Tobit 6
6
Itsiktesäñtel ixämbal Tobias yik'ot Rafael
1Tsa' majli jiñi Tobías yik'ot jiñi ángel, jiñi ts'i' tsa' kaji itsäkleñ majlel. Ti jiñbä k'iñ tsa' ixäñäyob majlel jiñto tsa' ik'a pañämil, che' jiñi tsa' jijliyob ya' ti' t'ejl ñoj ja' ik'aba' Tigris. 2Jiñi Tobías tsa' ju'bi majlel ya' ti ñoj ja' cha'añ mi' poke' iyok, mach yäxe iyoj ya' ti ja' tsa' sib' tijp'i tilel jiñi kolem chäy kolex ik'uxtäl iyok. Tobías k'am tsi' icha'le oñel. 3Ixku jiñi ángel tsi' su'be:
—Chuku jiñi chäy, mach yomik ma' to'o kol.
Jiñi Tobías tsäts tsi' chuku jiñi kolem chäy, tsi' tujk'a lok'el ti' pam lum. 4Jiñi ángel tsa' to icha' su'be:
—P'o'o jiñi chäy, lok'säbeñ jiñi ich'aj yik'ot ipusik'al yik'ot iyolmal yom ma' lote', kome añäch ik'ajñibal bajche' ts'ak. Ixku yom achokbeñ jiñi isoyta. Che'eñ.
5Jiñi ch'itoñ Tobías tsi' p'o'o jiñi chäy, tsa' ilok'säbe jiñi ich'aj yik'ot ipusik'al yik'ot iyolmal. Tsi' xut pojpo jiñi chäy yik'ot tsa' ik'uxu. Ixku jiñi ikolobal tsa' iyäk'e ats'am yik'ot tsa' iloto.
6Che' jiñi tsa' cha' kajiyob ti xämbal, jiñto tsa' k'otiyob ti läk'äl ya' ti tejklum Media.
7Jiñi Tobías tsa' kaji ik'ajtibeñ jiñi ángel:
—Kerañ Azarías, ¿Chuki ti ts'ak añ ya' ti' pusik'al yik'ot ti' yolmal yik'ot ya' ti' ch'aj jiñi chäy?—Che'eñ.
8Jiñi ángel tsi' jak'ä:
—Che' mi lak pulbeñ ipusik'al yik'ot iyolmal jiñi chäy ti' tojlel juñtikil wiñik yik'ot x-ixik chujkembä ti' p'ätälel xi'baj, bajche' ja'el joñtolbä ch'ujlel, jiñi ibu'ts'il mi' we'ts' lok'el chuki machbä uts'at yik'ot ma'añix mi' chäñ päs ibä jiñi xi'baj. 9Jiñi ich'aj chäy añ ik'äjñibal cha'añ mi lak boñe' ti' wut che' añ majki säktokañ iwut mi' yilañ pañämil, jasäl mi lak wujtañ ba' säktokañ, ts'äkäbil mi' kätäl.
10Che' tsa' ochiyob ya' ti Media yik'ot che' läk'älix añob ya' ti Ecbatana, 11jiñi Rafael tsi' pejka jiñi ch'itoñ Tobías, tsi' su'be:
—Kerañ Tobías, —che'eñ.
Jiñi Tobías tsi' jak'ä:
—Chuki awom,— che'eñ.
Jiñi ángel tsi' ijak'ä:
—Ti ili ak'älel mi kaj jijlel lojoñ ya' ti iyotot jiñi Ragüel, juñtikil api'älbä. Añ juñtikil iyixik'al ik'aba' Sara. 12Ma'añik yambä iyalobil, kojach jiñi xch'ok. Awilañ, jatet jach ipi'älob läk'älbä icha'añ, jiñ cha'añ añ ti' atojlel jiñi xch'ok cha'añ ma' añujpuñijel yik'ot. Tojäch cha'añ mi' yochel ti' atojlel ichu'bä añ jiñi itat.
»Sara jiñäch juñtikil xch'ok xuk'ulbä ipusik'al, che' ja'el añ ik'äjñibal yik'ot it'ojoljax jiñi xch'ok, ixku itat tojäch ja'el. 13Isujmäch cha'añ jatet mi' mejlel apäy wäle. Kerañ, ubiñ chuki mik su'beñet. Ti ili ak'älel mi kaj kpejkañ itat xch'ok cha'añ mi' yäk'eñet bajche' k'ajtibilix acha'añ. Che' muk'ix lak kajel ti cha' sujtel ti Ragües mi' kaj lak melbeñ ik'iñilel jiñi ñujpuñijel.
