San Juan 2
2
Ña xituꞌun ña nuu vaꞌa xa Jesús viko tandaꞌa ña kana ñuu Caná
1Ra saa kuu te ndiyaꞌa uni kii, ra saa ndixiyo iin viko tandaꞌa ñuu Caná, ña ndikun ndiaa chi Galilea. Ra ndixaa tu siꞌí Jesús va nuu iyoo viko kan, 2ra kana tu na Jesús va ndixaa ra xiꞌin ndia itaꞌan xiꞌin ra nuu iyoo viko tandaꞌa kan. 3Ra saa kuu ndia ndee ndia kan saa ra ndiꞌi va vino, ra saa ndikaꞌan siꞌí Jesús xiꞌin ra kachi ña saa:
―Köo ka vino koꞌo na ―kachi ña̱.
4Ra saa ndakuiin Jesús kachi ra saa xiꞌin ña:
―Nana, ¿nichuun ^kaꞌan kun saa xiꞌin yu? Saa chi täan xa̱a̱ kii ña xaꞌa yu sachiñu yu ―kachi ra xiꞌin ña.
5Ra saa ndikaꞌan ña xiꞌin na chuꞌun ndaꞌa kan, kachi ña saa:
―Na sa ndo takundiꞌi ña ^kaꞌan ra xiꞌin ndo ―kachi ña xiꞌin na.
6Ra nuu iyoo viko kan ndita i̱ñu̱ kisi yuu naꞌnu, ña xiniñuꞌu na judío taan na tiakuii ra ndaꞌa na, saa chi xa saa yunaꞌa va na. Ra kuꞌva iin ciento litro kuvi tiakuii ra kita ñuꞌu ini iin iin kisi kan. 7Ra saa ndikaꞌan Jesús xiꞌin na chuꞌun ndaꞌa kan kachi ra saa:
―Sakutu ndo i̱ñu̱ saa kisi yoꞌo xiꞌin tiakuii ―kachi ra.
Ra saa sakutu ndáá na kisi kan xiꞌin tiakuii. 8Ra te ndiꞌi saa ndikaꞌan ra xiꞌin na kachi ra saa:
―Tava ndo loꞌo rá, taxi ndo ndaꞌa ra ndíso chiñu tava viko ―kachi ra xiꞌin na.
Ra saa tava na rá taxi na ndaꞌa ra ndiso chiñu tava viko kan. 9Ra te ixtondoso ra tiakuii ra nduu vino kan, ra nii ndikundäa ini ra ndia mii ke kee ra, ndi su na chuꞌun ndaꞌa ra xa kundaa va ini na kan, saa chi mii na kan kuvi na taan va tiakuii ini kisi kan. Ra saa ndakana ra ndíso chiñu ndatava viko kan mii ra tandaꞌa kan, 10ra ndikaꞌan ra xiꞌin ra kachi ra saa:
―Takundiꞌi yuvi ra xiꞌna ka va vino ra váꞌa, kuvi ra taxi na xiꞌi yuvi na xaꞌan viko, ra te xa ndiꞌi ra kan xiꞌi na, ra saa vi ke tava na vino ra nu̱u. Ndi su yoꞌo, ra nduvi ni va xa kun saa chi chuvaꞌa va kun vino ra vaꞌa, ra ndia vichin vi ndatava kun ra ―kachi ra ndiso chiñu ndatava viko kan xiꞌin ra tandaꞌa kan.
11Ña yoꞌo ku ña xituꞌun ña nuu vaꞌa xa Jesús ñuu Caná, ña ndikun ndiaa chi Galilea, ña ndañaꞌa ra ndiee ña iyoo xiꞌin ra, saa ra kandixa va ndia itaꞌan xiꞌin ra ra.
12Ra te ndiꞌi viko yoꞌo, saa ndakutaꞌan Jesús xiꞌin siꞌi ra, xiꞌin ndia ñani ra, xiꞌin ndia itaꞌan xiꞌin ra; ra ndakiꞌin na kuaꞌan na chi ñuu Capernaum, ra ikan xindee na ndiaꞌvi kii.
