Génesis 1
1
Nukën ꞌIbu Diosan kamabi ñu unio bana
1Uniotabakin ka Nukën ꞌIbu Diosan uniokëxa, naíkamë ꞌëo ꞌimainun me. 2Me uniokëxbi mëníokëmapan ꞌain ka kamabi parúmpapa manámi bëánbëankibukë ꞌiakëxa. Usa ꞌain ka Nukën ꞌIbu Diosan bëru ñunshin baka manámiax shaíkibëkiankëxa.
3Usa ꞌain ka Nukën ꞌIbu Dios kiakëxa: Ka pë́kiti ꞌikën. Kiaxa kikëbë ka pë́kiakëxa. 4Usai kikëbëa pë́kia ka Nukën ꞌIbu Diosan pë́kikë a upí isakëxa, upí iskin ka bëánkibukë axa amo ꞌimainun axa pë́kikë aribi amo ꞌimiakëxa, 5usai ꞌia ka pë́kikë a nëtë kakin anëakëxa, anëanan ka bëánkibukë a imë́ kakin anëakëxa, usakin ꞌakëbë bëánkionxa pë́karakë ax ka achúshi nëtë ꞌiakëxa.
6Usakin ꞌatankëx ka Nukën ꞌIbu Dios kiakëxa: Ka achúshi xabá chaiiracha an ꞌumpaxkama ënananmiti ꞌiti ꞌikën.
Kikëbëshi ka usai ꞌiakëxa. 7Usa ꞌain ka Diosan achúshi xabá chaiira an bakakama bëarati ꞌakëxa: ꞌakëx ka xabá chaiira meu panaitsi tikimainun panaitsi axribi manámi bërúakëxa. 8Xabá chaiira a ka naí kakin anëakëxa. Usakin ꞌakë ꞌain ka bëánkionxa pë́karakë ax rabë́ nëtë ꞌiakëxa.
9Usa ꞌain ka Nukën ꞌIbu Dios kiakëxa: Naí meu ꞌikë baka ax ka anubia rakátinu timë́ti ꞌikën, me ëski mëratanun.
Kikëbë ka usai ꞌiakëxa. 10Axa ëskikë a ka Nukën ꞌIbu Diosan me kakin anëakëxa, anëanan ka axa timë́ax ꞌianëmë ꞌëosa ꞌaish rakákë a parúmpapa kakin anëakëxa.
Usai ꞌiá ka kamabi Nukën ꞌIbu Diosan upí ꞌikë isakëxa, 11isi ka kiakëxa: Me mëuküax ka bëtsi bëtsi chuku kóti ꞌikën: axa ënxëñu ꞌiti ꞌimainun ikama axa bimiñu ꞌi tuati akamax.
Kikëbë ka usai ꞌiakëxa. 12Usa ꞌain ka menuax bëtsi bëtsi xubi ꞌiruakëxa: ꞌirui ka xubikama axa ënxëñu ꞌiti ꞌimainun ikama axa bimiñu ꞌi tuati akama. Usai ꞌiá ka kamabi Nukën ꞌIbu Diosan upí isakëxa. 13Usakin ꞌakë ꞌain bë́ankionx pë́karatëkënkë ax ka rabë́ ꞌimainun achúshi nëtë ꞌiakëxa.
14-15Usa ꞌain ka Nukën ꞌIbu Dios kiakëxa: Naí xabá chaiira kuman batsisa anu ka an me pë́katikama ꞌiti ꞌikën, an imë́ ꞌikëbi xabá ꞌinun nëtë ꞌimikë, ax ka anun nëtëkama ꞌunánti ꞌianan, baritiakama ꞌunánan uisa nëtëkama kara ꞌia kixun ꞌunánti ꞌikën.
Kikëbë ka usai ꞌiakëxa. 16Nukën ꞌIbu Diosan ka an pë́kati rabë́ ꞌakëxa: ꞌakin ka chaiira an nëtën pë́kati ꞌanan an imë́ pë́kati chukúma ꞌakëxa. ꞌAnan ka an imë́ pë́kati okin ꞌispakamaribi ꞌakëxa. 17Nukën ꞌIbu Diosan ka naí xabáchaiira kuman batsisa anu an me pë́katikama ꞌakëxa, 18an nëtën ꞌimainun imë́ pë́kati a ka nëtë xabábëa imë́ biranantima okin ꞌakëxa, usa ꞌain ka akamabi Nukën ꞌIbu Diosan upí isakëxa. 19Usakin ꞌakë ꞌain bë́ankionx pë́karatëkënkë ax ka, rabë́ ꞌimainun rabë́ nëtë ꞌiakëxa.
20Usakin ꞌatankëx ka Nukën ꞌIbu Dios kiakëxa: Baka ꞌukëmëu ka bëtsi bëtsi ñuina ꞌaisamaira ꞌuakamë ꞌëoti ꞌikën, ꞌimainun ka me manánmi nuanti pëchiñu ñuinakama uniti ꞌikën.
Kikëbë ka usai ꞌiakëxa. 21Nukën ꞌIbu Diosan ka parúmpapanu ꞌiti ñuina chaiirabukama uniokëxa, ꞌimainun ka baka ꞌukëmëuküax kaiti ꞌanubi ꞌiti ꞌanan ka ñuina pëchiñukamaribi ꞌakëxa. Usakin ꞌatankëxun ka Nukën ꞌIbu Diosan upí isakëxa, 22usakin ꞌakëxa upí ꞌikë iskin ka Diosan an ꞌakë ñukama upíokin sinánxunkin kakëxa: Parúmpapanu ꞌikë ñuinakama tuapati ka ꞌuakamë ꞌëoi ka kait, ñuina pëchiñukamaribi ka tuapati ꞌitsaira menu ꞌiti ꞌikën.
23Usakin ꞌakë ꞌain bë́ankionx pë́karatëkënkë ax ka mapai achúshi nëtë ꞌiakëxa.
24Usa ꞌain ka Nukën ꞌIbu Dios kiakëxa: Menu ka bëtsi bëtsi ñuina kaiti ꞌikën: a rabukuti ꞌimainun ka a piti ñuinakama ꞌimainun a pitima raëkëma ñuinakama, ꞌimainun men niríkë ñuinakamaribi.
Kikëbë ka usai ꞌiakëxa.
25Nukën ꞌIbu Diosan ka ënë ñuinakama uniotankëx kamabi upí ꞌikë isakëxa.
26Usa ꞌain ka kamabi ñu ꞌatankëx Nukën ꞌIbu Dios ësai kiakëxa: Bërí kananuna nu iskësabi ꞌitánun uni unioti ꞌain. Ax ka bakanu ꞌikë ñuinakama ꞌimainun pëchiñu ñuina ꞌimainun a piti pitima ñuinakama ꞌianan, ñuina raëkëma ꞌimainun men niríkë ñuinakamax ka an bërúankë ꞌiti ꞌikën.
27Usa ꞌain ka uni uniokin Nukën ꞌIbu Diosan asábi ꞌitánun nukëbënë ꞌimainun xanu uniokëxa,
28Uniotankëxun ka upíokin sinánxunkin kakëxa: Bakë bëchipati kamina mekama tsitsirui ꞌuákamë ꞌëoti ꞌain; baka mëu ꞌikë ñuinakama ꞌimainun manan nuánkë pëchiñu ñuinakama, ꞌimainun axa men niríkë ñuinakama aín ꞌibu kamina ꞌiti ꞌain.
29Usokin pain a ñukama ꞌatankëxun ka Nukën ꞌIbu Diosan kakëxa: Ka is mitsu kana menu kookë ikama ax tuáñu ikama ꞌimainun, ꞌain bimi pitima akamabi ꞌinanin. Akamax ka mitsun piti ꞌiti ꞌikën.
30ꞌAínbi kana ñuinakama axa men nikë ꞌimainun manan ꞌikë pëchiñu ñuinakama ꞌimainun men niríkë ñuina akamabi kana menuax ꞌirukë in bimikama pinun ꞌinanin.
Kikëbë ka usai ꞌiakëxa, 31usokin ꞌaxun ka Nukën ꞌIbu Diosan an uniokë ñukama upíira upí ꞌikë isakëxa. Usaxa bë́ankionx pë́karatëkënkë ax ka mapai ꞌimainun achúshi nëtë ꞌiakëxa.
လက္ရွိေရြးခ်ယ္ထားမွု
Génesis 1: cbrPB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 1978, 1995, 2008, 2022 Wycliffe Bible Translators, Inc. All rights reserved.