Luk 14
14
Uvaʼs ibʼant quBʼaal Jesuus bʼaʼn val u vinaq t-yaabʼil tuulbʼal val u xeem qʼij saavado
1Tuulbʼaletz vaʼt u xeem qʼij saavado, tul ex Jesuus txʼaʼon t-totzotz val viqʼesal uvaʼ fariseeoiche. Tul txʼebʼoʼmyich kuxh vet jolt inqʼa fariseeo tiʼ tilixeʼ tal uvaʼ laʼich elk Jesuus t-bʼey. 2Atichetz val u vinaq vatz Jesuus uvaʼ sipkʼinaʼqich kuxh itxhiʼoʼl, tan nikich kuxh imaqtxʼ aʼ titxhiʼoʼl.
3Ajtetz til Jesuus u vinaq, tul ech tal Jesuus te inqʼa fariseeo, atz te inqʼa nikich txhusun ibʼekʼbʼal inqʼa tij imam Israeel s-eche: —¿Nik kol ikuy u qubʼekʼbʼal uvaʼ laʼ ibʼan invaʼq xaol bʼaʼn tu xeem qʼij saavado? —xeʼt Jesuus.
4Tul yeʼ motx tzaqʼbʼi. Yaʼne taqʼ jaʼ Jesuus iqʼabʼ tiibʼa u vinaq. Tul ibʼan vet Jesuus bʼaʼn. Tul itxhaq vet bʼen Jesuus.
5Yaʼne ech tal Jesuus te inqʼa fariseeo s-eche: —Eche ex, oq laʼ bʼen invaʼq ekʼaol t-jul, maq invaʼq evaʼk, tul bʼane yeʼetz koq laʼ bʼen etiqʼo jaʼul, kʼuxh tuulbʼal invaʼq u xeem qʼij saavado, —xeʼt Jesuus.
6Tul yeʼl vet vaʼtoʼq iyol inqʼa fariseeo motx txhej tiʼ teesal iqʼij Jesuus.{*}#14.6 Yeʼl invaʼtoʼq yol tal inqʼa fariseeo, tan tootzaqliche oq uvaʼ laʼich bʼen invaʼq tavan t-jul, tul yek laʼich motx tiqʼo jaʼul.
Uvaʼs itxhusun quBʼaal Jesuus, tiʼ uvaʼ yeʼ laʼ taqʼ bʼen tibʼ inqʼa xaol s-nim
7Nikichetz kuxh isaqi Jesuus inqʼa xaol, inqʼa bʼekʼelichat tiʼ u txʼaʼoʼm. Tan aʼ nikich motx itxhok u bʼaxa xhiila tiʼ tok viʼ meexha. Tul txumbʼalimal talt Jesuus val u txhusbʼal xoʼl inqʼa xaol. Tul ech tal Jesuus s-eche: 8—Oqetz jaʼl invaʼq laʼ bʼekʼon ex tiʼ ebʼen txʼaʼon tiʼ invaʼq tzʼaloʼm, tul yeʼ laʼ isaʼa uvaʼ, aʼ laʼ kʼuqeʼvik ex t-inqʼa bʼaxa xhiila. Tan avoqe at invaʼtoʼq xaol bʼekʼele uvaʼ palnaʼq tiqleʼm seviʼ. 9Laʼetz ul vet u aj tzʼaloʼm uvaʼ bʼekʼon ex, atz uvaʼ bʼekʼon uvaʼ palnaʼql tiqleʼm seviʼ, tul ech laʼ tal sete s-eche: «Elen el tu xhiila uvaʼe, tan aʼ u xaol uvaʼa toq kuʼoq,» chaq sete. Tul chʼixvebʼal kuxh vet laʼ ebʼen kʼuqeʼvoq tiyaʼtebʼal xhiila.
10Pet oq laʼ bʼekʼex ex, tul aʼ laʼ kʼuqeʼvik ka ex tiyaʼtebʼal xhiila. Aʼetz vet u aj tzʼaloʼm, ech laʼ alon sete s-eche: «Txa, avuleʼ. Jetxh ukuʼl eebʼ sinkʼatza tu bʼaxa xhiila,» chaq sete. Echetz at etiqleʼm vatz inqʼa xaol, inqʼa tzum laʼ etok viʼ meexha s-tuchʼ.
11Tan jabʼiste ex, uvaʼ laʼ etaqʼ bʼen etibʼ s-nim, tul aʼetz exe, uvaʼ laʼ eesal eqʼij taʼn quBʼaal Tiuxh. Atz jabʼiste ex, uvaʼ laʼ etiqʼo kuʼl etibʼ, tul aʼetz exe, uvaʼ laʼ oksal eqʼij taʼn quBʼaal Tiuxh, —xeʼt Jesuus.
12Yaʼne yolon Jesuus te u fariseeo uvaʼ bʼekʼon tul Jesuus txʼaʼon. Tul ech tal Jesuus s-te s-eche: —Oq laʼ abʼan invaʼq atxʼix, jitetz aʼ laʼ abʼekʼ tul inqʼa avamiʼk, atz jitoq inqʼa eetzʼin aatzik, atz jitoq inqʼa avatin eebʼ s-tuchʼ, atz jitoq avetz tzʼalol uvaʼ txʼiol iqʼij. Tan oq laʼ motx ibʼanaq ibʼaʼnla txʼix, tul oq laʼ ibʼekʼ axh, aqʼaxiyetz vet ichʼexele see. 13Pet oq laʼ abʼan invaʼq atxʼix, tul aʼ laʼ abʼekʼ inqʼa meebʼaʼ, inqʼa yeʼl iqʼabʼ, inqʼa koyel ixaoneʼ, atz inqʼa tzot. 14Tan yeʼl ichʼexel laʼ motx taqʼ see. Pet aʼ quBʼaal Tiuxh laʼ aqʼon ichʼexel see uvaʼs laʼ titzʼeʼv inqʼa xaol inpaqte, inqʼa jikxh vatz quBʼaal Tiuxh. Tul at vibʼaʼnil quBʼaal Tiuxh seebʼa laʼ ibʼana uvaʼs laʼ akʼuulat inqʼa xaol, inqʼa meebʼaʼ, —xeʼt Jesuus.
Uvaʼs txumbʼalimal itxhusun quBʼaal Jesuus, tiʼ uvaʼ jit jankʼal inqʼa tij imam Israeel laʼ bʼen kʼatz quBʼaal Tiuxh tu amlikaʼ
15Atich val u vinaq viʼ meexha kʼatz Jesuus uvaʼ abʼin u yol. Tul ech tal te Jesuus s-eche: —¡At vibʼaʼnil quBʼaal Tiuxh s-qiibʼa, oʼ inqʼa tij imam Israeel, tan ant vet oʼ tiʼ u nimla qʼij uvaʼs laʼ ibʼant u Kriisto iqʼesalil! —xeʼt te Jesuus.
16Yaʼne ech tal Jesuus s-eche: —Echetz ibʼane paqul. Tan ibʼan val u vinaq vaʼl inimla txʼix. Tul mamala xaol ibʼekʼa. 17Bʼaʼnixetz vet u txʼix, tul itxhaq vet bʼen u vinaq val u taqʼonvil tiʼ tiqʼol inqʼa xaol, inqʼa bʼekʼich veteʼ. Tul ech ex tal u aqʼonvil s-eche: «Etulvaq veteʼ. Tan il u txʼix bʼaʼnixya,» xeʼte. 18Tul junun motx itxhoktaqich vet inqʼa xaol iyol. Tul ech tal u bʼaxa s-eche: «Aʼ maʼt vil bʼiil vintxʼavaʼ uvaʼ yaʼn inloqʼlaʼ. Pet kuyxh in, yeʼl in laʼ bʼen in,» xeʼte.
19Yaʼne ech tal invaʼt s-eche: «Yaʼnxh oʼ tzumul inyakʼa vaʼk inloqʼlaʼ. Tul maʼt vileʼ oq bʼaʼn taqʼonv txoo. Kuyxh in, yeʼ laʼ utxh inbʼenaʼ,» xeʼte.
20Yaʼne ech tal txha invaʼt s-eche: «Yeʼ laʼ utxh inbʼenaʼ, tan yaʼnxh in tzʼalony in,» xeʼte.
