Yemba - 2017 CABTAL (NT) Non Drama

Yemba - 2017 CABTAL (NT) Drama

Yɛɛ́so á shʉʼ ŋkó á tésɔŋ Jeliko, ńnɔŋ ntɔ́kɔ, mmɔʼ ŋiŋ á gɔ́ éwú, mɛ́ tɔ́ŋ á yí é lɛ Zakio, ŋ́gɔ́ á tɛŋgyā wɔ tswí‑ncup, ŋ́gwɛ̄ ŋkāp tɛʼ. Ńnɔŋ ŋkɔ̄ŋɔ á lejʉ̄ɔ ntií ŋiŋ zīi Yɛɛ́so a á eziɛ́, tɛ́ ŋké te kūʼ, melaʼ mīi, a lɛ tútúʼ ŋiŋ, alāʼ a gɔ́ si mvɛ́nɛ á yí. Á záʼte ŋgʉ̄ɔ mé mvhɔ, ŋ́kɔ́ʼ ánɛ athʉ́, ńnáŋ éwú ŋ́gɛ Yɛɛ́so a a ge etɔ́ke, a echʉ́ nnɛ̄t njʉ́ɔ á yí. Yɛɛ́so á ziŋ tɛ ŋkó á letseŋ athʉ́ mɛ́t, ḿbʉ́ʼɛ menēk njʉ́ɔ á yí, ńtɔ́ŋ á yí ndé ŋ́gɛ: «Zakio, gáknɛ́ esóʼo, á gɔ́ lɛ akɔ̄ lɛ́, meŋ ndáʼ á mba wu ayáʼa. » Á lɛ ŋgákne efhó athʉ́ esóʼo, ńtswí á Yɛɛ́so mé lekāk, ńdɔ̄k mé mba zi. Epuɔ é jʉ́ɔ páʼ Yɛɛ́so pɔ́ Zakio é si ŋgʉ̄ɔ, ńzwɛ́tte ndé ŋ́gɛ: «Ŋiŋ wɔ̄, a yi, á gʉɔ mé mba ŋiŋ tepɔŋ á ndáʼa le. »
Pɔ́ yí é gʉɔ, Zakio á kó ntshóte nnɛ̄t mé lezēŋ Yɛɛ́so, ńdé ŋ́gɛ: «Ḿba Ndi, meŋ a sáne etsō tsá ntsem nzhɛ pīa, égapte á taʼ nzhɛ á mbū wɔ te kuʼ ánɛ azō. Ŋ́gɔ́ éyi, meŋ ndé pɔpte á ŋiŋ, ńtswí ajūɔ zí, mbɔ meŋ a tsɔ́ʼ azō mɛ́t nzhɛ lekua. » Yɛɛ́so á júʼ épúp, ńdé ŋ́gɛ: «Ndém a á ghʉ, megaŋ ŋgyā puɔ, é tswɛ́t azɔ́p ayáʼa. Anuúnē, ŋiŋ wuɔ mɛ́t, a á azí ndhu Ablaham. Méŋ‑Ŋiŋnɔŋ wuɔ a lɛɛ́ eshʉʼɛ á ndo esī atsetsáʼ, ŋ́gɔ̄ á efaāʼ epuɔ pīi pɔ́ le mbí, éghʉ pɔ́ epīŋ nzem á mbū Ndém. »


