Lik - 2013 WBT (NT) Non Drama

Lik - 2013 WBT (NT) Drama

Ara, Yesus elce wibuka deiamuk nang, obarye 12 nang, el yupu peterelbana ati Rasul nang, el dam yangana ati, yukubukce, ‘Na pil dopnin banamak’ tenen, yuk-yuk dopdeibuk. Anang dopdeibuk ning ara, ‘Isa nirya bisibuka yakanamak’ tenen, tonda, ‘Uk yala-yala nirya kwetepnamak’ tenen, winin ning deiyok bitinye aribukce, el mikip sik nong deice deibuk. Ara, anang ara, “Allah arye ninye nirya lyeplirye, sik kanye talima talinamle,” nyabuka, ‘Laka peterelbinamak’ tenen, tonda ‘Uk dilamlye ninye kwetepra banamak’ tenen, el mapu 12 nang dopdeibuk.
Tonda wininamika ati, laka nyabuk yupu ara ani.
“Amutuku-amutuku nirya banamunye talak ara, aning-aning nirya kum libuka banamlulume. Ara, anggunce, ‘Se aning-aning nirya ara, yata wiribuka arye doproptibye do?’ tenen, weik arye tenena meme. Allah arye anggun patapsilye ning ara arenamsile. Kama sirika ap, aling ap, anggun kwaning ap, yo bok ap, baju bitinye ap, libuka kum bopnamlulume,” Yesus arye el mapu 12 nang ati nyabuk.
Nyabukce ayupu ton nyabuk. “Tonok asik domicak bimunyopura, tonok aikuk wekuka anyakauk manmamunya ani, yuk mutuku banamlulume. Anyasik mapmana, orasik mapmana, uasik mapmana kina meme. Yata mutuku do nirya, asik dolamicak bimunyeura, telebe nyabuka, anggun yupu kum kekepsikirye, kum yukupsikcopura, winipnamlulume.
Ara amutuku tuku anggun yan deice palipmasilye ning ara miningdam anyuk kilibuka abatakmunce amutuku batakuka yukak banamlulume. Winipnamluma deiyok ara ani. Ara anang arye, ‘Allah yupu batakmaba ara, pia malye upmaba ati, nun yan tuku yanibuka, kiliplopmasiyaka atonun, Allah arye nun nong wenebuka opnamsile, tenepnamake’ tenen, wininamlulume,” Yesus arye nyabuk.
Yesus arye ayupu nyabukopura, kekebik, ninye nirya sik kanye talima malye tenelamika ap, sik malye ulamika ap batakikirye, kanye tamubikirye, diba tenebiceura, ‘Allah arye sik kanye talima talinamle’ tenen, Allah yupu peterepra balamik. Tonda, amutuku-amutuku nirya peterepra balamikce, uk dilamuk ninye weik kwetelamik.
Yesus el mapu arye peterepra balamika ati, ninye weika arye, Yesus el winilamuk ning ap, el si ap, kekelamik. Tonda, amutuku nirya talyamuknye, weik ninye deiyoknye Raja Herodes ababye, kekebuk. Ton ninye ara, Yesus arye ninye winipman kum pil dolamukak, eibika ati, sikce nyabik. “Kume, Yohanes Pembaptis akunum diamuk bukni, ila tamubuka kam bukuk akarye, ninye winipman kum pil dolule,” nyalamik.
Yuk nang ara, “Kume, anye bira, Allah yupu ap, Allah arye aminyan winipnamle ning ap ati, laka nyalamuknye nabi Elia ulule,” nyalamik. Ara, yuk ninye ara, “Nabi Elia kumura, Allah arye winipnamle ning ap, el yupu ap ati laka nyalamik nang akunum diamik nabi nang kan-kan arye, tonoknye kam bukuka akunum yanmasile,” nyalamik. Nyalamikura, Herodes kekebukce kanye teniltolamuk bukni, Raja Herodes arye ayupu nyabuk. “Se, Yohanes Pembaptis akunum ya arye seklopsa ati, anye bira, mambul pil dobuka anye biti nyaninyaka ara, yatanye birye apil dolul do?” nyabuk. Utenebukce, ‘Na ton eiptinye’ tenen, piripdeyuk.


