Génesis 2
2
1Naskadu Diospa bai yawi dai naatiiwi awarawu udiwakĩ adaitidi. 2Seis peda yuduta ma peda siete ikadu Epa Diospa tededi. 3Naa pedata yurawawe tedekata idibapakexanuwu. Awarawu udiwakĩ taewayabea naa pedatamai keyuxu. 4Ikũkui Epa Dios udiwadi dai yawi bai.
Dukuwede Adán bae Edén adu idi
Naskadu Epa Diospa bai yawi dai udiwakĩ adaitidi.
5Dai yawi bai udiwaitadu adu diiwu wasiwu exeyawu idiba. Epa Diospa adu ui ibayuabadu. Adu dukuwede idiba yudupana. 6Naskawia bai meraduax ede tsekeiniwuwadi na baitiixu bechananu. 7Epa Diospa bai yura wata dukuwede udiwadi. Naskawata awẽ rechukuki xuũ adi. Dukuwede xakaita widinakawãdi.
8Na wari uwaikiri bai Edén adu nadu Diaiwu Diospa awẽ wadawu idi. Naskata na wai adu Diospa da dukuwede udiwaa nadu ibadi. 9Naduxu Diaiwu Diospa dii wetsa keskarawu wuaibadi na iwiwu sharakuiwu idi. Awẽ wibiwu pitirupinishara naa wai babaki nexpakaya iwi rawe diawu idi. Wibi wetsa piax nu ipatiru. Wetsauxũ chaka tapita shara tapitiru idi. 10Naa bai Edén aduax ede tsekepaudi. Ene bai bechanawapaudi naa ede axka awẽ tuaika cuatro idi. 11Axka ewapa awẽ ade Pisón. Naa bai Havilátiixu chiti chiti ika. Havilá adu nadu oro idi. 12Naa bai adu oro sharakui idi. Naduriwi iwi awẽ ede ini sharakui. Naduri ruwe ónice. 13Awẽ axka wetsa Guihón. Naũ bai Cus ari kaa Custiixu chiti chiti ika. 14Axka wetsa Tigris. Na bai Asiria wari uwaikiri idi. Wetsa axka awẽ ade Éufrates idi.
15Epa Diospa awẽ wai Edén nadu dukuwede ibadi naduxu yuduta kexenu. 16Naskata Diospa dukuwede yuidi: “Da wai adua iwiwu atũ wibiwu mi pitiru. 17Diiwu mera dia iwi awẽ wibi ma pitiruba. Nauxũ chaka tapita shara mi tapitiru. Awẽ wibi piyabawe. Piax mi datiruki”, Epa Diospa Adán wadi.
18Epa Dios iskadi: “Dukuwede ares itiruba. Ẽ watura wetsa udiwanu aweta yudubis inu. Na aweta yudubis shara iki”, idi.
19Yuina wetsa keskarawu peiya wetsa keskarawu udiwaawu naawu Epa Diospa bai udiwaxu dukuwedeki wedi. “Atu adepakenu”, ixu nawu aki ewedi. Naskadu dukuwene yuina wetsa keskarawu peiyawu naawu wisti rasi awara ade adea naa awẽ ade ipaxanu. 20Naskaxu dukuwene yuina idawanabetiruwu peiyawu dii mera yuinawu atu adedi naatiiwi. Naskaweke yuinawu meradua tsua wichidiba Adánwe rawenu.
Naskawata dukuwene awẽ shina meraxu shinadi: “Eweta yudubis ẽ wichiyuaba”, idi. 21Naskake Epa Diospa dukuwede uxabakuixu awẽ pishi wisti tsekaxu awiana na ika keskara wadi. 22Naskata naa pishi xaũ Epa Diospa awĩwu udiwadi. Naa awĩwu dukuwedeki ewedi.
23Naskaidu awĩwu uĩta dukuwede ares wisti iskadi: “Da ewẽ dabikui ewẽ pishiri. Naskake ẽ adei awĩwu, ẽ wai dukuwede uduamai ewẽ pishi wita Epa Diospa udiwaa”, Adán idi.
24Naskadike na nu ibis keskara iskapakedaka. Dukuwede awĩwuwe wianaxikĩ apaduax awaduaxri paxkatiru. Awĩwe wianakadax na rawe yura wisti keskara itiruwu.
25Na dukuwede Diospa udiwadi dukuwene awẽ awĩri chituria ipaudiwu. Naskawikadax rawĩpaipaudiwuba.
လက္ရွိေရြးခ်ယ္ထားမွု
Génesis 2: mtsB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