Génesis 19
19
Nukën ꞌIbun Sodoma ꞌimainun Gomorra ëma këñua bana
1Bari kuabúkëbë ka Sodoma kakë ëmanu ángel rabë́ bëbakëxa. Anu bëbakiania kuania ka Lotnën anun ëmanu atsínti xëkuënu tanti tsóxun isakëxa, ax ka anua uni timë́kë ꞌiakëxa. Anu tsótanbia aia ka iskin nirukiani kuanxun ka biakëxa, bitsi aín bëmánanën memi bëtikikin, 2ka kakëxa:
—ꞌËn kana mitsu kain, pëkarakëbë kuanux karamina ꞌën xubunu tanti kuantima ꞌain. Anu kamina tachukatankëx tantiti ꞌain, anuax kamina pëkarakëma ꞌaínshi kuanti ꞌain.
ꞌAínbi ka atun kakëxa:
—Asabi ka ꞌaíshbi kananuna ꞌima. Xubu ëman ënushi kananuna nu rabë́ ꞌuxti ꞌain. 3Kixun kakëxunbi ka, Lotnën amiribishi katëkëankëxa usama ka kamina kuantima ꞌain usakian ꞌuran kakëxun ka a rabëtan aín xubunu abë kuanti sinánkëxa. Usakin kabiani kuantankëx aín xubunu nukuxun ka Lotnën piti ꞌitsa ꞌanan pánribi anun chamiti ñu këñuma ꞌaxun a isia kuankë unikama a pikiankëxa.
4Ax ꞌuxkëmapan ꞌaínbi ka a ëmanu ꞌikë unikaman kamabi Sodomanu ꞌikë unikaman aín xubu bëararakë ꞌiakëxa, anu ka uni apan ꞌimainun bëná unikamaribi ꞌiakëxa, 5usai ꞌikin ka munuma sharati kushin banakin Lot kakëxa:
—¿Uinu kara mibëa ënë ñantan min xubunu ukë uni rabë́ ax ꞌik? ¡Kamina chikínti ꞌain! ¡Atubë kananuna ꞌisatanin ënë imë́ kamina nu bëxúnti ꞌain! 6Usai sharati kikëbë ka Lot atu kai chikíkin, ka aín xubu xëputi xëpúakëxa, anun uni atsintisama okin, 7usokin xëpukin ka atu kakëxa:
—ꞌË ꞌurama ꞌikë unikaman ñu ꞌatimairamina ꞌakani kamina bërúankakanti ꞌain. 8Ka kuakan ꞌëx kana bëchikë xanu rabëñu ꞌain ax ka unibë ꞌikintankëma ꞌikën; usa ꞌain kana a rabë́ mitsun kuëënkësokinmi ꞌanun mitsu ꞌinánti ꞌain, ꞌaínbi kamina uni rabë́ ënë uisabi okantima ꞌain, atux ka ꞌën kuënkëx uaxa usa ꞌain. 9Ësokian kakëxunbi ka unikaman kakëxa:
—¡Mix amo nirakëanan kamina min xubunu nu atsímiti ꞌain! Mix ënu ꞌikë uni ꞌixun kaina min kuëënkësokin nu ꞌati ꞌain. ¡Bërí kananuna a unikama ꞌakima mi ꞌatima oti ꞌain! Usakin kakinshi ka Lot xutunkin aín xëpútinubi rakankin ñatankankëxa, 10usakian ꞌakananiabi ka ángel rabë́ a isia kuankë an aín mëkën mëshpakianxun bikin aín xubunu atsímiakëxa; usakin ꞌakinshi ka aín xubu xëpúti upíokin xëpúakëxa, 11xëpukinshi ka ángelnën. Ëman bukukë unikama bëxuñu ꞌimiakëxa. Kamabi uni bënábukama ꞌimainun uni apankama axbi ka bëxuñu tikiakëxa. Usai ꞌikin anun atsínti xëputi barikasmatankëx ka atux rikiankëxa. 12Usokin ꞌatankëxun ka a isia kuankë uni rabë́ an Lot kakëxa:
—¿Min aintsi ꞌibukama kara ënë ëmanu ꞌaíma ꞌik? Kamina biti ꞌain min bëchikë bëbu, ꞌimainun xanu min piaka min bëchikë an binuxun katakë uni akama kamina ënë ëmanua chikínbiankin ꞌura buánti ꞌain, 13kixun katankëxun ka ángel rabëtan Lot ësokinribi kakëxa. Nun kananuna ënë ëma añu kara anu axa akama këñunbi këñui uan, usakin ꞌanun ka nu Nukën ꞌIbun xuaxa ꞌaisamaira unix ka uisa kupín kara ënë ëma Nukën ꞌIbun ñu ꞌatima ꞌaia iskinbi këñuima kiax kia, usa ꞌain kananuna nun bërí ënë ëma këñuin.
14Usakian kakëx ka Lotnën aín bëchikë binuxun kakë aín piaka ꞌiti uni rabë́ barikuankëxa, kuanxun mërakin ka aín piaka ꞌiti uni a kakëxa:
—¡Bënëti nirukiani ka kuantan Nukën ꞌIbun ka ënë ëma këñuti ꞌikën!
ꞌAínbi ka aín piaka ꞌiti unikaman këmëkin isa Lotnën kaia kixun sinani kuanma ꞌikën. 15Usai ꞌión pëkarakuatsínkëbëtan, ka ángel rabëtan Lot katëkëankëxa:
—¡Bënëti kamina! Nirukiani min xanu ꞌimainun min bëchikë xanu rabë́ akama bibiani ënë ëma këñúkëma ꞌainshi bamatisama tani kuanti ꞌain. 16Ësokin kakëxbia bënëti kuaniama ka nuibakin ángel rabëtan Lot, mëinkin biakëxa. Nukën ꞌIbun ka ꞌain xanu ꞌimainun aín bëchikë xanu rabë́ aribi a ëmanua bamatima kupin ië́mikin chikíankëxa.
17A ëmanua chikinbiaxun ka ángel achúshinën Lot kakëxa:
—¡Bënëti kamina abákiani kuanti ꞌain ië́tisatani! Kuankin kamina kaxú bësukin añu ñubi isima kuanti ꞌain, usai ꞌikamina nirakëtima kuanshiti ꞌain. Kuanshiti kamina matá mekama anu ië́tisa tani kuanti ꞌain. 18ꞌAínbi ka ësokin Lotnën kakëxa:
—¡Usama ka ꞌën ꞌIbu ka kuat, ax ka ꞌura ꞌikën! 19Mitsun kamina ꞌitsaira ꞌë ꞌakian, usa ꞌixun kamina ꞌë ië́nun ꞌakian, ꞌaínbi kana ꞌëx matán me kamanu kuantima ꞌain, anu kuaniabia tsin bikëx kana ꞌëx bamati ꞌain. 20Ka kuat, ënë ꞌurama ka achúshi ëma chukúma ꞌikën, anu kana abáti ꞌain. ¡Anu ië́ti kuantanun kamina ꞌë ënti ꞌain, ax ka ëma chukúmara asérabi ꞌikën! 21Usaia kia ka a uni achúshinën kakëxa:
—ꞌËn kana minmi ꞌë kakëxun kuan usa ꞌain kana ami ꞌë ñuixunkë ëma chukúma a këñutima ꞌain, 22usa ꞌain kamina ¡Bëríbi ënuax kuanti ꞌain! bënëtishi ka kuantan, mix a ëmanu bëbakëma pain ꞌain kana uisa ñubi ꞌatima ꞌain. Usa ꞌain ka a ëma Sóar kakin anëakëxa.
23Kuankëbë pë́karakëbëa bari urukëbë ka Lot ꞌimainun aín bëchikë xanu akamabë bëbakëxa Sóar kakë ëma chukúmara anu, 24usaía ëmanu bëbakëbëtanshi ka Nukën ꞌIbu tsi ꞌimainun azufre naínua ꞌibúmikin Sodoma ꞌimainun Gomorra kakë ëma a këñuakëxa; 25usakin ꞌakin ka Nukën ꞌIbu Diosan ëmanu tsókë unikama, ꞌimainun kamabi a menu kókë xubi ñu ꞌapákë ëma ꞌurama ꞌikë akamabi këñuakëxa. 26Usai ꞌikëbë kuankinbi kaxú bësukin isíbi ka Lotnën xanu, ax Sodoma ꞌimainun Gomorra isi kuainakëtishi bamai tashi maxáxsa ꞌinun churishi ꞌiruakëxa.
