LÓʼKAS 12
12
Yə́sus ayáágánan pɔɔd mbaŋ
(Maʼt 10.26-27)
1A kɛnɛŋ kɛ́go kɛ́ɛg, ɛ́fɔlɛ́ ɛ́ pɔɔd, pɔʼtɔ́ɔ́sɛn wɔnɔ́ pɔʼtɔ́ɔ́sɛn, pə́yíím əgəə́yiilə kɔ áay, páagaányɛŋ a pogó. Náa Yə́sus əə́gəə́bə́ə́ kosɔyɔ na paaʼkan pə́ə́ŋ, ɔnɔ́: «Kɛ́ na oʼto na oʼto, pólóʼkɔd na kinudiʼ umbúb kɛ́ Pafalɛsɛyɛ́ɛŋ pógódíí. Áay lɛ́ tɔmɛm toɔ́bɔn tóbaan tó pálɛanɛɛ́ na tólɛ́. 2Yiim yɛ́ ɛ́lɛɛ́ a pɛɔsɛ́g ɛ́lɛ́ɛ́ kolon táán. Yɛ́ ɛ́lɛɛ́ a nuníb, pálɛ́ɛ́ kolɛŋ. 3Kɛ́lɛ lɛ́, nkə kiim kɛ́ polɛ́ɛ́ kosɔyɔɔ́ a mbin a kaadɛ, pálɛ́ɛ́ koob kɛ́lɛ́ a táyááŋ. Nkə kiim tɛn kɛ́ polɛ́ɛ́ kodɛ́anɛɛ́ na mɔɔd a oʼtóɛŋ a yoog kusuu a kaadɛ, pálɛ́ɛ́ kolɔɛgɛ kɛ́lɛ́ a kɛbon a mɔɛn. 4Ndabodɛ́anɛ na pəŋi pɔsɔ́sɔ́g páam nyɔʼkɔ́: Podɛʼtámmána pá pálɛɛ́ lɛ́ páagoon mɔɔd, náa pádɛáʼkɛ kɛɛlɛ yɛ́ndɛ́ŋ na yɛ́ndɛ́ŋ a ngim yɛ́ɛy. 5Ndabodɛ́anɛ ánɛ aa pugódíí lɛ́ pódammana: Tammánáan Táán nyɔ́ alɛɛ́ lɛ́ a ngim yɛ́ aáʼkogoyónɛ́ɛ́, alɛ na toɛn tóonɛ lɛ́ ágoódagɛdɛ a yug yɛ́ ɛgóón. Ɛɛ́ɛ, ndabodɛ́anɛ lɛ́ nyɔ́lɛ́ aa pugódíí lɛ́ pódammana. 6Pɔ́dɛɔ́gɔ agolɛg múlundúún móʼtáan a síísi ɛ́baan á, ngɔ́ɔ́? Táán óoʼ, alɛ əguliogi niis ɔmbɔ́ əgín áa ímuʼ ə? Ndóo. 7Kɛlaŋanan anɛ́ɛ́n na pəŋi pá aálɛŋ ɔmbɔ́ na ɔmban ó tuyə́ən toáŋan a oʼto kɛ́. Podɛʼtámmána anɛ́ɛ́n yoom na yoom. A əngis á Táán, pəŋi pomááyɛn múlundúún muim.
Nyɔ́ alɛ́ɛ́ kinjəə́gidənií mɛ, mɛ tɛn ndɛ́ɛ́ kumuə́gidən nyɔ́lɛ́
(Maʼt 10.32,33, 12.32; 10.19, 20)
8«Ndabodɛ́anɛ lɛ́ nyɔ́ alɛ́ɛ́ kinjəə́gidənií a udi ó pɔɔd, ɔɔ́sɔyɔ lɛ́ nyɔ́lɛ́ alɛ ongaaʼkan waam, mɛ Mɔɔ́n o mɔɔd ndɛ́ɛ́ kodɛ́lɛm tɛn a udi ó məŋun má maʼtom má Táán əgusəə lɛ́ alɛ waam. 9Náa, nyɔ́ alɛ́ɛ́ kiʼtəmií a əngis á pɔɔd, mɛ ndɛɛ́ kumuúʼtəm tɛn nyɔ́lɛ́ a udi ó məŋun má maʼtom má Táán, nyɔʼkɔ́ ntɛmoólɛŋɛn. 10Nyɔ́ alɛ́ɛ́ kosɔyɔɔ́ niiŋ nɛ́ Mɔɔ́n o mɔɔd kɔbɛ́, Táán alɛ́ɛ́ kumuúlisin kɔbɛ́ kóog. Kɔmɔɛ́d lɛ́ nyɔ́ alɛ́ɛ́ kosɔyɔɔ́ niiŋ nɛ́ Uŋun wó Ufúlúʼtú kɔbɛ́, Táán adɛndɛ́ɛ́ kumuúlisin kóog kɔbɛ́. 11Ná pálɛ́ɛ́ kɛɛnɛɛ́ na pəŋi a puog pó pɛɔ́sɔ́gɔ́lɔ́n lɛ́ pódɛ́lɛm a pɛyɔm a udi ó padɛ́lɛm yuudi, ɔmbɔ́ lɛ́ ó palaamɛʼ, podɛyáságɛ́máá nkə kɛ́ puə́səə kɔ, na tuə́ áa poágaánɔna 12lɛ́ a kɛnɛŋ kɛ́go kɛ́ɛg, Uŋun wó Ufúlúʼtú ólɛ́ɛ́ koboyáʼkananɛ tuə́ áa pósɔyɔɔ́.»
Kɛbán kɛ́ tugúm tó a nsí yɛ́ɛnɛ
13A pɔɔd póob pá pə́yə́yiilin, sɔ́g nyummú kɔ aáság kodɛ́ɛmɛn na tɔgɛ́ɛ́, ɔnɔ́ na Yə́sus: «Kɛlág, tɛánɛ́ na móŋŋí waam lɛ́ tɛ́abanan tugúm tó sɛ wəəs əyíbidíín.» 14Yə́sus əyímuyúlísíni ɔnɔ́: «Mbóoó, ánɛ aa əmíʼtə́nígi lɛ́ njɔm pɛbán pɛáŋan, oó lɛ́ mpoyáaban moom moáŋan?» 15Aáság kaágasɛ ná ungim alɛɛ́, náa ɔnɔ́ na pɔ́lɛ́: «Pəŋi, pólóʼkɔd o! Poálɛŋ na kuunə kó tugúm kó mbod ngim kóog náan lɛ́, óyɛɛn na tugúm ɔmbɔ́ tuə́, adɛ́njaŋ tólɛ́ aa tóagɛɛlɛ lɛ́ wɛ́ɛn na ɔlaa.»
Nkaʼtɛ́n ɛ mɔɔd o tugúm nyɔ́ adɛʼkɛ́lɛɛ́ na nsiŋ
16Yə́sus aáság kubuúsiədin nkaʼtɛ́n yɛ́ɛnɛ, ɔnɔ́: «Mɔɔd o tugúm nyummú aa nyóon moom móyámodɛ́ɛ́lɛn kɛ́fɔlɛ́ a malɛ́m mə́ə́ŋ. 17Náa mɔɔd nyóon əə́gəə́bə́ə́ kosóngɛ, əə́gəə́ŋíən ɔnɔ́: “Tuə́ áa mbándagɛɛlɛɛ́ na moom móonɛ ə́? Ntɛɔ́gɔ na kɛnɔ kɛ́ mbándagaáganɛɛ́ mólɛ́.” 18Náa ɔnɔ́ kɔ a ɔʼtɛ́m wə́ə́ŋ: “Táá nkə kɛ́ ndáagɛɛlɛ aa kɛ́ɛnɛ: Ndaaman kogada pɛságɛʼ pɛ́am piim, ná nnoga pɛ́ndɛ́ŋ pɛ́ pɛ́mááyɛn pɛ́ɛb, nyáágan ngafón yaam ngim kɔ, na nkə kiim kɛ́ kɛ́lɛɛ́ na mɛ a malɛ́m. 19Ná ndəndin anɛ́ɛ́n a nsí, ndə́gəə́səə kɔ na mɛɛ́nyɔ́amɔɛ́d nyɔʼkɔ́: Náan ó! Táá mɛ aa nyóonɛ na moom yɔɔ́yɔɔ mó móagɛnyɛɛlɛnɛ pɛag wɔnɔ́ pɛag, ntɛsóg! Mmənjóóyig áŋ, mmannɛ́ ɔlaa áŋ, ndáanɛ, ndáaŋo áŋ.” 20Alɛ agosɔyɔ kɔ náan a, Táán ɔnɔ́ na nyɔ́lɛ́: “Kiyəg kɛmɔɛ́d! Udúg əgín ó naánɛ́ wóonɛ, ɔlaa wááŋ ólɛ ommanáán. Nkə kɛ́ɛnɛ kiim kɛ́ waáʼkaágonyanɛɛ́ anɛ́ɛ́n óoʼ, ánɛ aa əə́ndədíin ɔ́lɔbɛɛ́ konɛ?” » 21Yə́sus aáság kuyibənən ɔnɔ́: «Taa, nkə kɛ́ kɛ́lɛ́ɛ́ kaáyɛ́lɛɛ́ na ungim nyɔ́ alɛ́ɛ́ kaágɔnyanɛɛ́ tugúm əgín a nyɔ́lɛ́nyɔ́amɔɛ́d, əʼkúmi a əngis á Táán.»
