानर बाकै मांयनैऊँ निकळ ज्याती। अर बे बा सगळा मिनखानै निरोगो कर्या जखा रोगला हा। अंय्यां इ ताँई होयो क्युं क यसाया परमेसर की खेबाळो जखो खयो हो बो पूरो होवै:
बे आपणा रोगानै खुद प लेर अर आपणी बिमार्यानै सेण कर दूर कर दिनी।


जद ईसु आपकै च्यारूमेर भीड़ देखी जणा बे आपका चेलानै दरिआव क परलै-पार जाबा को हुकम दिओ। बि टेम क एक यहूदि जिनै सास्तर को ज्ञान हो, बो ईसु कनै आर बोल्यो, “म्हराज थे जठै बी जास्यो म बी थारै गेल जास्युं।” बे बिकी इ बातनै सुणर बिऊँ बोल्यो, “गादड़ा की घुर अर अकास म उडबाळा पंछ्या का घुरस्ळा होवीं पण मिनख का बेटा को तो सीर लुखाबा को बी ठिकाणो कोनी।” अर ईसु को एक चेलो बाऊँ खयो, “ओ म्हराज मनै पेली जाबा दे की म मेरा बापनै गाड्याऊँ।” पण ईसु बिनै ओडायो, “मेरै गेल होले क्युं क परमेसर बा मिनखानै जाकै कनै जुग-जुग को जीवन कोनी बानै मरेड़ो समजै ह बा मरेड़ा मिनखानै बाका मरेड़ानै गाडबा दे।”


बिकै पाछै बे एक न्याव म जार बेठगा। बाकै सागै बाका चेला बी हा। जद बे न्याव क मांयनै हा बि टेम क दरिआव क मांयनै जोरको तौफान आयो अर न्याव म पाणी भरबा लाग्यो पण ईसु सोर्यो हो। जणा बे ईसु कनै गया अर बानै जगार बाऊँ बोल्या, “परबु म्हानै बचाओ। क्युं क आपा मरबाळा हां!” जणा ईसु बाऊँ बोल्या, “हे कम बिस्वास राखबाळो! थे अंय्यां क्युं डरो हो?” बिकै पाछै बे भाळनै अर दरिआवनै दकाल्या जिऊँ सक्यु स्यांत होगो। बे मिनख ताजूब म पड़गा, अर आपसरी म बतळाबा लाग्या, “ओ कूण ह? जिकी बाता तौफान अर दरिआव बी मानै ह!”


बिकै पाछै ईसु गदरेनिया दिसावर म पुग्या, ओ दिसावर दरिआव क परलै नाकै हो। जणा बठै दो मिनख बानै मिल्या जखा मूसाणा मऊँ निकळर आर्या हा बाकै फेंट होईड़ी ही। बे अंय्यां का खतरनाक मिनख हा की बाकै बजेऊँ बि गेलै कोईबी कोनी जातो हो। बे जोरऊँ बोल्या, “हे परमेसर का बेटा, थारो म्हारो काँई लेणदेण? के थे थारा टेमऊँ पेल्याई म्हानै नास करबा आया हो?” अर बठैई क्युंक दूर एक सूल्डा को रेवड़ चरै हो। इ ताँई बे ओपरी बलाय बाऊँ अरदास कर बोली, “ज थे म्हानै आमऊँ काडो हो जणा बा सूल्डा का रेवड़ म भेज द्‍यो।” जणा ईसु बानै ओडायो, “जाओ!” जणा बे बा मिनखाऊँ निकळर बा सूल्डा का रेवड़ म रळगी। इकै बजेऊँ बे सूल्डा ढळानऊँ गुड़ता गुड़ता दरिआव क मांयनै जा पड़्या अर मरगा। अर सूल्डानै चराबाळा नगरी म जार जोक्यु बठै होयो हो बिकै बारां म अर जखा मिनखा म फेंट होईड़ी ही बाकै सागै काँई होयो बिकै बारां म खे सुणायो। आ सुणर बि नगरी का मिनख ईसु कनै आगा अर बाऊँ अरदास करबा लाग्या क बो अठैऊँ चल्यो जावै।

နားေထာင္ပါ मत्ती 8