Jɔn 4
4
Faŋ wəzwi mɔ́ꞌ fɨ shɨ Samaria nə bìŋ Yeso laa ŋwə lùu wə ntɨə faŋ Nwi shòꞌ
1Gə fɨ maa nu məkɔ muu mə Nwi faŋ Yeso nə kɔ̀ muu mə Nwi tɨ́ vɨɨ nə, vɨɨ vəyaŋ jwi zwetə nu ki, fì muu mə Nwi fɨ ghɔ ŋwə. Vɨɨ Farisii zɔ laa vɨɨ məzwetə nu Yeso yaŋ shɔ̀ɔ vɨɨ məzwetə nu Jɔn. Yeso baa kɨɨ laa vəŋ zɔ̀ nu kɔ́, 2tɨ́ nshɨ-tɔ wi nəə kee kɔ muu mə Nwi tɨ́ vɨɨ me, nəə kɔ sheꞌ vɨɨ məzwetə nu ki. 3Nɨniŋ, ŋwə ndɔ fɨ shɨ Judia, bə̀ŋ gə̀ shɨ Galilii. 4Faŋ ŋwə nə gə nɨniŋ, jɨɨ yi shɔ̀ɔ fɨ shɨ Samaria. 5Ŋwə gə ziꞌ maa ntɨꞌ yimɔ́ꞌ fɨ shɨ Samaria, yizii ntɨꞌ yɔ́ luu Sika. Ntɨꞌ yɔ́ luu yɨ shəŋ nsi ŋkɨə faŋ Jeykob nə kɔ̀ tɨ́ ŋwiŋ wi Josef fɨshi nə. 6Yibɨɨ muu Jeykob nə luu yifi. Vəŋ ziꞌ maa shəŋ kɔ́, Yeso bwa fɨ maa yitoꞌ yɔ́, dùꞌ nsi yɨ yibɨɨ muu yɔ́. Nə luu maa yizɔ buꞌtə.
7Fɨkɨꞌ wəzwi mɔ́ꞌ fɨ shɨ Samaria fuu jwì maa mətɔ muu. Yeso gi tɨ́ ŋwə laa ŋwə kɔ yi nə muu yi nu. 8Yeso nə luu nɨnɔŋ ghɔ wəzwi ghɔ́, tɨ́ vɨɨ məzwetə nu ki gə taa shɨ maa məywaŋ fazɨ. 9Wəzwi ghɔ́ gi tɨ́ Yeso laa, «A lùu wuu Jus, kɨ ndwaŋ muu fɨ ghɔ wuu Samaria lee?» Ŋwə nə gì nɨniŋ, buꞌ laa vɨɨ Jus ghɔ vɨɨ Samaria nə kee zɨzɨnə me. 10Yeso bəŋsə tɨ́ ŋwə laa, «A nii toꞌ kɨɨ nə vəkɔ və Nwi, nə wə ntɨə faŋ ŋwə gisə tɨ́ ghɔ laa, Kɔ mə nə muu mə nu, buu a bitə tɨ́ ŋwə, ŋwə kɔ ghɔ nə muu mə vəlwaŋ.» 11Wəzwi ghɔ́ gi tɨ́ ŋwə laa, «Tɨta, a kee kìi fa sùŋ muu shɔ fɨ taa yibɨɨ me, yibɨɨ yɔ́ baa lùu yigə, a taa ndi muu mə vəlwaŋ mbɔ́ fɨ fə? 12A kwàlə shɔ̀ɔ tii ŋwaa-nsiŋ Jeykob faŋ ŋwə nə kɔ̀ yibɨɨ muu nyə̀ tɨ́ yia mu? Jeykob nə nu fɨ taa yibɨɨ nyə̀ ghɔ vaŋ vi nə nyaasə si.» 13Yeso gi tɨ́ ŋwə laa, «Wə tɨ̀ me wə faŋ ŋwə nu muu mbə̀, twey muu ndɔ baa ywey ŋwə. 14Gə fɨ maa wə ntɨə faŋ mə kɔ muu mə vəlwaŋ mbɔ́ tɨ́ ŋwə, ŋwə nu, kaꞌ twey-muu ndɔ kee baa ywey ŋwə me. Muu mbɨə faŋ mə kɔ̀ tɨ́ ŋwə nə, kiasə gù koꞌ-fɨ-nsi taa fwi ŋwə, muu fuu fɨ fuŋ, yɨ̀sə ŋwə kii məbwey vəlwaŋ faŋ ŋwə gòꞌsə yighee muꞌ.» 15Wəzwi ghɔ́ gi tɨ́ Yeso laa, «Tɨta, kɔ kəŋ muu ghɔ́ shee, laa twey-muu kee baa kɨ ywey mə me, mə kee baa kɨ jwi tɔ muu fɨ taa yibɨɨ nyə̀ me.» 16Yeso gi tɨ́ ŋwə laa ŋwə gə ndì ndəə wi, bə̀ŋ jwì nə ŋwə. 17Ŋwə gi laa yi kee kìi ndəə wi me. Yeso gi tɨ́ ŋwə laa, «A gì ŋkee nu yinsəŋ laa a kee kìi ndəə wə me. 18A nə fɔŋ ndàa vəndɔŋ tee. Gə fɨ maa wə ntɨə faŋ a kìi ndwə, ŋwə kee luu ndəə wə me. Nɨniŋ, a gi ŋkee nu yinsəŋ.» 19Wəzwi ghɔ́ gi tɨ́ Yeso laa, «Tɨta, mə ye laa a luu nshiiŋii-sɔghɔ. 20Mə kəə bitə nu tɨ́ ghɔ. Vətɨɨ via nəə jwi shɔ̀ꞌtə Nwi fuu baŋ nyə̀ feenə. Gə fɨ maa viŋ, vɨɨ Jus, viŋ gi laa, Jerusalem lùu shəŋ ŋkɨə faŋ kaꞌ vɨɨ kɨ gə shɔ̀ꞌtə Nwi shɔ.» 21Yeso gi tɨ́ ŋwə laa, «Ye mɔɔ, yaa, zɔ nu ŋkɨə faŋ mə nàysə tɨ́ ghɔ! Yighee ndɔ kɨ jwi faŋ wə ndɔ kee baa shɔꞌtə Nwi fuu baŋ nyə̀ me, tɨꞌnə me taa Jerusalem me! 22Viŋ shɔꞌtə wə faŋ viŋ kee kɨ̀ɨ nə ŋwə me. Gə̀ fɨ maa yia, yia shɔꞌtə Nwi faŋ yia kɨ̀ɨ nə ŋwə. Wə ntɨə faŋ ŋwə ndɔ bweysə vɨɨ ndɔ fuu luu fɨ taa ŋwaa vɨɨ Jus. 23Yighee ndɔ kuꞌ faŋ vɨɨ ndɔ kɨ shɔꞌtə Nwi maa jɨɨ yijəə, kɨ shɔꞌtə Nwi nə nu ŋkɨə faŋ Zwitə Nwi kwàŋ taa fwisə vəŋ, shɔꞌtə ŋwə ŋkee maa yinsəŋ, fɔnə vəŋ zɔnə ŋwə nɨzi. Yinsəŋ, yighee yɔ́ duꞌtə nyə kuꞌ ndwə. Nwi kəə vɨɨ faŋ vəŋ shɔꞌtə ŋwə tɨ́ nee. 24Nwi lùu zwitə. Bàw vɨɨ mbɨə faŋ vəŋ shɔꞌtə Nwi, kɨ shɔꞌtə taa zwitə baa nə yinsəŋ.» 25Wəzwi ghɔ́ gi tɨ́ ŋwə laa, «Mə kɔꞌ kɨɨ laa wuu məbweysə vɨɨ ndɔ jwi faŋ vɨ tii ŋwə nə Kristo. Wuu məbweysə ghɔ́ ndɔ kɨ jwi, ŋwə taa fɨꞌtə vənu vənshə tɨ́ nsiŋ.» 26Yeso gi tɨ́ ŋwə laa, «Mə faŋ mə gisə tɨ́ ghɔ feenə, mə lùu wə ghɔ́.»
27Sheꞌ maa yighee yɔ́ vɨɨ məzwetə nu Yeso bəŋ jwì. Shuu vəŋ yɔŋ laa Yeso gisə ghɔ wəzwi ghɔ́. Luu nə, tuu wə fɨ taa ŋwaa vəŋ kee bìtə tɨ́ ŋwə laa ŋwə sii kə̀ə kə me, tɨꞌnə me laa sii yɨ̀ kə ŋwə gisə tɨ́ wəzwi ghɔ́ me.
28Wəzwi ghɔ́ meꞌtə ntɨɨ muu wi yifi, bə̀ŋ gə̀ taa shɨ, gə naysə tɨ́ vɨɨ laa, 29«Viŋ jwi ye wə faŋ ŋwə naysə vənu vaŋ vənshə faŋ mə nə yɨ̀. Nə kaꞌ kee lùu Kristo yimu?» 30Vəŋ fuu fɨ taa shɨ, gə shəŋ ŋkɨə faŋ Yeso nə luu shɔ nə.
31Faŋ vəŋ nə kee ta zìꞌ yifi me, vɨɨ məzwetə nu Yeso buꞌ ghɔ tɨ́ ŋwə laa bàw ŋwə zɨ fa. 32Ŋwə gi tɨ́ vəŋ laa yi kìi fazɨ faŋ vəŋ kee kɨ̀ɨ nə ŋkə me. 33Vɨɨ məzwetə nu ki gi sheꞌ vəŋ vəŋ laa, «Wə nii jwì nə fazɨ tɨ́ ŋwə mu?» 34Yeso gi tɨ́ vəŋ laa, «Fazɨ kaŋ lùu laa mə kɨ yɨsə nu wə ntɨə faŋ ŋwə nə tɔ̀ŋ mə nə, baa nə laa mə metə vəfaꞌ vi. 35Maa vɨ gisə laa gòꞌ yiŋuu yishwe buu luu yighee məshwi vətɔ? Viŋ zɔ! Mə naysə tɨ́ viŋ, viŋ shaꞌsə sɨ ghiŋ taa yizɔ, yè faŋ fazɨ duꞌtə ŋkə kuꞌ maa məshwi. 36Yighee jwi kùꞌ laa wə ntɨə faŋ ŋwə shwi say, kii vəndɔꞌnə vi. Vəndɔꞌnə vi lùu laa ŋwə baytə vɨɨ laa vəŋ jwi kìi məbwey vəlwaŋ. Nɨniŋ, wə ntɨə faŋ ŋwə yaa bia, nə wə ntɨə faŋ ŋwə shɨshwi, kìi məŋaytə shəŋ muꞌ. 37Yigisə tii njyə faŋ vɨɨ yaa kɨ gisə laa, wə muꞌ yaa kɨ bia, wə dɨday kɨ shwi, luu nu yinsəŋ. 38Mə tɔ̀ŋ viŋ laa viŋ gə shwì say faŋ viŋ nə kee yisɔ me. Nə fàꞌ vɨɨ day shɔ. Nɨniŋ, viŋ ŋii maa faꞌ vəŋ, kɨ shwi say faŋ vɨɨ day nə sɔ̀.»
39Vɨɨ Samaria vəyaŋ faŋ vəŋ nəə shi maa ntɨꞌ yɔ́, biŋ nu Yeso, buꞌ faŋ wəzwi ghɔ́ nə gì laa ŋwə kɨɨ nə vənu vi vənshə. 40Nɨniŋ, vəŋ jwi ziꞌ yɨ Yeso, buꞌ ghɔ tɨ́ ŋwə laa ghɔ vɨ vəŋ goꞌ mɔ́ꞌ. Ŋwə biŋ, ghɔ vɨ vəŋ shi vəshi vəbɔɔ. 41Vɨɨ vəmɔ́ꞌ vəyaŋ baa nùŋ fwi vəŋ maa ŋwə, faŋ vəŋ nə zɔ̀ yigisə Yeso. 42Vəŋ gi tɨ́ wəzwi ghɔ́ laa «Yia kee baa bìŋ Yeso sheꞌ buꞌ yigi yə me. Yia zɔ nə tuulə ghia, buu kɨ̀ɨ yinsəŋ laa ŋwə lùu wə ntɨə faŋ ŋwə ndɔ bweysə vɨɨ.»
Faŋ Yeso nə shùꞌ wee shɨꞌ ntɨꞌ Kapernaum
43Vəshi vɔ́ vəbɔɔ kɨ shɔɔ, Yeso ndɔ fɨ yifi, shɔɔ gə ntɨꞌ yimɔ́ꞌ fɨ shɨ Galilii. 44Ŋwə nə gə shɨ Galilii faŋ nə luu shɨ ki, tɨ́ ŋwə nə kɔꞌ kɨɨ, baa gì laa vɨɨ shɨ nshiiŋii-sɔghɔ kee yaa kɨ kɔ feenə tɨ́ nshiiŋii-sɔghɔ yɔ́ me. 45Ŋwə gə zìꞌ shɨ Galilii, vɨɨ Galilii ŋaytə maa ŋwə, buꞌ laa vəŋ nə yè vənu vənshə faŋ ŋwə nə yɨ̀ Jerusalem maa yighee yitianə yɔ́ faŋ vɨ tii nə Pasa. Vəŋ nə ye, buꞌ laa vəŋ nə gə Jerusalem nɨzi maa məzɨ Pasa ghɔ́. 46Yighee yɔ́ Yeso bəŋ gə ntɨꞌ Kana fɨ shɨ Galilii. Luu ntɨꞌ njyə faŋ ŋwə nə kìasə muu shɔ, mbə gu məluꞌ nə. Faŋ ŋwə nə luu yifi, wuu kwalə mɔ́ꞌ nə luu shɔ ntɨꞌ Kapernaum faŋ ŋwiŋ wi nəə zasə. 47Wuu kwalə ghɔ́ zɔ laa Yeso ndɔ fɨ shɨ Judia, jwì ziꞌ Galilii, ŋwə gə shəŋ ŋkɨə faŋ Yeso nə luu shɔ nə, buꞌ ghɔ tɨ́ ŋwə laa ghɔ ŋwə siꞌ gə̀ ntɨꞌ Kapernaum, tɨ́ kaꞌ Yeso yɨsə ŋwiŋ wi bwaŋnə. Wee ghɔ́ nə luu shuu yiku. 48Yeso gi tɨ́ wuu kwalə ghɔ́ laa, «Maa viŋ kee kaw biŋ mə maa laa viŋ bɨ ye vəshwenə və shuu yɔŋvə me.» 49Wuu kwalə ghɔ́ gi tɨ́ ŋwə laa, «Tɨta, kɔꞌlə jwi, buꞌ ŋwiŋ ŋwaa ghɔ́ mètə ku!» 50Yeso gi tɨ́ ŋwə laa ŋwə bəŋ gə̀ shiŋii. «Ŋwiŋ wə bwàŋnə.» Wuu kwalə ghɔ́ biŋ, bə̀ŋ gə̀ shiŋii. 51Faŋ ŋwə nə bə̀ŋ nɨniŋ, kɨ biitə ziꞌ fɔ ŋwə, vɨɨ faꞌ vi jwi, yè ŋwə jɨɨ, gì tɨ́ ŋwə laa, «Ŋwiŋ wə bwàŋnə.» 52Ŋwə bitə tɨ́ vəŋ laa wee ghɔ́ tey kɨ bwaŋnə yighee kə? Vəŋ bəŋsə tɨ́ ŋwə laa, «Ywaŋ laynəfu maa vəshɨshwi kwatia, nshɨꞌ kɔ́ mè fɨ maa ŋwə.» 53Tɨɨ wee ghɔ́ lumə laa luu ŋkee yighee njyə faŋ Yeso sɨ gì tɨ́ ŋwə laa ŋwiŋ wi bwaŋnə. Nɨniŋ, wə ghɔ́, ghɔ vɨ vɨɨ vi vənshə, nuŋ fwisə vəŋ maa Yeso. 54Nə luu vəshwenə və shuu yɔŋvə beꞌsə vəbɔɔ faŋ Yeso nə yɨ̀ faŋ ŋwə nə ndɔ̀ fɨ shɨ Judia, bə̀ŋ gə̀ shɨ Galilii.
လက္ရွိေရြးခ်ယ္ထားမွု
Jɔn 4: bav
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 1993, Wycliffe Bible Translators, Inc. All rights reserved.