21Qʼaʼvetz vet u aqʼonvil, tul ul tal vet inqʼa yol te u vinaq. Yaʼne lakp iviʼ u vinaq. Tul ech tal vet te u taqʼonvil s-eche: «Nal kuxh abʼenaʼ. Tul yekl axh t-kʼayibʼal. Atz yekl axh t-inqʼa qʼeʼtxaq bʼey tuulbʼal u tenam. Tul aʼ bʼen eeqʼo tzaan inqʼa meebʼaʼ tuchʼ inqʼa yeʼl iqʼabʼ, atz inqʼa koyel ixaoneʼ, atz inqʼa tzot,» xeʼt u vinaq.
22Bʼiiletz txhan vet s-tuul, tul ech tal u aqʼonvil s-eche: «Inqʼesal, qat inbʼanl kam uvaʼ qat aala. Tul il tel atibʼal ati,» xeʼt veteʼ.
23Yaʼne ech tal u vinaq te u taqʼonvil s-eche: «Quuxh. Tul yekl vet axh t-inqʼa bʼey, atz kʼuxh t-inqʼa xoʼlaq vitz. Tul tal kuxh pal eeqʼovat vet inqʼa xaol. Tul laʼ ayaʼlu tukuʼl. Echetz laʼ inoje u votzotz,» xeʼt u vinaq. 24Pet niketz val see txaj, uvaʼ jit jankʼal inqʼa tij imam Israeel, inqʼa qat inbʼekʼ s-bʼaxa laʼ ukuʼl txʼaʼon viʼ meexha sinkʼatza uvaʼs laʼ inbʼant iqʼesalil, —xeʼt Jesuus te u vinaq uvaʼ bʼekʼex tiʼ u tzʼaloʼm.
Uvaʼs talt quBʼaal Jesuus uvaʼ bʼaxaxh laʼ titzʼa inqʼa xaol s-bʼaʼn u tok bʼen tiʼ quBʼaal Jesuus
25Paquletz uvaʼ mam tenam txhʼuyich tiʼ Jesuus, yaʼne sutxhqʼ Jesuus tiʼ talax yol te inqʼa xaol. Tul ech tal Jesuus s-eche: 26—Jaʼletz invaʼq ex nik saʼon etxhʼuyeʼv s-viʼ tiʼ etxhust etibʼ sinkʼatza, tul aʼ isaʼ uvaʼ tira laʼ ekʼayi etaanima s-viʼ, viʼ jolt inqʼa kam, jankʼal eche: etxutx ebʼaal, etixqel, enitxaʼa, etitzʼin, etatzik, atz kʼuxh laʼ etaqʼ u qʼij esaq s-viʼ. Tan oq yeʼ laʼ etxʼol taqʼax ka inqʼae, tul yeʼletz laʼ utxh etxhʼuyeʼv s-viʼ tiʼ etxhust etibʼ sinkʼatza. 27Atzoq yeʼ laʼ etxʼol epal t-vitzaʼlal s-viʼ, atzoq yeʼ laʼ ebʼan etetz, eche uvaʼ nik inkʼutxh sete, azoq jit ech laʼ ebʼan tiʼ etxhʼuyeʼv s-viʼ, eche nik ibʼan invaʼq pereexho tiʼ tiqal kurus, tul yeʼletz laʼ utxh etxhʼuyeʼv s-viʼ tiʼ etxhust etibʼ sinkʼatza.
28Jaʼl uvaʼ laʼ isaʼ itxhʼuyeʼv s-viʼ, tul aʼl bʼaʼn laʼ titzʼa s-bʼaxa, oq laʼ itxʼol tiqʼoleʼ. Tan avoqe ech laʼ ibʼan, eche invaʼq u vinaq uvaʼ laʼ titzʼa ijaʼ vaʼq totzotz. Tan bʼaʼn uvaʼ bʼaxa laʼ kʼuqeʼv tiʼ titzʼaleʼ jankʼal puaq laʼ tiqʼo vijaʼ u otzotz. Atz maq at jankʼal uvaʼ toq ibʼanbʼe tiʼ itzoqpisal ijaʼ u totzotz. 29Tan oq yeʼ laʼ titzʼa s-bʼaxa, atz bʼaxa kuxh laʼ xeʼt tiʼ taqʼax kuʼ ixeʼ u totzotz, oqetz yeʼ laʼ oleʼv tiʼ itzoqpisal ijaʼ u totzotz, tul laʼ kuxh tzeʼlel vet taʼn inqʼa xaol, inqʼa laʼ ilon. 30Tul ech laʼ motx tal inqʼa xaol tiʼ u vinaq s-eche: «Qat kuxh xeʼt tiʼ ijaʼ totzotz, tul yeʼxh qat oleʼvi,» chaq vet eʼli.
