John 2
2
Canahch kaa niipuunaanuuhch
1Nishtu chiishikaau maak ishpish chii niipuunaanuu anite an ihtaawin Cana kaa ishinihkaatech anite Galilee aschiihch kaa ihtakuhch. Ekute anite kaa ihtaayich Jesus ukaawiih. 2Jesus ekw maak aniyuu uchischinuhamuwaakanh kaye wiyawaau chii wiishaamaakanuuch aniyuu e niipuunaanuyich, 3Iskutak maak misiwe kaa chistaakanuuhch an shuuminaapuu, Jesus chii itikuu ukaawiih, “Shaash nuuhtepayuuch shuuminaapuuyuu.”
4Jesus maak chii iteu, “Iskweu, chekwaan wehchi wiihtamuyin an, taapaa eshkw utihchipayuu an nitipahiikan anit che chischeyimakuyaan awen e aawiyaan.”
5Ekw Jesus ukaawiih kaa itaat aniyuu aapachihaakanh, “Mikw taan che itashumitaakwe eukw aniyuu ihtuutamuwaahkw.”
6Chii ihtakunh maak anit kutwaashch asiniiyuu puutaih. Paahpeyakw maak uyuuh puutaih wiyesh Niishtunuu maak nishtumitanuu minaakan chechii ispihtaakamihch nipii chii ayaaspishaauh. Jewa iinuuch maak e chishtaapawaachetwaau itaapachihtaauch uyuu nipiiyuu e ihtuutahkwaau taan e itashumikutwaau utayimiheu wiishuwewinawaau. 7Ekw Jesus kaa itaat aniyuu aapachihaakanh, “Saakaschinepitaakw nipii utah uyuuh puutaih.” Tekash maak chii saakaschinepitaayuuh. 8Ekw miin kaa itaat, “Kwaapahamukw apishiish che ituhtutuwekw an makusheuchimaau.” Eukun kiipaa kaa ihtiyich. 9Chii kuchishtam an makusheuchimaau aniyuu nipiiyuu, shaash maak shuuminaapuuhch chii itaakamiyuu. Namui uhchi chischeyihtam taanite kaa uhchipayiyich aniyuu shuuminaapuuyuu. Anichii maak wii aapachihaakanich aniyuu nipiiyuu kaa kwaapahahkwaau chii chischeyihtamuch wiyawaau taanite kaa uhchipayiyich aniyuu shuuminaapuuyuu. Ekw an makusheuchimaau kaa wiishaamaat aniyuu uschinaapewaan, 10kaa itaat, “Misiwe awen e makushet, aniyuu maauch e miywaayich shuuminaapuuyuu niishtam pimipayihtaau, ekw iskutak e ati miyuhkasuyich aniyuu kaa wiishaamaat, ekw aniyuu ekaa kaa wiihkaniyich shuuminaapuuyuu pemipayihtaat. Chiya maak chekwaan wehchi maahchishtai pimipayihtaayin an kaa miywaach shuuminaapuu.”
11Ekut maak anit Canahch anite Galilee aschiihch, niishtam kaa maamishkaach ihtit Jesus, ekut kaa nuukuniyich uchisteyihtaakusuwin. Ekut maak kaa uhchi taapweyimikut uchischinuhamuwaakanh.
12Ekw Jesus kaye maak ukaawiih ekw maak wiichishaanh kaye aniyuu uchischinuhamuwaakanh chii ituhteuch anite ihtaawiniyuu Capernaum kaa ishinihkaateyich, ekute anite kaa ihtaatwaau. Namui mikw naashch mihchetu chiishikaau uhchi ihtaauch anite.
Chisheayimiheukamikuhch kaa ituhtet Jesus
Matthew 21.12, 13; Mark 11.15-17; Luke 19.45, 46
13Shaash maak chii peshunaakuniyuu Jewa iinuuch kaa chii makushetwaau, miyaaskaacheu makushewin kaa ishinihkaateyich, ekw anite Jerusalemihch kaa ituhtet Jesus. 14Anite maak chisheayimiheukamikuhch che ati piihchet, chii waapameu naapeuh e ataaweyitwaauh mistusa kaye maanishchaanisha kaye piyeshiisha, kaye aniyuu kaa miishkutuunaayich shuuliyaau e apiyich anite. 15Ekw kaa ushihtaat pishishtehiikaniyuu apisiyuu e aapachihtaat, ekw kaa wiiwiitishihwaat aniyuuh kaa ataaweyitwaau kaye aniyuu awesiisa anit chisheayimiheukamikuhch, taapishkun aniyuu maanishchaanisha kaye aniyuu mistusa. Chii kwetipuwepinamuweu kaye umiichisuunaahtikuyuuh aniyuu kaa miishkutuunamiyich shuuliyaayuu, kaa aschewepinamuwaat aniyuu ushuuliyaamiyuu. 16Chii iteu maak aniyuu piyeshiisha kaa ataawaacheyitaauh, “Maachiikw wiiwiihtahaahkuch nete anichii. Nuuhtaawii uyuu wiichi, namayeu uu ataawaaukamikw. Ekun ekw ishpish ataawekw chekwaan utah.” 17Uchischinuhamuwaakanh maak chii uhchi chischisiyuuh anite masinahiikanihch kaa itashteyich,
Mitun nika shaakuuchihiikuun naashch e saachihtaayaan chiwaaskaahiikanim.
18Ekw aniyuuh kaa niikaanishkuwaayitwaauh Jewa iinuuh kaa pechi nituwaapamikut, kaa itikut, “Awen kaa itashumisk an kaa ihtuutaman, chekw maamishkaach ihtuwin chechii waapahtiyaahch taapwe Chishemanituu e chii itashumisk chechii ihtuutaman an kaa ihtuutaman.”
19Ekw Jesus kaa ishi nishkuushihaat, “Wanaachihtaakw uu Chisheayimiheukamikw, nishtu chiishikaauh maak ishpish miin kutach nika wiikaapuuhtaan.”
20Ekw kaa itaatwaau, “Nishtu chiishikaauh aa ishpish shaash miin chika chii wiikaapuuhtaan. Nemitanuu kutwaashch pipun chii tashiihkaakanuu uu chisheayimiheukamikw kaa wiikaapuuhtaakanuuhch.”
21Wiiyuu aniyuu kaa ayimitutahk Jesus aniyuu kaa itwet chechii wiikaapuuhtaat ayimiheukamikuyuu nishtu chiishikaauh ishpish. 22Iskutak maak kaa wanishkaanaakanuut nipuwinihch uhchi, ekw kaa chischisiyich aniyuu uchischinuhamuwaakanh uyuu kaa itwet. Chii taapwehtamuch maak taan e itashteyich Chishemanituu utayimuwinihch kaye taan kaa itweyich Jesus.
Jesus tekash chischeyimeu taan e iteyihtaakusiyich aweyuuh
23Mekwaach maak Jesus kaa ihtaat anite Jerusalemihch aniyuu mekwaach kaa makushaanuyich miyaaskaacheu makushaaniyuu, mihchetu aweyuu chii taapweyimikuu wiya taapwe e aawiyit Christ iskutak kaa waapamikut e maamishkaach ihtit. 24Jesus maak namui uhchi taapweucheyimeu wesh misiwe aweyuu chii chischeyimeu taan nihaau e iteyihtaakusiyich. 25Namui kaye uhchi nituweyihtam chechii wiihtamaakut aweyuu taan e iteyihtaakusiyich aweyuu wesh chii chischeyimeu taan nihaau e iteyihtaakusiyich.
လက္ရွိေရြးခ်ယ္ထားမွု
John 2: crjrNT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.