Iiḍighi 1
1
1 #
Luk 1.1-4
Ooḅi ạTiofilos, pạ ạḍiḅel ạḍinya phọ ạmi, mị ụge ni oomo phọ ịpe ạJizos aḍighi bọ, ạḅile bọ ạtughemi kꞌemiighom oḍighi phọ ọdi, 2tụtu ẹteeny bọ ḍio phọ ạḍiphe ọsighe bọ nyọdi ogheelom kꞌạke. Kụ kọsighe bọ nyọdi, esi ịikpo Uwaloor Iigbia phọ kụ ọdi ạtooghi ịdi koḍighi ghan ạḅeni butelhedom mọ ọdi ạsaḅar bọ. 3Ọdi amugh bọ esi inyadi aḍughul-otu, ọdi amite ghan ni egaan aḍeenaan loor ọdi bịdi ịbadi areten dị iikia ị́tol, mọ ọno odi ni. Bịdi ụmiinan ghan ni, kụ ọdi ạtughemi ghan ịlo ọmar phọ kꞌẸnaan. 4#Luk 24.49Mem dị ọdi ạrolan rꞌạbidi, kụ ạto ạḅeni mọ bịdi kụ́ḍua Jeruselem, mọ ọrol okori ịpe Ọde phọ ọno aguanaan bọ, ịdipho bịdi mọnaghan bọ ni dị ọno ạghaaph. 5#Mat 3.11; Mạk 1.8; Luk 3.16; Jọn 1.33Mọ ạJon, ịdipho bịdi olegheri bọ ni, ạsighe ghan mụum kụ awuroghom we, kụ mọ esi asuḍughul-otu dị ị́kel, kọsighe Uwaloor Iigbia phọ kụ iwuroghom inyina.
Ọsighe Jịzos okeelom kꞌạke
6Kụ mem dị abutelhedom mọ ookpomoghan esi, bịdi upuru ni Jịzos mọ, “Ọmoogh-we, mẹteeny dị nạ kạtagharan Ịzirel lọ kọḅile opogha aani loor ḍụghum?”
7Kụ ọdi ạphagharanaan mọ, “Ílo esi anyina olegheri amem rꞌariiḍio phọ ịpe Ọde phọ ạsighe bọ ịikpo phọ ọdi bịn kụ aguom. 8#Mat 28.19; Mạk 16.15; Luk 24.47, 48Kịngo ni inyina ịikpo mem dị Uwaloor Iigbia phọ misoorom inyina, kụ nyina ịgbaanaan ịmi, emiigh Jeruselem rꞌoomo phọ aJudia rꞌaSameria, kụ esiemi eekuna aḅirini phọ.” 9#Mạk 16.19; Luk 24.50, 51Ọdi rọghaaph ịphen phọ, kụ bịdi odi ni ropogh, bịn ọsighe nyọdi rokeelom kꞌạke, kụ ọotu aakpereghiom nyọdi ịdi bịdi nyọdi ụ́miin mun.
10Kụ ịdipho ọdi rakeel bọ, bịdi uphogh ni okuaḍio phọ okananaam, kụ egina amem bịn ịyal awe dị ọkpologhian ịphalaḅaal, ọmeera ịigaany ạbidi, 11kụ ọḅem mọ, “Weye aGalili, nyina ịtuan eeghe kụ ẹmeregha bọ sịen repogh ghan ẹpe okuaḍio phọ? ẠJizos phọ ọphon ạar bọ inyina rokeelom kꞌạke phọ, kạḅile ni ạtuugh ịduon nyina rẹmiin bọ kụ atu.”
