Jwon 1
1
Findeli Hatus ii Maɗufal
1Tasi bya' a Findel, Findeli ma akul hu DeeƁwe, Findeli a DeeƁwe. 2Tasi bya' ma akul hu DeeƁwe.
3Shak ɗamam ii ta kyel ames si masi, si mas ɗama nin na saa ti shak ɗamam mii kaciwa' yis kwa. 4Ta wii ames a mupwet, mupweti a kweneng i ɗufal. 5Kwenengi ka' ta saa ti maɓing wi, maɓingi ɓin njeng ames kwa.
6Ai maɗufal nin yes ima DeeƁwe rotus, asum ames a Jwon. 7Yes ɓa u lak ɗufal mwawei si kwenengi hai, ɓa ta fo ames ɗufal shak si fa mwawei. 8A Jwon mii kwenengi kwa, yes ɓa u findel si a kwenengi hai je. 9Kweneng mwawei ima ma fati ɗufal shak kweneng, ma yes na naya.
10Ai yis na naya, ahun si mas nayai ta kyel ames, shak ta andi nayai ti shangus kwa. 11Yes kyel ima si mii ames, amesi si nggwetus. 12Shak maɗufal ima matus, fa mwawei si asum ames hai, yis fas mbaitat i mute ii fe i DeeƁwe. 13Fe ima wa' si alus ta fisel i lo' hu masi i maɗufal kwa, a ti masi i DeeƁwe.
14Findeli te ii maɗufal, tena saa kan ti, hya ti maɗesi hu mwawei. Ka ɗing mbaitat ames, mbaitat i Al andek ɗwyat ima yes ta kyel i Dee.
15Jwon findel si yis hai ti la mbai ni, “Ayis ima ai i findel i hai nyai, ‘Ima ma wa yes na takfai yunti ɓinun, ɓurti ai yis na kaciwa' si al lun.’ ”
16Ɓurti hya i maɗesi ames ma giliki shak ma fasikan maɗesi tasi hai i maɗesi. 17DeeƁwe fa anggut ta rai Mosis, mal maɗesi hu mwawei si yes ta kyel i Yeso Kristi. 18Anggi maɗufali tasi hwer ɗing DeeƁwe ya? Al ames andek ɗwyat ima a yis mii DeeƁwe, ma akul hu Deehi, Deehi kof kan ti ɓa ka shangus.
Jwon Findel Si Yeso
19Findel ima Jwon lak mai, myan ima som Ju ta Yerushalima si ro som i kocok hu gung i Livai ɓa si lulus nyai, “A ha aweya?” 20Jwon ɓwinggil kwa, lakus ya ni, “Ayin a Kristi kwa.”
21Unai si lulus si ni, “Ou, a ha aweya? A ha a Iliya haa?”
Unai humustikyel ti findel ni, “Ayin kwa.”
“A ha a mashit ani haa?”
Ni, “Wayou.”
22Unai ta dala si nyus, “A ha aweya? Laka nin ti ɓa ni wa ni lak som ima si ro nin. Ami ha laki si haisa hai ya?”
23Jwon humustikyel ti findel ta ngga' ima mashit Ishaya lakta ni, “Ayin a la malai ta ya, ‘Ɗak hun ti fisel i Deembai ta u wa mangra.’ ”#1:23 Ɗing huni hwak: Ish 40:3.
24Unai shini Farisiyawa, ima si yes ti muroi, 25si lul ta Jwon nyai, “Na a ha ha mii Kristi kwa, na a ha ha mii Iliya kwa, na a ha ha mii mashit ani kwa, ami kin ha masti batisma ya?”
26Jwon humustikyel ti findel ni, “Yin i masu batisma ti ham, ɗeng mana saa yuti ima hu shangus kwa. 27Ayis ma yes na takfai yunti, i ndok ii hwet mwinggi' i kpakasak ames ya kwa.”
28Shak ɗamam mii si fur ta Betani fit i Ɗara i Jodan, kyel ima Jwon mas ɗufal batisma ta.
