Juan 1
1
Ro Pagpakilaea kay Jesu-Kristo
1Bago pa gintuga ro bisan ano hay una eo't-a ro ginatawag nga ro Mensahi.#1:1 Ro ginapatungdan it “Ro Mensahi” hay si Jesus mismo. Ro tuyo it sangka mensahi hay ro pagpahayag kon ano ro una sa paino-ino it isaeang ka tawo nga gusto nana nga ipaabot sa iba. Ngani paagi eang kay Jesus masayran naton kon ano ro una sa paino-ino it Dyos nga gusto nanang ipaabot katon. Ro Mensahi hay kaibahan eon it Dyos ag ro Mensahi hay Dyos. 2Imaw ro kaibahan 't-a eagi it Dyos bago pa gintuga ro bisan ano. 3Paagi kana hay gintuga it Dyos ro tanan-tanan. Owa gid it bisan ano nga natuga kon bukon it paagi kana. 4Una kana ro minatuod nga kabuhi nga pareho it iwag nga nagahayag sa paino-ino it mga tawo. 5Nagahinayag ro iwag ngaron sa mga tawo nga nagakabuhi nga matsa una sa kadueom, ag ro kadueom ngaron hay indi makaperdi sa iwag ngaron.
6May isaeang ka tawo nga ro ngaean hay si Juan.#1:6 Rayang si Juan hay si Juan nga Manogbawtismo bukon it si Juan nga nagsueat kara. Ginsugo imaw it Dyos 7agod magpamatuod parti sa ginatawag nga Ro Iwag, agod paagi sa anang pagpamatuod hay magatuo sa Iwag ngaron ro tanan nga tawo. 8Bukon imaw it Ro Iwag pero nag-adto imaw iya agod magpamatuod parti sa Iwag ngaron. 9Ro matuod 't-a ngaron nga Iwag hay tag nag-adto riya sa kalibutan, nga nagatao it kahayag sa paino-ino it tanan nga tawo.
10Nag-adto imaw iya sa kalibutan pero owa imaw pagkilan-a it mga tawo iya sa kalibutan, bisan pa nga paagi kana hay gintuga sanda. 11Nag-adto imaw sa ana mismong nasyon pero eaban sa anang mga kasimanwang *Judio hay owa kana nagbaton. 12Pero ro tanan nga nagbaton ag nagtuo kana hay gintaw-an nana it kinamatarong nga mangin unga it Dyos. 13Owa sanda nangin mga unga it Dyos bangod nangin bunga sanda it paghulid it mag-asawa pareho sa kinaandan nga pagkatawo, o bangod sa kagustuhan eang it tawo, kundi paagi sa gahom it Dyos. 14Ro Mensahi hay nagpakatawo ag nag-istar imaw iya sa kalibutan kaibahan namon. Hakita gid namon ro anang eangitnon nga pagkadaeayawon, nga tanda nga imaw ro Owa't Kapareho nga ginpadaea iya it Dyos Ama. Sobra gid ro anang kabuot ag matuod tanan ro anang ginasugid. 15Nagwali si Juan nga Manogbawtismo parti kana. Hambae ni Juan, “Imaw ra ro akong ginapatungdan sa akong ginhambae kinyo nga may maabot masunod kakon nga eabaw pa kakon, tungod una eon imaw bago pa ako natawo.” 16Dahil sa anang sobrang kabuot hay ana permi nga ginapakamaayo it bugana kita tanan nga nagatuo kana. 17Gintao it Dyos ro *Kasuguan paagi kay Moises pero paagi't-a kay Jesu-Kristo ginpakita it Dyos ro anang sobrang kabuot, ag ginpahayag ro kamatuuran parti sa kaeuwasan it tawo. 18Owa gid it tawo nga nakakita sa Dyos mismo. Pero may nagpaathag sa mga tawo parti kana. Ruyon hay ro Owa't Kapareho nga Unga it Dyos, imaw nga may maeueot gid nga kaangtanan sa Dyos nga anang Ama.
Ginpaathag ni Juan nga Manogbawtismo nga Bukon it Imaw ro Maneueuwas
(Mat 3:3, 11-12; Mar 1:2-3; Luc 3:4, 16)
19-20Kaisaea kato hay may mga *saserdote ag mga Levita#1:19-20 Ro mga Levita hay mga inapo ni Levi nga ro andang trabaho hay nagabulig sa mga saserdote (basaha sa Num 3:6). nga ginsugo ku mga manogdumaea it mga Judio sa Jerusalem nga mag-adto kay Juan nga Manogbawtismo ag magpangutana kon sin-o gid-a matuod imaw. Ginsabat sanda ni Juan it diritso ag owa imaw it gintago kanda. Rondaya ro anang sabat kanda, “Bukon it ako ro Maneueuwas nga ginpromisa it Dyos.”
