Matiye 18
18
Naway nawsan daya di?
(Markus 9.33-37 / Luka 9.46-48)
1Pay nani gewleɗ na Zezu azaraŋka zani, assohonəni! Naway daya adəv məlĩ na Maŋgəlva di? 2Zezu ayak win muzliya, aziw ginik awaleŋgti. 3Amna: Gesiŋ nədawnah sukum an kəkpaŋgaŋ kəsoŋ gən va kirin muzliyeɗ ɓa, asna kətoŋgoŋ na məlĩ na Maŋgəlva ɓa samə. 4Ɗəf an məs də ɓegən kiyən va win muzliyaŋka, ndəni daya adəv məlĩ na Maŋgəlva. 5Ko naway dətaf win muzliya viwa, anaw atafə.
Wəmzla gən ɗəffa
(Markus 9.42-48 / Luka 17.1-2)
6Ɗəf məs dəmzla gən wiyən səmbet məs dətafaŋ ɗəɗaah wəlawsən gərəm metiŋgin awlani, dəsganən gən eret iŋkile. 7Midi dəlvəŋ arayka, vi tay əmzlagit ɗii adəv mambraya. Tay dədaw takən ɓa, amma bonoy aza ɗəffan dədawsan adəv wənnamzlagiti.
8An voki walla tuluki amzla gukuk adəv mambraya, atawa asgan faraɗa. Ɗəɗaah wətoŋ də zeŋgille də vok taka walla də tuluk taka, ki wətoŋ də zuk mogon pak aka offo an məs agrak ɓa. 9An horok amzla gukuk wəɗɗa mbrayen akdəha asgan faraɗa, ɗəɗaah wətoŋ də zeŋgillok horok taka ki wətoŋ də zuk mogon pak aka offo məs agrak ɓa.
Wən məkpaŋga na time məzani
(Luka 15.3-7)
10Məzi zukum kədawzeletin səmbet muzliyeɗ nawəŋ ko taka ɓa. Əntatə nah sukum: Maslayɗe net tahəŋ aba Affu na disiŋ ziw ziwi. 11[Wətən Ɗəf* ade na vi ka koh gən an dəzəyi.]
12Mbar kəda ɗumoŋ di? An ɗəf tay dit timeŋgiɗ səkatə, yaŋ azə səret taka, apet na kaklaw vaytak kiyit vaytak aka mosorgo ndən kadawkayan an dəzə ɓa sa? 13Əntatə nah sukum: An arəhəka, waneken zəni vi time takaŋ adayək kiyit timeŋgiɗ kaklaw vaytak kiyit vaytak məs dəzaŋ ɓeŋki. 14Vaski bo Affukum na disiŋ dəŋgəl ko ɗəf taka dəzə gən səka dəlvəŋ ɓa.
Mbrayen an məlmuk ada agəɗ suko
15An məlmuk agəɗ sukuk mbrayen, dokə pel sən munokum sula sula. An apprəmək moko asna kəkoh gənəka. 16Amma an aɓoŋko dəpprəm mok ɓa, doko zan də ɗəf taka walla ɗii sula, vi uwəli pak dəsan gən aka saydawa net məɗɗaŋ saydawa sula walla hoku va məverin. 17An aɓoŋko dəpprəm met ɓa, say anah sit kretiyenɗe. An aɓoŋko say mula zokum va dəsən Maŋgəlva ɓa walla va malaka.
An məs kəslereŋ akan walla məs kəslereŋ akan ɓa
18Gesiŋ nədawnah sukum: An məs kəslereŋ akan aka dəlva fuŋ ɓa, kawsleri akan a disiŋ ɓa'a. An məs kəslereŋ akan aka dəlva fuŋ, kaw sleri akan a disiŋ nge'e.
19Əntatə nah sukum: An ɗii naka dəlva fuŋ sula aslereŋgək vi kassoh də wəzuliya. Affu na disiŋ wapsiti. 20Vi an ɗii akkalaŋgək sula ko hoku vi iya nawa wanəsaw aweleŋti.
Wən məkpaŋga na məgəɗ wəza dəɓoŋ da viyan mambraya
21Yaŋ Piyer ade za Zezu, assohoni: Ɗəfdaya, an məlmu asbanək wəgəɗ su mbrayen na, nəviyan sən gən təl mbarwa di? Təl buhul sa? 22Zezu azlan sənək na: Awwo təl buhuli ɓa, amma təl kaklaw buhul təl buhul. 23Yaŋ amna: Awla an va məlĩ na Maŋgəlva aslə: Məlĩ maɓɓan aŋgəl məɗɗaŋ wəza nan dəŋɗan sənən gən wəŋɗa na arya nani. 24Yaŋ atəŋ wəza nani aki sənənək ɗəf məs adasban dəmən akan suleyɗe natəbəs gap dubuɗe. 25Ɗəf nan tay də zəga nafaɗ dəmən nan ɓa. Yaŋ daya net aɗi wənnan də vələn gəni. Ndəni dət ɗak nani gəm kirtin pak kaw faɗ dəmən nani. 26Yaŋ ɗəf nak akduk takpran aba daya nan naka akamani, amna: Kamə arma mokroko, məlĩya, wanəfaɗ pakə. 27Yaŋ daya nan awələk saha kani, apansənək dəmən nak pakə.
28Yaŋ məgəɗ wəza nak agili, aləmək də ɗəf dədaɗɗa wəza dəndən an məs dəmən nan akan suleyɗe səkat taka, armak wəlani ahərəsləka, amna: Afaɗ su dəmən nawa. 29Məgəɗ wəza dəndən nok akdukuk abani akamanka, amna: Kamə arma mokroko wanəfaɗ suko. 30Amma aɓoŋko, asganək a daŋgay say an afaɗək dəmən nan pakə. 31Yaŋ məɗɗaŋ wəza dəndən meɓɓet awlanən vaska, assetik sawɓa, adoŋko, anahsənənək daya net pak an dəgəɗə. 32Yaŋ daya net aya ɗəf naka, apsən na: Nok məgəɗ wəza mbrayuk kənani, nəviyan sukuk dəmən nok pak vi kəkamawa. 33Kaŋ mogoni kuwəl gən saha aka məgəɗ wəza də is va nəwəl saha akokəŋ ɓa sa? 34Gədəv daya net adək akan diiɗa sawɓa asganək a daŋgay tattuwãha say dəfaɗ gən dəmən nan pakə. 35Yaŋ Zezu anah akan na: Vaski Affu na disiŋ adawgəɗ sukum, an kəviyanən mambray net ɗiiyen dəɗɗaŋ sukumən mbrayen də mokrokum taka ɓa.
လက္ရွိေရြးခ်ယ္ထားမွု
Matiye 18: GDRNT85
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Gidar New Testament © Bible Society of Cameroon, 1985.