A Yeso Mii Al Tutwi i DeeƁwe
29Mwen ti ɓu, Jwon ɗing Yeso yis yes kyel ames. Unai ni, “Ɗing hun Al Tutwi i DeeƁwe ima ma wa ha' ti mafwashi i naya ya! 30Ayis ima i laku nyai, ‘Maɗufal ima ma yes na takfai yunti ɓinun, ɓurti ai yis na kaciwa' ti si alun.’ 31Yin ti haisun i shangus kwa, aɗeng ima kin i yes yin masti batisma ti ham ayis nai, ɓa yis u makof wa kyel i Isar'ila.”
32Unai Jwon lak nyai, “I ɗing Rin i DeeƁwe yis muɗor sus hai ta fit fota gurguta, tes hai. 33Ai yin i shangus kwa, a DeeƁwe ima rohun ɓa i mas batisma ti ham, ayis nyun, ‘Maɗufal ima ha ɗing Rin ɗorus hai tes hai, ayis ma wa masti batisma ti Rin masapai.’ 34I ɗingi a yis nai ima laki nyai, maɗufal mai a Al i DeeƁwe.”
Som Koltifai Ti Yeso i Bya'
35Mwen ti hum ɓwai hwak Jwon yis mangra ta kyeli akul hu ɗufal apil ta saa ti fe i ro ames. 36Myan ima Jwon ɗing Yeso yis Musa ta, unai ni, “Ɗing hun Al Tutwi i DeeƁwe!”
37Myan ima apili si hal findel ima Jwon lak, unai si kolfai ti Yeso. 38Yeso hatat tifai ɗingi sin koltifai ames, unai lulus ni, “Ami hu fari ya?”
Unai si nyus, “Rabbi” (nyai makofiti ndai), “Ha mati mute a leya?”
39Unai Yeso nyus, “Yehun, hu ɗingi.” Unai fe i roi si wa si ɗing kyel ima ma mute tai, si te ta kyeli akul mweni. A tasi shitam ɓaras ti ango.
40Andru nusus i Siman Pita, ma andek ta saa ti ɗufal apil ima si kolfai ti Yeso takfai tima si hal findel i Jwon si Yeso hai. 41Ti bya' Andru far nusus Siman, lakus ni, “Ni wis Kristi,” (Kristi ndai). 42Unai kol Siman ta kyel i Yeso.
Unai Yeso ɗingus fo ni, “A ha a Siman al i Jwon. Si wa lai ii Kefas” (Pita ndai, afung ndai).
Yeso lai Filip hu Natanyel
43Mwen ti ɓu, Yeso kin hai ɓa u wa Galili. Unai wis Filip nyus, “Kolafai a suni.”
44Filip a maɗufal i Betsaida, ashwa i hu Andru hu Pita. 45Filip wis Natanyel nyus, “Ni wis maɗufal ima Mosis worong findel si yis hai ta anggut ames, hu ima som i shit si worong ta kaadaha ames, Yeso maɗufal i Nazaret, al i Josep.”
46Unai Natanyel lulus ni, “Ɗama maɗesi ma wa mulangya ta Nazaret haa?”
Filip nyus, “Ya ha ɗingi.”
47Myan ima Yeso ɗing Natanyel yis yes kyel ames, ni, “Ɗing hun maɗufal i Isar'ila i mwawei, ima mati fyarat kwa.”
48Unai Natanyel lul ta Yeso ni, “Ha mas atini ha shangun ya?”
Yeso humuskyel ti findel ta ni, “I ɗinga myan ima ha ɗiri ta gung i makambong kaciwa' Filip tuu laya.”
49Unai Natanyel ni, “Rabbi (makofti shangi ndai), a ha ha mii Al i DeeƁwe, a ha ha mii makai i Isar'ila.”
50Unai Yeso hum laksus ni, “Ha fa mwawei, a ɓurti i laka nyai i ɗinga ta gung i makambong haa? Ha wa ɗing ti ɗamam ima si ɓin mai.” 51Unai Yeso hum laksus ni, “I laksu mwawei, hu wa ɗing ti fit matɓu, som lu' i DeeƁwe sin muɗu muɗor si Al i Maɗufal hai.”
လက္ရွိေရြးခ်ယ္ထားမွု
Jwon 1: AlisIRonNT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© Wycliffe Bible Translators, Inc. and © The Nigeria Bible Translation Trust 2018