If you have would like a copy of this version please contact info@davarpartners.org

Text: Ahirani New Testament, CC-BY-SA-4.0, The Love Fellowship. -- Audio: Ahirani New Testament Audio Bible, CC-BY-SA-4.0, Davar Partners International, The Love Fellowship, 2022

Ahirani New Testament

Ahirani Bible (आहिराणी) by The Love Fellowship is licensed under Creative Commons Attribution-ShareAlike 4.0 License.

हय येशु ख्रिस्त नि पूर्वजस्नी नावस्नी यादी शे. तो राजा दाविद ना वंश ना शे आणि जो अब्राहाम ना वंश शे. अब्राहाम ना पोऱ्या इसहाक, इसहाक ना पोऱ्या याकोब, आणि याकोब ना पोऱ्या यहूदा, आणि तेना भाऊ हुयनात.
यहूदा ना पोऱ्या पेरेस आणि जेरह हुयनात, तामार एस्नी माय होती, आणि पेरेस ना पोऱ्या हेस्रोन, आणि हेस्रोन ना पोऱ्या अराम हुयना. आणि अराम ना पोऱ्या अम्मीनादाब, आणि अम्मीनादाब ना पोऱ्या नहशोन, आणि नहशोन ना पोऱ्या सल्मोन हुयना. सल्मोन ना पोऱ्या बवाज हुयना तेनी माय राहेब होती. आणि बवाज ना पोऱ्या ओबेद हुयना, आणि तेनी माय रूथ होती. राहेब आणि रूथ यहुदी नई होत्यात. आणि ओबेद ना पोऱ्या इशाय हुईना. आणि इशाय ना पोऱ्या दाविद राजा, आणि दाविद ना पोऱ्या शलमोन, त्या स्त्री पासून उत्पन्न हुयना जी पयले उरीयानी बायको होती.
शलमोन ना पोऱ्या रहबाम, आणि रहबाम ना पोऱ्या अबिया, आणि अबिया ना पोऱ्या आसा हुयना. आणि आसा ना पोऱ्या यहोशाफात, आणि यहोशाफात ना पोऱ्या योराम, आणि योराम ना पोऱ्या उज्जीया हुयना. आणि उज्जीया ना पोऱ्या योताम, आणि योताम ना पोऱ्या आहाज, आणि आहाज ना पोऱ्या हिज्कीया हुयना.
आणि हिज्कीया ना पोऱ्या मनश्शे, आणि मनश्शे ना पोऱ्या आमोण, आणि आमोण ना पोऱ्या योशीया हुयना. योशीया, यखन्या आणि तेना भावूस्ना आजोबा होता. जो इस्त्राएल देश ना लोकस्ले बाबेल मा बंदी बनाईसन लीजावा ना पयले उत्पन्न हुयेल होतात.
बंदी बनाईसन तेस्ले लीजावा ना टाईम पासून येशु ना जन्म लोंग, तेना पूर्वज या शेतस, यखन्या ना पोऱ्या शल्तीएल, आणि शल्तीएल ना पोऱ्या जरुब्बाबेल हुयना. आणि जरुब्बाबेल ना पोऱ्या अबिहूद, आणि अबिहूद ना पोऱ्या एल्याकीम, आणि एल्याकीम ना पोऱ्या अज्जुर हुयना. आणि अज्जुर ना पोऱ्या सदोक, आणि सदोक ना पोऱ्या याखीम, आणि याखीम ना पोऱ्या एलीहूद हुयना. आणि एलीहूद ना पोऱ्या एलाजार, आणि एलाजार ना पोऱ्या मत्तान, आणि मत्तान ना पोऱ्या याकोब हुयना. आणि याकोब ना पोऱ्या योसेफ हुयना, जो मरिया ना नवरा होता, आणि मरिया येशु नि माय होती, जो (येशु ले) ख्रिस्त सांगावस.
अब्राहाम पासून दाविद लगून सर्वा चौदा पीडी हुयनात. राजा दाविद ना टाईम पासून त्या टाईम लोंग जव इस्त्राएल देश ना लोकस्ले बंदी बनाईसन बाबेल लीग्यात, तठलोंग चौदा पिढ्या हुयनात. आणि बंदी हुईसन बाबेल ले पोहचाळा ना टाईम पासून ख्रिस्त लोंग चौदा पिढ्या हुयनात.


येशु ख्रिस्त ना जन्म होवाना पयले ह्या प्रकारे हुयन, कि जव तेनी माय मरिया नि मांगणी योसेफ संगे हुईगी त तेस्ना लग्न होवाना पयले, जव ती कुवारी होती, तव ती पवित्र आत्मा ना सामर्थ्य ना द्वारे गर्भवती हुयनी. योसेफ, तीना नवरा एक धर्मी माणुस होता आणि तिले सार्वजनिक रूप शी बदनाम करानी ईच्छा नई होती, एनासाठे तेनी चुपचाप आपली मांगणी तोळाना निर्णय (कारण ती लग्न ना पयलेच गर्भवती दिखनी जे नियम ना विरुद्ध मा शे) करना.
जव तेना ध्यान ह्या गोष्टीस्ना विचार माच होतात परमेश्वर ना दूत तेले स्वप्न मा दिखीसन सांगू लागणा योसेफ, राजा दाविद ना वंश तू मरिया ले आपली बायको बनावाले भ्यावू नको कारण कि तीना गर्भ मा शे तो पवित्र आत्मा ना सामर्थ्य कण शे. ती धाकला पोऱ्या ले जन्म दिन आणि तू तेना नाव येशु ठेवजो, कारण कि तो आपला लोकस्ले तेस्ना पापस पासून वाचाळीन.
हय सगळ एनासाठे हुयन कारण ते सर्व पूर्ण होवो जे परमेश्वर नि यशया भविष्यवक्तास्ना व्दारे येशु ना जन्मा ना विषय मा सांगेल होत. यशया नि ह्या प्रकारे लिख. देखा एक कुवारी गर्भवती हुईन आणि एक धाकला पोऱ्या ले जन्म दिन आणि तेना नाव “इम्मानुल” ठेवाईन जेना अर्थ शे “परमेश्वर आमना संगे.” आणि तव योसेफ निंद मधून जागीसन परमेश्वर ना दूत ना आज्ञा प्रमाणे तेनी मरिया ना संगे लग्न करी लीधा आणि तिले आपला घर लई उना. आणि जठ लगून ती धाकला पोऱ्या ले जन्म नई दिनी तठ लगून तेस्नी काही शारीरिक संबंध नई ठेव. जव तेस्ना पोऱ्या ना जन्म हुईना तव योसेफ नि आपला पयला पोऱ्या ना नाव येशु ठेवा.

နားေထာင္ပါ။ मत्तय 1