Bl 6
6
Tơdrong kơnê̆ kon bơngai rai dêh
1Đơ̆ng kon bơngai đĭ rai lơ năm jơ̆p-jang kơpal teh păng kon bơngai đei pơjing lu kon drŏ-kăn boih, 2Lu kon tơdăm yang 'bôh kon adruh kon bơngai 'lơ̆ng hơbŏ na iŏk oei, adruh ayơ mă sư lăp đon. 3Kră Yang khan thoi âu: “Yang Bơhngol Inh ưh kơ oei lăm kon bơngai ling-lang ôh; yua kơ kon bơngai jơ̆ sĕch akar đĕch, chăl arih lu sư lăp minh-hrĕng 'bar-jĭt sơnăm đĕch.”
4Chăl noh păng chăl đơ̆ng rŏng kơ noh đei lu bơngai mă tih kơjung arih kơpal teh, yua kơ tơdăm yang oei hơdai hăm lu adruh kon bơngai na pơjing kon hơ'lơ̆p; noh lu bơngai nuih kơtang sơ̆ đe ư-ang kơ lu sư.
5Kră Yang 'bôh kon bơngai kơpal teh âu pơm kơnê̆ dêh păng jơhngơ̆m lu sư tơchĕng kơnê̆ ling-lang. 6Na Sư hmach kơdih Sư kơ tơdrong pơjing boih kon bơngai kơpal teh păng Sư sơ'ngon lăm jơhngơ̆m. 7Kră Yang khan thoi âu: “Inh gô pơrăm lê̆ đĭ kon bơngai kơpal teh mă đêl Inh pơjing, đơ̆ng kon bơngai truh tơ lu kon sem brem, lu hơdrông kơep lep-ler, lu sem păr, yua kơ inh hmach kơdih akâu đei pơjing boih lu sư noh.” 8Mă-lei Nôê đei pŭn 'bơ̆t anăp Kră Yang.
Nôê pŭn
9Âu roi gah Nôê. Nôê lăm chăl arih sư jơ̆ minh 'nu bơngai 'lơ̆ng tơpăt, ưh kơ đei tơdrong glăi kiơ, sư kiơ̆ Kră Yang 'Bok Kei-Dei. 10Nôê đei pêng 'nu kon drŏ-nglo, Sem, Cham, Japhet.
Tơdrong pơm duk
11Hơtai ei sơ̆ Kră Yang 'Bok Kei-Dei 'bôh đĭ kon bơngai lăm teh đak tă kơ yoch răm ngăl păng 'bĕnh kơ tơdrong kơnê̆. 12Âu, Kră Yang 'Bok Kei-Dei lăng lăm teh đak, 'bôh tơdrong yoch răm, yua kơ đĭ-đăng kon bơngai pơm ăn kơ trong sư kơdih kơpal teh âu răm đĭ. 13Kră Yang 'Bok Kei-Dei khan kơ Nôê thoi âu: “Inh gô pơrăm đĭ kon bơngai, yua kơ đơ̆ng kon bơngai na teh âu 'bĕnh kơ tơdrong kơnê̆. Thoi noh inh gô pơrăm lu sư hơdai hăm teh. 14Ih athei pơm minh pôm duk păng 'long gôphea, pơm đei lơ tăl, na pik chai tơ đaih păng tơ lăm. 15Thoi noh, athei pơm kiơ̆ thoi âu: Duk tor pêng-hrĕng hlok, wơ̆l pơđăm-jĭt hlok, kơjung pêng-jĭt hlok. 16Gah kơpal duk ih athei bŏk 'măng-'mŏk, să minh hlok păng pơm 'măng tơ hơnă hai; ih gô pơm minh tăl ala, minh tăl tŏk-bŏk păng minh tăl kơpơ̆ng. 17Gah Inh, Inh gô ăn đak lip jơ̆p kơpal teh âu, wă pơrăm đĭ lu adrĕch sĕch akar mă đei dui jơhngơ̆m păng kial mă oei ala plĕnh, đĭ-đăng lu kon sem brem kơpal teh gô lôch goh đĭ.”
Tơdrong Kră Yang 'Bok Kei-Dei pơgơ̆p pơkă hăm Nôê
18“Na inh gô đei nơ̆r pơkă pơgơ̆p pơkăm hăm ih, đơ̆ng noh ih hăm akăn ih, lu kon hăm lu mŏ mai ih, athei mơ̆t tơ lăm duk. 19Gah lu kon sem dui jơhngơ̆m, ih athei tơmơ̆t ba lăm duk minh hơgrop, đei tơno akăn, tơmông păng yŏng, wă kơ ih wei rong lu sư arih. 20Sem păr kiơ̆ kơ khŭl, sem dơrong kiơ̆ kơ khŭl, hơdrông kơep mơmŏ kơpal teh, rim khŭl minh hơgrop wă kơ ih wei sư arih. 21Na ih kư̆m athei chĕp ba tơmam sa, wă pơm tơmam sa, por sŏng kơ iĕm, ih păng lu kon sem brem noh.”
22Nôê pơm tôm tơdrong âu trŏ 'blep thoi Kră Yang 'Bok Kei-Dei đei pơkă.
လက္ရွိေရြးခ်ယ္ထားမွု
Bl 6: bdq
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©Bahnar Bible Association. All rights reserved.