21Nagsabat sanda, “Hay sin-o ka't-ing? Si Propeta Elias ka baea nga nagbalik?”
Nagsabat si Juan, “Bukon a.”
“Ro Propeta ka baea nga ginpromisa it Dyos?”#1:21 Deut 18:15. pangutana eon man nanda.
“Bukon man,” sabat ni Juan.
22Pinangutana pa gid nanda imaw, “Sugiri kami kon sin-o ka gid agod may isugid man kami sa mga nagpaadto kamon iya. Sin-o ka sinimo?”
23Nagsabat si Juan, “Ako ro katumanan ku ginsueat ni Propeta Isaias nga may tawo nga magasinggit idto sa *disyerto, ‘Patadlunga ro aeagyan it Ginuo.’ ”#1:23 Isa 40:3. Ro pagwali ni Juan sa *disyerto ro magapahaom sa mga tawo sa pag-abot it Ginuo.
24Sa mga nagapangutana ngato hay may mga *Pariseo. 25Pinangutana eon man nanda si Juan, “Hay ano ro imong otoridad nga magpangbawtismo kon bukon man gali it ikaw ro Maneueuwas nga ginpromisa it Dyos, bukon ka man it si Elias, ag bukon ka man it Propeta ngato nga ginpromisa it Dyos?”
26Ginsabat sanda ni Juan, “Nagapangbawtismo ako it tubi, pero may iya eon makaron nga kaibahan ninyo nga owa pa ninyo hikilan-i. 27Imaw ro maabot masunod kakon nga mas eabaw pa kakon nga bisan gahubad eon lang ku higot it anang sandalyas hay bukon ako it takos.” 28Idto ra tanan natabo sa banwa it Betania nga idto sa tabok ku suba it Jordan, kon siin nagapangbawtismo si Juan.
Si Jesus hay Pareho it Tiyo it Karnero nga Pangsakripisyo Para sa Kasae-anan it Katawhan
29Pagkamasunod nga adlaw, hakita ni Juan si Jesus nga nagapaeangop kana. Naghambae si Juan, “Tan-awa ninyo. Haron ro *Tiyo it Karnero nga gintao it Dyos bilang pangsakripisyo agod hipatawad ro kasae-anan it katawhan! 30Imaw ra ro akong ginapatungdan sa akong ginhambae kinyo nga may maabot masunod kakon nga eabaw pa kakon, tungod una eon imaw bago pa ako natawo. 31Bisan ngani ako hay owa kato kasayod nga imaw gali ro ginpromisa it Dyos, pero nagapangbawtismo ako it tubi agod makilaea imaw ku mga inapo ni *Israel kon sin-o gid imaw.”
32-33Ginsugid dayon ni Juan ro anang nasaksihan. Hambae nana, “Kato, owa ko man masayri nga imaw gali ro ginpromisa it Dyos. Pero ro Dyos nga nagsugo kakon nga magpangbawtismo it tubi hay imaw man ro naghambae kakon, ‘Kon kanyo mo makita ro Espirito Santo nga magapanaog ag magapabilin hay ruyon ro magapangbawtismo it Espirito Santo sa mga tawo.’ Ag nakita ko gid ro Espirito Santo nga nagpanaog halin sa eangit nga kahitsura it salampati ag nagpabilin kana. 34Nakita ko gid ron ngani ginahambae ko kinyo nga imaw matuod ro Unga it Dyos.”
Ro Haunang mga Sumueunod ni Jesus
35Pagkamasunod nga adlaw, idto eon man si Juan sa pangpang it Jordan, kaibahan ro daywa ku anang mga sumueunod.#1:35 Sambilog sa daywa ngato nga ka sumueunod hay si Andres (basaha sa bersikulo 40). Abo nga mangin-aeamon sa Bibliya nga nagapati nga ro sambilog hay si Juan nga nagsueat ku libro ngara. 36Nakita nana si Jesus nga nagaagi ag gintinueok ra nana.
Naghambae dayon si Juan, “Tan-awa tuo ninyo. Haron ro *Tiyo it Karnero nga gintao it Dyos bilang pangsakripisyo!” 37Pagkabati ku daywa ngato nga ka sumueunod ku ginhambae ni Juan hay sinunod nanda kara si Jesus. 38Naglingot si Jesus ag nakita nana nga nagasunod kana ro daywa. Ginpangutana nana sanda, “Ano kunta?”
Nagsabat sanda nga daywa, “Rabbi, siin ka gatenir?” (Ro kahueugan it “rabbi” hay “maestro.”)
39“Mus agod hikita ninyo kon siin,” sabat ni Jesus. Ngani nagmunot sanda kana ag nakita nanda kon siin imaw gatenir. Mga ika-10 nga oras eon rato#1:39 Sa mga Judio raya hay alas 4 it hapon dahil gaumpisa sanda it paghuyap sa alas 6 it agahon. Pero kon sa mga Romano, raya hay alas 10 it agahon dahil gaumpisa sanda it paghuyap sa tungang gabii. Basaha ro “Paathag kon paalin ro paghuyap ni Juan it oras sa rayang anang ginsueat” sa “Mga Mapinuslanon nga mga Pamisaea” sa printi it rayang sueat. ag nag-iba sanda kana ku adlaw ngaron hasta nahapon.
Si Pedro ag si Andres hay nangin Sumueunod ni Jesus
40Ro sambilog sa daywa ngato nga nakabati sa ginhambae ni Juan ag nagmunot kay Jesus hay si Andres nga igmanghod ni Simon Pedro. 41Ro una nanang gin-obra hay gin-usoy na ro ana mismong igmanghod nga si Simon agod sugiran. Pagkita nanda, hambae ni Andres, “Nakita eon namon ro Mesias” (nga nagakahueugan nga “Kristo,” ro Maneueuwas nga Ginpromisa it Dyos). 42Gindaea dayon ni Andres si Simon idto kay Jesus. Gintueok ni Jesus si Simon ag ginhambae, “Ikaw si Simon nga unga ni Juan. Pero umpisa makaron, si Cefas eon ro imong ngaean.” (Ro ngaean nga Cefas hay sa linggwahe it mga Judio, ag ro Pedro hay sa Griniyego, ag pareho ra nga nagakahueugan nga “bato.”)
Si Felipe ag si Nataniel hay Nangin Sumueunod ni Jesus
43Pagkamasunod nga adlaw, nagdesisyon si Jesus nga maadto sa probinsya it Galilea. Ku ulihi, hakita nana si Felipe ag ginhambae nana ra, “Mus, sunod kakon bilang akong sumueunod.” 44Si Felipe ngara hay tagaBetsaida sa Galilea, pareho nanday Andres ag Pedro. 45Gin-usoy man dayon ni Felipe si Nataniel. Pagkakita nana kay Nataniel, ginhambae ra nana, “Nakit-an eon namon ro ginapatungdan ni Moises sa Kasuguan ag ku mga propeta sa andang ginsueat. Imaw ra hay si Jesus nga tagaNazaret nga unga ni Jose.”#1:45 Si Jose hay bukon it matuod nga ama ni Jesus pero imaw ro nagtindog bilang anang ama. Basaha sa Mat 1:18-25.
46Nagsabat si Nataniel, “TagaNazaret? May mapinuslanon gid baea nga matabo dahil sa sangka tagaNazaret?” “Musyon tuo, agod hipamatud-an mo,” sabat ni Felipe.
47Nakita ni Jesus nga nagapaeangop kana si Nataniel. Tag maeapit eon ra kana, naghambae si Jesus, “Hara't-a ro nagpanubli ku batasan ku anang lolo nga si Israel. Owa gapangluko.”#1:47 Ro Jacob ro hauna nga ngaean ni Israel. Ro kahueugan it Jacob hay “manogluko” sa andang linggwahe. Pero ginbag-o it Dyos ro anang kinaiya ag gintaw-an imaw it bag-o nga ngaean nga Israel (basaha sa Gen 32:27-31).
48Ginpangutana imaw ni Nataniel, “Ham-an it kilaea mo't-a ako?”
Nagsabat si Jesus, “Nakita ko eon ikaw sa idaeom it puno it higera bago ka pa ginsueang ni Felipe.”
49Naghambae si Nataniel, “*Rabbi, Unga ka gid matuod it Dyos. Ikaw eon gid-a ro among ginahueat nga hari ku mga inapo ni Israel.”
50Nagsabat si Jesus, “Gatuo ka baea kakon ay naghambae ako nga nakita ta eo't-ing sa puno it higera? Pero sobra pa't-a kara ro imong hikita nga mga makangawa-ngawang mga butang. 51Matuod gid ro akong ginahambae kinyo nga makita ninyo nga magabukas ro eangit ag makita ninyo ro mga anghel it Dyos nga nagasaka-panaog paadto kakon nga *Unga it Tawo.”#1:51 Basaha sa Gen 28:10-15. Ro ginpromisa it Dyos kay Jacob tag anang ginpadamgo si Jacob hay ginatuman ni Jesus tungod paagi kana hay mapakamaayo it Dyos it kaeuwasan ro mga tawo sa bilog nga kalibutan.
လက္ရွိေရြးခ်ယ္ထားမွု
Juan 1: akl
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
2024 (Active) Wycliffe Bible Translators, Inc.