Epuɔ é le zɛ́t nzwíʼtɛ anu mɛ́t, mbɔ Yɛɛ́so a á tshóte nnɛ̄t tɛ mbáte á Yelósalɛm páʼā, mɛ́ zi á lekwaŋ ŋ́gɛ, Lefɔ Ndém é si ŋgɔ̄ á nzií á ndo esī atsetsáʼ, á lɛ mbɛ́te ashuŋne lepúʼ jʉɔ, ńdé á mbū pɔ́p ŋ́gɛ: «Mmɔʼ ŋkém a lɛ éwú, éshʉʼ ŋŋāʼ nnɛ̄t nnɔŋ ŋgʉ̄ɔ mé atō, mɛ́ ekó éwú, ńchʉ́ á yí ndɔk ŋghʉ̄ á efɔ, tɛ́ a epīŋ nzem, ésáʼ alāʼ zí. Ŋ́gē egʉɔ, ńtɔ́ŋ emɔ̄ʼ megaŋ afaʼ pí legēm, éfāʼ ŋkāp memína legēm, ŋ́gāpte á taʼ á taʼ á mbū awíɛ awíɛ ŋ́gɛ, pɔ́ ecʉ́ʼ nnɔ̄ŋ ndɔ̄kɔ ntáŋa esaá, tɛ yí eláʼ ŋkɔ́ʼ.
Ŋ́gʉ̄ɔ, mbɔ epuɔ alāʼ pí é nnɔŋ mbāa á yí páʼa, ńtó epuɔ á mbū efɔ atō mɛ́t. Pɔ́ gʉɔ ntswī á mbū yí ŋ́gɛ, alāʼ á ka kɔ̄ŋ ŋ́gɛ, ŋiŋ wuɔ a esáʼ á wɔ́p ɔ́.
Á gʉɔ épúp, mɛ́ ké ŋkó nchʉ́ á yí chʉ̄, ńdɔk ŋghʉ̄ á efɔ. Á piŋ nzem á alāʼ, ńdɛ ntɔ́ŋ megaŋ afaʼ pí pīi, a ke yá ŋkāp á mbū pɔ́p lā, ŋ́gɛ pɔ́ elɔ̄k apɛ eshʉ̄ʼ, yí ejʉ́ɔ páʼ e ke cʉ́ʼ ntó épúp. Mvhɔ ŋiŋ á shʉʼ, ńdé á mbū yí ŋ́gɛ: “Mɛkwáŋ, meŋ ke cʉ́ʼ njhʉ́ memína legēm, ánɛ eyi o ke yá me meŋ lā.” Á lé á mbū yí ŋ́gɛ: “Meŋ á kɔŋte á wú, o ó mbɔŋ ŋgaŋ afaʼ. Páʼ o ke wɛ̄ anuúnē á lelɔk ŋghʉ̄ mezízí menu lā, meŋ a yá mekap alāʼ legēm á mbū wu, o esáʼ.” Páte á shʉʼ ndé ŋ́gɛ: “Ŋkɔbé, meŋ ke cʉ́ʼ njhʉ́ memína métáa, ánɛ eyi o ke yá me meŋ lā.” Á lé á mbū ewuɔ ŋgaŋ mɛ́t ŋ́gɛ: “Meŋ a yá mekap alāʼ é tsɛ́táa á mbū wu, o esáʼ.” Mmɔʼ ŋgaŋ á shʉʼ ndé azí ŋ́gɛ: “Mɛnʉ́ʼ, ŋkāp ju ejʉɔ, meŋ ke lɔ̄k azō nzhó ŋkwɛ́t, éféŋ. Meŋ ndɛɛ́ eféŋɛ páʼā, melaʼ mīi, o ó ŋgaŋ leŋīŋ tɛʼ, meŋ mbīŋ nnɔ̄ŋ mbɔ́kɔ á wú. O te gē epɛ́ azō, mbɔ o le nɔ̄ŋ ɔ́. O te gē efāʼ etsō á ŋkāʼ, mbɔ o ke jʉ́ʼ ɛ̄.” Á lé á mbū yí ŋ́gɛ: “Tepɔŋ ŋgaŋ afaʼ, meŋ a lɔk ashuŋne zīi, á tó á nchu wu, tɛ́ lɔk eŋak á wú. O ke nɔ̄ŋ nzhɛ́ɛ á légɛ, meŋ á ŋgaŋ leŋīŋ tɛʼ, ŋ́gē epɛ́ azō, mbɔ meŋ ndɛ te nɔ̄ɔŋ, ŋ́gē efaʼ etsō á ŋkāʼ, mbɔ meŋ kɛ te jʉ́ʼ. O ke nɔ̄ŋ nzhɛ́ɛ épúp, o te néŋ ŋkāp za á báaŋ, meŋ ndáʼ ŋkɔ́ʼ ŋgē etswí, apɛ á zápne éwú ú, melaʼ akɔ̄?” Ńdɛ ndé á mbū epuɔ pīi, é ŋgɔ́ ajʉʼ mɛ́t ŋ́gɛ: “Pɛ efhó á mbū yí, ŋ́kú ŋkāp za, ŋ́gyá á mbū ŋiŋ yīi, a á njhʉ́ memína legēm.” Pɔ́ lʉʼ, ndé á mbū yí ŋ́gɛ: “Ndi, a á ndáʼ njhʉ́ memína legēm.” Á pwɛt ŋ́gɛ: “Pɛ ezhɛ́ á mbɔŋɔ́ á légɛ, mɛ́ e shʉʼ etswiʼne azō áa mbū ŋiŋ yīi, a á njhʉ́ apɛ. Ŋiŋ yīi a kaá njhʉ́ ɛ́, mɛ́ ekú mbɔɔ méŋ agáʼ yīi, a á nzi ŋgwɛ̄. Ḿbiŋ eshʉ̄ʼ ánɛ megaŋ mbo pá pīi, pɔ́ té si ŋkɔ̄ŋɔ ŋ́gɛ meŋ esáʼ á wɔ́p ɔ́, pɛ egɔ̄ á wɔ́p ndɔk eshʉ̄ʼ mé ega, ńzwhíte á wɔ́p á mvhɔ meŋ.”»


Yɛɛ́so á mak á leshūŋne, ńtsia ŋgɔ́ á mvhɔ, ŋ́gʉ̄ɔ mé Yelósalɛm. Ŋ́gʉɔ tɛ nnɔ̄ŋ mbátɛ mekap alāʼ Bɛtfajé pɔ́ Betani, émi é pateé lekwɛ̄t Methʉ́ Olive, éshʉ̄ʼ ánɛ nnɔ yí, ńtó epuɔ mémpīa. Ńdé á mbū pɔ́p ŋ́gɛ: «Pɛ egʉ̄ɔ ánɛ akap alāʼ zīi, á mvhɔ pɛ lēe, pɛ e gʉɔ tɛ lɛ ge ekó éwú, éjʉ́ɔ á mɔ́ njakási, a etsēŋne á esī, mbɔ ŋiŋ a laa á ndo éwú kɔ́ʼ ɔ́. Pɛ elɛ ŋkɛ́ʼɛ á yí, ńdɔk eshʉ̄ʼ. Ŋiŋ a piŋɛ ŋkó ńzɛ́tte á wɛ́ ŋ́gɛ, pɛ kɛ́ʼɛ á yí melaʼ akɔ̄ lɛ́, pɛ etsɔ́ʼ á mbū yí ŋ́gɛ, Ndi a á si ŋkɔ̄ŋɔ á lelɔk ŋghʉ̄ azō. »
Megaŋ nnɔ pí mɛ́t é gʉɔ, ŋ́kó njʉ́ɔ, akʉ̄ɛ akʉ̄ɛ á gɔ́ áa páʼ Yɛɛ́so, a á ŋghíte á wɔ́p épúp. Ńdɛ nnɔ̄ŋ ŋkɛ́ʼɛ á mɔ́ njakási mɛ́t, megaŋ é zɛ́tte á wɔ́p ŋ́gɛ: «Pɛ kɛ́ʼɛ njakási jɔ̄ melaʼ akɔ̄?» Pɔ́ pwɛt ŋ́gɛ: «Ndi a á si ŋkɔ̄ŋɔ á lelɔk ŋghʉ̄ azō. » Ńdé épúp, ńdɛ ndɔ̄k á na mɛ́t, éshʉʼ ŋgyá á mbū Yɛɛ́so. Ńdɔ̄k menzhó mɔ́p nzyākne ŋkaʼte yí, ŋ́ghʉ̄ á kɔ́ʼ nnáŋ éwú, ńnɔŋ ndɔ̄kɔ á yí nzīŋɛ, epuɔ é nɔŋ ndɔ̄kɔ menzhó mɔ́p, ńzyāknɛ á mɛnzhɛ yīi, a gɔ etsia éwú.
Á gʉɔ tɛ nnɔ̄ŋ mbátɛ á Yelósalɛm, ŋ́gɔ́ á ajʉʼ zīi, mɛnzhɛ a fhɔ́ɔ á ndo lekwɛ̄t Methʉ́ Olive esóʼo éwú, nnɔ yí yīi, é ŋgɔ́ tɛ nzá á nzem yí ŋŋyɛ̄nɛ, é zi á lekāk, ŋ́gyá á lepɛ mé ŋghi teté, ńdɔkɔ ŋgūʼtɛ á Ndém, melaʼ meŋkʉʼne anu mīi, pɔ́ ke jʉ́ɔ̄. Ŋ́gyá á lepɛ ŋ́gɛ: «Mbwɛ́né e egɔ́ á mbū efɔ yīi, a shʉʼɛ, mbɔ Ndém mé chʉ́ á yí, ńtó á mbū pek la. Á Ndém yīi a á lephū, ŋ́gɔ́ á ŋgaŋ mbwɛ́né, alāʼ a epú ŋgūʼte á yí. » Emɔ̄ʼ epuɔ Falísia pīi pɔ́ ŋgɔ́ azɔ́p á nnɔ alāʼ mɛ́t, é lé á mbū Yɛɛ́so ŋ́gɛ: «Ńziʼnɛ, cɔ́k epuɔ nnɔ pú, pɔ́ eláŋte. » Yɛɛ́so á pwɛt á mbū pɔ́p ŋ́gɛ: «Cʉ́ʼ meŋ ndɛ eshúŋ á wɛ́, pɔ́ zi ndáŋte, mbɔ metɔ́ e yá á lepɛ. »

