Kisah Para Rasul 4
4
Petrus deng Yohanes babela dorang pe diri di Mahkama Agama
1Waktu Petrus deng Yohanes masi bicara pa orang banya itu, ada imam-imam, kapala penjaga Ruma Ibada Pusat, deng babarapa orang Yahudi laeng dari aliran Saduki#4:1: Aliran Saduki ini tara percaya orang yang so mati bisa hidup ulang. datang pa dorang di situ. 2Orang-orang itu mara skali pa Petrus deng Yohanes, barang dorang dua kase ajar pa orang banya, Yesus so hidup ulang, deng orang yang so mati pasti mo hidup ulang. 3Kong, orang banya itu tangka pa Petrus deng Yohanes, tapi dorang bolong dapa urus karna so malam, jadi dorang dua dapa tahang sampe beso pagi. 4Tapi orang-orang yang dengar Petrus deng Yohanes pe ajaran itu, banya yang jadi percaya pa Yesus. Laki-laki yang percaya waktu itu, dorang pe banya kira-kira lima ribu orang.#4:4: Lima ribu orang ini bolong tahitung parampuang deng ana-ana.
5Dia pe beso pagi, pemimpin-pemimpin agama Yahudi, tua-tua Yahudi deng guru-guru agama yang ahli lima kitab Musa, dorang samua bakumpul untuk urus perkara itu di Yerusalem. 6Imam basar Hanas me ada di situ, sama-sama deng Kayafas, Yohanes, Aleksander deng samua imam basar pe keluarga yang laeng. 7Kong dorang suru bawa pa Petrus deng Yohanes mangada pa dorang. Turus, dorang mulai tanya-tanya pa dong dua bagini, “Ngoni biking apa sampe orang lumpu itu bisa sembu? Sapa yang kase kuasa itu pa ngoni?”
8Di situ Roh Kudus kuasai pa Petrus, jadi dia jawab bagini, “Ee, agama Yahudi pe pemimpin-pemimpin deng tua-tua. 9Hari ini ngoni urus pa torang dua karna tong biking barang yang bae, kase sembu pa orang saki. Ngoni lagi mau tau, itu sapa pe kuasa sampe orang saki itu bisa sembu. 10Jadi, bapa-bapa deng samua orang Israel musti tau, orang itu bisa sembu deng badiri pa ngoni pe muka, itu karna Yesus Kristus orang Nazaret itu pe kuasa. Yesus itu yang ngoni so kase salib, tapi Tuhan Allah so kase hidup ulang pa Dia. 11#Mzm. 118:22 Di Kitab Suci so tatulis, Yesus itu,
‘Batu yang tukang-tukang bangunan so tara pake, batu itu so jadi batu fandasi yang paling penting.’
12Jadi, cuma Yesus saja yang bisa kase slamat pa manusia, karna di seluru dunia, cuma Dia saja yang Tuhan Allah pili untuk kase slamat pa manusia. Tara ada yang laeng.”
13Orang-orang yang urus Petrus deng Yohanes pe perkara itu jadi herang, karna dorang lia Petrus deng Yohanes barani skali bicara. Apalagi dorang tau dong dua itu orang biasa yang tara skola. Dari situ baru dorang kanal, dua orang itu yang jaga iko-iko pa Yesus. 14Tapi karna dorang dapa lia orang yang lumpu itu so sembu deng badiri pa dong dua pe sabla, jadi dong so tara bisa malawang apa-apa pa dong dua. 15Jadi, dorang suru dong Petrus kaluar dari tampa urus perkara itu. Abis itu, baru pemimpin-pemimpin Yahudi baku ator tentang masala itu. 16Dorang baku tanya bagini, “Torang musti biking apa pa dong dua? Barang, samua orang di Yerusalem so tau, mujizat yang luar biasa yang dorang dua biking itu, jadi torang tara bisa manyangkal. 17Bagini saja, lebe bae torang ancam pa dorang dua la jang dong kase ajar lagi tentang Yesus, supaya itu tara tasiar pa orang banya.”
18Pe abis baku ator, dorang pangge pa Petrus deng Yohanes maso ulang di tampa urus perkara. Kong di situ dorang larang pa dorang dua, supaya jang dong dua mangajar lagi pa orang-orang tentang Yesus.
19Tapi Petrus deng Yohanes bilang pa dorang, “Coba bapa-bapa pikir. Mana yang lebe butul pa Tuhan Allah pe muka: iko bapa-bapa pe parenta atau iko Tuhan Allah pe parenta? 20Barang, torang so lia deng dengar sandiri apa yang Yesus biking deng kase ajar, jadi mau tara mau torang musti kase tau samua itu pa orang-orang.”
21Pe dengar itu, pemimpin-pemimpin agama Yahudi itu larang lebe karas pa Petrus deng Yohanes. Tapi biar bagitu me, dorang kase bebas pa Petrus deng Yohanes, karna pemimpin-pemimpin itu tara tau mo hukum apa pa dong dua. Dorang me tako jang sampe orang banya itu mo mangamo, karna orang banya di situ puji pa Tuhan Allah gara-gara orang lumpu itu so jadi sembu. 22Dorang herang, barang orang lumpu itu menderita so ampa pulu taong lebe, kong nanti skarang ini baru dia sembu.
Orang-orang percaya berdoa la dorang barani kase tau Kabar Bae
23Bagitu dorang dua so dapa kase bebas, dong dua langsung pigi pa dong pe tamang-tamang. Kong di situ, dorang dua kase carita samua yang imam-imam kapala deng tua-tua Yahudi bilang pa dong dua. 24#Kel. 20:11; Neh. 9:6; Mzm. 146:6 Pe dengar bagitu, dorang samua di situ sama-sama berdoa pa Tuhan Allah. Dorang bilang, “Ya Tuhan, Tuhan yang biking langit, bumi, laut deng samua dia pe isi. 25#Mzm. 2:1-2 Dulu, Tuhan Allah pake Roh Kudus untuk bicara pa raja Daud, orang yang jaga biking apa yang Tuhan Allah suru. Tuhan Allah pe pasáng bagini:
‘Bikiapa kong orang-orang bukang Yahudi mara?
Deng bikiapa kong suku-suku bangsa itu biking rencana yang tarada dia pe guna?
26Raja-raja yang ada di dunia basiap-siap mo baku prang,
deng pemimpin-pemimpin dunia bakumpul supaya malawang pa Tuhan Allah deng pa Mesias, Raja yang Tuhan Allah janji mo kase slamat pa manusia.’
27 #
Mat. 27:1-2; Mrk. 15:1; Luk. 23:1, 7-11; Yoh. 18:28-29 Apa yang raja Daud bilang dulu itu, butul-butul so jadi skarang. Di kota ini, raja Herodes, gubernur Pontius Pilatus, orang-orang bangsa Israel deng orang-orang bangsa laeng yang bukang Yahudi, dorang samua itu so baku ator supaya malawang pa Yesus, Orang yang Tuhan Allah so pili, yang suci, deng yang jaga biking apa yang Tuhan Allah suru. 28Itu samua jadi karna Tuhan Allah so tentukan dari dulu, kong itu Tuhan Allah pe mau deng Tuhan Allah pe kuasa. 29Jadi skarang Tuhan, tolong lia dorang pe ancaman-ancaman itu, kong kase kuat pa torang, orang yang jaga biking apa yang Tuhan suru, supaya jang torang tako tapi torang tamba barani kase tau Tuhan pe Kabar Bae di mana-mana. 30Tuhan, kase pa torang kuasa la torang bole kase sembu pa orang-orang saki, biking mujizat-mujizat deng tanda-tanda yang laeng yang kase tunju Yesus pe kuasa sampe orang jadi herang. Yesus itu kudus deng yang jaga biking apa yang Tuhan Allah suru.”
31Pe abis berdoa, ruma yang dorang pake bakumpul itu tagoyang, kong Roh Kudus kuasai pa dorang samua. Abis itu, dorang pigi kase tau Tuhan Allah pe Kabar Bae tentang Yesus pa orang-orang deng barani.
Orang-orang percaya pe cara hidup
32 #
Kis. 2:44-45
Samua orang yang percaya pa Yesus, dorang hidup satu hati deng satu pikiran. Tarada satu orang yang bilang dia pe harta cuma untuk dia pe diri sandiri saja, tapi jadi samua orang punya. 33Kong, Yesus pe utusan-utusan yang orang sebut rasul-rasul, dorang dapa kuasa basar dari Tuhan Allah, sampe dorang barani kase tau pa orang-orang, Yesus so hidup ulang. Kong Tuhan Allah kase Dia pe bae pa dorang talebe-lebe. 34Dari dorang yang ada di situ, tara satu orang yang kekurangan apa-apa. Barang, orang-orang yang ada tana atau ruma, dorang jaga jual dorang pe tana atau ruma itu. Turus, dia pe doi itu, 35dorang bawa kong kase pa rasul-rasul itu. Turus, rasul-rasul kase bage-bage doi itu pa orang-orang iko dong pe perlu.
36Kong itu lagi yang Yusuf biking. Yusuf itu dari suku Lewi, lahir di pulo Siprus. (Rasul-rasul itu kase nama pa dia ‘Barnabas’, yang pe arti, ‘orang yang suka kase smangat pa orang laeng.’) 37Yusuf ini ada jual dia pe kobong, kong dia pe doi itu dia serakan pa rasul-rasul.
လက္ရွိေရြးခ်ယ္ထားမွု
Kisah Para Rasul 4: PB MMU
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Perjanjian Baru Bahasa Melayu Maluku Utara @ Lembaga Alkitab Indonesia 2020