Luk 17
17
Ịkaraph
(Matiu 18.6-7, 21-22; Mạk 9.42)
1Kụ ạJizos ạḅeni bụmatuan phọ ọdi mọ, “Ạraraar dị reḍighi ghan mọ awe omeleghu oḍighanaan ọdegh ophogh kẹtol li, kụ pọ eeghe ọdo ịminimiin dị kẹtolonaan oye phọ ọpo ịphen phọ kẹtuan bọ esoor! 2Ẹkpe ghụn ni ọsighe ịluma ọghoroghiom orum ọdi osumeeny ọphiiny oghiigh epu dị ọdi kaakeleghi nyoniin sịphe ịbam ạnmuny phọ ạbuen mọ aḍighi ịkaraph. 3#Mat 18.15Igona ni loor anyina.
“Umor ạna aḍighi ịkaraph, ḅạam ni nyọdi. Kụ ọdi akiton, sạr ri ạwilenaan nyọdi. 4Mọ ọdi aḍighi nyịna ịkaraph oḍual amem ẹmhu aḍio, kụ aru ghan kụ ạḅeni nyịna mọ, ‘Mị makiton,’ pọ sạr ghan ni ạwilenaan nyọdi.”
Omeeraam
5Kụ abutelhedom mọ ọḅeni Ọmoogh-we phọ mọ, “Bụghe omeeraam mọ ayoor.”
6Kụ Ọmoogh-we phọ mọ, “Lọ nyina ẹmoogh ni omeeraam dị aghom ịdipho ekpo ạmustad, kụ ẹḅeni sịkamin-oreeny phọ ọphon mọ, ‘Tuphuronu sịen asuma ọphiiny kụ ạḅile ạmeera,’ pọ kịnaghanan ni inyina.”
Ooghiraan dị ẹbene kaaghiraan ghan
7“Oniin ọnyo anyina ạmoogh ẹbene dị rabul ghan esi iḅeph mụghumo rapogh ghan iyool-ịga, mem dị ọdi ạḍua ozo phọ arigheel, nạ rạḅeni ghan nyọdi mọ, ‘Gboogborion ạrol ude alhe eḍien,’ ḍụghum? 8Kị́dipho. Kpạripe ghụn ni, nạ rạḅeni ghan nyọdi mọ, ‘Nụun ạsa eḍien phọ ạmi, ạkparamian ukpe ạna, aru ạḅam eḍien phọ, ạmeera ukori ịmi tụtu mị malhe ạpughol, kụ agbi olhe ẹpe ạna.’ 9Ẹkpe ni ọseph ẹbene dị mạnaghanan ịpe ọḅeni bọ nyọdi ḍụghum? 10Ịduon kẹn kụ ẹdi idianaan ni inyina. Mem dị nyina meḍighi oomo phọ ịpe ịḅeni bọ inyina oḍighi phọ, ịḅem ghan mọ, ‘Yoor ạrebene dị ịyaar ụ́man. Yoor moḍighi ịpe isi bọ iyoor bịn.’”
ẠJizos aakonom ḍioph awe dị ẹzegh ọku ufe eḍighi yogh
11ẠJizos anyeene rạki Jeruselem, kụ ạghi asi ọku aSameria rꞌaGalili. 12Ạḍua rạki oḍigh eniin ẹbam ẹmha, kụ ḍioph awe dị ẹzegh ọku ufe eḍighi yogh ọmiin nyọdi. Kụ ụrol li kꞌegher 13ọlo mọ, “Jịzos, Ọtughemia, ụnma iyoor ighirigiir.”
14 #
Lịv 14.1-32
Kụ ạJizos ạmiin bịdi kụ ạḅeni mọ, “Ịki eḍeenaan loor anyina bụpinyon rịkia phọ.”
Kụ bịdi omoonogh ẹpe eten phọ. 15Kụ mem dị oniin ọnyo ạbidi ạmiin bọ mọ ọno maḍum mọ, aḅula ni aboom Ẹnaan rꞌeboom ẹḍogh, 16kụ aḅololo ude ruwol ạJizos ạseph ghan nyọdi. Oye phọ ọlo aSameria. 17Kụ ạJizos ạḅem mọ, “Mị aakonom bọ ḍioph awe, bụeri phọ esugha phọ odi ẹghen? 18Uḍighi ika kụ oniin ooruen phọ ọphon bịn kụ aḅula bọ raboom ghan Ẹnaan?” 19Kụ ạJizos ạḅeni oye phọ mọ, “Ḅetenu agheel. Omeeraam mọ ạna maakonom nyịna.”