^Ndukueꞌe Jesús xiꞌin na ndee ixiko nuu keꞌe veꞌe ñuꞌu kaꞌnu
13Ra saa kuu ra xa kuaꞌan kuyachin va kii ña koo viko pascua, ña ndatava na judío, ra saa ndakiꞌin Jesús kuaꞌan ra chi ñuu Jerusalén. 14Ra te ndixaa ra ndikiꞌvi ra kuaꞌan ra nuu keꞌe veꞌe ñuꞌu kaꞌnu kan, ra saa xini ra na ndee ixiko sindiki, xiꞌin paloma, xiꞌin ndikachi, xiꞌin na ndéé ^nama xuꞌun xiꞌin yu̱vi. 15Ra saa nduku ra ñii, ra xavaꞌa ra ñii ndoꞌo xiꞌin ña, ra xiꞌin ña kan ke tava ra takundiꞌi na ndee ixiko chi keꞌe kuaꞌan na, ra saa tu kiti sana va na, ta kuu sindiki xiꞌin ndikachi, xiꞌin paloma. Ra sanduva ndiꞌi tu ra mesa na ndee nama xuꞌun xiꞌin yuvi va, ra ndixitia ndiꞌi xuꞌun na. 16Ra saa ndikaꞌan ra xiꞌin na ndee ixiko paloma kachi ra saa:
―¡Tava ndo ri yóꞌo chi keꞌe! ¡Saa chi veꞌe Tata va yu kuvi ña yoꞌo, ra na ndäsa ndo ña nuu yaꞌvi! ―kachi ra xiꞌin na.
17Ra saa ndakaꞌan ndia itaꞌan xiꞌin Jesús xaꞌa tuꞌun ña ndikaꞌan ra rey David xiꞌin Ndioxi te yachi ta kachi ra suꞌva: “^Ndiꞌi ni ini yu xaꞌa veꞌe kun chi kuni ni yu ña na koo vaꞌa ña”, kachi ra.
18Ra saa kuyachi ndia judío ra ndindakatuꞌun ndia Jesús kachi ndia saa:
―¿Ndia ña ku iin ña xituꞌun sa kun kuni ndi, ña vaꞌa na kandixa ndi ña taxi Ndioxi ndiayu ndaꞌa kun ña tava kun na ndee ixiko nuu keꞌe veꞌe ñuꞌu kaꞌnu yoꞌo? ―*kachi ndia xiꞌin ra.
19Ra saa ndakuiin Jesús kachi ra saa xiꞌin ndia:
―^Kani ndo veꞌe ñuꞌu kaꞌnu yóꞌo, ra kii uni ndakani ndichi yu ña ―kachi ra xiꞌin ndia.
20Ra saa ndikaꞌan ndia judío kan kachi ndia saa xiꞌin Jesús:
―Uvi xiko i̱ñu̱ kuiya vi ke kuvaꞌa veꞌe ñuꞌu kaꞌnu yoꞌo. ¿Ra yoꞌo tu, kaꞌan ña ndakani ndichi kun ña uni kuiti kii va? ―*kachi ndia xiꞌin ra.
21Ndi su süvi xaꞌa veꞌe ñuꞌu kaꞌnu kan ke ndikaꞌan Jesús xiꞌin ndia, chi xaꞌa iki kuñu va ra ke ndikaꞌan ra xiꞌin ndia, ña kachi ra saa. 22Ña kan ke ta ndixiꞌi Jesús ra ndatiaku tuku ra, ra saa ndakaꞌan ndia xitaꞌan xiꞌin ra xaꞌa tuꞌun ña ndikaꞌan ra xiꞌin ndia, ra saa kandixa vaꞌa ka va ndia tuꞌun Ndioxi, ra saa tu tuꞌun ña ndikaꞌan mii Jesús xiꞌin va ndia.
Xíni̱ Jesús nima takundiꞌi va yuvi
23Ra saa kuu Jesús íin ra ñuu Jerusalén ta ndasakaꞌnu na viko pascua, ra kuaꞌa ka vi yuvi xaꞌa ^kandixa ñaꞌa, te xini na ña kuaꞌa ni ña xituꞌun xa ra. 24Ndi su Jesús ra ndikandïxa vi ra na, saa chi xa xíni̱ va ra ndia kuꞌva ke iyoo takundiꞌi yuvi. 25Ña kan ke ndixïniñuꞌu vi ra ndia nii yuvi ña ndatuꞌun na xiꞌin ra xaꞌa yuvi kan, saa chi Jesús ra xa xini ndiꞌi va ra ndia kuꞌva ke iyoo nima takundiꞌi yuvi.
