If you have would like a copy of this version please contact info@davarpartners.org

Text: Churahi New Testament, CC-BY-SA-4.0, The Love Fellowship. Audio: Churahi New Testament Audio Bible, CC-BY-SA-4.0, Davar Partners International, The Love Fellowship, 2022

Churahi New Testament

Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.

तैन्हांं धियाड़िया मझ बड़ै सारै मैहणु यीशु किनि यै जां तेसेरै चोउवो पासै किट्ठै भौ ग्यै, जां तैन्हांं किनि खांणुनि किछ बि ना थियु, तां तेनी अपड़ै चैलै ऐपु किनि शदा करि बौलु, मूं ऐन्हैरै तेईनी बड़ु बुरू आ लगतु, केईनी कि ऐक्यै मैहणु पेहिलै किना त्रियां धियाड़िया किना मूं किनि अत्तै, अबै ऐन्हां किनि खांणुनि किछ बि ना। अगर आंउ तैन्हांं भ्रुख्णां घरेनी भेईजि दियुं ता सै बत्तै मझ बिहोश भौ गांहणै, केईनी कि ऐन्हां मझ कौ दूरां अत्तै यौउरै।
तेसेरै चैलै तेसनी उत्तर दित्ता, “पण ऐन्हां सभनियांं मैहणुवंनी खांणेरै तेईनी ऐस सुनसान जगाय मझ योउती रोटी केणु कोठां किना अंणि सकता, कि सै रजि गहिया।” यीशु तैन्हांं किना पुच्छु, “तुहां किनि केत्थरी रोटी अत्ति?” तैन्हैं बौलु “असु किनि सत्त रोटी अत्ति।”
तां तेनी तेन्हांनि धरती पन बेशणैरी आज्ञा दित्ती, जां सै बेशि ग्यै, जां सै सत्त रोटी लेई जां परमेश्वरैरा धन्यवाद केया जां रोटिरै दो टुकड़ै क्यै जां अपड़ा चैला धेरै दींता ग्या ताकि तैन्हांं मैहणुवंनी बंडि दिया, जां चैलै मैहणुवंनी खांणेरै तेईनी बंडि दित्ती। तैन्हांं किनि थोड़ी किछ मछली बि थी, जां तेनी परमेश्वरैरा धन्यवाद करि-करि सै मछली बि मैहणुवंनी बंडणेरी आज्ञा दित्ती। मैहणुवें खई जां रजि ग्यै। फिरी तेठां किना बाद चैलै भगोरा टुकड़ा केरी सत्त टोकरी भरी करि किट्ठी की। जां मैहणु चोउर हजार लगभग थ्यै फिरी तेनी सै विदा करि दित्तै। फिरी सै तुरंत अपड़ा चैला सेईतै किश्ती पन चढ़ी करि दलमनूता प्रदेशनी चलि ग्या।


फिरी फरीसी यीशु किनि अईछी करि बेहस कांना लगै जां तैस परखणेरै तेईनी तैस किना कौ स्वर्गेरा चिन्ह मग्गा। तेनी तेन्हैरै अविश्वासेरै कारण निराश भौ करि लम्मा शाह लैकरी बौलु, “ऐस टैंमेरै मैहणु केईनी चिन्ह तोपतै? आंउ तुहां सेईतै सच बोलता, कि इस युगैरै मैहणुवंनी कौ चिन्ह ना मेईंणा।” फिरी सै तैन्हांं छडि करि किश्ती पन चढ़ा जां गलील झीलिरै पार चलि ग्या।


यीशुरै चैलै ऐपु सेईतै रोटी अंणनी भुलि थ्यै गियोरै, जां ऐठणीरै तेईनी एकि रोटी छडि करि तैन्हांं किनि किश्ती मझ होरी कौ बि रोटी ना थी जां यीशु सै खबरदार कियै, कि तका “फरीसिया केरै खमीरा जां राजै हेरोदेसेरै खमीरा किना बंचतै रिय्हा।” सै ऐपु मझ विचार कांना लगै, असु किनि रोटी ता अति घट। ऐ बुझि करि यीशु तैन्हांं सेईतै बौलु, तुवे केईनी ऐपु मझ विचार कातै अत्तै कि असु किनि रोटी नति? क्या तुहैं अपड़ै दिल कठोर करि लियौरै अत्तै, कि तुहां हालै बि समझ ना लगती? क्या तुवाड़ै टीरै कांणै जां कंन टंउणै अत्तै? जां तुहां पता ना। तुहैं बचौरा टुकड़ा केरी केत्थरी टोकरी उछुत्तोरी थी, जेख्णी मीं तैन्हांं पंजा हजारा मैहणुवंनी सिर्फ पंजै रोटिये ला रोटी खलाईथी? तैन्हैं तैस सेईतै बौलु, “बाराह टोकरी।” यीशु तैन्हांं सेईतै बौलु, “जां जेख्णी चोउवा हजारा मैहणुवंनी सत्त रोटी थी ता तेख्णी तुहैं टुकड़ा केरी केत्थरी टोकरी भरी करि चुकथी?” तैन्हैं तैस सेईतै बौलु, “सत्त टोकरी।” यीशु तैन्हांं सेईतै बौलु, “क्या तुवे हालै तेईनी ना संमझतै, कि आंउ केणु आ।”