Yesus arye wibuka deibukura, el yupu dobuka peterepra balamik nang, Rasul nang peterepra balamika ani, tamubuka Yesus dam yayikce, sik peterepra balamik ning ap, sik pil dolamik ning ap, Yesus ati yanuka laka nyanmek. Yesus arye, sik yuk nang daunmakibuk, ‘Na ap, na mapu Rasul nang ap, nunuk tonok mutuku si Betsaida mutuku binuyabe’ tenen, bisik banmeka ani, bisik noutam arye, ninye una kumak biyik.
Sik yuk banmek bukni, sik sakwetebuka, banmek talak eibik nang arye, laka nyanmeka ati, yuk ninye weik kel bikik akarye, ‘Epdanamap’ tenen, sik babye, aminyan banmek. Yesus Betsaida mutuku akunum biyukopura, ayupa weik aminyan wekelbiyik nang ati, telebe nyabuka, “Allah arye ninye lyeplirye, sik talima pia talilule,” nyabuka peterelamuk yupu tonap peterenmok. Tonda, sik uk dilamuk ninye weik kwetenmok.
Peterenmokura, keting kumupnamok talak ara, Yesus el wipdeibuk nang, sik 12 nang arye, Yesus dam nyalyayik. “Naio, ninye kumak unmaba anya arye, keting akunum kumupla ati, abulupmak nang dopkwetebibyeura, amutuku noutamak yuk-yuk aik malbiting akarye, sik din ning dekuka diptinge,” nyalyayik. Nyabik bukni, Yesus arye el mapu 12 nang ati nyabuk. “Angguncuk sik din ning areplulume,” nyabuk. Nyabukopura, sikce tamubuka Yesus ati nyabik. “Kume naio, nunda din ning roti pamubarye ap, mekin bal bitinye ap, anyuk upmasila ati, yuk din ning kum dekeipyopura, aninye pia weik ati aninguk kum areptibye,” nyabik.
Atalak ara, ninye yupa pia weike sal dem 5.000 bulubuka unmeka ati nyabik. Nyabikura, Yesus arye tamubuka nyapdeibuk ati, el mapu arye ayupa weik wekmek nang ati nyabik. “Anggun yuk-yuk yupa pamubarye kibuka, (ara ninye 50 nukuka) tuku deice ak bokuka yuk-yuk buklulume,” nyabik.
Nyabikura, awekmek nang arye bokuka bukikopura, ton tam yupa weik pamubarye bukik. Ton tam babye, atonun yupa weik pamubarye bukik. Anang nirya ara, yupa weik 5.000 ninye bokuka bukik. (Awekmak nang nukik bukni, kilapu ap, mapu ap, kum nukik.) Akunum bukikopura, Yesus el mapu arye, roti pamubarye ap, mekin bal bitinye ap, arepnamek ning ara dobuka im deice dipdeyukce, Allah ati, “Telebe,” nyabuk akarye, aroti ara toptalibukce, el mapu obarye 12 nang arye, ‘Abukmek nang arepnamak’ tenen, aribuk. Tonda, amekin bal bitinye sekuka el mapu aribukura, abukmek nang ati, aroti ap, amekin bal ap bokuka arinmek.
El mapu arye abukmek nang ati, aning bokuka arinmekura, doprobikce dinmeka ani, akunum boubukopura, ton batakik ning ara, bulubuka deibikce, dobuka tonok ak deibik. Yesus el mapu 12 nang arye bulubuka libuka deipmek ning ara, aling atonun ning, el si ara bakul, weik ning 12 deiamika arye libuka deibik.