လက္ရွိေရြးခ်ယ္ထားမွု
San Juan 2: mxvNT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2017, Wycliffe Bible Translators, Inc. All rights reserved
San Juan 2
2
Ña xituꞌun ña nuu vaꞌa xa Jesús viko tandaꞌa ña kana ñuu Caná
1Ra saa kuu te ndiyaꞌa uni kii, ra saa ndixiyo iin viko tandaꞌa ñuu Caná, ña ndikun ndiaa chi Galilea. Ra ndixaa tu siꞌí Jesús va nuu iyoo viko kan, 2ra kana tu na Jesús va ndixaa ra xiꞌin ndia itaꞌan xiꞌin ra nuu iyoo viko tandaꞌa kan. 3Ra saa kuu ndia ndee ndia kan saa ra ndiꞌi va vino, ra saa ndikaꞌan siꞌí Jesús xiꞌin ra kachi ña saa:
―Köo ka vino koꞌo na ―kachi ña̱.
4Ra saa ndakuiin Jesús kachi ra saa xiꞌin ña:
―Nana, ¿nichuun ^kaꞌan kun saa xiꞌin yu? Saa chi täan xa̱a̱ kii ña xaꞌa yu sachiñu yu ―kachi ra xiꞌin ña.
5Ra saa ndikaꞌan ña xiꞌin na chuꞌun ndaꞌa kan, kachi ña saa:
―Na sa ndo takundiꞌi ña ^kaꞌan ra xiꞌin ndo ―kachi ña xiꞌin na.
6Ra nuu iyoo viko kan ndita i̱ñu̱ kisi yuu naꞌnu, ña xiniñuꞌu na judío taan na tiakuii ra ndaꞌa na, saa chi xa saa yunaꞌa va na. Ra kuꞌva iin ciento litro kuvi tiakuii ra kita ñuꞌu ini iin iin kisi kan. 7Ra saa ndikaꞌan Jesús xiꞌin na chuꞌun ndaꞌa kan kachi ra saa:
―Sakutu ndo i̱ñu̱ saa kisi yoꞌo xiꞌin tiakuii ―kachi ra.
Ra saa sakutu ndáá na kisi kan xiꞌin tiakuii. 8Ra te ndiꞌi saa ndikaꞌan ra xiꞌin na kachi ra saa:
―Tava ndo loꞌo rá, taxi ndo ndaꞌa ra ndíso chiñu tava viko ―kachi ra xiꞌin na.
Ra saa tava na rá taxi na ndaꞌa ra ndiso chiñu tava viko kan. 9Ra te ixtondoso ra tiakuii ra nduu vino kan, ra nii ndikundäa ini ra ndia mii ke kee ra, ndi su na chuꞌun ndaꞌa ra xa kundaa va ini na kan, saa chi mii na kan kuvi na taan va tiakuii ini kisi kan. Ra saa ndakana ra ndíso chiñu ndatava viko kan mii ra tandaꞌa kan, 10ra ndikaꞌan ra xiꞌin ra kachi ra saa:
―Takundiꞌi yuvi ra xiꞌna ka va vino ra váꞌa, kuvi ra taxi na xiꞌi yuvi na xaꞌan viko, ra te xa ndiꞌi ra kan xiꞌi na, ra saa vi ke tava na vino ra nu̱u. Ndi su yoꞌo, ra nduvi ni va xa kun saa chi chuvaꞌa va kun vino ra vaꞌa, ra ndia vichin vi ndatava kun ra ―kachi ra ndiso chiñu ndatava viko kan xiꞌin ra tandaꞌa kan.
11Ña yoꞌo ku ña xituꞌun ña nuu vaꞌa xa Jesús ñuu Caná, ña ndikun ndiaa chi Galilea, ña ndañaꞌa ra ndiee ña iyoo xiꞌin ra, saa ra kandixa va ndia itaꞌan xiꞌin ra ra.
12Ra te ndiꞌi viko yoꞌo, saa ndakutaꞌan Jesús xiꞌin siꞌi ra, xiꞌin ndia ñani ra, xiꞌin ndia itaꞌan xiꞌin ra; ra ndakiꞌin na kuaꞌan na chi ñuu Capernaum, ra ikan xindee na ndiaꞌvi kii.