फिरी यीशु जां तेसेरै चैलै बैतसैदा नगरा मझ यै तां मैहणु एकि कांणै तैस किनि लै यै जां तैस सिंउ विनती की, कि सै तैस मैहणु छू करि ठीक करिया। सै तैस कांणैरा हत्थ पकड़ी करि तैस ग्राँईयां किना भेईर लै ग्या। फिरी तैस ठीक कांनेरै तेईनी तैस मैहणुरै टीरा मझ थुक्कु जां तैस पन हत्थ रखा जां तैस किना पुच्छु, क्या तु किछ हैरी सकता? तेनी टीरै खड़ै करि बौलु, “आंउ मैहणुवां तका सकता, पण सै मूं साफ-साफ नत्तै लेहिंथै। सै बुटा सैयि चलतै अत्तै लेहिंथै।” तां यीशु दुबारे हत्थ तेसेरै टीरा पन रखै, फिरी तेनी मैहणु अपड़ै टीरै मोटैरी करि खौलै, जां सै ठीक भौ गियोरै थ्यै, तैस सभ किछ साफ-साफ लेहिंथु थियु। तेठां किना बाद यीशु तेसनी घरेनी गांहणनी आदेश दिता, यीशु तैस सिंउ बौलु अपड़ै घरेनी चलि गा, पण नगरवालनी किछ शुणाणेरै तेईनी नगरा मझ दाखिल मेईं भूंता कि ऐठि कितु भौरू थियु।


यीशु जां तेसेरै चैलै बैतसैदा नगर छडि करि कैसरिया फिलिप्पी शहरेरै नीड़ ग्राँईयां मझ चलि ग्यै। जां तेनी बत्तै मझ अपड़ा चैला किना पुच्छु, मैहणु मिंडै बारै मझ कितु बोलतै अत्तै? चैलै उत्तर दित्ता, “किछ मैहणु सौचतै कि तु यूहन्ना बपतिस्मा दींणै वा, जै मैहणुवंनी बपतिस्मा दिईंथ्या।” किछ मैहणु सौचतै कि तु ऐलिय्याह भविष्यवक्ता; पण कोई-कोई मैहणु सौचतै कि तु पिछलै युगेरै भविष्यवक्ता मझियां अक आ। तां फिरी यीशु तैन्हांं किना पुच्छु, “तुवे कितु सौचतै आंउ आ?” पतरसै तेसनी उत्तर दिता, “तु परमेश्वरैरा भेईजौरा मसीह आ।” तां यीशु तेन्हांनि चेतावनी दित्ती कि तेसेरै बारै मझ कोस सेईतै मेईं बोलतै।


जां यीशु अपड़ा चैलानि शिख्राणु शुरू कियु। कि मैहणुरै पुत्रेरै तेईनी ऐ जरूरी आ कि सै बड़ै दुख उठाईया जां यहूदी वुजुर्ग जां प्रधानयाजक जां यहूदी शास्त्री तैस तुच्छ समझि करि मारी छडिया जां फिरी त्रीं धियाड़ि बाद जींति गहिया। तेनी ऐ गल तैस सेईतै साफ-साफ बोलि दित्ती। ऐत पन पतरस तैस अलग लैई करि झिड़खांणा लगा। पण यीशु पीछेनी मुड़ा जां चैला धेरै तकाउ जां फिरी पतरसनि झिड़खै दित्ती, जां तेसनी बौलु, “ओ शैतान मूं किना दूर भौ गा!” तिंडि गलै सिर्फ मैहणुवां केरी अत्ति ना कि परमेश्वरेरी।


तेनी सारी भीड़ अपड़ा चैला समैत ऐपु किनि शदा करि तैन्हांं सिंउ बौलु, “अगर तुवे मिंडै चैलै बंणना चांहथै ता तुहां अपड़ि ईच्छाय छडि दींणी चेहिंथी। तुहां तेसैरा क्रूस उछुई करि तियार भूंणु चेहिंथु जां मूं पिचालीं चलणु चेहिंथु।” केईनी कि जै कोई इस धरती पन अपड़ि जान बचांणेरी कोशिश करेलै, तेसनी अनन्त जीवन ना मेईंणा, पण तुवे जै मिंडै कारण जां खुशखबरिरै कारण अपड़ै प्रांण दींतै, तेन्हांनि स्वर्ग मेईंणु। अगर मैहणु सारै संसारा हासिल करि लिया जां अपड़ि आत्मायरै बारै न सोचिया ता तेसनी कितु फायदा भूंणा अक मैहणु परमेश्वरनी कितु दी सकता जै अनन्त जीवना खरीदी लैला? किछ बि ना। अगर तुहां मझियां कौ बि मूं अपड़ै परमेश्वरा ना मंनता जां मिंडी शिक्षाय केरा पालन कांना किना नमां काता, केईनी कि तुवे डरींतै कि जै कौ परमेश्वरा पन विश्वास ना कांनारा जां पापी मैहणुवां तुवाड़ा नुकसान कांना, फिरी आंउ मैहणुरा पुत्र, नमां करि दैला कि तुवे मिंडै चैलै अत्तै जेख्णी आंउ पवित्र स्वर्गदूता सेईतै अपड़ै पिताऐरी महिमायरै तेईनी धरती पनि वापस ऐईला। तेख्णी हर कोई मिंडा चमकता तैज तकाला जै मिंडै पिता परमेश्वरा सैयि आ।

နားေထာင္ပါ။ मरकुस 8