توریت شریف: پَیدایش 1
1
1شُروع وِچ اللّٰہ تعالیٰ زِیمی تے آسمان پَیدا کِیتا۔ 2اُس ویلَے زِیمی نی کوئی شکل نی سی، تے اے خالی سی۔ اے ڈُونگے پاݨِیئے نال پہری وی سی، جس نے اپر نیہرا ہی نیہرا سی۔ اللّٰہ تعالیٰ نا رُوح پاݨِیئے نے اپر ہوا نی طرح پھِرݨا رہݨا سی۔
3فِر اللّٰہ تعالیٰ آخیا، ”لو ہوئی جائے!“، تے لو پَیدا ہوئی گئی۔ 4اللّٰہ تعالیٰ تکیا کہ لو چنگی اے، تے فِر اُس لوئی کی نیہرے نالوں بکھ کری شوڑیا. 5اُس لوئی کی ”دیہاڑ“ آخیا، تے نیہرے کی ”رات“. شام ہوئی تے سویر ہوئی، اِس طرح پہلا دیہاڑا ہویا۔
6فِر اللّٰہ تعالیٰ آخیا، ”اَپرے نے پاݨِیئے کی تھلے نے پاݨِیئے تُوں بکھ کرنے واسطے فَضا بݨی جائے!“ 7اِسے طرح ہویا. اللّٰہ تعالیٰ فَضا بݨائی، جس نال اُس تھلے نا پاݨی اَپرے نے پاݨِیئے نالوں لادا کری شوڑیا۔ 8اللّٰہ تعالیٰ فَضا کی ”آسمان“ آخیا. شام ہوئی تے سویر ہوئی، اِس طرح دُوئا دیہاڑا ہویا۔
9فِر اللّٰہ تعالیٰ آخیا، ”آسمانے نے تھلے جہیڑا پاݨی اے، او اِک جغہ پر کھٹا ہوئی جائے، تے سُکی زمِیں نِکلی اَچھَے!“ فِر اِس طرح ہی ہویا۔ 10اللّٰہ تعالیٰ سُکی جغہ کی ”زمِیں“ آخیا، تَے جہیڑا پاݨی کھٹا ہویا سی، اُس کی ”سمندر“ آخیا۔ اللّٰہ تعالیٰ تکیا کہ اے چنگا اے.
11فِر اللّٰہ تعالیٰ آخیا، ”زِیمی ہر قسم نی ہریالی پیدا کرے! اِیئے جئے بُوٹے جِنہاں تُوں اِناج حاصل ہوئے، تے اِیئے جئے درخت جِنہاں نے پھلے وِچ بِیں ہووے۔“ فِر اِسے طرح ہی ہویا۔ 12زِیمی ہر قسم نی ہریالی پیدا کیتی، اِیئے جئے بُوٹے جِنہاں تُوں اِناج حاصل ہویا، تے اِیئے جئے درخت جِنہاں نالوں پھل حاصل ہویا. اللّٰہ تعالیٰ تکیا کہ اے چنگا اے. 13شام ہوئی تے سویر ہوئی، اِس طرح ترِیئا دیہاڑا ہویا۔
14فِر اللّٰہ تعالیٰ آخیا، ”آسمانے وِچ لو دیݨے آلیاں چِیزاں پَیدا ہوئی جاݨ! تانکہ دیہاڑ تے رات وِچ فرق کرݨ، تے موسم تے دیہاڑیاں تے سالاں نا پتہ دیݨ، 15تے او دُنیا پر لو کرݨ۔“ تَے فِر اِسے طرح ہی ہویا۔ 16اللّٰہ تعالیٰ دو بہُوں بڑیاں لو دیݨے آلیاں چِیزاں پَیدا کیتیاں: سورج، جیہڑا ساریاں تُوں بڑا سی، دیہاڑ پر حکومت کرنے واسطے، تے چن، جیہڑا اُس تُوں نِکا سی، رات پر حکومت کرنے واسطے۔ اُس تارے وی بݨائے۔ 17اللّٰہ تعالیٰ اُنہاں ساریاں کی آسمانے وِچ رخیا تانکہ دُنیا اپر لو کرݨ، 18دیہاڑ تے رات پر حکومت کرݨ، تے لوئی کی نیہرے نالوں بکھ کرݨ. اللّٰہ تعالیٰ تکیا کہ اے چنگا اے. 19شام ہوئی تے سویر ہوئی، اِس طرح چوتھا دیہاڑا ہویا۔
