Génesis 21မွ လူႀကိဳက္ႏွစ္သက္ေသာ က်မ္းပိုဒ္မ်ား။

မၽွေဝရန္

Usa ꞌain ka ax kikësabi oia ꞌinun Sara Nukën ꞌIbun bërúankëxa, usokëx ka ax kikësabi oi ꞌiakëxa

Usai tuá ax inia ka Nukën ꞌIbu Diosan kuakëxa; kuakin ka Nukën ꞌIbu Diosan ángelnën naí manámixun Agar kuënkin ësokin kakëxa: ¿Uisai kaina ꞌian Agar? Kamina rakuë́tima ꞌain Nukën ꞌIbu Diosan ka mi ꞌimainun min tuá bëunan mëskuti inia kuaxa uinu kara min tuá ꞌikën. Bënëtishi nirukiani, kuanxun kamina min tuá barikin bitankëxun aín mëkënan mëinti ꞌain, ꞌën kana aín rëbúnkinëxa achúshi ëma chaiira ꞌinun ꞌiminuxun ꞌain.

usa ꞌain ka ax tutankëxun achúshi tuá, Abraham ꞌaxuankëxa, usa ꞌain ka kaniakëkë ꞌixunbi Abraham tuaxuankëxa, a tuakëx ka Nukën ꞌIbu Diosan anun bakënti nëtë nankë sënënkëbë bakë́ankëxa.

Usai ꞌitankëxun ka Saran sinánkëxa: Nukën ꞌIbu Diosan ka ꞌë kuëënmikin kuaimiaxa, usa ꞌain ka kamabi unin ꞌunánti ꞌikën, ꞌëx kana achúshi tuáñu ꞌai kixun ꞌunáni ka kuëëni ꞌëbë kuaiti ꞌikën.

Usai ia iskin ka Nukën ꞌIbu Diosan kakëxa: Kamina ꞌitsaira masá nuitutima ꞌain min bëchikë ꞌimainun an mi ñu ꞌaxunkë xanu kupín. Kamabi ñu min xanu Saran mi kakë kamina ꞌati ꞌain, min rëbúnkikamax ka ꞌën mi kakësabi oi min bëchikë Isaac aín rëbúnki ꞌiti ꞌikën.

ꞌImainun ka an ñu ꞌaxunkë xanu aín tuá, aribi ñuikin ësokin kakëxa: ꞌËn kana aín rëbúnkinëxa achúshi ëma chaiira ꞌinun ꞌimiti ꞌain ax ka min bëchikëbi ꞌikë usa ꞌain.