LÓʼKAS 9
9
Oʼtom wó Yə́sus ayɛ́ʼkɛn na paaʼkan pə́ə́ŋ pá pówád na pábaan
(Maʼt 10.1-9,11-14; Mə́l 6.6-13)
1Yə́sus yɛɛ́gónyɛd paaʼkan pə́ə́ŋ pá pówád na pábaan, aáság koboyɛ́ʼkɛn nɛnom na toɛn tó koŋɛŋ məŋun má mabɛ́ miim, na tóonɛ lɛ́ mɔɔd alɛ abany páyɛmoyóómɛ. 2Ayɛ́boyɛ́ʼkɛn oʼtom lɛ́ pɛ́ɛn alɔɛgɛ Nɛlaamɛʼ nɛ́ Táán, páyoómanɛ pabámbany. 3Ayɛ́bodɛánɛ ɔnɔ́: «Poándagɛɛn, podɛnjábóŋɛ́náá moom. Pudisiə́d ɔmbɔ́ oʼtɔ́ŋ ó kodáŋana na wólɛ́, ɔmbɔ́ kɛbalɛ́ kɛ́ ongɛn. Pudisiə́d ɔmbɔ́ moom mó konɛ, ɔmbɔ́ mɔɔnɛ́. Mɔɔd adɛnjɛ́ɛ́n na pilə́ə́ pɛ́baan. 4Kɛnɔ kiim kɛ́ pumíig, noádɛʼ nó poɔ́sɔd a nólɛ́, púləndin kɔ agɛɛn əgiig a wɔɔ́s wó poádɛ́ɛmɛn agosan. 5Kɛnɔ kiim kɛ́ pə́dibuúsiədinií kɔŋɛʼ, lónáan a pálɛ́ɛg yɛ́ɛy pósan. Poándaasan, puə́gidə ummúndúŋ wó a ambaan yááŋan. Mbaŋ áa pomáboyáágánan náan.» 6Paaʼkan pááság kɛɛn. Páyɛ́ɛ əgiim pádáŋana a əʼkúu əngim, páalɔɛgɛ Tɔsɔm Tólaŋ, pə́əgiim póómanɛ pabámbany pɛnɔ piim.
Ɛlóod alɛ na ɛságág a ɔʼtɛ́m
(Maʼt 14.1-2; Mə́l 6.14-16)
7Ɛlóod nyɔ́ ayɛ́ɛ alaamɛ a Kalilə́ə ayóób nugəm nó Yə́sus na nkə kiim kɛ́ kɛ́yɛ́ɛ agaásan. Oʼto wə́ə́ŋ wɛ́ɛ́lɛáŋ lɛ́ ayóób pɔɔd pə́mmú pə́əsəə pɔ́nɔ́: «Sɛ́aŋ Ɔsɔgɛn pɔɔd aa əə́ʼkiiʼkini kiim yóndɛgɛɛ́.» 8Pə́mmú páyɛ́ɛ əgusəə pɔ́nɔ́: «Ɛlɛ́as aa əə́ʼkiiʼkini kiim álónɛ́ɛ́ a piíd.» Pə́mmú tɛn pɔ́nɔ́: «Ɔndɔɛgɛʼ pɛbán o Táán nyummú o kalaʼ aa əə́ʼkimií yóndɛg.» 9Náa Ɛlóod ɔnɔ́: «Mɛ, njɛ́ɛ́lɛ lɛ́ pásom Sɛ́aŋ oʼto. Náa, nyóonɛ anɛ́ɛ́n nyɔ́ ndɛɛ́ agoob pɔ́ɔsɔyɔ pɛbán piə́ŋ ə́ə, ánɛ aa alɛɛ́nɔ ə́?» Əə́bə́ə́ kuunə lɛ́ ná aádála Yə́sus.