Tonok sum ara, Yesus ap, el mapu ap, sik yuk unmekce Allah moronmekopura, Yesus arye el mapu ati asipdeyuk. “Yuk nang arye nati yatanye tenebuka nyaninyak do?” nyabuk. Nyabukura, sik nirya arye tamubuka nyabik. “Ton nang ara, ‘Yohanes Pembaptis ulule,’ nyakinyake, ton nang ara, ‘Elda Allah yupu laka nyalamuknye nabi Elia,’ nyakinyake, ton nang ara, ‘Allah el yupu ap, elce winipnamle ning ap ati, laka nyalamik nang kan-kan arye diamik bukni, tonoknye kam bukuka ulule,’ nyakinyake,” nyabik.
Nyabikura, Yesus arye el mapu 12 nang ati tamubuka asipdeyuk. “Ton nang ara, ayupu nyakniyak bukni, anggunce nati, yatanye tenebuka nyanululum do?” nyabuka asipdeyuk. Asipdeyukura, Peterus arye tamubuka nyabuk. “Naio, anda ‘Ninye mutuku-mutuku nirya, ninye weik lyeplirye, talipnamle’ tenen, Allah arye wipdeiamkuknye, anda Ninye Lyena Deiyoknye, Kristus ulyame,” nyabuk. Peterus nyabukura, Yesus arye sik nirya ati nyabuk. “Aning ara, yuk nang ati laka kum nyalbinamlulume,” nyabuka yupu moup deibuk.

Yesus arye, anyapmok yupu moupdeibukce, el nong deice ikin ning deipnamik ning ap, kanye imun ning upnamuk ning ap, el mapu obarye 12 nang ati, deiyok koubuka lak nyabuka peterenmok. “Nara, Ninye Mi Koprop Atonunye unune. Sik Yahudi yala nang sik deiyok nang ap, Allah arena ati deiyok nang ap, Allah arye, ‘Winipnamlulume, aning kum winipnamlulume,’ nyapdeibukura, Musa arye sekamuk yupu peterena deiyok nang ap, anang nirya arye nati bataknikirye, opnamniyake. Opnikcopura, dipmanya ani, lik winilye mapmanya ani, Allah arye tamubuka kam bukeipnamnile,” nyabuk. Ayupu nyabukopura, ayupu tonap, nyabuk.
Yata nang do nirye, nati dib tenepnikirye na melibuka dobolyanganamniak nang ara, sik ning ati, ‘Aning mambul,’ kum tenenamake. Sik babye, winibuka obikceba, dipnamak nanguk, wanwanun yo dobuka talye balamikirye, anang arye, ‘Akunum oplopnamak ara, telebuka,’ tenenyak touk, na mapu babye, ‘Opnamsiak do?’ tenena kum arye, sik kam un ning ap, sik pataplye ning ap, adiparyuk kum tenenamake. Yesus dib tenebikca deice arye Yuk malye-malye nang arye na mapu obikcopura, ‘Ara mambul,’ kum tenenamake. Na yupu uk kekebuka dobolyanganamake.
Aning ati ara, yata nang nirya ara, nati dib tenepnica ati, yuk nang arye “Opnuyabe,” nyabikiba, ilil uplya ati, sikce, ‘Nun kam una ap, nun patapsilye ning ap, aninguk mambule. Nun ning uk,’ tenebuka ulamice ninye ara, aminyan Allah arye weneplirye, opliba, dipanamake. Aminyan talak ara tuba tonap, sik kam pia kum unamake. Bukni, nati dib tenebikca deice arye, yuk nang arye na mapu obikceura, dipnamak ninye ara, aminyan ara pia kam unamake.
Tonoknye birye, aning-aning yala weike talyamtua ani, nati diba tenena kumce, dipturye, uku din mutuku bitopura, atalyamtu ning nirya arye lyeptu do? Aning nirya arye teleb kum updeipmimitue. Yata nang do nirya, anggun anang kan-kan upmunce, na nong ap, na yupu ap ati, ‘Yesus ati diba tenebibyeura, yuk nang arye nun nong deice ikin ning deipsicak do, opsicak do?’ tenen, anggun ilil ati alye usilyeura, nati bataknumunyopura, aminyan sirya talak ara ikin weik upnamsile.
Ara Allah daunmalya ani, na Ninye Mi Koprop Atonunye birye aminyan talak, ‘Anang ara, na mapu kume,’ nyabuka anggunti bataknamsine. Ara, na ni el urasin pia teleb ulirye, dirina weik ulya atonun, na babye, atouk upnyopura, Allah arye kwepdeibukak im deice unyak nang malaikat ap, ansinipropbibirye, tukwak yanamap talak ati nyapsine. Yesus arye awekmek nang ati nyabuk.
Nyabukce, ayupu ton nyabuk. “Na dipkoprop yupu nyapsine. Anggun mening dam atikmalum nang kan-kan arye, ton nang ara Allah arye ninye mutuku-mutuku nirya ninye lyeplirye, el mikip deice sik talima talipnamle talak min kum winipmalye talak ara, kum dipnamlume. Sik aninye ara aminyan awinipnamle ning eipnamake.” Yesus arye awekmek nang ati nyabuk.


Ayupu nyabukopura, daulamika ani, naku barye sum akunum mabikopura, Yesus arye winilye nanguk doprobukce, ‘Allah moropnuyap’ tenen, weik mutuku dup welebik. Yesus ap mutuku dup welebik nang si ara, Peterus ap, Yakobus ap, Yohanes ap, Yesus ap, sikuk amutuku dup welepmek. Sik amutuku dup welebikopura, sik awinilye nang wi ubukura, mapmek. Sik mapmek talak ara, Yesus arye Allah moronmok karen ara, Yesus urasin yuk ubuk. Urasin yuk ubukce, el cang baju, el si juba kurubukce, bebeya lingum alamle touk, dirina weik ubuk.
Winibukura, sik awinilye nang mapmek dam arye, minop ulamik nang ara, Allah el im deice dirina ubuk deice arye, nabi Elia ap, Musa ap, Yesus dam tikilyarik. ‘Tikilyarikura, Allah arye Yesus ati, Winipnamle’ tenen, akunum wipdeiamuknye ati, yupu talipmek. Ara, Yesus ap sik neika tikikce, yupu talipmek. Allah el im deice dirina ubuk deice arye yarikce, sik yupu talipmeka ara, Yesus Yerusalem mutuku biyukura, opnamik ap, el tamubuka kam bukukce, im deice binamuk ning ap ati, ayupu talipmek.
Sik Peterus ap, Yakobus ap, Yohanes ap ara, amutuku dam mapmeka winiryuk wi walwal bukikopura, wi walwal upmok arye, wi dung-dung anmek, ak adirina weik ubukura, lukdanuka dung-dung abik. Akunum dung-dung abik karen ara, Yesus el urasin yuk ubuk ning ap, el dirina weik ubuk ning ap, abitinye nang el ap neika tikmekak arye, yupu talipmek ning ap, eibik.
Sik nabi Elia ap, Musa ap, Yesus ap, ayupu talipmekce, abitinye yanmarik nang binurik talakuk, Peterus arye Yesus ati nyabuk. “Naio, nun aunmaba ara, pia teleb ati, nun winilye nang arye buru aik ton doptibye. Ton aik ara anti, ton aik ara Musa ati, ton aik ara Elia ati doptibirye, anyakuk ulamtibye,” Peterus arye nyabuk. (Peterus arye ayupu nyabuk ning ara, Yesus el urasin yuk ubuk ning ap, Musa ap, nabi Elia ap yanmarik ning ap, yupu nyaprik ning ap, nirya eibikce, ‘Se’ tenen, ngalukikura, Peterus arye bita bikna kumce, talye yupu nyabuk.)
Peterus ayupu tuba nyanmok talak ara, dua arye siktikmek mutuku nirya libukce, adua arye yanuka siknipdongobukura, aning ati Yesus el mapu ara, ilil weik ubuk. Adua kan-kan ara, Allah arye ayupu nyabuk. “Aunmalanye bira, na Mi Koprop ulule. Narye el wibuka deiamsa ati, el yupu pia moubuka kekenamlulume,” nyabuk.
Allah arye ayupu nyabukura, adiparyuk sik awinilye nang arye, siktikmekak dana-dana dipdeyikura, ayanmarik nang bitinye ara, kum eibik. Sik winilye nang ap, Yesus ap sikuk atikmek. Amutuku dup arye tamubuka kulukuka yayikce, aunmek talak ara, Yesus el mapu winilye nang arye awinipmokura, eipmek ning ara, yuk nang ati, laka kum nyalamik. Sikuk kanye pum tam biklamik.


Sik welepmek mutuku deice arye kouluka yanuka mapmeka berekukopura, ‘Ninye weik Yesus el yupu ton kekepnuyap’ tenen, bulubuka yanuka wekmekura, epdayik. Awekmek nang kan-kan tonoknye birye Yesus ati ayupu nyabuk. “Naio, na mi tonokuk dinmala ati, dipdetumce kwetepnutume. Na mi isa talilyangalye talak nirya ara, isa mikip arye wekliryeura, ngaluklirye, tuku deice dobuka poukloplyeura, si kamula sakalule. Tonda, si lingdarap ablirye, sirim bir-bir abuka, el nong nirya malye kilule. Aisa arye na mi batakna pia kume. Pia opmanto ulule. Winilul ati, ‘An mapu arye aisa yakwetepnamak’ tenen, weika arye moropman bukni, sikce kum yakwetepmanto upmake.” Ami el li birye Yesus ati nyabuk.
Nyabukura, Yesus ayupu kekebukce, atikmek nang nirya ati lik ubukura, ayupu nyabuk. “Anggun wini talak ululum nang ara, dib kum tenelalum nang ati, yata talak arye, pia aunamne do? Tonda, ‘Teleb unamak do?’ tenen, batakna kum arye yata weribukap talak arye pia neika unamap do? Ati, ami ara na dam boyalulume,” nyabuk.
Yesus arye nyabuka ati, anang arye ami dobuka Yesus dam boyayik talak aryuk, ami talyamuk isa ara Yesus eibukopura, ami dobuka tuku deice pouklobuk akarye, aisa mikip deice arye sirim weik arye talipmok. Sirim donmokce tuku deice dokuka poubukce, tuku deice bongoltonmok akarye, si kamula barukunmok. Ami wininmokura, ami talyamuk isa ara, Yesus arye yakuka dopkwetebuk ati isa ami talima pum tam kutukuka biyuk. Biyukura, ami ara teleb ubuk ati, Yesus arye el li bak tamubuka aribuk. Winibukopura, awinipmok ning nirya eibik nang arye, ‘Se Allah el mikip ara pia weik ulule,’ tenebuka ngalukik.
Yesus arye nyabuk. “Na nyapnusin yupu ara moubuka kekepnululume. Luba kina meme. Ninye Mi Koprop Atonunye, ninye yupu delilbiceura, opnamniyake,” nyabuk. Yesus arye ayupu nyabukura, el mapu ara, kekebik bukni, bita kum kel bikik. Allah arye ayupu deiyok duknubuk anya arye sik bita kum kel bikik. Tonda, sik ilil ubuk ati, “Anyapmasilam yupu deiyok ara, laka nyapsilyame,” nyabuka Yesus ati kum asipdeyik.


Yuk talak ara, Yesus el mapu sikuk yupu talipmekce, yupu nyanmek. Sik yupu nyanmeka deiyok ara, ‘Nun kan-kan arye, yatanye tiklirye, nun deiyoknye kipnamsil do?’ tenen, sik arye nyaldanmekce, yupu talinmek. Yesus arye sik kanye talima noutamak tenenmek ning akunum kel kibuka ati, tonok mitik mi dobuka sik kan-kan arye tikdeibukce ayupu nyabuk. “Yatanye do, yata kil do, amitik mi atonun ninye ati, bico tenebikirye, na si deice arye telebe nyabuka mililamicopura, ara nati melinamniyake. Nati, melinamniyak nang ara, natibuk kume. Nati, milipnicopura, ara na dopdeipnuknye, Allah ati melinamake. Yatanye do, yata kil do, ‘Na weiknye upnamne,’ tenenyak nang ara, ninye amu tam unyakce, yuk ninye nirya ati, bico tenebuka melinauk unamake. Atouk uplinye bira, Allah el kanye ara, ‘Anye bira pia mambulnye,’ tenelule,” Yesus arye nyabuk.
Yesus arye nyabukura, Yohanes arye tamubuka nyabuk. “Naio, tonoknye elce ninye talilamuk isa ara, an si deice arye yaklamuk ak, eibupurye, anye bira nun ap kum banyapnye biti, ‘Anda bataklyame,’ nyabupe,” Yohanes arye nyabuk. Nyabukura, Yesus arye tamubuka nyabuk. “Ato nang ati, anggunce yupu kum sekenamlulume. Yata ninye do nirya, na yupu kum yanisinyak nang ara, nun ap neika pil donyap ninye atonun unyake.” Yesus arye nyabuk.

Yesus im deice tamubuka welepnamuk talak dam akunum kibukaura, yuk ning tenena kumce, ‘Adip aryuk Yerusalem mutuku abinune,’ tenebukce, bisik banmok. Tonda, el melina nang bitinye wibuka, ‘Na ti, aning kintinip deipnamnirak’ tenen, dopdeibuk. Dopdeibukura, sik banmarika ani, bisik noutamak Samaria mutuku asik tonok dolamikak birik. Anyasik dam binuka wekrikce, ‘Anyakuk Yesus el ning kintinipnuname,’ teneprik bukni, sik Samaria mutuku ulamik nang arye, ‘Kume, sik deiyoknye Yesus, Yerusalem mutuku binamala ati, aning winipnurak’ tenen, kel bikikce, Yesus ati “Kume, anda, Yerusalem mutuku binamlyama ati, nun ap neika una kume,” nyabuka kum yukubik.
Kum yukuprobik ati, Yohanes ap, Yakobus ap eiprikopura, Yesus ati ayupu asipderik. “Naio, Allah moropnimnyeura, ‘Allah im deice arye uku dopkweteptuba, anang nirya ara dipdoptue’ tenen, Allah moropnunam do?” nyabuka asipderik. Bukni, Yesus arye tamubuka anang bitinye ati, “Winina ara, pia malye,” nyabuka wenebuk. Wenebukopura, sik nirya amutuku batakuka, yuk asik dolamikak biyik.


‘Yerusalem mutuku binuyap’ tenen, bisik banmek talak ara, tonoknye birye Yesus ati ayupu nyabuk. “An banalamak nirya ara, narye melibuka dobolbanamkine,” nyabuk. Nyabukura, Yesus arye tamubuka anye biti nyabuk. “Mabil mana atonun ning do yuk talye buru tam ulamle ning do nirya ara, tuku palibuka aik dobikirye unyake. Maka yala nirya ara, sik aik ara, yo duba dobuka unyake. Wininyakbuk nara Ninye Mi Koprop Atonunye bira, na aik kopropa kum ati, na man aik ton lo kum upnuke,” Yesus arye nyabuk. Tonye biti, Yesus arye, “Na melibuka dobolyanilyame,” nyabukura, anye birye tamubuka nyabuk. “Deiyok, teleb bukni, na ni dipmala ati, minop weipnirye. Na ni weipneyopura, aminyan talak, anti melibuka dobolyanamkine,” nyabuk.
Nyabukura, Yesus arye tamubuka nyabuk. “Dib tenena kum ninye ara, dibinyak ninye atonun unyak anya arye, sik dibikce ninye ara, aninye arye weiptinge. Anda, ‘Allah arye ninye weik lyeplirye, anggun kanye talima talinamsil talak akunum yanmale,’ nyabuka, Allah el kai teleb yupu ara, peterelbilyame,” nyabuk. Tonye birye Yesus ati, ayupu nyabuk. “Naio, aminyan ara, narye an melibuka dobolyanamkin bukni, winira min, na mutuku kopropa tamubuka bitinirye, na yala nang ap, na kayapu nang koprop ap ati, ‘Telebe anggun daululume,’ nyapdeipnirye,” nyabuk.
Nyabukura, Yesus arye winipmanto yupu tamubuka nyabuk. “Yata ninye do nirya, weik yo kan-kan wa deiyok koubuka wipnin balamikirye, ikin uplyeura, ‘Se apil tuba kum doptinye ati, bataknun do?’ tenen, tamubuka wa min arye wiamikcak caknam ati tenebikirye, tamubuka dilbanyak nang ara, atonun ninye ara na pil kum doptinge. Tonda, ‘Allah arye ninye weik lyeplirye, sik kanye talima talinamsil’ tenen, Allah el pil kum doptinge.” Yesus arye ayupu nyabuk.

နားေထာင္ပါ။ Lukas 9