यूहन्‍ना 14

प्रमात्मैं तक पुजणै रा रस्ता

1“तून्दा मन परेशान ना भोआ; प्रमात्मां पुर भरोसा रखा अतै मिन्जो पुर भी विस्वास रखा। 2मेरै पितै रै घरा मन्ज मती भारी रैहणी री जगह हा, अगर ना भूंदी ता अऊँ तूसु सोगी बली दिन्दा क्ओकि अऊँ तूसु तांयें जगह तैयार करना चलूरा हा। 3अतै अगर अऊँ गिच्ची करी तूसु तांयें जगह तैयार करदा, ता फिरी ईच्ची करी तुसिओ अपणै बलै लेई गाणा कि जैड़ी अऊँ ररेऊँ तैड़ी तुहै भी रैहन। 4जैहरा अऊँ चलूरा तुहै तैठिया रा रस्ता जाणदै हिन।”

5थोमा तैस थऊँ पुच्छणा लगु, “हे प्रभु, अहै ना जाणदै कि तू करा चलूरा; ता रस्ता किया पता भोला?”

6यीशुऐ बल्लू, “रस्ता अतै सच्चाई अतै जिन्दगी अऊँ ही हा; बिना मेरै कोई पितै बलै ना गिच्ची सकदा। 7अगर तुहै मिन्जो जाणदै ता, मेरै पितै जो भी जाणदै; अतै अबै तैसिओ जाणदै हिन, अतै तैसिओ हेरू भी हा।”

8फिलिप्पुस बलणा लगा, “हे प्रभु पिता जो असिओ दस्सी दे, ऐह ही असु तांयें बडा हा।”

9यीशुऐ तैस सोगी बल्लू, “हे फिलिप्पुस, अऊँ ऐतनै दिन थऊँ तूसु सोगी हा, अतै कै तू मिन्जो ना जाणदा? जिनी मिन्जो हेरूरा तिनी पिता जो हेरूरा। तू कजो बलदा कि पिता जो असिओ दस्स? 10कै तू विस्वास ना करदा कि अऊँ पिता हा अतै पिता मिन्जो मन्ज हा? ऐह गला जैड़ी अऊँ तिजो सितै करदा हा, अपणी तरफा थऊँ ना बलदा, पर पिता मिन्जो मन्ज रैहीकरी अपणै कम्मा करदा हा। 11मेरा विस्वास करा कि अऊँ पिता मन्ज हा अतै पिता मिन्जो मन्ज हा; ना ता चमत्कारा री वजह थऊँ ही मेरा विस्वास करा लेय्आ। 12अऊँ तूसु सोगी सच बलदा कि जैडा मिन्जो पुर विस्वास रखदा, ऐह कम जैडा अऊँ करदा तैस भी करनै, पर ऐत थऊँ भी बड़ै बड़ै कम करनै हिन, क्ओकि अऊँ पिता बलै चलूरा हा। 13जैडा कुछ तुहै मेरै नां सितै मंगलै, सो ही मुँ करना कि पुत्रा री वजह थऊँ पिता री महिमा भोआ। 14अगर तुहै मिन्जो थऊँ मेरै नां सितै कुछ मंगलै, ता मुँ सो करना।”

पवित्र आत्मा री सौगन्द

15“अगर तुहै मिन्जो सितै प्‍यार रखदै हिन, ता मेरै हूक्म मनणै हिन। 16मुँ पिता सोगी बिनती करनी हा, अतै तुसिओ अक्क होर साथी दिणा कि सदा सो तूसु सोगी रेय्आ। 17मतलब सच्चाई री आत्मा, जैसियो संसार ग्रहण ना करी सकदा, क्ओकि संसार ना तैसिओ हेरदा अतै ना तैसिओ जाणदा हा; तुहै तैसिओ जाणदै हिन, क्ओकि सो तूसु सोगी रैहन्दा हा, अतै सो तूसु मन्ज भूणा।”

18“मुँ तुसिओ अनाथ ना छड़णा; अऊँ तूसु बलै इन्दा हा 19होर थोड़ी देर रैई गई हा फिरी संसारा मिन्जो ना हेरना, पर तूसु मिन्जो हेरना; ठेरैतांये कि अऊँ जिन्दा हा, तूसु भी जिन्दै रैहणा। 20तैस दिन तुसिओ पता लगणा कि अऊँ अपणै पिता मन्ज हा, अतै तुहै मिन्जो मन्ज, अतै अऊँ तूसु मन्ज। 21जैड़ा मेरी आज्ञा जो जाणदा हा अतै सो तियां जो मन्दा हा, सो ही मिन्जो सोगी प्‍यार रखदा; अतै जैडा मिन्जो सोगी प्‍यार रखदा, तैस सोगी मेरै पितै प्‍यार रखणा, अतै मुँ तैस सोगी प्‍यार रखणा अतै अपणै आपा जो तैस पुर जाहिर करना।”

22तिनी यहूदै जैडा इस्करियोती ना थू, तैस सोगी बल्लू, “हे प्रभु, कै भूआ कि तू अपणै आपा जो असु पुर जाहिर करना चाहन्दा अतै संसारा पुर ना?”

23यीशुऐ तैसिओ जवाव दिता, “अगर कोई मिन्जो सोगी प्‍यार रखला ता सो मेरै बचना जो मनला, अतै मेरै पितै तैस सोगी प्‍यार रखणा, अतै असु तैस बलै ईणा अतै तैस सोगी रैहणा। 24जैडा मिन्जो सोगी प्‍यार ना रखदा, सो मेरै बचना जो ना मन्दा; अतै जैड़ै बचन तुहै हुणदै हिन सो मेरा ना पर पितै रा हा, जिनी मिन्जो भैजुरा हा।”

25“ऐह गल्ला मैंई तूसु सोगी रैई करी तूसु सितै करी हिन। 26पर साथी मतलब पवित्र आत्मा जैसियो पितै मेरै अधिकारा सितै भैजणा, तैस तुसिओ सब गल्ला सखाणी, अतै जैडा कुछ मैंई तूसु सोगी बल्लू हा, सो सब तुसिओ तैस याद दुआणी हा। 27अऊँ तुसिओ शान्ती दि चलूरा, अपणी शान्ती तुसिओ दिन्दा हा; जियां संसार दिन्दा, अऊँ तुसिओ ना दिन्दा तून्दा मन परेशान ना भोआ अतै ना ही डरा।”

28“तुहै हुणु कि मैंई तूसु सोगी बल्लू, ‘अऊँ चलू हा, अतै तूसु बलै फिरी ना ईणा।’ अगर तुहै मिन्जो सोगी प्‍यार रखदै, ता ऐसा गल्ला थऊँ खुश भुन्दै कि अऊँ पितै बलै चलूरा, क्ओकि पिता मिन्जो थऊँ बडा हा 29अतै मैंई अबै ईयां गल्ला रै भूणै थऊँ पैहलै तूसु सितै बली दिता, कि जैहणै ऐह भूच्ची गच्छा, ता तुहै मिन्जो पुर विस्वास करन। 30मुँ अबै तूसु सोगी होर गल्ला ना करनी, क्ओकि ऐस संसारा रा सरदार शैतान चली आ हा। मिन्जो पुर तसेरा कोई हक्क निय्आ। 31पर ऐह ठेरैतांये भूणा लगुरा कि संसारा जो पता लगी गच्छा कि अऊँ पितै सोगी प्‍यार रखदा, अतै जियें पितै मिन्जो हूक्म दितुरा अऊँ तियां ही करदा हा।”

“उठा ऐड़ी थऊँ चलन।”

လက္ရွိေရြးခ်ယ္ထားမွု

यूहन्‍ना 14: GBKNT

အေရာင္မွတ္ခ်က္

မၽွေဝရန္

ကူးယူ