If you would like a copy of this version please contact info@davaraudiobibles.org

Wagri New Testament

हेरोदेस राजा ने दाड़ा मा जेरे यहुदिया परदेस ने बेतलेहम नगर मा ईसु ने जनम थाजू। ते जुओ, उगमणी हाड़े हू थुड़ाक जोतिसी यरूसलेम मा आवीनी पुसवा लागा के, “यहुदिय ने राजो जिने जनम थाजू हे, किय हे? केमके अमय उगमणी हाड़े विने तारो डिटो हे नी वणाय दणवत करवा आजा ह।”
यू हबलीनी राजा हेरोदेस नी वणा हाते यरूसलेम ने कईक मनका गबराई गिय। तणी वणाय हेता मुटायाजक नी मुसा ने नियम हिकाड़वा वाले वगळा करीनी वणअ हू पुसयू के, “मसी ने जनम किय थावू जुजे?”
वणय हेते वणाहू केजू, “यहुदिया परदेस ने बेतलेहम नगर मा, केमके परमेसवर ने हाड़े हू बुलवा वाले एवू लकजू हे के,
“ ‘हे यहुदिया ने बेतलेहम ने मनको,
तमारे नगर यहुदिया ने कणा नगर हू कम नीं हे,
केमके तय मा हू एक राजो निकलहीं,
जी मारे इज़रायेल ने मनका ने रकवाली करहीं।’ ”
तेरे हेरोदेसे जोतिसीयोय सुपके हू हादिनी वणहू पुसयू के, वी तारो कणी वला दिकाणो तो। नी यू केईनी वणाय वा बेतलेहम मुकलजा के, “जाईनी वणा सुरा ने बारामा सई सई पतो करो नी जेरे वी मली जाए, ते मय बी हमिसार आलवान ताकि मुँ बी आवीनी वणाय दणवत करू।”
पसे वा राजा ने वात हबलीनी जाता रेजा, नी जुओ, जी तारो वणय उगमणी हाड़े डिटो तो वी वणअ मोरी मोरी हिड़जो नी जिय सुरो तो वणी जगा माते पोसीनी रूकाई गियो। जेरे वणय वी तारो डिटो, ते वा कईक राजी थाजा। नी वा घेर मा गिया ते वणय वी सुरो विने आई मरियम ने हाते डिटो, नी वणय गुड़अ माते आवीनी वणा सुराय दणवत किदू नी आपड़े जुली खुलीनी हुनू, लोबान नी अनतर ने भेट सडावजी।
नी परमेसवर हपना मा वा सकोर किदा के, तमो पासा हेरोदेस कनी नकी जाता वो, तणी वा बिजी वाटे थाईनी आपड़े देस आवी गिया।

जेरे वा जोतिसी जाता रेजा ते, यूसुफे हपना मा परबू ने एक हरगदुते परगट थाईनी केजू, “उट, सुराय नी विने आजी लईनी मिसर देस मा जातो रे नी जेरे लगण मुँ तय हू नीं कऊँ, तेरे लगण वियस रेवान। केमके हेरोदेस अणा सुराय हुजी रेजो हे ताकि वणाय मरावी दड़े।”
तणी वी रातेस उटीनी सुराय नी विने आजी लईनी मिसर देस मा जातो रेजो। हेरोदेस ने मरवा लगण वी वियस रेजो। यू तणी थाजू के, परबू ने वु वसन जी परमेसवर ने हाड़े हू बुलवा वालअ हू केजू तु वु पुरू थाई हके, “मय मारे सुराय मिसर हू बान्णे हादजो।”

हेरोदेसे जेरे यू जुजू के, जोतिसीय मारे हाते दोको किदो हे, ते वी री हू पराई गियो नी वणाय हुकम काड़जो के, जोतिसी केजू तुहू वणा समय, वणा ने आहे पाहे जनमजअ बेतलेहम नी विने आहे पाहे ने बे वरह या वणाहू बी नाना नाना सुरअ मरावी दड़जअ।
तेरे परमेसवर ने हाड़े हू बुलवा वाला यिरमीयाय जी वसन केजू तु वु पुरू थाजू के,
“रामाह नगर मा एक दुक हू पराईली थकण आवाज़ हबलाणी,
आवाज़ रूवा ने नी मुटा दुक ने ती।
राहेल आपड़े सुरअ ने हारू रूई रेजी ती,
नी सानू रेवा नीं साहती ती।
केमके व नीं रेजअ।”

पसे हेरोदेस ने मरवा बाद मिसर मा यूसुफे हपना मा परबू ने एक हरगदुत परगट थाजो, नी वणाहू केजू, “उट सुराय नी विने आजी लईनी इज़रायेल देस मा जा, केमके जी सुराय मारवा वालो तो, वी मरी सुको हे।”
पसे यूसुफ उटजो, नी सुराय नी विने आजी लईनी इज़रायेल देस मा आजो। पण जेरे यूसुफे यू हबलजू के, यहुदिया माते आपड़े बाप हेरोदेस ने जगा माते अरखिलाउस राज करी रेजो हे ते, वी विय जावा हू बयी गियो, नी पासू हपना मा परमेसवर ने हुकम पाईनी गलील परदेस मा जातो रेजो। नी नासरत नामक नगर मा घेर माड़ीनी रेवा लागो ताकि परमेसवर ने हाड़े हू बुलवा वालअ हू केजू गियू वसन पुरू थाए के, “वी नासरी केवाहीं।”

နားေထာင္ရန္ मती 2