Erumom ọmar phọ kꞌẸnaan
(Matiu 24.23-28, 37-41)
20Eniin aḍio buniin aFarisi phọ upuru ni Jịzos mem mọ ọmar phọ kꞌẸnaan katu bọ. Kụ ọdi ạphagharanaan mọ, “Ọmar phọ kꞌẸnaan kátu erumom dị kọmiin ekpeḍien. 21Kọ́ḅem mọ, ‘Pọono sịen,’ mụghumo, ‘Pọrono ẹpe,’ ịdi eḍighi bọ ọmar phọ kꞌẸnaan odi ni sịen ogbo phọ anyina.”
22Kụ ạJizos ạḅeni bụmatuan phọ mọ, “Amem ketu ni dị nyina kẹwa ni ịlo ọmiin rꞌaḍiniin aḍio sịphe asiḍughul-otu phọ Ọony phọ Oye kamite bọ egaan phọ, kụ nyina kẹ́miin. 23Awe dị kọḅem ghan mọ, ‘Ipogh ẹphen,’ ḅịle mọ, ‘Ipogh ẹpe,’ kọtol li. Kụ kẹ́ki ẹdaph bịdi. 24Ịdipho aḍio phọ rẹmephian ghan bọ kegborori ẹḅeeny okuaḍio phọ kụ ịdi kẹtol ḍio phọ ạḍiphe Ọony phọ Oye katu bọ. 25Kụ tụtu rẹteeny mem mọ ọpo, ọdi kạmiinom ni iboom, kụ awe oghiil phọ ọphon kokel li nyọdi. 26#Emi 6.5-8Kụ ịdipho ẹrol bọ mem mọ aNoa kụ ịdi kẹtol mem mọ Ọony phọ Oye katu bọ. 27#Emi 7.6-24Awe ule ghan ni eḍien ọphughologh, alephiri ạnmuny rꞌạnmariir ạalan yogh ghan ni ilom, tụtu ẹteeny bọ ọkaraghi aḍio phọ aNoa aḍigh bọ oghuugh phọ, kụ ạmuum-aḍigho phọ aru bọ aphiemi oomo phọ ạbidi. 28#Emi 18.20—19.25Ḅịle kẹn, kẹtol li ịdipho amem mọ ạLot. Awe ulheeghi ghan ni malhe ọphughologh, omuulogh siḍighi, oḅeph ghan iizo, ọloghoḍi ruutu. 29Kụ ḍio phọ ạḍiphe ạLot amite bọ Sọdom ạḍua, ạnian rꞌạsolfa iimor ri kꞌạke esoor ude elhe oomo phọ ạbidi ephiemi. 30Kẹtol ịduon ḍio phọ Ọony phọ Oye kamite bọ egaan phọ.
31 #
Mat 24.17, 18; Mạk 13.15, 16 “Oye lọ odi ạnyu otu ḍio phọ ạḍiphe kúsoor ookoroghian aruphua ọdi. Ḅịle kẹn, oye lọ odi ozo kúḅula ologhi otu. 32#Emi 19.26Ịitughian ghan ạnir phọ ạLot. 33#Mat 10.39; 16.25; Mạk 8.35; Luk 9.24; Jọn 12.25Oye lọ ạwa ọphel aghuḍum ọdi kapiemi ni, kụ oye lọ aphiemi ghuḍum mọ ọdi kạpel li. 34Mị rịḅeni ghan inyina mọ, ḍughul aḍio phọ ạḍiphe, ịyal awe lọ ọmina esi kọsighe ni nyoniin, ọbile nyọori phọ. 35Ịyal ạnmariir lọ odi rọgbe ghan ịbiakpa kọsighe ni nyoniin, ọbile nyọori phọ. [ 36Ịyal awe lọ odi oniin ozo roḍighi oḍighi kọsighe ni nyoniin, ọbile nyọori phọ.]”
37Kụ ạbumatuan phọ opuru nyọdi mọ, “Ọmoogh-we, ẹghen nụun?”
Kụ ạJizos mọ, “Tọrobo ekpisi lọ ịḅoria aruzu edi kụ ẹdi ạredelhe resoor ghan keekpomoghan.”
လက္ရွိေရြးခ်ယ္ထားမွု
Luk 17: ẠḌI
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS