Amainhama 12
12
Katonda ayeta Aburamu
1Agho Musengwa Katonda yaakoba Aburamu ati: “Va mu nsi yo, oleke ab'ekika kyo n'ab'endhu ya lata wo, oje mu nsi ye naakulaga.#Bik 7:3; Heb 11:8 2Ndidha kukugha abaidhukulu kamaala, bafuuke eighanga ery'amaani. Ndidha kukugha enkabi, era ndeetere eriina lyo okumanhikana olwo lighange okugheesanga abandi enkabi.#Mainh 15:5; 17:4-5; 18:18; 22:17; 28:14; 32:12; 35:11; 46:3
3“Abo abakusabira enkabi, nnaabaghanga enkabi, aye abo abakukolimira zeena ndidhanga kubakolimira. Era mu iwe amaghanga goonagoona mwe galigheerwa enkabi.”#Mainh 18:18; 22:17-18; 26:4; 28:14; Gal 3:8
4Kale Aburamu yaaja nga Musengwa Katonda bweyamukoba ni Loti yaaja naye. Aburamu ghe yaviira e Harani yali agheza emyaka nsanvu n'etaanu (75) egy'obukulu. 5Yatwala mukazi we Sarai, ni Loti omwana wa muganda we, n'ebintu byaibwe byonabyona bye baali nga bagheziiza, era n'abantu be baali bafuniire e Harani. Kale baatoolera olugendo oluja mu nsi ey'e Kanaani.
Bwe baatuuka mu Kanaani, 6Aburamu yaaja ng'atambula mu nsi eyo, yaatuuka ku muti gwa More mu kifo ekitukuvu e Shekemu. Mu biseera ebyo Abakanaani nga n'abali mu nsi eyo. 7Agho Musengwa Katonda yaabonekera Aburamu, yaamukoba ati: “Baidhukulu bo ndibagha ensi eno.” Kale Aburamu yaazimbira agho Musengwa Katonda eyamubonekera, alutaari.#Mainh 13:15; 15:18; 17:8; 24:7; 26:3; 28:3-4; 35:12; 48:4; Bik 7:5; Gal 3:16 8Olwava agho, yaaja mu kiketezo eky'ensozi e buvandhuba w'e Betheli yaazimba eyo weema ye nga Betheli kimuli e bugwandhuba, ate Ayi kyamuba e buvandhuba. Yaazimbira agho Musengwa Katonda alutaari, era yaamusinza. 9Agho Aburamu yeeyongera okutambula ng'ayolekeire ekiketezo eky'e Kanaani ekikalukalu ekiri ku luuyi olw'omukono omusaadha olw'e buvandhuba.
Aburamu ng'ali mu Misiri
10Agho endhala yaagwa mu Kanaani, Aburamu yaaja mu Misiri yaasenga eyo okumala entangama, kuba endhala yali egwire ya maani.#Mainh 20:1-18; 26:7-11 11Bwe yali ng'ali kumpi okwingira mu Misiri, yaakoba mukazi we Sarai ati: “Bona, ndidhi ng'oli mukazi aboneka obulungi einho. 12Era Abamisiri bwe banaakubona baidha kukoba bati ono ni mukazi we olwo nze bandhite, aye iwe bakuleke obeegho. 13Kale iwe oidha kubakoba oti oli mwanhinaze, memale olwo mbisibwe bukalamu era mpone okwitibwa ku lulwo.” 14Aburamu bweyaingira mu Misiri, Abamisiri baabona nga bwenebwene omukazi yali mulungi inho. 15Era abakungu aba kyabazinga bwe baamubona, baaghayiraku kyabazinga ku bulungi bwe. Olwo Sarai yaatwalibwa mu kisaagaati kya kyabazinga. 16Era ku lulwe, kyabazinga yaabisa Aburamu bukalamu yaamugha entaama, n'ente, n'endogoyi enume n'enkazi, n'abairu abasaadha n'abakazi, era n'engamiya.
17Aye olw'okuba kyabazinga yatwala Sarai, Musengwa Katonda yaamusindikira endwaire embi einho ghalala n'abantu ab'omu kisaagaati kye. 18Agho kyabazinga yaayeta Aburamu, yaamubuuza ati: “Kiki kino ky'onkoze? Lwaki tiwankobeire oti ono mukazi wo? 19Lwaki wankobye oti ono mwanhoko, n'ondeka okumutwala nga mukazi wange? Kale ni, mukazi wo wuuyo, mutwale era ogolole.” 20Agho kyabazinga yaalagira abasaadha be baafulumya Aburamu mu nsi eyo, ghalala ni mukazi we era n'ebintu byonabyona bye yali nabyo.
လက္ရွိေရြးခ်ယ္ထားမွု
Amainhama 12: Sog
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Baibuli Ekibono kya Katonda © The Bible Society of Uganda, 2014