Génesis 17

Nukën ꞌIbu Diosan abë mëníonanti sinánxun Abram ꞌunántiorakanun kixun ká

1Usa ꞌain ka Abram axa noventa ꞌimainun nueve baritiañu ꞌikë, Nukën ꞌIbun amiribishi ami mëratëkënkin ësokin kakëxa:

—ꞌËx kana min ꞌIbu Dios kamabi kushiñuira a ꞌain, usa ꞌain kamina ꞌëx kuëënkësabi ꞌoíshi tsóanan ꞌëx kikësabiokin kamabi ñu ꞌati ꞌain, 2ꞌimainun kana ꞌën achúshi ñu mibëtan ꞌati ꞌain: ꞌanan kana ꞌën min rëbúnkinëxa ꞌaisamaira ꞌi ꞌuákamë ꞌëonun ꞌimiti ꞌain, kixun ka Nukën ꞌIbu Diosan kakëxa. 3Usakian Nukën ꞌIbu Diosan kakëx ka Abram rantin puruni aín bëmánanën me tikai tsóbuakëxa usai ꞌiaka kakëxa:

4—Ënë ñu kana mibëtan ꞌain kamina kuati ꞌain: Mix kamina ꞌaisamaira bëtsi bëtsi ëmanu ꞌikë unikaman rara ꞌinuxun ꞌain, 5ꞌimainun kamina bërí Abram kakin anëkë ꞌitima ꞌain. Usa ꞌain ka min anë bërí ꞌia Abraham, ꞌën kana mi bëtsi bëtsi ëmanu ꞌikë unikaman rara ꞌiminuxun ꞌain. 6ꞌËn kana min rëbúnkinëxa ꞌaisamaira ꞌinun ꞌiminuxun ꞌain; min rëbúnki raírinëx ka ꞌapu bëtsi bëtsi ëmanu ꞌinuxun ꞌaia. 7ꞌËn kana achúshi ñu mibëtan ꞌain ꞌimainun kana min rëbúnki kamabëtanribi ꞌanuxun ꞌain, usa ꞌain kana ꞌëx min Dios xënibua ꞌaínbi ꞌiti ꞌain, ꞌianan kana atun Diosribi ꞌinuxun ꞌain. 8Mi ꞌimainun min rëbúnkikama kana kamabi Canaán me anumi bërí tsókë ënë ꞌinánti ꞌain, ax ka min rëbúnki kamaxa xënibua ꞌaínbi anu tsóti ꞌikë ꞌimainun kana ꞌëx atun Dios ꞌiti ꞌain.

9Katankëxun ka ësokinribi, Nukën ꞌIbu Diosan Abraham kakëxa:

—ꞌAínbi kamina min, achúshi ñu ꞌën mibëtan ꞌakë ax kikësabiokin ꞌati ꞌain, ꞌimainun ka kamabi min rëbúnki kamanribi ax kikësaibi ꞌiti ꞌikën. 10Ënëx ka mitsubëtan ꞌën ꞌakë achúshi ñu ꞌikën, usa ꞌain ka min rëbúnki kamanribi ꞌëx kikësokinbi ꞌati ꞌikën: usa ꞌain ka kamabi unikama mitsubë ꞌikë atux aín nëtokë ñu rëbu tëai ꞌunantiorakakë ꞌiti ꞌikën. 11ꞌUnántiorakakin kamina aín nëtokë ñu rëbu aín maxaka ꞌikë a tëati ꞌain, ënëx ka ꞌën mibëtan ꞌakë achúshi ñu a ꞌunánti ꞌikën, ësokin ꞌakin kamina ꞌunánti ꞌain nun kananuna achúshi ñu ꞌa kixun. 12Bërími ësokin ꞌakë ënuxun, kamina kamabi uni mix abë ꞌikë unikaman bëchikënëxa bëbu tuá bakënia mapai achúshi ꞌimainun rabë́ ꞌimainun achúshi nëtë ꞌikëbëtan aín nëtokë ñu rëbu ain maxaka tëati ꞌain, min ñu mëëxunkë uni ꞌimainun min kuríkinënbimi bëtsi menua marukë bëtsi unibi ka aín nëtokë ñu rëbu tëakë ꞌiti ꞌikën. 13ꞌËx kikësabiokin kamina ꞌunánti okin bëtsi ꞌakësa ꞌakësaribi okin aín nëtokë ñu maxaka ꞌën mi kakësabiokin ꞌati ꞌain. Usakinmi ꞌën mibëtan ꞌakë achúshi ñu ax ka mitsun naminu ꞌunántiokë ꞌiti ꞌikën, usa ꞌain ka mitsun ꞌëbëtan achúshi ñu ꞌakë ax këñútimoi ꞌiti ꞌikën. 14ꞌAínbi ka uix kara ꞌunántiorakaisama tania ax mitsunua chikínkë ꞌiti ꞌikën, ꞌën achúshi ñu ꞌakë a bana kikësokin ꞌaisama tankë kupí.

15Usakin katankëxun ka Nukën ꞌIbu Diosan ësokinribi Abraham kakëxa:

—Bërí ka min xanu ax Sarai kakin anëkë ꞌitima ꞌikën. Aín anë ka bërí Sara kakin anëkë ꞌiti ꞌikën. 16ꞌËn kana upíokin sinánxunin, usa ꞌain kana achúshi tuá mi ꞌaxúnun ꞌimiti ꞌain. ꞌËn upíokin sinánxunkëx ka kamabi menu ꞌikë unikama aín rëbúnki ꞌiti ꞌikën. ꞌImainun ka aín rëbúnkinëx kamabi menu ꞌikë unikaman ꞌapu ꞌinuxun ꞌaia, kixun ka Nukën ꞌIbu Diosan kakëxa.

17Usakian Nukën ꞌIbu Diosan kakëx ka Abraham rantipuruni memi bëtiki tsóbuti, ësokin sinani kuaiakëxa: ¿Achúshi unin kara cien baritiañu ꞌixun bëchiti ꞌik? ¿ꞌImainun kara Saran noventa baritiañu ꞌixun achúshi tuá ꞌati ꞌik? Ësakin ka Abrahamnën sinánkëxa. 18Usakin sinánkin ka Nukën ꞌIbu Dios kakëxa:

—¡Usa ꞌain sapi ka, Ismaelnën rëbúnkikama atux upitax tsóti ꞌikën!

19Kakëxun ka Nukën ꞌIbu Diosan kakëxa:

—ꞌËn mi kakë ax ka ësakin mi kakë ꞌiaxa min xanu Sara ax ka achúshi bëbu tuá bakënti ꞌikën, bakënia kamina min a tuá Isaac kakin anëti ꞌain. Abëtan kana ꞌën achúshi ñu asérabi ꞌati ꞌain, ax ka xënibua ꞌaínbia sinánun aín rëbúnki kamabëtan ꞌakë ꞌiti ꞌikën. 20Ësokin katankëxun ka aín bëchikë Ismael ñuikinribi ësakin kakëxa, ꞌën kana min bana kuan, usa ꞌain kana upíokin sinánxunuxun ꞌain; ꞌimainun kana ꞌaisamaira aín bëchikë ꞌinun ꞌimiti ꞌain usa ꞌain ka aín rëbúnkinëx ꞌuakamë ꞌëoti ꞌikën. ꞌImainun ka Ismael ax mapai rabë́ ꞌimainun rabë́ ꞌapukaman kushiira aín papa ꞌiti ꞌikën, ꞌimainun kana an achúshi ëma chaiira cha ꞌanun ꞌamiti ꞌain. 21ꞌAínbi ka ꞌën achúshi ñu mibëtan ꞌakë ax min bëchikë Isaac min xanu Sara ënuax achúshi baritia ꞌikëbë anun ꞌiti nëtë ꞌikëbë bakënkëbë ꞌën ꞌakë ñu ax anubi ꞌiti ꞌikën. 22Usai abë banatankëxun Abraham ëbiani ka Nukën ꞌIbu Dios anuax kuankëxa.

23Usai Nukën ꞌIbu Dios abë banatankëx sënë́nkiani kuankë ꞌain ka a nëtënbi Abrahamnën aín bëchikë Ismael, aín nëtokë ñu maxaka tëakin ꞌunántiokëxa, ꞌanan ka kamabi unikama an ñu mëëxunkë aín xubunuaxa bakënkë akama ꞌimainun aín kuríkinënbia marukë. Unikama aribi unántiokin aín nëtokë ñu rëbu tëaxuankëxa. Usakin ꞌakin ka kamabi uni abëa ꞌikë atun xubunu ꞌixuan an ñu mëëxunkë akamaribi aín nëtokë ñu maxaka tëaxunkin ꞌunántiokëxa, Nukën ꞌIbu Diosan usakin ꞌanun kakësabiokin ka ꞌakëxa. 24-25A nëtëkaman usokin ꞌai ka Abraham ax noventa ꞌimainun nueve baritiañu ꞌiakëxa, ꞌimainun ka aín bëchikë Ismael ax bërí kani trece baritiañu ꞌiakëxa, a nëtën ka aín nëtokë ñu maxaka ꞌunántiokin tëakë ꞌiakëxa. 26A nëtënbika Abraham ꞌimainun aín bëchikë Ismaelnëx usai ꞌitia kakë, usaibi ꞌiakëxa usa ꞌaish ka a nëtënbi aín nëtokë ñu maxaka tëai ꞌunántiorakakëxa, 27usai ꞌikin ka Abrahamnën kamabi unikama abë ꞌikë ꞌimainun aín xubunuxua an ñu mëëxunkë unikama a këñun aín xubunuaxa bakënkë ꞌimainun bëtsi menua aín kuríkinënbia marukë akamabi ꞌakëxa.

လက္ရွိေရြးခ်ယ္ထားမွု

Génesis 17: cbrPB

အေရာင္မွတ္ခ်က္

မၽွေဝရန္

ကူးယူ