31Atz jaʼl uvaʼ laʼ isaʼ itxhʼuyeʼv s-viʼ, tul aʼl bʼaʼn laʼ titzʼa s-bʼaxa, oq laʼ itxʼol tiqʼoleʼ. Tan avoqe ech laʼ ibʼan, eche invaʼq u mam iqʼesal uvaʼ laʼ ixeʼtisa txhʼaʼo tuchʼ invaʼtoʼq mam iqʼesal t-invaʼtoʼq tenam. Tan bʼaʼn uvaʼ bʼaxa laʼ kʼuqeʼv tiʼ titzʼaleʼ, oq laʼ oleʼv tuchʼ lavoq mil isol tiʼ itxhʼaʼoil viinqoq mil sol uvaʼ laʼ itxhʼaʼoi tibʼ s-tuchʼ. 32Pet oqetz laʼ til vet s-bʼaxa uvaʼ yeʼ laʼ oleʼv tiʼ u txhʼaʼo, atz tuulbʼal uvaʼ yeʼnaql aqʼbʼoq kʼatz uvaʼ laʼ itxhʼaʼoi tibʼ s-tuchʼ, tul naletz kuxh vet laʼ itxhaq bʼen kaʼvoʼq itxhaq tiʼ iyaʼsal u txhʼaʼo. Tul laʼ tabʼi tok bʼaʼnil s-xoʼl tuchʼ uvaʼ laʼ ibʼan txhʼaʼo s-tuchʼ.
33Echetz jaʼl invaʼq ex, uvaʼ laʼ saʼon etxhʼuyeʼv s-viʼ, tul tiraetz laʼ etaqʼ ka inqʼa kamaq etetz s-kaqaayil tiʼ etxhust etibʼ sinkʼatza.
Uvaʼs ibʼant quBʼaal Jesuus eela inqʼa niman tetz tuchʼ u atzʼam
Tio 5.13; Kuxh 9.50
34Tan jaʼl ex, inqʼa niman vetz uvaʼ nik esaʼeʼ laʼ txhʼuyeʼv ex s-viʼ, tul bʼaʼn uvaʼ at koqxh vet etxumbʼal laʼ ibʼana. Echetz laʼ tatin vet vebʼaʼnil xoʼl inqʼa xaol, eche u atzʼam uvaʼ nik chiʼbʼisan u etxhbʼubʼal. Pet oqetz laʼ tzʼeqxeʼl vichiʼil u atzʼam, tul yeʼxhkametz laʼ ulbʼel vet tok vichiʼil inpaqte. 35Echetz yeʼxhkam vet invaʼtoʼq laʼ txakunk u atzʼam; jitoq laʼ txakun vet tiʼ taqʼax iyakʼil txhiko; atz jitoq laʼ ok vet siyujel qʼajeʼn. Pet taʼn kuxh laʼ ulbʼel vet u atzʼam uvaʼ tira laʼ makʼax vet el. Echetze ex, tan aʼ nik val uvaʼ yeʼ koq laʼ etzʼeq vetxumbʼal tiʼ etxʼolt tiqʼol viyolbʼal quBʼaal Tiuxh.
Jaʼletz ex, uvaʼ nik abʼin inqʼa yol uvaʼ nik valeʼ, tul bʼanvaq yaʼl tiʼ inimaleʼ, —xeʼt Jesuus.#Kuxh 9.49-50
လက္ရွိေရြးခ်ယ္ထားမွု
Luk 14: ixlC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2016, Wycliffe Bible Translators, Inc. All rights reserved.