Emiighom 19
19
Ạsipioghom mọ ẹmha phọ ạSodom
1Mem mọ ịyal phọ ạruukpaany phọ Ẹnaan osi bọ Sọdom dulhe, ạLot ạtol atuman ọnhu-aḍibuo oḍigh ẹmha phọ. Kụ ọmiin ạbidi bịn ọdi aḅetenu ọghi ọteeny ạbidi. Ọdi azumeri ni ghisigh ọdi ude ọngo ạbidi eghuan. 2Kụ ạḅem mọ, “We phọ, mị odi sịen okumu ọngo anyina. Iseseeny itu ọghi kꞌạmi. Iitola ruwol anyina, ẹrol sịen ḍughul phọ. Ḍịroor kụ eḅon eḅetenu ẹghi ẹpe nyina rẹki bọ.”
Kụ bịdi ọphagharanaan mọ, “Eeye, yoor kọtol li ẹphen egbogh erugh ẹmha phọ.”
3Ọdi ạkpaariom ni bịdi iboom, kụ ekureriom mọ bịdi omeera ọdaph ọdi ọghi kꞌọdi. Kụ ọdi ạko bịdi igoni, arom butelhedom mọ ọdi mọ ọsa brẹd dị yist ụ́logh ịlo ọngo aruuruen phọ. Rewila kụ ọngo kụ bịdi olhe.
4Ẹtol repogh mem dị awe kọmina, bịn oomo awe ạSodom mọ oru bịn okoom otu phọ ạLot; ugheel rꞌikumoor awe ekool kịrokiro. 5#Ịir 19.22-24Bịdi ụmagh ni Lọt omitiom kụ opuru mọ, “Awe phọ oru bọ kꞌạna sịen aḍughul phọ odi ẹghen? Mitiom bịdi ụngo iyoor.” Awe phọ ạSodom rọwa ọrolan esi rꞌạbidi.
6ẠLot amite kụ aghughiom we phọ eghuugh phọ, 7kụ ạḅeni bịdi mọ, “Rịghiri, mị rịiḅereghi ni inyina kéḍighi ịyaar dị eeph ịdipho! 8Mị ạmoogh ni ịyal ạnmanyaan dị kőtuman ghan olephiri ọony. Mị kamitiom bịdi ịngo inyina eḍighi bịdi ịlo ịḅeeraan inyina. Kụ ọlo kéḍighi ịyaar we phọ ạbuen. Bịdi aruuruen dị odi kꞌạmi, kụ mị kaakpereghi ni bịdi.”
9Kụ bịdi ọḅem mọ, “Ḍụa sịphe yoor ọmiin eten, nạ ooruen! Nạ ạnhian ọḅeni ayoor ịlo yoor koḍighi? Ḍụa risigh ayoor, ọbo yoor koḍighi ghan bọ nyịna ịdi kebeeph epu ịlo ạbidi.” Bịdi unyuughi ni Lọt oḅulemi ọman kụ ọnya ọghi ạay eghuugh phọ. 10Kụ ịyal phọ awe phọ ọrol bọ ologhi otu phọ otigh eghuugh phọ kụ oḍur Lọt ọlogh ologhi otu kụ oghughi eghuugh phọ. 11#2 Ạbud 6.18Kụ bịdi oḅomoghi riḍien oomo awe phọ ạbuphe okoom bọ otu phọ, bụbam rꞌabugbogh, bịn ọnyo ạbidi ọ́lhogh mun ọnhu-aḍibuo phọ elegh.
ẠLot ạbile ẹmha phọ ạSodom ạḍua
12Ịyal phọ awe phọ upuru ni Lọt mọ, “Nạ ạḅile ni ạmoogh bụnon awe sịen ẹmha phọ? Ụgua, nạ rꞌọto ạna rꞌạrogo ạna, ạnmuny ạna rꞌạnmanyaan ạna; tọrobo ịyaar lọ nạ ạmoogh sịen ẹmha phọ ẹphen, pọ pạm ạḍuanam. 13Yoor kopiemi ni ẹmha phọ ẹphen. Ọmoogh-we phọ mạnaghan iboom ịkaraph ịinaghan ịlo awe phọ ạbuen, kụ murom iyoor ophiemi ạSodom.”
14Kụ ạLot ạghi ạteeny we dị oguan ophin ạnmanyaan ọdi kụ ạḅeni bịdi mọ, “Iigborion emite, ịdi eḍighi bọ Ọmoogh-we phọ kạnuun apiemi ẹmha phọ ẹphen.” Kụ bịdi ogbi mọ ọdi rạmaar ghan ịmaar ịnhu.
15Ạḍiroor rẹḅaal kụ ạruukpaany phọ Ẹnaan ogunan Lọt mọ, “Nụun aḅetenu ạsighe ạnir phọ ạna rꞌịyal ạnmanyaan phọ ạna, bụen odi bọ sịen rꞌạna, ọbo kọḅaram bọ nyịna opiemiom loor ạsipioghom ẹmha phọ ẹphen.” 16#2 Pit 2.7ẠLot aabinya ni kụ Ọmoogh-we phọ ạnma nyọdi ighirigiir; kụ awe phọ ọpham rạghaagh ạLot rꞌạnir phọ ọdi rꞌịyal phọ ạnmanyaan phọ ọdi omitenom ẹmha phọ. 17Kụ oniin ọokpaany ạḅem mọ, “Ikiil ọphelom asighuḍum anyina! Képogh ọman kụ kẹ́meera ẹpe eḍiiny phọ. Ikiil ẹghi ẹpe aroogbolom mọ, ọbo nyina ekpetenaan ḍuugh.”