27Usai ꞌiónxa pëkarakëma ꞌaínshi ka Abraham anuaxa Nukën ꞌIbubë banonkë anubi kuantëankëxa; 28kuantankëx nirakëkin ka Abrahamnën Sodoma ꞌimainun Gomorra, kakë ëma aubësukin isakëxa, iskin ka kamabi me kuainakëkë amiaxa naë nënkësa ꞌinun kuin chaiira, chikitia isakëxa. 29Ësokin ka Nukën ꞌIbu Diosan ëma rabë́ anua Lot ꞌikë këñuakëxa, usakin a këñukinbi ka Abrahammi sinánkin aín piaka Lot ashi a ëmanua chikíankëxa.
Moabitaskama ꞌimainun Amonitakaman chaitiokë kama ꞌia ñuikë bana
30Usakian Nukën ꞌIbu Diosan a ëma këñuan ka Lot ꞌitsaira rakuë́ti Sóar kakë ëma anu ꞌisama tankëxa, anu ꞌiti bari ka aín bëchikë xanu rabë́ abëbi kuankëxa kuantakëx ka bashikama anu Lot aín bëchikë xanu rabë́, abë achúshi kini chaiira xubu namësa mëratankëx anu tsóti bërúakëxa. 31Anu ꞌixun ka achúshi nëtën, aín bëchikë apanën sinánkëxa uisax karana tuáñu ꞌiti ꞌai kixun sinánxun ka aín xukë́n ꞌanáka kakëxa:
—Nun papa ka xënira ꞌikën usa ꞌain ka ënë menu uni ꞌaíma ꞌikën an nu rabë́ xanuati ka ꞌaíma ꞌikën, kananuna ꞌunan kamabi menuxun ka unin xanu bixun bëchia; 32usa ꞌain kananuna nu rabëxun nun bata paë xëamixun paëónti ꞌain, usokin ꞌatankëxun kananuna aín bëchikë ꞌitánun tuaxunti ꞌain. 33Usai kitankëxun ka a ñantánbi uvas baka paëokë aín papa xëamixun paëónkëxa; usokin ꞌatankëx ka aín rëkuë́n bëchikë ax pain abë ꞌikin aín nami ꞌamiakëxa, usaía abë ꞌikëxunbi ka aín papan paënxun táma ꞌikën aín rakábukë ꞌimainun aín nirukëbi. 34Usai ꞌiónx pëkarakin ka aín xukë́n apanën, aín ꞌanáka aribi kakëxa:
—Ka kuat, ꞌëx kana nun pabë ënë imë́ ꞌión usa ꞌain kananuna nu rabëtan mixribimi abë ꞌinun ënë ñantan amiribishi paëónti ꞌain; usakin ꞌatankëxun kananuna nu rabëxunbi aín bëchikë ꞌitánun tuaxunti ꞌain. 35Usai kanantankëxun ka a ñantánbi amiribishi uvas baka paëokin ꞌakë aín ꞌanákanën aín papa xëamitankëx, abë ꞌiakëxa; ꞌaínbi ka Lotnën abë ꞌia rakábukë ꞌimainun aín nirukë abi táma ꞌikën. 36Usai ꞌitankëx ka Lotnën bëchikë xanu rabë́ tuuakëxa ax ka aín papanbi ꞌakë ꞌiakëxa. 37Aín bëchikë apan aín tuá ka Moab kakin anëkë ꞌiakëxa ax ka Moab unibunën rara ꞌiakëxa usa ꞌaish ka bëríbi Moabitas unibu aín rëbúnki ꞌikën. 38ꞌImainun ka aín ꞌanákanënribi tuakëxa achúshi okin aín anëx ka Bem-amí kakë ꞌiakëxa ax Bem-amí unibunën rara ꞌiakëxa usa ꞌaish ka bëríbi amonita unibu ax aín rëbúnkibi ꞌikën.
လက္ရွိေရြးခ်ယ္ထားမွု
Génesis 19: cbrPB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 1978, 1995, 2008, 2022 Wycliffe Bible Translators, Inc. All rights reserved.