20فِر اللّٰہ تعالیٰ آخیا، ”پاݨی بہُوں جاندار چِیزاں نال پہریا جائے، تَے آسمانے وِچ پرندے اُڈرݨ!“ 21اِسے طرح اللّٰہ تعالیٰ بڑیاں مَچھیاں، پاݨِیئے وِچ رہݨے آلیاں ہر قسم نیاں چِیزاں، تے ہر قسم نے پرندے بݨائے. اللّٰہ تعالیٰ تکیا کہ اے چنگا اے. 22اُس اُنہاں کی برکت دِتی، تے سمندرے نیاں جانوراں کی آخیا، ”پھلو پھُولو تے تعداد وِچ بدھݨے جاؤ! سمندر تُساں نال پہرݨ جائے!“ اُس پرندیاں کی وی آخیا، ”تعداد وِچ بدھی جاؤ۔“ 23شام ہوئی تے سویر ہوئی، اِس طرح پنچواں دیہاڑا ہویا۔
24فِر اللّٰہ تعالیٰ آخیا، ”زِیمی پر ٹُرنے آلا ہر قسم نا جاندار پَیدا ہوئی جائے: مال ڈنگر، زِیمی پر رینگݨے آلے تے جنگلی جانور!“ تَے فِر اِسے طرح ہی ہویا۔ 25اللّٰہ تعالیٰ ہر قسم نے مال ڈنگر، رینگݨے آلے تے جنگلی جانور بݨائے۔ اللّٰہ تعالیٰ تکیا کہ اے چنگا اے.
26فِر اللّٰہ تعالیٰ آخیا، ”ہُݨ میں انسان کی بݨاں، جہیڑا مہاڑے اَر ہوسی. تے او مچھیاں پر، پرندیاں پر، مال ڈنگراں پر، جنگلی جانوراں پر، تے زِیمی پر سارے رینگݨے آلے جانداراں پر حکومت کرے۔“ 27اِس طرح اللّٰہ تعالیٰ انسان کی اپݨے اَر بݨایا. تے اُس اُنہاں کی مرد تے عورت بݨایا۔ 28اللّٰہ تعالیٰ اُنہاں کی برکت دیئی کے آخیا، ”پھلو پھُولو تے تعداد وِچ بدھݨے جاؤ! دُنیا تُساں نال پہرݨ جائے، تے تُساں اُس پر اختیار رکھو۔ مچھیاں پر، پرندیاں پر، تے زِیمی پر سارے رینگݨے آلے جانداراں پر حکومت کرو۔“
29اللّٰہ اُنہاں کی مزید آخیا، ”ہݨ میں تُساں کی کھاݨے واسطے دُنیا وِچ ہر قسم نے اِناج تے ہر قسم نے پھل دیݨا آں۔ 30اِسے طرح میں سارے جانوراں کی کھاݨے واسطے ہریالی دیݨا آں۔ جس وِچ وی جان اَے، او اے کھائی سکݨا، پاویں او جنگلی جانور، پرندہ یا زِیمی پر رینگݨے آلا جانور ہووے۔“ فِر اِس طرح ہی ہویا۔
31اللّٰہ تعالیٰ ہر اُس چِیزے کی تَکیا جہیڑی اُس بݨائی سی کہ اے بہُوں چَنگی اے. شام ہوئی تے سویر ہوئی، اِس طرح چھیوَاں دیہاڑا ہویا۔
လက္ရွိေရြးခ်ယ္ထားမွု
توریت شریف: پَیدایش 1: phr
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Text (c) 2021 Noor-e-Kashmir
Audio (p) 2021 Noor-e-Kashmir