18Kụ ạLot ạphagharanaan mọ, “Eeye. Seseeny, ye phọ, kúḍighi iyoor ịdipho. 19Nạ muḍighi ịmi iboom iiḅi ọphel aghuḍum ạmi; kụ ọghi ẹpe aroogbolom mọ ẹkel ẹpughan. Amuphe kụteeny ni ịmi mị amugh kụ mị agbi osi ẹpe. 20Nạ ạmiin ni ẹbam ẹmha phọ ẹpe phọ etuman bọ. Mị kạki ẹpe, etuman ni. Eḍighi ni ọony ẹmha kụ mị kạmoogh ni pẹleeny.”
21Ọdi ạphagharanaan mọ, “Ẹnighe ni. Mị mameeraam. Mị kápiemi ẹmha phọ ẹpe. 22Gboogborion. Kiil. Mị káḍighi ịyaar tụtu nạ asi ẹpe phọ.”
Ḍien ẹmha phọ ẹpe ughol ghan mọ aZoar. Ẹmhu phọ, pọ ekom ni.
Opiemi Sọdom rꞌaGomora
23Erumuḍio remite, kụ ạLot agbi osi aZoar. 24#Mat 10.15; 11.23, 24; Luk 10.12; 17.29; 2 Pit 2.6; Jud 1.7Ekperenom bịn Ọmoogh-we phọ aseere ọlophia ạnian rꞌạsolfa ẹpe kꞌạke kụ ạlophom Sọdom rꞌaGomora 25aphiemi rạmha phọ rꞌarere eḍiiny phọ, rꞌoomo awe phọ orughogh bọ rạmha phọ rꞌoomo ạraraar dị esiighi sịphe ade phọ. 26#Luk 17.32Ạnir phọ ạLot akiton aphogh ọman bịn aten eegboghoḍi aboph.
27Eḅon ạḍiroor ḍịeri phọ aḍio phọ, kụ Ebraham ạnuun ạghi asi esi phọ dị ạmeera bọ elhor Ọmoogh-we phọ. 28Kụ Ebraham aphogh ạghiom Sọdom rꞌaGomora rꞌoomo eḍiiny phọ, kụ ạmiin ạmughi dị ạḍua sịphe ade phọ kụ ramite ịdipho amugbogh ạmughi aḍigbogh egu ạnian. 29Rẹteeny bọ mem dị kopiemi rạmha phọ rꞌarere phọ ẹpe ạLot arugh bọ, kụ Ẹnaan ẹetughian Ebraham kụ ẹngo ẹereegh Lọt osuma ọghi ekpisi dị ịiḅaghami phọ kési.
Ịdi ạMoabait rꞌAmonait phọ omiteghu
30ẠLot aghiilaan orugh ghan ẹpe Zoar, kụ ạḍua ạghi ẹpe aroogbolom mọ kụ bịdi orugh loor epogh ade, ọdi rꞌịyal phọ ạnmanyaan phọ ọdi. 31Kụ okumoor ọnyani phọ ạLot ạḅeni ọbam ọnyani phọ mọ, “Ọde phọ ayira mạkpo, kụ awe úlho sịen aḅirini phọ, dị kuphin iyira dị yira kọmar nmụny. 32Tue ọngooghi ọde phọ ayira miim dị kakiigh nyọdi, ọbo yira ọrolan ọmaraghinaan ọde phọ ayira nmụny.” 33Ḍughul phọ ạḍiphe phọ bịdi ọngooghi miim ọde phọ ạbidi, kụ okumoor ọnyani phọ ạphur ạghi ạrolan esi. Amiim mọ ạphughan ni kụ ọdi ólhegheri mem mọ ọdi ạmina bọ rꞌamem mọ ọdi aḅetenu bọ.
34Kụ rẹḅaal ḍịeri phọ aḍio kụ okumoor ọnyani phọ ạḅeni umarani phọ ọdi mọ, “Mị ụrolan ni rꞌoye phọ ḍughul; rodon yira kọḅile ọngo nyọdi miim, ọbo nạ ạrolan aani nyọdi esi, ọbo tọrobo ọnyo ayira ạmoogh mọony dị ọde phọ ayira kụ amitiom.” 35Kụ ḍughul phọ ạḍiphe bịdi ụḅile ni ọngo ọde phọ ạbidi miim, kụ ọbam mọ ạḅile ạrolan aani esi. Amiim mọ ạphughan ni kụ ḅịle kẹn ọdi ólhegheri mem mọ ọdi ạmina bọ rꞌamem mọ ọdi aḅetenu bọ. 36Areten phọ ịphen kụ ẹdi ịyal phọ ạnmanyaan phọ ạLot kụ ọmoogh rụkuruḅaka-eghun dị ọde phọ ạbidi kụ raamoromi. 37Okumoor ọnyani phọ ạmar mọony kụ aghol ḍien ọony phọ mọ ạMoab. Ọdi kụ azin ạnmuny ạnmuny awe phọ ạbuen rokol ghan bọ mọ ạMoabait phọ. 38Kụ ọbam mọ ạmar aani ọony ọlo ọdi, kụ aghol ḍien ọony phọ mọ ạBen Ạmi. Ọdi kụ azin ạnmuny ạnmuny awe phọ ạbuen rokol ghan bọ mọ Amonait phọ.
လက္ရွိေရြးခ်ယ္ထားမွု
Emiighom 19: ẠḌI
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS