Luk 13
13
Ikiton esi ịkaraph anyina
1Mem mọ ọpo phọ buniin awe ụrol li, dị ọḅeni Jịzos ịlo awe aGalili dị odi rọpinyon rịkia kọngo Ẹnaan kụ aPailet ạze. 2Kụ ạJizos apuru bịdi mọ, “Nyina regbi ghan mọ awe phọ aGalili ọze bọ ịduon phọ kụ uḍighi bụkaraph awe opu oomo ạbueri phọ awe phọ aGalili ḍụghum? 3Kị́dipho. Mị rịḅeni inyina mọ, eḍighi ịyaar dị nyina íkiton esi ịkaraph phọ anyina, nyina kemugh aani ni ịdipho bịdi omugh bọ. 4Nyina regbi ghan kẹn mọ ḍioph rꞌọphaanya aweye phọ ạbuphe omuughu bọ mem mọ ọpo oboom otu ẹedaneen phọ ameel bọ ẹpe Siloam kụ uḍighi bụkaraph awe opu oomo ạbueri phọ orugh bọ Jeruselem ḍụghum? 5Kị́dipho. Mị rịḅeni inyina mọ, eḍighi ịyaar dị nyina íkiton esi ịkaraph phọ anyina, nyina kemugh aani ni ịdipho bịdi omugh bọ.”
Aḍidogh dị ọsighe olhom oreeny-ạfig kụ odoghom
6Kụ ạJizos adogh ḍidogh phọ ạḍien ạḅeni bịdi mọ, “Oreeny dị oghol mọ ạfig asi ni ozo ireeny amiim oniin oye. Kụ oye phọ ạghi ạnmanaghian iimuma phọ, kụ ọ́miin rꞌeghuuny. 7Kụ ọdi ạḅeni opoghom ozo phọ ọdi mọ, ‘Mịin, sịen ịraar ạsia mị uru ghan ni ạnmanaghian iimuma oreeny phọ ọphon, kụ mị ụ́miin rꞌeghuuny. Benogh alher. Uḍighi ika kụ ọdi kạtol ghan sịen bịn ạmooph ẹnuum ade phọ oopho?’ 8Kụ opoghom ozo phọ mọ, ‘Oye phọ, bịlenaan ọdi ạrol lhạ phọ ạḍien bịn. Mị kaguph ni akitonom zin phọ ọdi, atoph atopha ọngoom ẹnuum, 9kụ eḍighi mạar dị ọdi amuum nana, pọ ẹnighe ni, kụ mụghumo ómuum, kụ agbi olher.’”
ẠJizos aakonom ẹkugha ạnir ḍio ophooghian phọ
10Eniin aḍio ophooghian, ạJizos odi ni oniin obughotu rạtughemi ghan, 11kụ oniin ạnir ạrol li sịphe, dị ọkaraph uwaloor ạrol ẹmhu kụ aḍighi dị ọdi aḍighi ẹkugha ḍioph rꞌọphaanya ạsia. Ạkoma ni bịn órue ghan mun ọmeera osel. 12Mem dị ạJizos ạmiin bọ nyọdi, ạmagh ni mọ, “Nịr phọ,” kụ ạḅeni mọ, “Nạ makpetenaan eephina phọ ạna.” 13Kụ ọdi ạsighe rạghaagh ọdi ạzuom ạnir phọ, bịn egina amem ọdi ạgbutonu ạmeera, kụ aboom ghan Ẹnaan.
14 #
Ẹḍua 20.9, 10; Dut 5.13, 14 Ịghagh ni ologhi uwo ẹmhu obughotu phọ ịdipho ạJizos aakonom bọ ạnir phọ ḍio ophooghian phọ, kụ ạḅeni we phọ mọ, “Odiiny aḍughul-otu kụ ẹdi yira koḍighi ghan oḍighi. Itu ghan siḍughul-otu phọ ịpe kụ eekonoma siloor anyina, káḍio ophooghian phọ.”
15Kụ Ọmoogh-we phọ ạphagharanaan nyọdi mọ, “Nyina abulegheri ịlo ạbunon, ịlo-anyina-ílegheri. Ọnyo anyina kọ̋katan ghan nạm mụghumo ẹnam adool ọdi loor ẹkan ọghi ọngo mụum ḍio ophooghian phọ ḍụghum? 16Ạnir phọ ọphon ọnyo ẹemara ẹemara Ebraham, dị aSetan ạlogh esi ịminimiin sịen ḍioph rꞌọphaanya ạsia, ị́kpe ọotoghion ọdi ḍio ophooghian phọ ḍụghum?” 17Ọphagharanaan phọ ọdi aḍighi mạar dị umugholoor asiph oomo ạbumulogh-ḍien phọ ọdi, kụ awe phọ ụmoogh ni iboh loor esi oomo ạraraar ịiḍaany phọ ịpe ọdi aḍighi yogh bọ.
