LUKU 4

Yesu yɔ̃ogwanaa

(Mat 4:1-11; Maa 1:12-13)

1Yesu bò Yoda àtɛn su kũ Luda Ninio pɛkɛrɛna, akũ Nini pìi gɛ̀ɛ kãao gbárannan. 2Ibilisi a yɔ̃̀ à gwà gwe ari gɔrɔ bupla. Gɔrɔ kũ̀a adi pɔ́ke blero. Kũ gɔrɔ bupla pìi pàpa, nà tɛni a dɛ. 3Akũ Ibilisi pìnɛ: Tó Luda Nɛ́mɛ n ũ, ǹ pi gbɛ̀ dí li burodi ũ. 4Yesu wèa à pì: À kú Luda yãn ò pì:

Pɔ́blen bisãsiri dìgɔ̃ kúo adoro.

5Akũ Ibilisi gɛ̀ɛ kãao musu, akũ à andunia kpatanɔ mɔ̀nɛ pínki a zɛki gbɛ̀n gɔ̃̀nɔ 6à pì: Mani n gba abirenɔ iko pínki kũ a gakurio, zaakũ à kú ma ɔĩmɛ, gbɛ̃ kũ má yei mani kpáa. 7Tó n kutɛ ma arɛ dé, ani gɔ̃ n pɔ́ ũmɛ pínki. 8Yesu wèa à pì: Ò kɛ̃̀ ò pì, ǹ donyĩ kɛ Dikiri n Ludanɛ ǹgɔ̃ doi ado.

9Akũ Ibilisi gɛ̀ɛ kãao Yurusalɛmu, à a zɛ̀ Luda kpɛ́ mìsɔ̃ntɛa à pì: Tó Luda Nɛ́mɛ n ũ, ǹ ɔ gbarɛ n zĩdai la, 10zaakũ ò kɛ̃̀ Luda yãn ò pì:

Ani n yã o a malaikanɔnɛ ò n dãkpã.

11Ò pì dɔ:

Oni n sɛ́ ń ɔĩ, de ǹsun gɛ̃̀ sí gbɛ̀ɛaro yãi.

12Yesu wèa à pì: Ò pì, ǹsun Dikiri n Luda lɛ́ ǹ gwaro.

13Kũ Ibilisi Yesu yɔ̃̀ à gwà kũ yã pínkio à làka, akũ à a tòn ari zĩkea dɔ.

Yesu nana a zĩia Galili

(Mat 4:12-17; Maa 1:14-15)

14Yesu ɛ̀ra à tà Galili kũ Luda Nini gbãnao, akũ a tɔ́ dà bùsuu pìla pínki. 15Àdi yã dańnɛ ń aduakɛkpɛnɔ gũn, baadi pínki dì a sáabu kpá.

Nazɛradenɔ gina Yesui

(Mat 13:53-58; Maa 6:1-6)

16Akũ à gɛ̀ɛ Nazɛra, gu kũ à nɛ́ blèn. Kámmabogɔrɔ zĩ à gɛ̀ɛ aduakɛkpɛn lákũ àdi kɛ nà. À fùtɛ à zɛ̀ de à kyó kɛ, 17akũ ò annabi Isaya takada kpàa. Kũ à pòro, à bò gu kũ ò yã dí kɛ̃nwa ò pì:

18Dikiri Nini kúma,

à ma ditɛ mà baaru nna kpá takasidenɔnɛ,

à ma zĩ mà gɔ̃nzĩdanɛ kpàkpa kɛ

gbɛ̃ kũ ò ń zĩda vĩronɔnɛ,

mà wɛ́wɛ̃naa kpàkpa kɛ vĩ̀nanɔnɛ,

mà gbɛ̃ kũ ò yĩnanɔ poro,

19mà Dikiri gbɛ̃kɛkɛnnɛgɔrɔ kpàkpa kɛ.

20Akũ à takada pìi kòko à kpà kpanyĩriia, à vùtɛ. Gbɛ̃ kũ ò kú kpɛ́ gũnnɔ wɛ́ fĩa ń pínki. 21Akũ à nà yã'onnɛnaaa à pì: Luda yã dí pàpa gbãra lákũ átɛn ma nà. 22Yã mana kũ à da a lɛ́n bò ń sarɛ ń pínki, òtɛni a tɔ́ nna sí ò pì: Yusufu nɛ́n díroo?

23Akũ à pìńnɛ: Má dɔ̃ sãnsãn kũ áni yáasi dí zumɛnɛ. Tó mɔkɔ̃mmɛ likita ũ, ǹ n zĩda were. Áni omɛnɛ mà yã kũ a mà ma kɛ̀ zaa Kapɛnamu kɛ ma bɛ wɛ̃tɛ gũn la dɔ. 24Yãpuran matɛn oárɛ, annabii dìgɔ̃ bɛ̀ɛrɛ vĩ a bɛ wɛ̃tɛ gũnlo. 25Matɛn oárɛ yãpura, kũ ludambɛ zɛ́ tà Iliasu gɔrɔ, gyaanɔnɔn dasi. Legũ dí maro ari wɛ̃̀ aakɔ̃ kũ mɔ suddoo, akũ nà zɔ̃kɔ̃ɔ gɛ̃̀ Isarailanɔ bùsun pínki, 26ama Luda dí Iliasu zĩ ń gbɛ̃kearo, sé gyaanɔ kũ à kú Zarɛfa, Sidɔ̃ sarɛ. 27Annabi Ɛlisa gɔrɔ sɔ̃, Isarailanɔ bùsun kusunɔn dimmɛ, ama adi ń gbɛ̃ke werekɔ̃aro, sé Siria bùsu gbɛ̃ Naama.

28Kũ gbɛ̃ kũ ò kú aduakɛkpɛ gũnnɔ yã pìi mà, ń pɔ fɛ̃̀ manamana ń pínki. 29Akũ ò bò kũ Yesuo wɛ̃tɛ kpɛ, ò gɛ̀ɛ kãao sĩ̀sĩ kũ ń wɛ̃tɛ kátɛa mìsɔ̃ntɛa, de ò ɔ sɔ̃i à lɛ́tɛ à sín yãi. 30Akũ à bò ń tɛ́ à tà.

Yesu tãnade werekɔ̃ana Kapɛnamu

(Mat 8:14-17; Maa 1:21-39)

31Yesu tà Kapɛnamu, Galili bùsun, akũ àtɛn yã dańnɛ kámmabogɔrɔ zĩ. 32A yãdannɛnaa bò ń sarɛ, zaakũ a yã iko vĩ. 33Gɔ̃gbɛ̃ tãnade ke kú aduakɛkpɛn gwe, akũ à wiki gbãna lɛ̀ à pì: 34É'e! Bɔ́n ó vĩ kɔ̃ ɔĩii, Yesu Nazɛra? N su ǹ ó kakatɛn yá? Má dɔ̃ gbɛ̃ kũ ń de a ũ, mɔkɔ̃mmɛ Luda gbɛ̃ kũ à kú adona ũ. 35Akũ Yesu gì tãna pìinɛ à pì: Ǹ yĩtɛ! Ǹ go gɔ̃gbɛ̃ pìia. Akũ tãna pì gɔ̃gbɛ̃ pìi pã̀tɛ gbɛ̃nɔ tɛ́, à gòa, adi a kĩnnaro. 36Gbɛ̃nɔ bídi kɛ̀ ń pínki, òtɛn kɔ̃ lala: Bɔ́ taka buri yãn gwee? Àdi yã ditɛ tãnanɔnɛ kũ iko gbãnao, akũ òdi goḿma. 37Akũ a tɔ́ dà bùsuu pìla pínki.

Gyãrenɔ werekɔ̃ana dasidasi

(Mat 8:14-17; Maa 1:29-34)

38Kũ à bò aduakɛkpɛn, akũ à tà Simɔ bɛa. Simɔ nanɔ da tɛn mɛ̀wãna kɛ manamana, akũ ò a yã ònɛ. 39Yesu zɛ̀ala à gì mɛ̀wãna pìinɛ, akũ a mɛ̀ɛ kɛ̀ sã̀na. Zaa gwe gɔ̃̀nɔ à fùtɛ à pɔ́ble kɛ̀ńnɛ.

40Kũ ifãntɛ̃ gɛ̃̀ kpɛ́n, gbɛ̃ kũ ò gyãre vĩnɔ sù kũńwo Yesunɛ, akũ à ɔ nàna ń baadia, à ń werekɔ̃a kũ ń gyã buri sĩnda pínkio. 41Tãnanɔ sɔ̃ òtɛn bo gbɛ̃nɔ gũn kũ wikio dasi ò pì: Mɔkɔ̃mmɛ Luda Nɛ́ ũ. Ama àdi gíńnɛ ò yã o, kũ ò a dɔ̃̀ Arumasihu ũ yãi.

Yesu waazikɛna Galili

(Maa 1:35-39)

42Gukɛ̃kɔ̃ana Yesu bò wɛ̃tɛ gũn, à gɛ̀ɛ gusarɛ, akũ gbɛ̃nɔ tɛni a wɛtɛ. Kũ ò bòa, ò ye à ń tóro. 43Akũ à pìńnɛ: Sé mà kpata kũ à bò Luda kĩnaa baaru kpá wɛ̃tɛ kparanɔnɛ dɔ, zaakũ abire yãin Luda ma zĩ. 44Akũ à gɛ̀ɛ àtɛn waazi kɛ Yudea bùsu aduakɛkpɛnɔ gũn.

လက္ရွိေရြးခ်ယ္ထားမွု

LUKU 4: BB2005

အေရာင္မွတ္ခ်က္

မၽွေဝရန္

ကူးယူ

မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ

Bisã Bible © SIM International, 2005.

Bisã Bible 2005 အေၾကာင္းကို ပို၍ သင္ယူပါ။