»Joñoñ mik ña'tañ cha'añ jiñi Ragüel mach mejlik cha'añ ma'añik mi yäk'eñet, che' ja'el mach mejlik iyäk'eñ jiñi yambä wiñik, añ me bäbäk'eñix mi' kaj itsänsäñtel, che'äch añ ti' xik'ojel Moisés. Jiñi yujil cha'añ añäch ti' atojlel cha'añ mi' apäybeñ iyixik'al ti awijñam. Che' jiñi, ubiñ chuki woli ksu'beñet, mi' kaj pejkañla ti ili ak'älel ti' kaj xch'ok cha'añ mi yäk' bajche' awijñam, che' wolix lak cha' sujtel ti Ragües, ya'i mi lak päye' majlel ti awotot.
14Tobías tsi' jak'be jiñi Rafael:
—Kerañ, tsa'ix kubi ti alol cha'añ ili xch'ok añix wäksujtelix tajbil icha'añ wiñik, yik'ot bajche' juñtikil xi'baj tsa' ilaj tsäñsa ti' wäktiklel ti jiñ jachbä ak'älel che' tsa' ñujpuñiyob, che' mu'to ikajel ipi'leñob ibä ti wäyel. 15Jiñ cha'añ mik bäk'ñañ jiñi xi'baj, kojach jiñi xch'ok ma'añik chuki mi' tumbeñ, tsikil bajche' k'ux mi yu'biñ, che' añ majki mi' läk'tesañ ibä ba'añ jiñi xch'ok ti jiñi jachbä k'iñ mi' tsänsäñtel. Awilañ, joñoñ jach iyalobiloñ ktat, mi tsa' chämiyoñ, jiñi ktat kña' mi' kajelob ti chämel ti' ch'ijiyemlel ipusik'al. Jiñob ma'añik yambä iyalobil mu'bä ikajel ti mukoñel. —Che'eñ.
16Jiñi ángel tsi' su'be:
—¿Tsa'ix laj ñajäyi acha'añ jiñi t'añ tsa'bä isu'beyet atat, cha'añ yom ma' päy jiñi awijñam lok'eñbä ti' p'olbal añojte'el? Kerañ, mik su'beñet cha'añ mach yomik ma' bäk'ñañ jiñi xi'baj, yom ma' päye' cha'añ awijñam jiñi xch'ok.
»Mik su'beñet cha'añ ti' ili jachbä ak'älel mi' kaj awäk'beñtel cha'añ awijñam. 17Che' mi' awochel majlel wäle ya' baki mi' kaj la' wäyel, ch'ämä jiñi ipusik'al chäy, t'ox tsepbeñ jiñi iyolmal, pulu ya' ti' pam jiñi ñich k'ajk' cha'añ xojokña. Mi' kajel ti pam pujkel majlel iyujts'il, che' mi' kajel isik' jiñi xi'baj mi' kaj ti puts'el lok'el majlel, ma'añix mi' kaj ichäñ tilel ti' t'ejl jiñi Sara.
18»Che' mi' kaj api'leñ la'bä, ñaxañ ch'ojyeñla, pejkañ Lak Ch'ujutat cha'añ mi' p'uñtañetla, che' jiñi mi' kaj ikoltañetla. Mach ma' cha'leñ bäk'eñ, jiñi Lak Ch'ujutat tsa'ix iwäñ yajkäbeyet cha'añ awijñam. Jatet mi' kaj akoltañ, mi' kaj imajlel awik'ot baki jach ma' majlel, che' ja'el mi kaj iyäk'eñet awalobil k'uxbibilbä mi' kajel ak'el. Mach amel apusik'al.
19Che' tsa'ix ilaj u'bi jiñi Tobías cha'añ iyalobiläch iyerañ, tsa' kaji imulañ jiñi Sara.
လက္ရွိေရြးခ်ယ္ထားမွု
Tobit 6: CholDc
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© Biblia Chol de estudio con DC- Derechos reservados por SBM