Aḍidogh dị ọsighe ekpo ịizupha dị eghom ịikia kụ odoghom
(Matiu 13.31-32; Mạk 4.30-32)
18ẠJizos ạḅem mọ, “Ọmar phọ kꞌẸnaan ạkighom eeghe nụun? Kọsighe eeghe kụ ọmaaniom? 19Ạkigh ịdipho ekpo ạmustad dị oye ạsighe ạzuph ozo ọdi. Ekpo phọ isi ni ẹbalabal ḍiphoph, kụ ịnun esoor ẹloghoḍi ruutu pạ ịla phọ ọdi.”
Aḍidogh dị ọsighe yist kụ odoghom
(Matiu 13.33)
20ẠJizos ạḅem kẹn ni mọ, “Mị kạsighe eeghe kụ ạmaaniom ọmar phọ kꞌẸnaan? 21Ạkigh ịdipho ayist dị ạnir ạsighe aḅunyonom inyadi aruuku aflaur kụ aseere, tụtu oomo phọ ạbred phọ aru.”
Ọkololoony ọnhu-aḍibuo phọ
(Matiu 7.13-14, 21-23)
22Kụ ạJizos manyeene Jeruselem kụ ạgbaranu ghan ạtughemi igbogh rꞌịbam ạrama. 23Kụ oye apuru ni nyọdi mọ, “Oye phọ, ịyal-ikpo awe bịn kụ ẹdi kọpel bọ otene ḍụghum?”
Kụ ạJizos ạphagharanaan bịdi mọ, 24“Ịkparami ni ọbo eḍigh ọkololoony ọnhu-aḍibuo phọ, ịdi eḍighi bọ mị rịḅeni ghan inyina mọ ịbadi awe kọwa ni oḍigh aani kụ kótue. 25Uwotu phọ kaḅetenu ni akughi otu phọ. Pọ kụ amem dị nyina kẹmeera erugh kụ ekar eghuugh phọ kụ ẹḅem mọ, ‘Oye phọ, ughughuronaan iyoor eghuugh phọ.’ Kụ ọdi kịphagharanaan ni inyina mọ, ‘Mị úlegheri ekpisi lọ nyina ẹḍua kụ eru.’ 26Kụ nyina egbi ọḅem mọ, ‘Yoor ulian ni eḍien, ọḅile ọphugholan rꞌạna, kụ nạ ạtughemi sịphe ẹmha ayoor.’ 27#Ạsuo 6.8Kụ ọdi kạḅile ni ạḅem mọ, ‘Mị úlegheri ekpisi phọ nyina ẹḍua bọ kụ eru. Oomo anyina abuḍighinom ịkaraph phọ, ịḍuaghu sịen.’ 28#Mat 22.13; 25.30#Mat 8.11, 12Pọ eeghe emoghi rꞌaḍighirigha dị kịrolonaan inyina mem dị nyina ẹmiin mọ Ebraham rꞌẠizik rꞌạJekob, rꞌoomo ariil phọ Ẹnaan moḍigh ọmar phọ kꞌẸnaan, kụ miphorogh inyina omitiom erugh! 29Kụ awe kọḍua ni inya ạsiagaany aḅirini phọ otu olian eḍien ẹpe ọmar phọ kꞌẸnaan. 30#Mat 19.30; 20.16; Mạk 10.31Ịmiin, bụdi osugha ọman koḍighi bụḅel, kụ ạbuḅel phọ kosugha ni ọman.”
Ẹphomoghian dị ạJizos ạphomoghian Jeruselem
(Matiu 23.37-39)
31Egina phọ amem mọ ọpo phọ, buniin aFarisi phọ uru ni ọteeny Jịzos kụ ọḅeni nyọdi mọ, “Ḍụa sịen ạghi ẹnon ekpisi, ịdi eḍighi bọ ạHerod rạwa ni oghiigh ạna.”
32Kụ ọdi ạḅeni bịdi mọ, “Ịki ẹḅeni ẹekpa-ako phọ ọpo mọ mị raporogh yogh ghan ruru, ạḅile raakonom ghan weye rodon rꞌiḍue phọ kẹḅaal bọ. Aḍughul-otu dị kemuneniom ịraar kụ ẹdi mị kạmadan oḍighi phọ ạmi. 33Tọrobo ịlo ẹrol, mị kaḅetenu rodon kụ mị ạtol eten iḍue rꞌọman iḍue. Epel Jeruselem, ẹnon ekpisi dị ẹkpe ọrol kụ oghiigh oyil Ẹnaan ílho.”
34“Weye aJeruselem, weye aJeruselem, nyina mẹze riil phọ Ẹnaan etoḅol ikpo bụphe orom bọ kụ oru bọ ịteeny inyina. Ika ọodia amem kụ ẹdi mị mạwa bọ oghuraam anyina, ịdipho ạkenegh ramuphonom ghan bọ nmụny ọdi pạ araphaaph phọ ọdi, kụ nyina ímeera bọ. 35#Ạsuo 118.26Ade ẹmha phọ anyina keḍighi ọkpagha. Mị rịḅeni inyina mọ nyina ịmi kị́miin mun tụtu nyina ẹḅem mọ Ẹnaan ẹseph ni nyọpo aghol bọ ḍien Ọmoogh-we phọ kụ aru.”
လက္ရွိေရြးခ်ယ္ထားမွု
Luk 13: ẠḌI
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS