KENESE Fakatomuaga
Fakatomuaga
Te uiga o te pati Kenese ko te ‘Kamataga.’ Te tusi e fakamatala ei te faitega o te lagi mo te lalolagi mo mea katoa i ei, te mafuaga o tino, te kamataga o te agasala mo te puapuaga i te lalolagi, mo auala e fesokotaki ei te Atua mo tagata. A Kenese e mafai o 'vae ki vaega tāua e lua.
1. Mataupu 1-11 Ko te faitega o te lalolagi, mo te kamataga o te tala tuku fakasolo o tino. I te vaega tenei, e fakamatala ei te tala o Atamu mo Eva, Kaino mo Apelu, Noa mo te lolo, mo te Taoa o Papelonia.
2. Mataupu 12-50 Ko te tala tuku fakasolo o tupuga muamua o Isalaelu. Te tino muamua ko Apelamo, tela e takutakua i tena fakatuanaki mo tena fakalogo ki te Atua. Tafa atu ki ei ko te tala o tena tama ko Isaako, mo tena mokopuna ko Iakopo, tela e fakaigoa foki ko Isalaelu, mo te tala ei o tamaliki a Iakopo kola e tinogafulu mo te tokolua, kola e fakaigoa ki ei a matakaiga e sefululua o Isalaelu. Te tamaliki e fakapogai ki ei te tala ko Iosefa, mo tala o mea ne tupu tela ne iku ei ki te malaga mai o Iakopo mo ana tamaliki mo olotou kaiga o 'nofo i Aikupito.
E ui te tusi e fakamatala i ei a tala o tino, kae ko te pogai tafasili i te taua, me se tala o galuega ne fai ne te Atua. E kamata ki te molimau me ne faite ne te Atua te lalolagi mo mea katoa i ei, kae fakaoti ki te feagaiga a te Atua me i a ia ka fakatumau tena manatu 'mafa mo tena fenua. I loto o te tusi, a ia tela e tafasili i te taua ko te Atua, tela e fakamasino kae fakasala ne ia a tino fai mea se 'tonu, e takitaki kae fesoasoani ki ona tino, kae faite ne ia ke foliga a tala tuku fakasolopito o latou. A te tusi taumua tenei, ne tusi ke fakamau ei a te tala o te fakatuanaki o tino, kae o fesoasoani o fakatumau ke ola te fakatuanaki tena.
Ko Fakasologa o Mataupu
Faitega o te lagi mo te lalolagi mo tino ola (1.1—2.25)
Te kamataga o te agasala mo puapuaga (3.1-24)
Mai i a Atamu ki a Noa (4.1—5.32)
Noa mo te lofiaga (6.1—10.32)
Te Taoa o Papelonia (11.1-9)
Mai i a Semu ki a Apelamo (11.10-32)
Tamana o Isalaelu:Apelaamo, Isaako mo Iakopo (12.1—35.29)
Te gafa o Esau (36.1-43)
Iosefa mo ona taina (37.1—45.28)
Fanauga a Isalaelu i Aikupito (46.1—50.26)
လက္ရွိေရြးခ်ယ္ထားမွု
KENESE Fakatomuaga: Tusi Tapu
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Tuvalu Revised Bible © Bible Society in the South Pacific