Yɛɛ́so á gʉɔ tɛ nnɔ̄ŋ ntshíɛ njʉ́ɔɔ á Yelósalɛm, mezeŋɛ tésɔŋ wuɔ mɛ́t é kó á yí, á zi á lela. Ńdé ŋ́gɛ: «Pɛ epuɔ Yelósalɛm, a láʼa ŋgɔ́ yīi, pɛ le zhɛ́ azɛ́ ajū mīi, á gɔ eyá á wɛ́ apwɛne ayáʼa ā? Ajʉɔ anu mɛ́t á piteé á wɛ́, pɛ gɔ le jʉ́ɔ. Púp, amɔ̄ʼ afʉʼ á si eshʉ̄ʼɛ, ázi megaŋ mbo pɛ́ e shʉʼ epɔ́ akɛ, élɔk ekɛ́nne á wɛ́, ékyɛ́t á wɛ́ á ŋkāʼ. Ékó á tésɔŋ, épú eshʉ́ʼne á wɛ́ a epɔ̄ pɛ́. Épú ekem á tésɔŋ wɛ, tɛ tɔ́ a á le zɛ́t ánɛ mmɔʼ nzápne ɛ́. Ajʉɔ anu a etɔ́kɔ páʼa, melaʼ mīi, á le kūʼ aleʼé zīi, Ndém a shʉʼɛ mé ntswíte pɛ, pɛ ekʉ̄ŋne á yí. »


Yɛɛ́so á gʉɔ, ŋ́gɔ nzíʼ ŋ́kó á Mía Ŋgyā Ndém, ńzī á lejuŋ epuɔ pīi, é ŋgɔ́ á ntē éwú ntáŋa esaá. Ŋ́gē ejuŋ á wɔ́p, ńdé ŋ́gɛ: «Ndém a le lé á ntē aŋwaʼne yí ŋ́gɛ: “Ŋgyā za e efú nnáŋa ŋgɔ́ɔ ŋgyā aswiŋte.” Pɛ pwɔ̄ é kʉʉ̄ŋ esɛt, ńdɔk ŋghʉ̄ ŋka metsɔ́ŋ. »
Á fhó épúp, Yɛɛ́so á nɔŋ ntékɛ epuɔ eleʼé etsem á ntē Mía Ŋgyā Ndém. Wɔ nɔŋ‑epɔʼ epi melʉɛ, ŋ́ghʉ̄ wɔ kɛ́ʼte‑mbé Ndém, mbɔɔ epɔ̄ melʉɛ epuɔ Yúda, é nɔŋ efāʼa eshhʉ̄ yīi, pɔ́ gɔ elɔk ezwhí á yí, tɛ́ ŋké te zhɛ́ páʼ, pɔ́ gɔ eghʉ̄ʉ épúp ɔ́, melaʼ mīi, alāʼ ntsem á lɛ á lezēŋ yí efʉʼ metsem, ńchʉ́ɛ nnɛ̄t njúʼɔ anu zīi, a á si eshúŋɔ.

နားေထာင္ပါ။ Lúkási 19