لوکا 13

دِیگپاگونّے گیودپا چوچیس۔

1می کھاچیگی حضرت عیسیٰ مسیح رومی کالون پیلاطُسی گلِیل پا کھاچیگ بیت المقدِس لا قُربان پھول زانے سادکھانبوے سکورلا شادس۔ 2حضرت عیسیٰ سی کھونگونلا مولس، ”کھیوجاگونّی تے گلِیل پاگونلا تیزوگ ردوگنگال تھونگپا، جان گلِیل پا تشانگمے سانگ مانّگا دِیگپاچان اینڈو سامّا راگا؟ 3نگے کھیوجا زیرّاد، تیبو لدینبا مانوگ، اِین نانگ گیودپا ماچونا، کھیوجاگونّانگ میدکھان چوا زادِین۔ 4یا سِلوامی سیگپا ردیبستے شیکھانّی می چوبگیادپو یروشالیم پا تشانگمیسانگ مانّگا دِیگپاچان اینڈو سامّا راگا؟ 5نگے کھیوجا زیرّاد، تیبو لدینبا مانوگ، اِین نانگ کھیوجے گیودپا ماچونا، کھیوجاگونّانگ میدکھان چوا زادِین۔“

6تینے حضرت عیسیٰ سی ای رومسپو شادّا زادس، ”میجیگی کھورانگی رگونتشاسّی نانّگا پھیگی کھازاسّی لچانگما ژُوگستے، ڈاسبو ژالّا سونگ اِین نانگ ڈاسبو ماتھوب۔ 7کھوے تشاسکھانلا زیرس، ’لو سوم سونگ ای لچانگمے کانے نگا ڈاسبو چیگّانگ ماتھوب۔ چادتے پھانگستونگ، تونمیدلا ناسّا گاگستے بوردوگ‘۔“

8”تشاسکھانّی لانتانگس، سپونبو، تارُونگ لو چیگ بورّا زاد، نگے کییر سکورتے سا سکوستے لود تانگین۔ 9کالتیس ستینگما لو ڈاسبو چھاگسنا گیالّا سونگ، اِین نانگ ماچھاگسنا چادین۔“

حضرت عیسیٰ سی شابّادّی جاگّا پھانچوگا زادس۔

10شابّادّی آرام چوچیسی جاگّا حضرت عیسیٰ مسیح یہُودی پے مجلِس جیگی نانّگا لابجا سال زانے 11بودکھانّی لو چوبگیادنے پھارلا ردود کھونگسچوگکھانّی بوموجیگ یودپین، کھو گورو سونگتے ڈانگپوا لانگس نیانّا میدپین۔ 12حضرت عیسیٰ سی کھو زیگسّاچیگ لدُونلا بودّا زادتے مولس، ”بومو، کھیرانگ ای زومونے تھارین۔“ 13کھونگی کھویکا چھاگ بورّا زادّاچیگ، تینّامالّا کھو ڈانگپوا لانگنیانتے خُدا ستودپا پھولس۔

14اِین نانگ عبادت خانہے اُسکیونگی شابّادّی جاگّا حضرت عیسیٰ سی ناد پھانچوگا زاد پاسانگ، ثو یونگستے میتشوگسلا زیرس، ”جاگ ڈوگ لاس چو چھوگستے اینوگ۔ تینّا جاگ ڈوگی نانّگا نادنے پھانچوگچیسلا یونگ، اِین نانگ شابّادّی جاگّا پھانچوگ مینیان۔“

15مسیح کھوا مولس، ”ریاکاری کھیوجے لانگتو تانگ بونگبو شابّادّی جاگّا ڈیسنے ٹولتے چھو تانّگا کھیرّا میدّا؟ 16تینے بودکھانّی لو چوبگیادنے پھارلا شیطانی لدامستے بورکھانّی حضرت اِبراہیم اولاد ای بوموبو شابّادّی جاگّا تھارچوگ ماگوسّا؟“ 17حضرت عیسیٰ سی تیگون مولّاچیگ، کھونگی ڈاو گون ٹھیلبا سونگ، اِین نانگ میتشوگس گانگپو حضرت عیسیٰ سی زادکھانّی معجزہ چھاگلاس گُون تھونگستے ما تھادپو سونگ۔

نیونگسکارّی سونّی رومس۔

18تینے حضرت عیسیٰ مسیح مولس، ”خُدے گیالثیدپو چی ژوگس اینوگ؟ نگے تیبو چیجیگ نیامپو لدور؟ 19تیبو نی نیونگسکارّی ساون ژوگس اینوگ کا بو میجیگی کھورانگی تشاسّی نانّگا تابّالا کھیرس، تیبو سکیستے لچانگما لدان، یانگ نامکھے چاگونّی تیبوے یالگیکا تشانگس چوس۔“