Kɛádɛ́ɛ́ kaag oʼto na Táán
(Maʼt 6.25-33)
22Náa Yə́sus ɔnɔ́ na paaʼkan pə́ə́ŋ: «Kólɛ́ aa ndábodɛ́anɛ nyɔʼkɔ́: Podɛndáŋ kaáságɛmɛla a noá na nkə kɛ́ poánɛ, ɔmbɔ́ lɛ́ na nkə kɛ́ puə́gəə́níig. 23Kɛ́lɛ lɛ́, ɔlaa ómááyɛn moom mó konɛ, nkó yəəs ɛmááyɛn pilə́ə́. 24Pódála na pɛ́ŋáŋaa ə́. Pɛ́dɛ́agóna, pɛ́mbáŋa. Píʼkóodi pɛságɛʼ, pɛ́diɛn na ndúŋ agɛɛ́ngɛgan moom moɔ́bɔn kɔ, kɔmɔɛ́d lɛ́ Táán alɛ agoboomɛ́nɛ. Pɛnɛŋ pɛ́sɛ́g anɛ́ɛ́n na pəŋi pá pomááyɛn pɛsag ə́! 25Ánɛ úmmuʼ a ondáŋ wááŋan aa alɛɛ́ ogɛɛlɛ lɛ́ mədúg mə́ə́ŋ máyáábɛg a ɔlaa lɛ́ alɛ agaáságɛma ə́? 26Nga podɛɔ́gɔ anɛ́ɛ́n na toɛn tó kɛɛlɛ ɛyaa ɛ́ yoom wɔnɔ́ yɛ́ɛy náan, a igə aa poágaáságɛma a pɛ́ndɛ́ŋ pɛ́ʼkáanɛ anɛ́ɛ́n piim? 27Táláan pafɛláwaʼ wɔnɔ́ ná pálɛɛ́ a kidun. Pə́díəgud, pánnog pilə́ə́. Náa ndábodɛ́anɛ lɛ́ ɔmbɔ́ əgín Salomɔ́ɔŋ na tugúm tuim tó yiígóodi#12.27 Salomɔ́ɔŋ na tugúm tuim tó yiígóodi: Kɛ́lɛ náan a kálaʼtaʼ ɛ 1Puʼk 10 , adɛʼkɛ́ɛ na kilə́ə́ kɛ́ kɛ́ɛ́dɛ́ɛ́ əgiig wɔnɔ́ fɛláwaʼ mmuʼ. 28Mbɛ́n yɛ́ a kidun yɛ́ ɛlɛɛ́ lɛ́ nɛ́gɔŋ ɛlɛ kɔ, na koany ná páág a yug, Táán aálɛŋ yɛ́lɛ́ náan əə, pɛnɛŋ pɛ́sɛ́g anɛ́ɛ́n na pəŋi ə́! Kəə́liʼtiniʼ koáŋan kúligi kudom ə́y! 29Pəŋi pudinjə́yə́bíí anɛ́ɛ́n. Pudinjə́yə́bíí əguunə pɛnɛŋ piim nkə kɛ́ poánɛ, na nkə kɛ́ poáŋo. 30Pandɛŋ Táán pá pálɛɛ́ a nsí yɛ́ɛnɛ aa ándɛ pɔ́ʼtɔm kuunə mólɛ́. Náa, a pəŋi, Sɛ waaŋan aálɛŋ lɛ́ polɛ njaan na moom móom muim. 31Uunə́ən agá Nɛlaamɛʼ nɛ́ Táán, nyɔ́lɛ́ aabosáayɛnɛ pɛ́ʼkáanɛ pɛ́ndɛ́ŋ piim. 32Podɛʼtámmána yoom na yoom, pəŋi póonɛ pá polɛɛ́ wɔnɔ́ ubid ó todóm. Podɛʼtámmána lɛ́ kíígə́mmi Sɛ waaŋan lɛ́ áboyɛ́ʼkɛn Nɛlaamɛʼ.
Tɛágaan oʼto wə́ə́s a tugúm tó a mɔɛn
(Maʼt 6.19-21)
33«Póman kolɛga nkə kiim kɛ́ pugódíí, poɛ́ʼkɛn mɔɔnɛ́ móom na mɔsɔ́gasɔ́gá. Poáyɛ́ɛlɛnɛ a pəŋibáamɔɛ́d mulid mó módɛ́amanɛɛ́. Púunə kɛɛn na tugúm a mɔɛn, tugúm tó tódɛ́amanɛɛ́ lɛ́ kɔ́gɔ́ɔg piíbən pə́díəgiig, nɛnɛ́ nɛ́ʼtɔ́bɔ. 34Kɛ́lɛ lɛ́, kɛnɔ kɛ́ tugúm toáŋ tólɛɛ́, kɔ tɛn aa ɔʼtɛ́m wááŋ ólɛɛ́.
Aádɛ́ɛ́ kaáboŋ pɛnɛŋ piim
(Maʼt 24.43-51)
35«Púləndən pɛnɛŋ piim na pilə́ə́ pɛáŋan pɛ́ pigólí a nkó, moláam moáŋan muúgə́ə́n. 36Póɛn wɔnɔ́ pɔɔd pá pálɛɛ́ agobóŋan kɛnɛŋ kɛ́ sə́dúg wɔɔbɔn əə́gimbuúli a wɔɔ́n ó kodɔn wó amɛ́ɛn a wólɛ́, a kóonɛ lɛ́ ná aádam ɔ́gɔdɛd udíyoog a niim əgiig niə́ŋ, pə́muúbuən. 37Kɔŋɛʼ na pəgudin póob náan pá sə́dúg wɔɔbɔn alɛ́ɛ́ koboóboanɛɛ́ əngis ongóm, páamooboŋ. A fɔ́lɔ́b, ndabodɛ́anɛ lɛ́, sə́dúg wɔɔbɔn nyɔ́lɛ́nyɔ́amɔɛ́d alɛ́ɛ́ kəə́níig kilə́ə́ kɛ́ pigólí, ɔnɔ́ na pɔ́lɛ́ pə́ləndin a tɛ́bɛlɛʼ, nyɔ́lɛ́ áboyáabɛn. 38Ɔmbɔ́ əmíim álon a ɔʼtɛ́m wó udúg óo, ɔmbɔ́ lɛ́ a ngim yɛ́ɛy oo, amaʼkoboóboan lɛ́ pálɛ əngis ongóm agomooboŋ, kɔŋɛʼ na pɔ́lɛ́!
39«Poálɛŋ lɛ́ mɔɔd o noádɛʼ yɛɛ́lɛŋɛn a kɛnɛŋ igə piíbən pə́əgiim əmuyííbənən, ɔdɛɔ́gɔ ogoboyáʼkɛnɛ lɛ́ pábáŋa yoog yəəŋ. 40Pəŋi tɛn, púləndin poágaáboŋ pɛnɛŋ piim lɛ́ Mɔɔ́n o mɔɔd alɛ́ɛ́ kiim alon a kɛnɛŋ kɛ́ podɛáfɛgɛɛ́ lɛ́ alɛ ugiim.»
41Náa Píɛ ɔnɔ́ əə: «Sə́dúk, pəsibə́əsíŋ áa umə́bisiə́din nkaʼtɛ́n yɛ́ɛy oóm, mɔɔd ungim əə́?» 42Náa Sə́dúk ɔnɔ́ na nyɔ́lɛ́: «Ánɛ anɛ́ɛ́n áa alɛɛ́ uʼkudin nyɔ́ pálɛ́ɛ́ kaágɛ́ɛ́ oʼto na nyɔ́lɛ́, nyɔ́ alɛɛ́ tɛn na nsiŋ? Taa, nyummú nyóonɛ nyɔ́ sə́dúg wəəŋ əyímuúcúm noádɛʼ nuə́ŋ lɛ́ ádɛ́ʼtɛg, aámɛ́nɛ pɔsɔ́g pəgudin lɛ́ kɛnɛŋ kɛ́ konɛ́ɛnɛ kíməʼkiig, áaboyáabɛn. 43Kɔŋɛʼ na uʼkudin nyóon náan nyɔ́ sə́dúg wəəŋ alɛ́ɛ́ komoóboanɛɛ́ lɛ́ alɛ agɛɛlɛ pigólí piə́ŋ. 44A fɔ́lɔ́b ndabodɛ́anɛ lɛ́ sə́dúg alɛ́ɛ́ kumudə́nigi lɛ́ ádáŋananɛ moom muə́ŋ muim. 45Kɔmɔɛ́d lɛ́ amaʼkɛɛn uʼkudin nyɔ́ alɛɛ́ afɛga agá a ɔʼtɛ́m wə́ə́ŋ, ɔnɔ́: “Sə́dúg waam aáʼkɛɛn ayɛ́ɛn ə́!” Əə́bə́ə́ agá kocɔʼkɔnɛ pɔsɔ́g pəgudin lɛ́ na pá panɔ́mɛɛd na pá pagɛ́ɛd, aánɛ moom, aáŋo poloʼ máság komoŋwáŋɛ. 46Nyóon náan, sə́dúg wəəŋ alɛ́ɛ́ kiim alon wɔɔ́s wó ɔdɛɔ́gɔ agaábóŋɛ́ɛ́, na a kɛnɛŋ kɛ́ adɛágaálɛŋɛɛ́. Alɛ́ɛ́ komoyɛ́ʼkɛn ntɔ́b yɛ́ amámoyááyɛn, yoom ímuʼ wɔnɔ́ yɛ́ Táán alɛ́ɛ́ kɛɛ́ʼkɛnɛɛ́ na pá pádɛágɛnɛɛ́ oʼto na nyɔ́lɛ́.
47«Uʼkudin nyɔ́ adɛáboŋɛnɛnɛɛ́, adiɛlɛ nkə kɛ́ sə́dúg wəəŋ alɛɛ́ anyɔ́ŋɛn, kɔmɔɛ́d lɛ́ alɛ ondɛŋáán nɛnyɔ́ŋɛn nɛ́ sə́dúg wəəŋ, pálɛ́ɛ́ komoónadɛn a nsun kɔŋɛʼ kɔŋɛʼ. 48Kɔmɔɛ́d lɛ́ sɔ́g nyɔ́ adɛʼkólɛŋɛnɛɛ́ nkə kɛ́ sə́dúg alɛɛ́ anyɔ́ŋɛn, ɔmbɔ́ amɛ́ɛ́lɛ nkə kɛ́ kíəguunə tɛn lɛ́ pámoónadɛn a nsun, yəəŋ áa mbáámanan ɛlɛ́ɛ́ kɛɛn ndiʼti. Kɛ́lɛ lɛ́, na nyɔ́ páyɛ́ʼkɛn kɛ́fɔlɛ́, pálɛ́ɛ́ tɛn kumuŋíən kɛ́fɔlɛ́. Na nyɔ́ pálɛ́ɛ́ kucumií moom muíŋ, pálɛ́ɛ́ tɛn kumuŋíən kuíŋ agaáyɛn náan.
Yə́sus əyíím agaag ɛsaa
49«Yug aa mbíim na yɛ́lɛ́ a nsí#12.49 Pódála tɛn náan a kálaʼtaʼ yɛ Ɛsa 66.15-16 Ɔʼtɛ́m wáam ólɛ əgín lɛ́ ná ɛ́mɛ́ɛ yə́ʼkəə́yúug! 50Nkóódi lɛ́ nsiəd ɔsɔgɛn. Ɔʼtɛ́m wáam ungim ólɛ əgín kɔ agɛɛn əgiig a wɔɔ́s ogo wó kɛ́lɛ́ɛ́ kaáyɛ́lɛɛ́!
(Maʼt 10.34-36)
51«Poafɛg lɛ́ kiwiiyiʼ aa mbíim na kɛ́lɛ́ a nsí ə́? Ndóo, ndabodɛ́anɛ lɛ́ ɛsaa aa mbíim agaag. 52Əgəə́bə́ə nɛ́gɔŋ kɛ́agɛɛn lɛ́, pɔɔd pálɛ a yoog yɔɔbɔn nto ɛ́ʼtáan, páasaalɛg lɛ́ pɔsɔ́g pá nto ɛ́dáád páanɔɛyɛ pá nto ɛ́baan, pá nto ɛ́baan páanɔɛyɛ pá nto ɛ́dáád. 53Sɛ a mɔɔ́n alɛ́ɛ́ kɔnɔɛyɛ mɔɔ́n wəəŋ, mɔɔ́n áanɔɛyɛ sɛ. Ŋŋí a mɔɔ́n ɛlɛ́ɛ́ kɔnɔɛyɛ mɔɔ́n nyɔ́ ɔʼkɛ́ɛd, mɔɔ́n nyɔ́ ɔʼkɛ́ɛd aánɔɛyɛ ŋŋí; ɔmbɔ́ tɛn ŋŋíin aánɔɛyɛ oʼkán ó mɔɔ́n, oʼkán ó mɔɔ́n aánɔɛyɛ ŋŋíin#12.53 Kɛ́lɛ náan a kálaʼtaʼ ɛ Mis 7.6 »
Nkə aa pɛálɛ́ʼkán píəbiíloodi
(Maʼt 16.2-3)
54Yə́sus əyíʼkíni kodɛ́anɛ na kiʼtúú kɛ́ pɔɔd kɛ́ɛg ɔnɔ́: «Pəŋi polɛanɛ lɛ́ ná poádála lɛ́ mbálámɔɛn ɛlɛ túgúgúgú, yəə́ʼkiíligən a noá nó ándɛ wɔɔ́s wáagɛɛn agɛɛ́mɛŋan, poɔʼkɔ́: “Naánɛ́ yɛ́ɛnɛ, aana noó.” Aándɛ tɛn kɛ́agaáyɛ́ɛlɛ náan. 55Ná poádála tɛn lɛ́ kɛfɛfɛm kímíim kɛ́dɛ́ɛmɛn a noá nó kusuu, poɔʼkɔ́: “Naánɛ́ yɛ́ɛnɛ, yoóy yáagɛɛn kɔ.” Kɛ́yɛɛn əgín tɛn náan. 56Moɔ́ŋɛ́ná pusú wɔnɔ́ pəŋi! Polɛ agolɛŋ kaanɛn pɛálɛ́ʼkán pɛ́ pɛ́lɛɛ́ a nsí na a mbálámɔɛn. Tuə́ áa podɛɔ́gɔ agolɛŋɛɛ́ anɛ́ɛ́n kaanɛn nkə kɛ́ kɛ́lɛɛ́ agaásan a pɛnɛŋ pɛ́ɛnɛ pɛ́ tigódíí ə́?»
Yaŋáan ədə́nigəni pɛbán pɛáŋan ná kɛnɛŋ kɛ́ pɛyɔm kídínjíig
(Maʼt 5.25-26)
57«A igə aa podɛágaásóngɛɛ́ pəŋibáamɔɛ́d a nkə kɛ́ pugódíí lɛ́ póɛlɛ, kɛ́ kɛ́lɛɛ́ sáád? 58Omaʼkɛɛn a kɛbán na mɔɔd náa poándagɛɛnɛɛ́ lɛ́ póɛn adɛ́lɛm a pɛyɔm, uunə lɛ́ puósóbini na nyɔ́lɛ́ ná pugə́ligi a ngə́. Náan fiɛ́d, aagɛɛn na wɛ a nó onjɔm pɛyɔm, ná onjɔm pɛyɔm ə́guúgumin, ágoyɛ́ʼkɛn na pasɔ́njaa lɛ́ pɛ́ɛn agoyáág a yoog yɛ njaan. 59A fɔ́lɔ́b ndagodɛ́anɛ lɛ́ odɛndɛ́ɛ́ kolon a yoog yɛ njaan yɛ́ɛy ná odɛ́mman kaálɛba uŋín wááŋ ungim. Ɔmbɔ́ síísi ɛdɛndɛ́ɛ́ kolɔb.»
လက္ရွိေရြးခ်ယ္ထားမွု
LÓʼKAS 12: yatDBL
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© Wycliffe Bible Translators Inc, 2015