Yə́sus yɛɛ́mɛ́nɛ kiʼtúú kɛ́ pɔɔd
(Maʼt 14.13-21; Mə́l 6.30-44)
10Ná pə́yímbuúlíni, pɔɔ́n pá maʼtom pə́ə́bə́ə́ kaáloaŋanan Yə́sus nkə kiim kɛ́ páyɛ́ɛ́lɛ. Əyə́suídíí na pɔ́lɛ́ a ɛbá, a noá nó a pálɛ́ɛg yimmú pɔ́ɔdɔ́ŋɔn lɛ́ Pɛdsáyída. 11Pɔɔd pɛ́ɛ́lɛ́ŋ lɛ́ kɔ́gɔ́ɔg aa amɛ́ɛn, pááság kumuyə́ən kɔ, kiʼtúú kilúd. Yə́sus əyíbusiə́d kɔŋɛʼ, amáboyásɛ́nɛn nkə aa kɛ́lɛɛ́ Nɛlaamɛʼ nɛ́ Táán, amóómánɛ pabámbany pá páyɛ́ɛ əguunə koom. 12Wɔnɔ́ ná mbin ɛyɛ́ɛ yəə́ndədə́əŋ, paaʼkan pə́ə́ŋ pá pówád na pábaan páyáyɛ́ʼtɛ́nɛ́ɛ́ a ɛbá yə́ə́ŋ, pɔ́nɔ́ na nyɔ́lɛ́: «Tɛánɛ́ na pɔɔd póonɛ piim, pɛ́ɛnan. Pɛ́ɛn a moyaa mó əʼkúu mó mólɛɛ́ áanɛ ndúmiʼ, na pɛnɔ pɛ́ toádɛʼ tólɛɛ́, púunə kɛnɔ kɛ́ pálɛɛ́ pə́gubúlim, na nkə kɛ́ pálɛɛ́ págonɛ lɛ́ áanɛ tɛlɛ a kɛnɔ kɛ́ kifələ́ə́n.» 13Náa Yə́sus ɔnɔ́ na pɔ́lɛ́: «Íʼi, ɛ́boyɛ́ʼkɛ́naan moom mó konɛ pəŋibáamɔɛ́d, pánɛ!» Náa pɔ́nɔ́ na nyɔ́lɛ́: «Pəsi tigóódi pɛlɛ́ɛd pɛ́ʼtáan súg áanɛ, na pusú póbaan. Waanyɔ́ŋɛn lɛ́ pəsi aa tíɛnɛɛ́ awɛɛn moom mó konɛ agomɛ́nɛ ɛdám ɛ́ pɔɔd yɛ́ɛnɛ yiim ə?» 14Páyɛ́ɛ kɔ yoom wɔnɔ́ tɔ́ɔ́sɛn ɛ pɔɔd ɛ́ʼtáan.
Náa Yə́sus ɔnɔ́ na paaʼkan pə́ə́ŋ: «Ɛ́bodɛánɛ́an pə́ləndin a pilí a pilí. Ɛ́nɛ́ kilí əʼtin a pɔɔd ábaan na pówád.» 15Pááság kɛɛlɛ wɔnɔ́ ná ayɛ́bodɛánɛ, pɔɔd pə́ə́ləndən. 16Yə́sus yiísiə́d pɛlɛ́ɛd pɛ́ɛb pɛ́ʼtáan na pusú póbaan, aábágɛ əngis a mɔɛn, amɛ́ʼkɛn pisoyidiʼ na Táán a moom móom, aábɛ́ŋa, amɛ́ʼkɛn na paaʼkan pə́ə́ŋ lɛ́ páaban ungim, ánɛ. 17Ungim yɛɛ́nɛ́, əə́yíid. Pɛbɛŋ pɛ́ pɛ́ɛ́lɔ́b, pɛ́ɛ́gómmánɛ, piə́yə́ə́g mɔsaŋɛʼ mówád na móbaan#9.17 Pódála tɛn náan a kálaʼtaʼ ɛ 2Puʼk 4.42-44
Píɛ ɔnɔ́ Yə́sus alɛ Məsíi
(Maʼt 16.13-21; Mə́l 8.27-31)
18Wɔɔ́s wúmmú, Yə́sus əyə́suídíí na paaʼkan pə́ə́ŋ a ɛbá ɔgɔɔ́sɔ́gɔlɔn Táán. Náa əə́buŋíən ɔnɔ́ əə: «Kɛnɛŋ kɛ́ pɔɔd pálɛ agosɔyɔ, pálɛ əgusəə lɛ́ ndɛ ánɛ ə́?» 19Pááság kumuyúlisini pɔ́nɔ́: «Pálɛ əgusəə lɛ́ olɛ Sɛ́aŋ Ɔsɔgɛn pɔɔd. Pɔsɔ́g pə́mmú pɔ́nɔ́, olɛ Ɛlɛ́as. Pə́mmú tɛn pɔ́nɔ́ ɔndɔɛgɛʼ pɛbán o Táán nyummú o kalaʼ aa əə́ʼkiiʼkini kiim yóndɛgɛɛ́ a piíd.»
20Náa ɔnɔ́ na pɔ́lɛ́: «Oo, a nɛáŋan nɛ́ pəŋibáamɔɛ́d anɛ́ɛ́n ə́ə, poɔʼkɔ́ ndɛ ánɛ ə́?» Píɛ əyímuyúlísíni ɔnɔ́: «Olɛ Məsíi nyɔ́ Táán əmíim ádom.» 21Ná Píɛ yiísə́ə́ náan, Yə́sus aáság koboyááganan mbaŋ na toɛn, ɔnɔ́ pádɛʼtɛánɛ náan na mɔɔd wɛndɛ́ŋ. 22Ayɛ́ɛ́n na tɔgɛ́ɛ́ yuudi, ɔnɔ́ na pɔ́lɛ́: «Mɛ Mɔɔ́n o mɔɔd, nkóódi lɛ́ nnɛ ntɔ́b kɛ́fɔlɛ́. Pasaá pá nigúu na puʼkúm pó payaaganɛʼ pɛfɔny, na palɛŋ pɛcɛm pálɛ́ɛ́ kiʼtəm, páyɛnjoon. Náa, mɔɔ́s mádáád a ngim yɛ́ɛy yɛ́ páagɛnjoon, ndəgiiʼkini kiim ndon a kəəniʼ ongóm.»
23Náa ɔnɔ́ na ungim nyɔ́ ayɛ́ɛ kɔ áay: «Mɔɔd əməʼkusəə lɛ́ əəginjə́ən, óliogi ɔʼtɛ́m na nyɔ́lɛ́nyɔ́amɔɛ́d, yə́lúú ɔmbásá wə́ə́ŋ mɔɔ́s miim ná yíim anɛ́ɛ́n yínjə́ən. 24Kɛ́lɛ lɛ́, wɛ nyɔ́ wɔʼkɔ́ wamaʼkanɛ ɔlaa wááŋ, olɛ́ɛ́ koʼtaŋ wólɛ́. Kɔmɔɛ́d lɛ́ wɛ nyɔ́ olɛ́ɛ́ koʼtaŋɛɛ́ ɔlaa wááŋ a kidíídí kɛ́am, wɛ nyóon aa olɛ́ɛ́ kɔɔyɛɛ́. 25Mɔɔd amaʼkɛɛn na tugúm tuim tó a nsí náa nyɔ́lɛ́nyɔ́amɔɛ́d alɛɛ́ undióŋóón, ɔmbɔ́ lɛ́ usulə́ə́n məní, ná amɛ́ɛ́lɛ nkə aa nyóon əə́? 26Mɔɔd amaʼkɛɛn lɛ́ aagoob oʼto kono na mɛ, aágaáŋa na tɔgɛ́ɛ́ tóam, mɛ Mɔɔ́n o mɔɔd ndɛ́ɛ́ tɛn koob oʼto kono na nyɔ́lɛ́ ná ndɛ́ɛ́ kimbuúlinií a nugəm nóam, na a nó Paabá na nó pəfúfúŋ pá məŋun má maʼtom. 27A fɔ́lɔ́b ndabodɛ́anɛ lɛ́, a pəŋi póonɛ pá polɛɛ́ póob, pə́mmú pálɛ kɔ pá pádɛndɛ́ɛ́ kugúú ná pádɛ́ʼtála Nɛlaamɛʼ nɛ́ Táán.»
Táán amɛ́ʼkɛn Mɔɔ́n nugəm
(Maʼt 17.1-8; Mə́l 9.2-8)
28Náan aa, yoom ɛ́ sɔ́ndɛʼ mmuʼ a ngim yɛ́ɛy yɛ́ yɛɛ́sɔ́yɔ náan, Yə́sus yiísiə́d lɛ́ na Píɛ, na Sɛ́aŋ, na Sɛ́ag, aábág na pɔ́lɛ́ a oʼkon a mɔɛn agɛɛn ɔgɔɔ́sɔ́gɔlɔn Táán. 29Alɛ anɛ́ɛ́n kɔ a pɛɔ́sɔ́gɔ́lɔ́n ɔ, udi wə́ə́ŋ wááság kaágasɛ, pilə́ə́ piə́ŋ fúlúʼtúʼtúʼtú, píəmənyə, kumənyə́ə́n. 30Nto ɛ pɔɔd ɛ́baan foáy kɔ lɛ́ na Moyíis, na Ɛlɛ́as, pálɛ agosɔyɔ na nyɔ́lɛ́. 31Páyɛ́ɛ agodɛ́ʼtɛganan əgín nugəm na nugəm, pɔ́ɔsɔyɔ na Yə́sus wɔnɔ́ ná aándagɛɛnɛɛ́ əyibəni oʼtom wə́ə́ŋ a Yolósalɛm. 32Na Píɛ, na pɔsɔ́sɔ́g pə́ə́ŋ páyɛ́ɛ páʼkosan ɛnɔ tɔ́g. Ná pə́yíím póndig, pááság kodála wɔnɔ́ ná Yə́sus alɛɛ́ a nugəm a kaadɛ, pɔɔd póob pábaan padɛ́lɛ́máán a ɛbá yə́ə́ŋ. 33Ná pɔɔd póob páyɛ́ɛ pándagaádanan na Yə́sus, Píɛ yiísə́ə́ ɔnɔ́ na nyɔ́lɛ́: «Kɛlág, kɛ́lɛ kɔŋɛʼ lɛ́ tɛ́lɔb áanɛ. Tɛabowáagɛn piób pɛ́dáád lɛ́, wɛ kímuʼ, Moyíis kímuʼ, Ɛlɛ́as kímuʼ.» Píɛ adɛʼkɛ́ɛ agolɛŋ nkə kɛ́ɛg kɛ́ ayɛ́ɛ əgusəə.
34Alɛ anɛ́ɛ́n kɔ na tɔgɛ́ɛ́ a unuʼ ə, kɛbɛd kɛáság kubuyə́súʼkinin, wɛɛ́y wə́ə́gumín paaʼkan. 35Nɛŋo níyíím nɛ́lon kɔ a kɛbɛd kɛ́ɛg a kaadɛ, nɛɔ́nɔ́: «Taa, nyóonɛ alɛ mɛ Mɔɔ́n nyɔ́ mbííyid, pómoyóóbɛn aá#9.35 Pódála tɛn náan a kálaʼtaʼ yɛ Ɛsa 42.1; Lóʼk 3.22 !» 36Ná nɛŋo nɛ́ɛn nɛ́ɛ́mán kosɔyɔ, pɛ́ɛ́dála agá Yə́sus aándɛ nyɔ́lɛ́nyɔ́əsíŋ, fiɛ́d mɔɔd kə́mmú a ɛbá yə́ə́ŋ. A kɛnɛŋ kɛ́go kɛ́ɛg, paaʼkan pádɛʼkádɛ́anɛ kɛbán na kɛbán na mɔɔd. Nkə kiim kɛ́ pɛ́ɛ́dála páyáyɛ́ngɛ́gɛ́ɛ́ a ɔʼtɛ́m.
Yə́sus ayóómɛ moóngaa nyɔ́ uŋun wó ɔmbɛ́ óyɛ́ɛ əguyə́njəbəni
(Maʼt 17.14-18; Mə́l 9.14-27)
37A koany kaáyɛnɛ, ná pə́yíím pə́suu oʼkon, kiʼtúú kɛ́ pɔɔd kíyíím əgəə́bun na Yə́sus. 38Mɔɔd nyummú kɔ a kiʼtúú kɛ́ɛg ayáág nɛŋo, ɔnɔ́: «Kɛlág, mbágoyɔ́sɔ́gɔ́lɔ́nɛ́ɛ́: Táá mɛ mɔɔ́n, kɛmbóg kɛ́am! 39Alɛ na ombod wó uŋun wó ólɛɛ́ lɛ́ úməʼkumuúgumin, əə́bə́ə́ kaányam, wáamoofóga, kɛngɔŋ kɛ́amoyóo. Alɛ údiə́bísígíí kumuúlis, súʼtə́ə́ əgín wáʼkoman komoóyɔgɛlɛdanɛ. 40Mbɔ́sɔ́gɔ́lɔ́nɛ́ɛ́ paaʼkan pááŋ lɛ́ pɛ́ŋŋɛ́ŋɛn uŋun wóow, pámáfɛ́gɛ́ɛ́ pádɛáʼkɛ.» 41Yə́sus ayáfɛ́mɛ́ɛ́, ɔnɔ́ na pɔ́lɛ́: «Pəŋi ɔsɛg wóonɛ wó podɛágaágɛ́ɛ́ oʼto na Táán, polɛ pabɛ́ a las! Kíəguunə lɛ́ nyɛ́ɛn na pəŋi agɛɛn əgiig súʼtə́ə́ naanɛ́g? Nkóódi lɛ́ mpoonóʼtan kə́mmú súʼtə́ə́ naanɛ́g? Mɛ́ɛn áanɛ na mɔɔ́n waaŋ.» 42Əgín pɔ́nɔ́ píim əgiig na moóngaa a udi ó Yə́sus, uŋun wááság komonyáŋɛn, ómámodɔɛ́d nwág a nsí, ómámofógɛd na toɛn. Yə́sus yɛɛ́sásɛ́dɛn uŋun wó ɔmbɛ́ wóow, amóómɛ moóngaa, əmə́musiə́d əgumuyúúlisi na sɛ. 43Ungim ayáyáágɛ́ɛ́ ɔmbɔg a oʼto, pə́əgəə́wúunəni wɔnɔ́ ná Táán alɛɛ́ na toɛn.
Yə́sus əmíʼkíni kusəə lɛ́ páamoyóon
(Maʼt 17.22-23; Mə́l 9.30-32)
Wɔnɔ́ ná ungim ayɛ́ɛ əgəə́wúunəni na nkə kɛ́ ayɛ́ɛ agɛɛlɛ, aáság kusəə ɔnɔ́ na paaʼkan pə́ə́ŋ: 44«Lɛŋáan koob nkə kɛ́ɛnɛ kɛ́ mbándabodɛ́anɛɛ́ nɛ́gɔŋ. Kɛ́lɛ lɛ́: Pálɛ́ɛ́ kiʼkumin, mɛ Mɔɔ́n o mɔɔd, páyɛndɛg.» 45Kɛbán kímuʼ paaʼkan pádɛʼkɛ́ɛ agoob yisí yɛ́ ɛyɛ́ɛ a tɔgɛ́ɛ́ tóod. Táán ayɛ́boyɔ́sɛ́gɛn yɛ́lɛ́ agɛɛlɛ lɛ́ pádɛnjóób yoom. Pɛ́ɛ́dámmána kuŋíən Yə́sus kɛbán na kɛbán.
Ánɛ aa alɛɛ́ oʼkóʼkóón
(Maʼt 18.1-5; Mə́l 9.33-37)
46Paaʼkan páyɛ́ɛ asáŋa agolɛŋ ánɛ a ondáŋ wɔ́ɔ́bɔn aa amáábɛ́gɛn pɔsɔ́g ombɔg a oʼto! 47Yə́sus yɛɛ́lɛ́ŋ nkə kɛ́ páyɛ́ɛ əgəə́ŋíənə kɔ a ntɛ́m yɔɔbɔn a kaadɛ. Yiísiə́d ɛyaa ɛ́ moóngaa, əmə́mudə́nígi a ɛbá yə́ə́ŋ, 48náa ɔnɔ́ na pɔ́lɛ́: «Nyɔ́ əə́siəd moóngaa wɔnɔ́ nyóonɛ kɔŋɛʼ a niiŋ nɛ́am, mɛɛ́nyɔ́amɔɛ́d áa əmísiə́d náan kɔŋɛʼ. Nyɔ́ əmísiə́d mɛ kɔŋɛʼ, əə́siəd tɛn kɔŋɛʼ nyɔ́ əyíím yɛ́ʼtom. Kɛ́lɛ lɛ́, nyɔ́ alɛɛ́ iyənjə́g ɛ́ las a kɛgaágadɛ kɛáŋan, nyóon aa amáábɛ́gɛn pɔsɔ́g ombɔg a oʼto.»
Nyɔ́ adɛáboónɔɛyɛɛ́, alɛ a ngim yaaŋan
(Mə́l 9.38-41)
49Náa Sɛ́aŋ əə́siəd tɔgɛ́ɛ́, ɔnɔ́ na nyɔ́lɛ́: «Paabá, tɛádála mɔɔd nyummú kága aáŋɛ́ŋan məŋun má mabɛ́ a niiŋ nɛáŋ. Tɛmaʼkayɛ́mosáŋɛ́nɛ́nɛ lɛ́ tɛɔʼkɔ́ ɔdɛɔ́gɔ mɔɔd nyɔ́ alɛɛ́ a ondáŋ wə́ə́s.» 50Yə́sus əyímuyúlísíni ɔnɔ́ na nyɔ́lɛ́: «Ndóo, podɛyɛ́mosáŋɛ́nɛ́nɛ lɛ́, nyɔ́ adɛáboónɔɛyɛɛ́, nyóon alɛ a ngim yaaŋan.»
Pɔɔd pá a Səməlíi pɛ́ɛ́sáŋɛ́nɛ kusiəd Yə́sus
51Ná kɛnɛŋ kɛ́ Yə́sus kodɛ́ɛmɛn a nsí yɛ́ɛnɛ agobag a mɔɛn kɛ́yɛ́ɛ kɛándagaáyɛʼtanɛ, yɛɛ́nóm ɔʼtɛ́m, əə́siəd ngə́ agobag a Yolósalɛm. 52Yɛɛ́yáŋ ədə́əmini pɔɔd agodom yuudi. Pɔɔd póob páyɛ́ɛ́n, pámɛ́ɛn alon a nigúu nímmú nɛ́ a Səməlíi lɛ́ ná pósóboni wɔnɔ́ ná nyɔ́lɛ́ əə́ndədíin yimií. 53Náa, pɔɔd pá a nigúu nɛ́ɛn pááság kosáŋɛnɛ kusiəd Yə́sus kɔŋɛʼ, lɛ́ wɔnɔ́ ná alɛɛ́ lɛ́ agɛɛn a Yolósalɛm, ásan mbámbáŋ, adɛʼtɛ́lɛm a pɔ́lɛ́. 54Ná paaʼkan pə́ə́ŋ, pa Sɛ́ag pɔ́lɛ́ na Sɛ́aŋ páyóób náan, páyɛ́modɛánɛ pɔ́nɔ́: «Sə́dúk, waányɔ́ŋɛn lɛ́ tíɛlɛ yug ɛ́gásɛg a mbálámɔɛn, ɛ́man kubusíŋini ə?» 55Náa, nyɔ́lɛ́ aáság koboyágasɛnɛ, əə́bə́ə́ kobosásan. 56Pááság kuyə́ən ngə́ yɔɔbɔn, pámɛ́ɛn a nigúu nɛ́ndɛ́ŋ.
Tí úmə́dí yiim, úyə́ən Yə́sus
(Maʼt 8.19-22)
57Ná páyɛ́ɛ pándɛ a ngə́, mɔɔd nyummú yɛɛ́dɛánɛ ɔnɔ́ na Yə́sus: «Sə́dúk, kɛnɔ kiim kɛ́ waágɛɛn, mɛ ndəguyə́ən kɔ.» 58Náa Yə́sus ɔnɔ́ na nyɔ́lɛ́: «Pɛyɛɛ́njɛ́m pígóódi pɛbaŋ pɛ́ pɛ́agɛɛ́mɛŋan kɔ, pɛsag na aŋŋany. Kɔmɔɛ́d lɛ́ mɛ Mɔɔ́n o mɔɔd ntigóodi əgín ɔmbɔ́ kɛnɔ kɛ́ nyíngigií oʼto agɛɛlɛ lɛ́ nyóoyig.» 59Aáság kaágasɛ ná sɔ́g wɛndɛ́ŋ alɛɛ́, ɔnɔ́ na nyɔ́lɛ́: «Wɛ, mɛ́ɛn wínjə́ən.» Nyóon əyímuyúlísíni ɔnɔ́ na nyɔ́lɛ́: «Sə́dúk sɛ́gɔɔ, yaŋ kiʼti nyɛ́ɛn əni sɛ waam.» 60Náa Yə́sus ɔnɔ́ na nyɔ́lɛ́: «Ndóo, wɛ tí pɛlóŋ píniəŋən pɛlóŋ pɛɔ́bɔn. Náa, wɛ tod alɔɛgɛ Nɛlaamɛʼ nɛ́ Táán.» 61Sɔ́g nyummú tɛn aáság kusiəd tɔgɛ́ɛ́, ɔnɔ́ na Yə́sus: «Sə́dúk, mɛ ndəguyə́ən. Náa kɛbán kímuʼ, yaŋ kiʼti nyɛ́ɛn agaábɛ́g yoog yaam ɛ pɔɔd.» 62Náa Yə́sus ɔnɔ́ na nyɔ́lɛ́: «Lɛŋ lɛ́, mɔɔd nyɔ́ əə́ʼkuguminií ɛsóó Əgəə́bə́ə pigólí, náa alɛɛ́ əgiiʼkini kəə́búʼkən ngim, nyóon ɔdɛɔ́gɔ nyóonɛ lɛ́ yɛ́ɛlɛ pigólí pɛ́ a Nɛlaamɛʼ nɛ́ Táán.»
လက္ရွိေရြးခ်ယ္ထားမွု
LÓʼKAS 9: yatDBL
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© Wycliffe Bible Translators Inc, 2015