Ọnon oye ạsighe dọl phọ ạḍiphe aJudas ạwile bọ
12-13 #
Mat 10.2-4; Mạk 3.16-19; Luk 6.14-16 Kụ abutelhedom mọ, aPita, rꞌạJon, rꞌaJems, rꞌẠndru, rꞌaFilip, rꞌạTomos, rꞌaBatolomiu, rꞌaMatiu, rꞌaJems ọony Ạlfios, rꞌaSaimon Zelotis, rꞌaJudas ọony aJems, ọḍua pạ Eegum Ọlivs eḍighi bọ otobi oḅula Jeruselem. Bịdi ọki osi, kụ ogheel pạ osoph phọ ọpo bịdi ọrol ghan bọ sịphe ẹedaneen otu ạnyu phọ. 14Bịdi rꞌạnmariir phọ rꞌaMeri onhiin ạJizos, rꞌabumor phọ ạJizos — oomo phọ ạbidi ọḅoph iloghi kụ ọkuom siloor ạbidi esi ịiḅereghi.
15Amem mọ ạmuen phọ kụ ẹdi aPita ạmeera ogbo ookpomoghan ạbuphe omeeraam bọ, dị ọghiom ni oniin okuron rꞌịyaldi, 16kụ ạghaaph mọ, “Bụo asiya, Uwaloor Iigbia phọ ạḅeni ni Devid mọ ạghaaph ịlo aJudas, ọpo aḍiemiom bọ bụphe osiph bọ Jịzos. Ịkpianaan ni dị ịmiin ạḍinya iigbia phọ ịpe kẹtuugh emite. 17Ụloghom aani nyọdi iyira mọ ạmoogh bin sịen oḍighi phọ ọphon.”
18 #
Mat 27.3-8
(Oye phọ ọphon ạsighe ni ikpoki phọ aal bọ Jịzos aghoom ekulha ade, kụ ropekele romeel, bịn aruphaan kụ ịla ọkuruḅaka emiteghu. 19Kụ oomo ạbuo aJeruselem ulegheri ni ịphen phọ, kụ bịdi oghol esi phọ ọnhu ẹmha ạbidi mọ, “Akeldama”, ịduon phọ pọ “Ade ịḅaal”.)
20 #
Ạsuo 69.25;
Ạsuo 109.8
“Ọge ni pạ ạḍinya Ạsuor phọ mọ,
“‘Amarugh phọ ọdi aḍighi ni ọkpagha!
Ẹesuna kị́tol dị ketugh kꞌọdi,’
“ḅịle mọ,
“‘Ọnon oye ạsighe ni dọl phọ ọdi!’”
21-22 #
Mat 3.16; Mạk 1.9; Luk 3.21;
Mạk 16.19; Luk 24.51 Kụ aPita ạḅem mọ, “Esi ịphen phọ, ẹnighe ni dị yira kophogh oniin oye sịen ogbo phọ ayira ọghaaph aani ịlo oḅetenu esi aḍuugh phọ ạJizos. Oye phọ kaḍighi nyoniin ọnyo ạbuphe morelhian ghan bọ rꞌạJizos Ọmoogh-we phọ, emiigh kꞌamem mọ ạJon awurogh ghan bọ we mụum mọ, kụ ẹteeny kꞌaḍio phọ ạar bọ iyira Jịzos ogheelom kꞌạke.”
23Kụ omitiom ịyal awe, Mạtias rꞌạJosef, ọpo oghol bọ mọ ạBasabas, aḍien ugheel ọdi ạJostos. 24Kụ bịdi ọoḅereghi kụ ọḅem mọ, “Nạ Ọmoogh-we dị alegheri iloghi oomo aweye. Uḍeenaan iyoor sịen ịyal awe phọ ạbuen ọlo nạ mạsaḅar 25lọ kạsighe dọl phọ ạḍiphe aJudas ạwile bọ aḍighi aani oḍighi otelhedom, sịen dị aJudas mạghi ọrol ạdol ịminimiin phọ ạḍiphe oseenaan bọ nyọdi.” 26Kụ bịdi ọsa ẹlhel, kụ ẹlhel phọ emeelom Mạtias, kụ ọsighe nyọdi ogbiom omuneniom ḍioph rꞌoniin abutelhedom mọ.
လက္ရွိေရြးခ်ယ္ထားမွု
Iiḍighi 1: ẠḌI
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS