Luka 5
5
Yesu a tiya waga lagbe dan
1A fərə Yesu a kangə kwaka gərə Jenisarat,#5.1 Gərə Jenisarat nə kpeyə kwaka mya dɨ wa gərə Galili. ndi ta kəndəshe, ɓwaare a paya a takadən ta kɨl le da Həmɨnpwa. 2Nda naa koombye kpe mye kpaddərən a kwa gəre taa asə a vorsərən, həmi koombingɨn nggɨrə dɨ suɓwa ndwambye darən. 3Yesu a jengə a pɨrə koombote hiɗə, a hɨnggə Siman. Nda nyisə Siman atɨ a nda lyembərə a dɨmdə koombotə a vor haɓye. Nda shea nza vor koombotə ta kənə ɓwaare shee.
4Ite nda byelə a mbəə, nda sa Siman, “Dɨmdə koombotə a vor haɓye a haa kuɓuke, hye vyeddə ndwambe gə hye kasa vaakye.”
5Siman a luwa a san, “Həmɨ-hwoɗye, hin liya kəɗə tuko-tuko, hinaa kɨr asə. Gələ la hye boyo gəngnə hɨn ɓa mɨna vyeddə ndwambe ɓə.”
6Ite ta ɗaasə, təna kər vaakye kɨr-kɨr ɓətɨ ndwambe ɓa sərə. 7Təna maddə kormingrən a waga ji-kəɗəngərən 'ye dɨ kəɗə gyenge gə təna shi asɨ gwadərən, təna shi asɨ naadə koombye ka vaakye ɓətɨ koombye ɓa ɗyemə.
8Naya Siman Bitrus ɓe naa ləngɨn, nda gyerə humwa Yesu a san, “Həmɨmiye, təkəsə ke, hye leyə atɨ hɨn nzə-ɗa səhasə.” 9Gə kala gə Siman ka ji-kəɗəngən ka wule vaaki kɨr-kɨrye təna kəsə, 10yə ji-kəɗəngən, ɓətɨ Yakubu ka Yohana je da Zabadi, a ndələ mgban.
Də Yesu a sa Siman, “Ɓe kala aa gu, gəkɨlə a humwa ɓwaare hye ɓawa nggala aa vaaki.” 11Də təna fwawa koombe darən a nggɨrdərən a kwakatə a nə tiye. Təna ɗaka shingɨn kat a koɗə Yesu.
Yesu a dɨmdə dagde dɨ sɨtɨ ama
(Matta 8.1-4; Markus 1.40-45)
12A fərə Yesu a pɨrə i vɨrati, ama a dagde a kɨɗa sɨsən a shi hakan. Ite nda naa Yesu, nda gyerə a tidə humwasən ta nyisən atɨ, “Həmɨmiye, na hye mwa, hye nee ka gətə hye suɓwagi gə dagdenə.”
13Yesu a ɗifdə tɨfəngɨn a pan, a san atɨ, “Hɨn mwa, zə gi shet-shet.” Də a hangɨn dagde a dɨmgə sɨsən.
14Yesu a fyel-kwakingɨn atɨ, “Ɓe boyə ama alə a nə sa na ɗəw. Zə wudə hye bɨlə kɨsahəme sɨsa, gə nda bɨlə ɓwaare kat təna leyə atɨ dagde dəw mbəə kat. Beetɨ angɨn hye hama ɓətɨ ɓashita Musa a boyo.#5.14 Naasə: Livitikus 14.1-32.”
15Kat ka fyelte Yesu a fyel-kwakingɨn atɨ ɓe ndaa bwe ləngɨn ama kɨlə, le a kwa mbəgə hee kat. Gə ləngɨn ɓwaare hananang a shi gə təna kɨl la Yesu a dɨ boyo, gə nda dɨmərən də ootə. 16Shezə kat ka angɨn Yesu a duwa ɗaka ɓwaare a dɨmə a muɗə a haa dɨsərən gə nda hiwo.
Yesu a gwadə ama ka ootɨ ndongtə
(Matta 9.1-8; Markus 2.1-12)
17A fərə, ite Yesu nee dɨ kəndəshe, Farise ka ji-lee kəndə ɓashita Musa 'ye dɨma dɨ vɨre som-som a vor njiya Galili ka Yawudiya ka Urshelima mgban, a paya a nza haa Yesu a dɨ kəndəshe də. Gəta Həmɨnpwa nee ɓwaa kan gə nda maddə ji-ootə. 18Də imi a nggura ama ka ootɨ ndongtə a nə kpəkləkye, təna ɓərə ɓa pɨrə kan a hwoɗye a haka Yesu. 19Shezə gə fure da ɓwaare, tənaa ɗɨm haa pɨrtə, təna ɓə nggɨrə nə vɨne a wunhaa a jangadə ma ka ootɨ ndongtɨngɨn a waka ɓwaare gbyel a humwa Yesu.
20Ite Yesu ɓe naa mwadiyale darən, nda sa ma ka ootɨ ndongtɨngɨn atɨ, “Ndewe, mye nggurugə səhase dəw.”
21Də Farise a hangɨn ka ji-lee kəndə ɓashita Musa ɓe kɨl la Yesu a boyo, təna ɗyengle ta ɗiyəsə, “Wonə nda ma ka byelə waka, dɨ kɨɗa kwakɨ Həmɨnpwa, nda wonə ɓa ngguro ɓwaara gə səhase a pɨrgə Həmɨnpwa ɓəmbə?”
22Yesu ɓə lee la a hubosərən, gə-angɨn nda ɗiyərən, “Ɓə ya hwuna nza a dɨ ndələ ka ləməngɨn a hubosəwnə? 23Ndoɗinə pupuluki pɨri, mya sa atɨ, ‘Mye nggurugə səhase dəw’ ma? Naasə mgban, mya san atɨ, ‘Maɗi, woyi muɗi’? 24Gə hwuna leyə atɨ Nze da Ɓwaara nee ka gətə nda nggurgə səhase ganə a vor vɨratə.” Yesu a virwo a sa ma ka ootɨ ndongtɨngɨn atɨ, “Hɨnə dɨ səw, maɗi nggur sɨbətɨ dəw, muɗə hwoɗye.” 25Ma ka ootɨ ndongtɨngɨn a maɗə tan-tan a kangəə humwaasərən kat, a nggur sɨbətɨ dan a kɨt tɨfə hwoɗye, ta ɓondi Həmɨnpwa. 26Myee a hangɨn kat a ɗa ndəle təna ndukodə Həmɨnpwa. Kala a gərən, tən ta sa atɨ, “Hin naa səkushipe supo!”
Yesu a wa Levi
(Matta 9.9-13; Markus 2.13-17)
27Beetɨ angɨn Yesu woyo dɨ pɨri, nda naa a nzə-luu taa shemti a mya dɨ wa atɨ Levi#5.27 Kpeyə kwakɨ Levi tɨnə nə Matta. sɨne nza kwaamɨ lyentɨ dan. Nda san atɨ, “Kwaɗe.” 28Levi a ɗaka shee kat a maɗə a koɗən a gəə lagba dan.
29Beetɨ angɨn Levi a ɗa sɨzɨmtə kɨr-kɨr gələ ndi ɓa wa Yesu a zɨm sɨlangsətə a hwodan. Ji-luu taa shemtə hananang ka i tataryi ɓwaare a shi a nza a ɓɨdɨmə a zɨmshe mgban. 30Ite Farise ka i ji-lee kəndə ɓashita Musa 'ye a vorsəngrən ɓe naa ləngɨn, təna nggwonə lagbe da Yesu shee, təna sa, “Gələ mɨnə hwuna dɨ zɨmshe ka ji-luu taa shemtə ka i tataryi ɓwaare?”
31Yesu ɓe kɨl ləngɨn, nda luwa a sarən, “Myee dwat aa dɨ zə haka nzə-ɓwatə, ji-ootə nə ɓəmbə dɨ zə mgba nggume. 32Hɨn taa shi vɨratə gə na waga myee dɨ nggur nəngrən ɓətɨ tən ji-ɗa səfemə, na shi gə ji-ɗa səhase gə təna por-njiya.”
Mya ɗiyə Yesu le a nə nggur gone
(Matta 9.14-17; Markus 2.18-22)
33Imi a nggwonə Yesu shee, tən ta sa atɨ, “Lagbe da Yohana a duwa ɗa hiwtə ka gone, sə mgban lagbe da Farise a dɨ ɗa. Hɨnggə lagbe dəw zɨmshi ka soɓwe ɗəng anəsə.”
34Yesu a sarən, “Ɓə ya omyee shi hwoɗi ləke ɓa mɨna gona? Tənaa dɨ gonə anda ngaja nee nza ɓwaa kaarən. 35Fəre ɓa shi a fəra mya kɨt ngajangɨn də, a fərəngɨn tən ɓa ɗaka zɨmshe a gonə.”
36Nda boyərən byelə səɗe a sarən, “Taa ndəng ama ɓa nggur sɨ baasə hwele a mbaka a nə rukutə iire. Kwaamɨ baasə hwele ɓa nggəl rukutə iirəngɨn a sɨran nda tawo, sɨrtɨngɨn ɓa mɨna hasə. 37Taa ama də mgban ɓa nggur vwo kwata dɨ huba a pukə vor səgi iire, ma kat ɗaasə, vwe ɓa huba a fala səgi iirəngɨn, vwe a kəji njiya.#5.37 Səgye da Yawude i sɨlarə. 38Di mya duwa pukdə vwo kwate a səgi hwele. 39Taa ama də mgban ɓa kɨla vwo kwate a mɨna sop vwa aa huba, ndi ɓa sa atɨ, ‘Vwo kwate nə wula pɨri.’ ”
လက္ရွိေရြးခ်ယ္ထားမွု
Luka 5: bcy
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.