20حضرت عیسیٰ سی یانگسکیار ٹیا زادس، ”نگے خُدے گیالثیدپو چیجیگ نیامپو لدور؟ 21تیبو سکیور ژوگس این، کا بو بوموے، پھے مانگپوے نانّگا ثیستے روسپا سکیوربو پاگپے گانگپوے نانّگا ڈیس۔“

گیاسگھو ٹاموی رومس۔

22حضرت عیسیٰ مسیح ڈونگکھیر تانگ گامیول گُون گیُودتے یروشالیم چھوگسلا سکیود زانے کھونگی لابجا سالّا زادس۔ 23میجیگی حضرت عیسیٰ سی ٹیس، ”مسیح لے می نیونگونجیگّا مانے تھارپا میتھوبّا؟“

کھونگی لانسالس، 24”گھو ٹامونے جُوگسشیسّی سونڈوس ثانٹے چوس، چیازیرنا نگے کھیوجا زیرّاد، می مانگپوے تینانگنے جُوگسشیسّی سونڈوس چوین، اِین نانگ ژوگس مینیان۔ 25کھانگداگ لانگستے گھو چوگتشارّاچیگ، کھیوجاگون پھیلوگا لوستے گھو ردونگین جوجو، ’مسیح لے نگاجے پھیا گھو پھیازاد‘ زیرین۔ کھوے لانتانگاین، ’نگے کھیوجا شیسّامید یا کھیوجا کانے یونگستے این نگا گیوسمید۔‘ 26تینے کھیوجے زیرین، ’نگاجے نیرانگ نیامپو زوسپین تھونگسپین، نگاجے ڈونگکھیرّی لامگونّیکا نیرانگی لابجا سالّا زادس۔‘ 27اِین نانگ کھوے لانتانگاین، ’نگے کھیوجا شیسّامید یا کھیوجا کانے یونگستے این نگا گیوسمید، لاس نگانپا چوکھانگون نگے کانے تھاگرینّگا سونگ‘۔“

28”حضرت اِبراہیم، حضرت اِضحاقؔ ، حضرت یعقُوبؔ تانگ پیغمبر تشانگما خُدے گیالثیدّی نانّگا یانگ کھیوجاگون پھیلوگا پھانگسکھانبو کھیوجے تھونّگاچیگ، کھیوجا نگوچیس تانگ سو ثیگچیس یونگین۔ 29میگون شار، لو، نوب، چانگنے یونگستے، خُدے گیالثیدّی نانّگا دونتانگی پھیا رانگی ناسّیکا دوگین۔ 30تانتان، ستینگجوگا یودکھانگون گویکا لیباین یانگ گویکا یودکھانگون ستینگجوگا لوسین۔“

حضرت عیسیٰ سی یروشالیم پاگونّیکا تھوگسّکیومو سکیودس۔

31تینّا توسلا فریسی پا کھاچیگ یونگستے کھونّگا زیرس، ”یکانے جان ناسّاجیگّا سکیود چیازیرنا گیالپو ہیرودِیس نیرانگ سادچیسّی سکابس ژالدوگ۔“

32حضرت عیسیٰ مسیح کھونگونلا مولس، ”سونگ یانگ تے واتسیا زیر، ’دیرینگ تانگ تھورے نگے ردودگون پھینگچیس تانگ نادپاگون پھانچوگّاد یانگ جاگ سومپے جاگّا نگا چوا یونگکھانّی لاسپو ڈوبین۔‘ 33نا، دیرینگ، تھورے تانگ نانگس گُون نگے یروشالیمّا چھاچیسّی نگارانگی سفر پو گاگ ماگوس، چیازیرنا تانتان پیغمبر جیگ یروشالیمّی پھیلوگا میساد۔“

34”یروشالیم پا، یروشالیم پا، پیغمبر گون سادکھان یانگ کھیوجیکا لامچوگا زادکھانگونلا ردوا گیابستے سادکھان گُون، چاموے رانگی ٹھوگوگون سکیوبچیسلا شوگپے یوگا کابّا تسوگسلا، نگیانگ کھیوجا لان مانگپو کابچیسّی دودپا چوسپین، اِین نانگ کھیوجے نگا چو ماچوگس۔ 35تا ستوس، کھیوجے بیت المقدِس سی نانّگا ناستے یودکھانبو بینگتے سکیودس۔ نگے کھیوجا لدینبا زیرّاد، کھیوجا نگا یانگسکیار میتُھونگ نامتشوگپا کھیوجے، ’مسیح خُدے وانگچھے نانّگا سکیودکھانبو برکت چان این‘ میزیر۔“ #13‏:35 زابور شوقبُوئ 118‏۔ 26

လက္ရွိေရြးခ်ယ္ထားမွု

لوکا 13: LBJNT

အေရာင္မွတ္ခ်က္

မၽွေဝရန္

ကူးယူ