Acateco (Kanjobal, Western) - 2001 Edition (NT)

Jaꞌ yet jun xewbꞌal cꞌu yet ebꞌ Israel, jix ecꞌ Jesús bꞌey jun bꞌe xol wan ixim tiriw yetoj ebꞌ scuywom. Jaꞌ ebꞌ scuywom tuꞌ, jix yiꞌel jayebꞌ sjolom ixim ebꞌ, catuꞌ jix sbꞌuchon eltej ixim ebꞌ, catuꞌ chi scꞌuxun ebꞌ. Catuꞌ jix skꞌanlen el wan ebꞌ Fariseo tet ebꞌ jaxca tiꞌ:
—¿Tzet yuxan che yun jun tzetyetal chi yal cu ley tol cꞌam chi skeꞌ yet scꞌual xewilal? ẍi ebꞌ tet ebꞌ scuywom.
Catuꞌ jix yalon Jesús tet ebꞌ:
—¿Tumi cꞌamto bꞌey che yil tzet chi yal yul An Juun Tzꞌibꞌebꞌilcanoj, tzet jix yun naj David junel yet peyxa, yet jix tit swail yetoj ebꞌ yetbꞌi naj? Jix octoj ebꞌ yul Kꞌap Na yet Dios,* jix yiꞌon a ixim pan asan Dios ey yet. Jix sloꞌon naj yetoj ebꞌ yetbꞌi. Jaꞌ wan pan tuꞌ, asan ebꞌ yakꞌomal xaambꞌal tet Dios ey sleyal sloꞌoni, ẍi Jesús tet ebꞌ.
Catuꞌ jix yalon pax oj:
—Jain tiꞌ, chi skeꞌ walon tzet chi skeꞌ kunen yet scꞌual xewilal, yutol Akꞌbꞌil Wopiso yu Dios xol ebꞌ ket animail,* ẍi Jesús tet ebꞌ Fariseo tuꞌ:


Jaꞌ yet junxa scꞌual xewilal, jix octoj Jesús yul jun snail sculto ebꞌ yet Israelal. Jix cꞌoli scuywa snan xol ebꞌ. Ey jun winaj sicbꞌinaj el swatxꞌ kꞌabꞌ, eyecꞌ naj tituꞌ. Jaꞌ ebꞌ cuywam yin sley Moisés yetoj ebꞌ Fariseo, jix smaj ebꞌ yilaꞌ ta oj waꞌxoj can skꞌabꞌ naj tuꞌ yu Jesús yet scꞌual xewilal tuꞌ. Yutol chi yoche ebꞌ chi ilcha junoj tzet chi oc spenailoj Jesús, catuꞌ chi bꞌuchwa ebꞌ yin. Yotaj xa pax Jesús tzet lalan snaꞌon oc ebꞌ yin. Yuxan jix yal tet naj sicbꞌinaj el skꞌabꞌ tuꞌ jaxca tiꞌ:
—Titan jin cꞌatan an, catuꞌ chach oc linan cu nan jon, ẍi Jesús tet naj.
Catuꞌ jix a linan naj. Jix lawi tuꞌ xin, jix yalon Jesús tet ebꞌ jaxca tiꞌ:
—Ey jun tzetyetal oj jin kꞌanle el ey jex an. ¿Bꞌeytet junoj ey sleyal kunen yet scꞌual xewilal che naꞌ? ¿Jam tzet watxꞌ chi skeꞌ kuneni, ma jaꞌ tzet pena? ¿Chim skeꞌ kakꞌon can waꞌxoj scꞌul junoj yaꞌey, ma chi skeꞌ kakꞌon can cam junoj ánima? ẍi Jesús tet ebꞌ.
Jix lawi tuꞌ, jix ecꞌ tꞌananoj Jesús xol ebꞌ joyan oc yin tuꞌ. Jix yalon tet naj jaxca tiꞌ:
—Bꞌieltoj ja kꞌabꞌ, ẍi Jesús tet naj. Jix sbꞌion eltoj skꞌabꞌ naj, catuꞌ jix waꞌxi canoj. Caw jix tit pax sjowal wanxa ebꞌ. Catuꞌ jix slatiꞌne el sbꞌa ebꞌ yu tzet oj yute Jesús ebꞌ.