^Ndukueꞌe Jesús xiꞌin na ndee ixiko nuu keꞌe veꞌe ñuꞌu kaꞌnu
13Ra saa kuu ra xa kuaꞌan kuyachin va kii ña koo viko pascua, ña ndatava na judío, ra saa ndakiꞌin Jesús kuaꞌan ra chi ñuu Jerusalén. 14Ra te ndixaa ra ndikiꞌvi ra kuaꞌan ra nuu keꞌe veꞌe ñuꞌu kaꞌnu kan, ra saa xini ra na ndee ixiko sindiki, xiꞌin paloma, xiꞌin ndikachi, xiꞌin na ndéé ^nama xuꞌun xiꞌin yu̱vi. 15Ra saa nduku ra ñii, ra xavaꞌa ra ñii ndoꞌo xiꞌin ña, ra xiꞌin ña kan ke tava ra takundiꞌi na ndee ixiko chi keꞌe kuaꞌan na, ra saa tu kiti sana va na, ta kuu sindiki xiꞌin ndikachi, xiꞌin paloma. Ra sanduva ndiꞌi tu ra mesa na ndee nama xuꞌun xiꞌin yuvi va, ra ndixitia ndiꞌi xuꞌun na. 16Ra saa ndikaꞌan ra xiꞌin na ndee ixiko paloma kachi ra saa:
―¡Tava ndo ri yóꞌo chi keꞌe! ¡Saa chi veꞌe Tata va yu kuvi ña yoꞌo, ra na ndäsa ndo ña nuu yaꞌvi! ―kachi ra xiꞌin na.
17Ra saa ndakaꞌan ndia itaꞌan xiꞌin Jesús xaꞌa tuꞌun ña ndikaꞌan ra rey David xiꞌin Ndioxi te yachi ta kachi ra suꞌva: “^Ndiꞌi ni ini yu xaꞌa veꞌe kun chi kuni ni yu ña na koo vaꞌa ña”, kachi ra.
18Ra saa kuyachi ndia judío ra ndindakatuꞌun ndia Jesús kachi ndia saa:
―¿Ndia ña ku iin ña xituꞌun sa kun kuni ndi, ña vaꞌa na kandixa ndi ña taxi Ndioxi ndiayu ndaꞌa kun ña tava kun na ndee ixiko nuu keꞌe veꞌe ñuꞌu kaꞌnu yoꞌo? ―*kachi ndia xiꞌin ra.
19Ra saa ndakuiin Jesús kachi ra saa xiꞌin ndia:
―^Kani ndo veꞌe ñuꞌu kaꞌnu yóꞌo, ra kii uni ndakani ndichi yu ña ―kachi ra xiꞌin ndia.
20Ra saa ndikaꞌan ndia judío kan kachi ndia saa xiꞌin Jesús:
―Uvi xiko i̱ñu̱ kuiya vi ke kuvaꞌa veꞌe ñuꞌu kaꞌnu yoꞌo. ¿Ra yoꞌo tu, kaꞌan ña ndakani ndichi kun ña uni kuiti kii va? ―*kachi ndia xiꞌin ra.
21Ndi su süvi xaꞌa veꞌe ñuꞌu kaꞌnu kan ke ndikaꞌan Jesús xiꞌin ndia, chi xaꞌa iki kuñu va ra ke ndikaꞌan ra xiꞌin ndia, ña kachi ra saa. 22Ña kan ke ta ndixiꞌi Jesús ra ndatiaku tuku ra, ra saa ndakaꞌan ndia xitaꞌan xiꞌin ra xaꞌa tuꞌun ña ndikaꞌan ra xiꞌin ndia, ra saa kandixa vaꞌa ka va ndia tuꞌun Ndioxi, ra saa tu tuꞌun ña ndikaꞌan mii Jesús xiꞌin va ndia.
Xíni̱ Jesús nima takundiꞌi va yuvi
23Ra saa kuu Jesús íin ra ñuu Jerusalén ta ndasakaꞌnu na viko pascua, ra kuaꞌa ka vi yuvi xaꞌa ^kandixa ñaꞌa, te xini na ña kuaꞌa ni ña xituꞌun xa ra. 24Ndi su Jesús ra ndikandïxa vi ra na, saa chi xa xíni̱ va ra ndia kuꞌva ke iyoo takundiꞌi yuvi. 25Ña kan ke ndixïniñuꞌu vi ra ndia nii yuvi ña ndatuꞌun na xiꞌin ra xaꞌa yuvi kan, saa chi Jesús ra xa xini ndiꞌi va ra ndia kuꞌva ke iyoo nima takundiꞌi yuvi.
လက္ရွိေရြးခ်ယ္ထားမွု
:
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2017, Wycliffe Bible Translators, Inc. All rights reserved