Jaꞌ yet jun tiempoal tuꞌ, jix too Jesús txaloj bꞌey jun wonan. Jun akꞌbꞌal txa cꞌal jix yun tet Dios tituꞌ. Jaxa yet jix kꞌinibꞌi a yet junxa cꞌu, jix yawtentej ebꞌ scuywom tuꞌ scꞌatan. Catuꞌ jix sicꞌon el lacawan xol ebꞌ. Catuꞌ jix yaon oc yopiso ebꞌ tuꞌ yu yoc ebꞌ ẍejabꞌoj. Jaꞌ sbꞌi ebꞌ tiꞌ: Simón, naj jix yij pax Pedro yu Jesús, yetoj jun yuẍtaj naj, Andrés sbꞌi, yetoj Jacobo, Juan, Felipe, Bartolomé, Mateo, Tomás, ey junxa chi yij sbꞌi Jacobo, scꞌaal naj Alfeo. Ey junxa Simón sbꞌi, yetbꞌi sbꞌa yetoj ebꞌ Cananista yet yalantoj. Ey jun chi yij sbꞌi Judas, yuẍtaj Jacobo, yetoj pax Judas Iscariote, naj jix aon oc Jesús yul skꞌabꞌ camich.


Jix lawi tuꞌ xin, catuꞌ jix eytej Jesús tuꞌ yetoj ebꞌ scuywom bꞌey jun wonan tuꞌ. Palan yeyol ebꞌ bꞌey jun acꞌal. Ecꞌal ánima jix tit bꞌey wan conobꞌlaj yul yet Judea. Jix apni ebꞌ scꞌatan Jesús tituꞌ. Ey ebꞌ jix tit bꞌey conobꞌ Jerusalén. Ey pax ebꞌ jix tit bꞌey stiꞌlaj jaꞌ mar, jaꞌton bꞌey conobꞌ Tiro yetoj bꞌey conobꞌ Sidón. Jix apni ebꞌ yabꞌ tzet chi yal Jesús. Ey ebꞌ xin, yu yiꞌle can el junoj syaꞌilal yin ebꞌ yu Jesús, yuxan jix apni ebꞌ. Ey ebꞌ eyoc pena espíritu yin, jix waꞌxi can scꞌul ebꞌ yu Jesús. Masanil ebꞌ chi yoche chi oc mitxꞌan yin Jesús tuꞌ, yutol chi waꞌxi can scꞌul masanil ebꞌ yu yipal Jesús.

Jix ecꞌ tꞌananoj Jesús xol ebꞌ scuywom tuꞌ, catuꞌ jix yalon tet ebꞌ jaxca tiꞌ:
—Jaꞌ jaex mebꞌa jex tiꞌ, watxꞌ je yet, yutol eyoc Dios je Yaawiloj.
Jaꞌ jaex ey je wail tiꞌ, watxꞌ je yet, yutol oj no can je cꞌul.
Jaꞌ jaex chex okꞌ tinaniꞌ, watxꞌ je yet, yutol oj jex tzeewoj.
Jin yaꞌiloj jain Akꞌbꞌil Wopiso yu Dios xol ebꞌ ket animail tiꞌ, oj chichon oc scꞌul ebꞌ ánima je yin, oj jex ujtele el xol ebꞌ, catuꞌ oj jex bꞌuchle yu ebꞌ. Caw cꞌam swatxꞌil oj yal ebꞌ je yin jin yaꞌiloj an. Jaꞌ yet queytuꞌ oj jex yute ebꞌ tuꞌ, caw watxꞌ je yet.
Tzalajonwej yin sicꞌlebꞌil, yutol ey tzet oj je chaꞌ sqꞌuexeloj bꞌey satcan. Jaxca chex utele tiꞌ tinaniꞌ, quey pax tuꞌ jix utele ebꞌ ẍejabꞌ Dios yu ebꞌ ánima yet peyxa.
Jal jaex bꞌeom jex tiꞌ, caw okꞌbꞌal jex cꞌule, yutol xax je yil swatxꞌilal, yuxan cꞌamxa niꞌoj je majul oj je chaꞌ je sattajto.
Jaꞌ jaex nonaj je cꞌul tinaniꞌ, caw okꞌbꞌal jex cꞌule, yutol oj jul jun tiempoal oj je yabꞌ je yakꞌon wail.
Jaꞌ jaex chex tzee tinaniꞌ, caw okꞌbꞌal jex cꞌule, yutol oj jex okꞌ yu cuscꞌulal.
Jaꞌ yet watxꞌ jex yalon ebꞌ ánima, caw okꞌbꞌal jex cꞌule, yutol queytuꞌ jix utele ebꞌ jix tzꞌaj yaloc sbꞌa ẍejabꞌoj Dios yu ebꞌ ánima yet peyxa tuꞌ.


Chi wal ey jex mac jex lalan je yabꞌen tzet chi wal an, camcꞌulne ebꞌ je cajat, akꞌwej watxꞌcꞌulal tet ebꞌ chi chichon oc scꞌul je yin. Jaꞌ ebꞌ chi kꞌanontej sjowal scꞌul Dios je yibꞌan, jaꞌ ojabꞌ swatxꞌcꞌulal Dios che kꞌantej yibꞌan ebꞌ. Chex txali yin ebꞌ chex bꞌuchoni. Ta ey mac chi makꞌontoj jun pacꞌoj je tiꞌ, che jacbꞌatoj jun pacꞌxa. Ta ey mac chi tokꞌon ecꞌ ja chumpa, jaj cantoj je camiẍ pax yetoj. Yal cꞌal mac chi kꞌanon junoj tzetyetal ey jex, akꞌwej tet. Jaꞌ ebꞌ chi iꞌon ecꞌ junoj je tzetyetal, manche je kꞌan meltzo tet ebꞌ. Watxꞌ ojabꞌ che yute je bꞌa tet ebꞌ je yet animail, yutol chex tzalai yet watxꞌ chi yute sbꞌa ebꞌ ey jex.
Ta asanne ebꞌ chex camcꞌulneni, ta jacꞌal chꞌan ebꞌ che camcꞌulne pax oj, ¿ta watxꞌ jaxca tuꞌ che naꞌ? Quey pax tuꞌ chi yun ebꞌ penawom. Yetoj pax oj, ta asan tet ebꞌ watxꞌ chi yute sbꞌa ey jex, watxꞌ che yute je bꞌa, ¿ta watxꞌ jaxca tuꞌ che naꞌ xin? Quey pax tuꞌ chi yun ebꞌ penawom. Ta asan mac tet chi akꞌon meltzo je tzettaj yetal che naꞌ yet chi xew smaaneni, ta asan tet che yakꞌ maanil, ¿ta watxꞌ jaxca tuꞌ che naꞌ? Chi yakꞌ pax ebꞌ penawom junoj stzettaj yetal maanil tet ebꞌ yet penawomal, yutol chi snaꞌ ebꞌ tol oj ẍaꞌ ebꞌ junelxa. Jal jex jaex tiꞌ xin, camcꞌulnewej ebꞌ je cajat. Akꞌwej cꞌal watxꞌcꞌulal. Jaꞌ yet che yakꞌon junoj tzetyetal maanil, cꞌam che naꞌ tol oj je chaꞌ junelxa. Ta che yun jaxca tuꞌ, caw miman tzet oj je chaꞌ sqꞌuexeloj bꞌey satcan, catuꞌ chi txeclo pax eloj tol yuninal jex xa pax Dios miman yeloc apnoj. Ilaꞌla, chi xꞌox swatxꞌcꞌulal Dios tet ebꞌ penawom, ebꞌ cꞌam chi yal niꞌoj yu diosalil yu tzet chi ẍaꞌ ebꞌ tet Dios. Okꞌ ojabꞌ je cꞌul yin ebꞌ je yet animail, jaxca chi yun yokꞌ scꞌul cu Mam Dios je yin.


Manche je naꞌoc yin junojxa mactxequel, yet watxꞌ man oj naꞌle oc je yin yu Dios. Man comonoj che yal tol ey spenail junoj mactxequel, yet watxꞌ cꞌam chi yal Dios tol ey je penail pax oj. Joꞌwej qꞌuey sjowal je cꞌul yin je yet animail, catuꞌ oj sjoꞌon qꞌuey sjowal scꞌul Dios je yibꞌan. Akꞌwej tet je yet animail. Ta queytuꞌ oj je yute, oj yakꞌ pax Dios ey jex. Jaxca junoj tzetyetal tzꞌajan chi yun yechelei, teqꞌueqꞌui chi noi, bꞌululi chi yunne, cꞌamxa chi skeꞌ spixle stiꞌ sneetal, queytuꞌ oj yute yakꞌon Dios tzettaj yetal ey jex. Jaxca che yute je yakꞌon tet ebꞌ je yet animail, queytuꞌ oj yute yakꞌon pax Dios ey jex.
Kꞌinaloj ta ey junoj mac cꞌam chi skeꞌ yiloni, ta chi quetzletoj yu junojxa cꞌam chi skeꞌ yiloni. Chi stokꞌletoj sbꞌa ebꞌ scawanil sat pacꞌan. Cꞌam junoj cuywom ecꞌbꞌan yeloc apnoj yintaj scuywam. Jal pax yet chi lawi scuywi, laan xa jaxca scuywam tuꞌ.
Kꞌinaloj ta junoj ja wet animail chi too scꞌail teꞌ yul sat. Cha woche cha wiꞌeltej jun scꞌail teꞌ tuꞌ, ta ey pax jun miman teꞌ eyoctoj yul ja sat. Cha wal tet, “wuẍtaj, chi skeꞌ wiꞌon eltej jun scꞌail teꞌ yul ja sat,” ja chi tet. ¿Tumi cꞌam cha wil pax jun miman teꞌ yul ja sat? Ta queytuꞌ cha wute ja walon xin, caw caabꞌ sat jaach. Sowalil cha wiꞌ can eltej jun miman teꞌ yul ja sat bꞌabꞌel, catuꞌ chi skeꞌ ja wiꞌon eltej jun scꞌail teꞌ yul sat ja wet animail tuꞌ.


Kꞌinaloj ta ey teꞌ teꞌ watxꞌ, man penaoj sat chi yakꞌa. Jacꞌalaꞌ pax teꞌ pena, cꞌam pax sat teꞌ watxꞌ chi yakꞌa. Yu sat junjun teꞌ chi yakꞌa, yuxan chi kotajne el tzet teꞌal teꞌ. Kꞌinaloj junoj teꞌ qꞌuix tinaniꞌ, man mansan oj sat chi yakꞌa. Kꞌinaloj pax junoj steꞌal tulus tinaniꞌ, man tzoyol oj sat chi yakꞌa. Jaꞌ mac watxꞌ snaꞌbꞌal, watxꞌ tzet chi yalaꞌ, yutol asan tzetyetal watxꞌ ey bꞌey spixan ebꞌ. Jal pax ebꞌ pena snaꞌbꞌal xin, pena tzet chi yal ebꞌ, yutol asan tzetyetal pena ey bꞌey spixan ebꞌ. Yutol jaꞌ tzet ey bꞌey cu pixan, jaꞌ chi kalaꞌ.


¿Tzet yuxan, “Mamin, Mamin” je chi ey jin an, cꞌam pax che jije tzet chi wal an? Oj waltej ey jex tzet oj yun yeloc ebꞌ chi jijen tzet chi wal an, yet chi yabꞌen ebꞌ. Laan oj yun yeloc ebꞌ jaxca junoj winaj chi swaꞌne sna. Chi skulon txꞌotxꞌ masantaꞌcꞌal chi michꞌcha chꞌen chꞌen, catuꞌ chi yaon ey xeꞌ sna tuꞌ. Chi lawi swaꞌxi yu naj xin, chi cꞌoli yecꞌ elom jaꞌ yinlaj, chi a sjowal jaꞌ, chi smakꞌon oc sbꞌa jaꞌ yin. Cꞌam cꞌal niꞌoj chi bꞌilwi jun na tuꞌ yutol caw watxꞌ ye can ey xeꞌ yibꞌan chꞌen tuꞌ. Jal pax ebꞌ cꞌam chi jijen tzet chi wal an, laan ebꞌ jaxca junoj mactxequel, tucꞌal chi swaꞌne a sna sat txꞌotxꞌ. Cꞌam xeꞌ chi ey xol txꞌotxꞌ. Chi lawi swaꞌxi tuꞌ, chi cꞌoli yecꞌ elom jaꞌ yinlaj jun na tuꞌ, chi a sjowal jaꞌ, chi smakꞌon oc sbꞌa jaꞌ yin. Eyman chi telcꞌo jun na tuꞌ, catuꞌ chi etextoj, ẍi Jesús tet ebꞌ.

နားေထာင္ပါ။ Lucas 6